Go na content

Go na a tra menu

Go na table of contents

Yehovah Kotoigi

Sranantongo

Gado abi bun nyunsu gi wi!

 LES 9

San yu osofamiri kan du fu de koloku?

San yu osofamiri kan du fu de koloku?

1. Fu san ede wan man nanga wan uma musu trow fu man de koloku leki osofamiri?

A bun nyunsu e komoto fu Yehovah, a koloku Gado, di wani taki osofamiri de koloku (1 Timoteyus 1:11). Na en seti a trowlibi. Te wan man nanga wan uma trow na lanti, dan den nanga den pikin fu den o firi koloku. Kresten musu trow na lanti èn na so den e sori lespeki gi den wèt fu a kondre.Leisi Lukas 2:1, 4, 5.

Fa Gado e si a trowlibi? A wani taki wan man nanga wan uma tan na makandra fu ala ten. Yehovah no wani taki masra nanga wefi e bedrigi makandra (Hebrewsma 13:4). Brokotrow na wan tegu sani gi en (Maleaki 2:16). Ma a e gi pasi taki Kresten e broko trow èn e trow baka te a patna fu den du sutadu.Leisi Mateyus 19:3-6, 9.

2. Fa masra nanga wefi musu libi nanga makandra?

Yehovah ben meki man nanga uma fu horibaka gi makandra so taki a trowlibi waka bun (Genesis 2:18). Leki osofamiri edeman, wan masra abi a frantwortu fu sorgu gi en osofamiri èn fu gi den leri fu Gado. A musu sori trutru lobi gi en wefi sondro fu denki ensrefi nomo. Masra nanga wefi musu sori lobi nanga lespeki gi makandra. Fu di ala masra nanga wefi na sondu sma, meki den musu leri fu gi makandra pardon fu kan abi wan koloku trowlibi.Leisi Efeisesma 4:31, 32; 5:22-25, 33; 1 Petrus 3:7.

3. Yu musu gowe libi yu trowpatna te yu no de koloku?

Efu yu abi problema na ini yu trowlibi, dan yu nanga yu patna musu du muiti fu sori lobi gi makandra (1 Korentesma 13:4, 5). Gado Wortu no e gi sma deki-ati fu prati,  soso fu di den abi problema di sma gwenti kisi na ini a trowlibi.Leisi 1 Korentesma 7:10-13.

4. Un pikin, san Gado wani gi unu?

Yehovah wani taki unu de koloku. A e gi unu a moro bun rai fa fu nyan bun fu den yongu yari fu unu. A wani taki unu kisi wini fu a koni nanga na ondrofeni fu un papa nanga mama (Kolosesma 3:20). Yehovah wani tu taki unu e prisiri fu du sani gi un Mekiman nanga en Manpikin.Leisi Preikiman 11:9–12:1; Mateyus 19:13-15; 21:15, 16.

5. Papa nanga mama, fa unu kan yepi un pikin fu de koloku?

Un musu wroko tranga fu gi un pikin nyan, wan presi fu tan, nanga krosi fu weri (1 Timoteyus 5:8). Ma efu unu wani taki den pikin fu unu de koloku, dan un musu leri den tu fu lobi Gado èn fu teki leri fu en (Efeisesma 6:4). Te un pikin e si fa unu e sori lobi gi Gado, dan dati kan abi bigi krakti na den tapu. Te unu e leri den pikin fu unu sani di e kruderi nanga Gado Wortu, dan dati kan yepi den fu si sani na a yoisti fasi.Leisi Deuteronomium 6:4-7; Odo 22:6.

Pikin e kisi wini te unu e gi den deki-ati èn te unu e prèise den. Den musu kisi piri-ai nanga trangaleri tu. A leri dati e yepi den fu no tyari densrefi na wan fasi di o meki taki den no de koloku (Odo 22:15). Ma noiti un musu strafu den na wan ogri-ati fasi.Leisi Kolosesma 3:21.

Yehovah Kotoigi e tyari difrenti buku kon na doro di skrifi spesrutu fu yepi papa, mama, nanga pikin. Den tori na ini den buku disi abi fu du nanga Bijbel.Leisi Psalm 19:7, 11.

 

Kon sabi moro

YU KAN ABI WAN KOLOKU OSOFAMIRI

Meki Gado yepi yu fu abi wan koloku trowlibi

Tu aksi kan yepi yu fu abi wan moro bun trowlibi.

YU KAN ABI WAN KOLOKU OSOFAMIRI

Fa fu lusu problema

Te yu e du sani na a yoisti fasi, dan yu kan abi wan koloku trowlibi na presi fu wan trowlibi di no e waka bun.