Go na content

Go na a tra menu

Go na table of contents

Yehovah Kotoigi

Sranantongo

Gado abi bun nyunsu gi wi!

 LES 7

San na Gado Kownukondre?

San na Gado Kownukondre?

1. San na Gado Kownukondre?

Fu san ede Yesus na a moro bun Kownu?MARKUS 1:40-42.

A Kownukondre fu Gado na wan tirimakti na hemel. A o kon na ini a presi fu ala tra tirimakti èn a o meki taki a wani fu Gado pasa na hemel èn na grontapu. A nyunsu fu Gado Kownukondre na bun nyunsu. Heri esi, Gado Kownukondre o tyari a bun tirimakti kon di libisma abi fanowdu. A o tyari wánfasi kon na mindri ala sma di e libi na grontapu.Leisi Danièl 2:44; Mateyus 6:9, 10; 24:14.

Wan kownukondre musu abi wan kownu. Yehovah ben poti en Manpikin, Yesus Krestes, leki Kownu fu a Kownukondre fu En.Leisi Openbaring 11:15.

2. Fu san ede Yesus na a moro bun Kownu?

Gado Manpikin na a moro bun Kownu di Gado ben kan poti, fu di a abi switifasi èn fu di a e hori ensrefi na san reti (Yohanes 1:14). Boiti dati, a abi a makti fu yepi sma, fu di a o tiri grontapu komoto fu hemel. Baka di a kisi wan opobaka, a opo go na hemel èn a sidon wakti na Yehovah en reti-anu sei (Hebrewsma 10:12, 13). Te fu kaba, Gado gi en a makti fu bigin tiri.Leisi Danièl 7:13, 14.

3. Suma o tiri makandra nanga Yesus?

Wan grupu di Bijbel e kari „den santawan”, o tiri makandra nanga Yesus na ini hemel (Danièl 7:27). Den fosi santawan di Gado teki ben de den apostel fu Yesus di ben e gi yesi na en. Teleki now, Yehovah e teki reti-ati man nanga uma leki santawan. Neleki Yesus, den e kisi wan opobaka leki yeye.Leisi Yohanes 14:1-3; 1 Korentesma 15:42-44.

 Omeni sma e go na hemel? Yesus kari den sma disi wan „pikin ipi” (Lukas 12:32). Te fu kaba dati sa de 144.000 sma. Den o tiri grontapu makandra nanga Yesus.Leisi Openbaring 14:1.

4. San pasa di Yesus bigin tiri?

Gado Kownukondre bigin tiri na ini 1914. * A fosi sani di Yesus du leki Kownu, na taki a fringi Satan nanga den ogri yeye fu en kon na grontapu. Satan kisi bigi atibron èn a bigin tyari problema kon na heri grontapu (Openbaring 12:7-10, 12). Sensi a ten dati, moro nanga moro tesi e miti libisma. Feti, angriten, siki, nanga gronseki, abi fu du nanga wan „marki” di e sori taki heri esi a Kownukondre o bigin tiri na heri grontapu.Leisi Lukas 21:7, 10, 11, 31.

5. San Gado Kownukondre e du?

Nanga yepi fu wan preikiwroko di e du na heri grontapu, Gado Kownukondre e tyari wan bigi ipi sma fu ala kondre kon na wán nownow kaba. Milyunmilyun safri-ati sma o teki Yesus leki tiriman. Gado Kownukondre o kibri den sma dati te a o pori na ogri grontapu disi. Sobun, ala sma di wani kisi wini fu Gado Kownukondre, musu leri fu saka densrefi na ondro a tiri fu Yesus.Leisi Openbaring 7:9, 14, 16, 17.

Na ini wan pisi ten fu 1000 yari, a Kownukondre o du san Gado ben abi na prakseri gi libisma na a bigin. Heri grontapu o tron wan paradijs. Te fu kaba, Yesus o gi a Kownukondre baka na en Tata (1 Korentesma 15:24-26). Yu sabi wan sma di yu ben o wani fruteri fu Gado Kownukondre?Leisi Psalm 37:10, 11, 29.

 

^ paragraaf 6 Efu yu wani sabi moro krin fa Bijbel profeititori ben sori go na a yari 1914, dan luku bladzijde 217-220 fu a buku San Bijbel kan leri wi?