Go na content

Go na a tra menu

Go na table of contents

Yehovah Kotoigi

Sranantongo

Gado abi bun nyunsu gi wi!

 LES 1

San na a bun nyunsu?

San na a bun nyunsu?

1. San na a nyunsu di Gado abi gi yu?

Gado wani taki sma nyan bun fu a libi na grontapu. A meki grontapu èn den sani di de na tapu, fu di a lobi libisma. Heri esi, a o meki taki sma na ini ala kondre abi wan moro bun tamara. A o frulusu libisma fu ala den sani di e meki taki pina de.Leisi Yeremia 29:11.

Nowan tirimakti ben man puru ogridu, siki, noso dede. Ma bun nyunsu de. Heri esi, Gado o poti en eigi tirimakti na ini a presi fu ala libisma tirimakti. Den sma na grontapu o libi na ini freide èn den o de gosontu.Leisi Yesaya 25:8; 33:24; Danièl 2:44.

2. Fu san ede a prenspari taki sma yere a bun nyunsu?

A pina di sma e pina o kon na wan kaba soso te Gado puru ogri sma na grontapu (Sefanya 2:3). O ten dati o pasa? Gado Wortu ben taki fu den takru sani di ben o miti libisma. Den sani di e pasa now e sori taki heri esi Gado o du wan sani.Leisi 2 Timoteyus 3:1-5.

3. San wi musu du?

Wi musu kon leri sabi Gado nanga yepi fu en Wortu, Bijbel. A buku disi de leki wan brifi di wan lobi-ati papa seni gi wi. A e taigi wi fa fu kon abi wan moro betre libi now èn fa fu kisi têgo libi na grontapu na ini a ten di e kon. A kan taki son sma no o lobi en taki yu e kisi yepi fu kon frustan Bijbel. Ma wi no musu meki tra sma tapu wi fu kon sabi moro fu a bun tamara di Gado pramisi wi.Leisi Odo 29:25; Openbaring 14:6, 7.