Go na content

Go na a tra menu

Go na table of contents

Yehovah Kotoigi

Sranantongo

Gado abi bun nyunsu gi wi!

 LES 12

Fa yu kan kon krosibei na Gado?

Fa yu kan kon krosibei na Gado?

1. Gado e arki ala begi?

Gado e gi ala sortu sma a kari fu kon krosibei na en nanga yepi fu begi (Psalm 65:2). Ma a no e arki ala begi. Fu eksempre, te wan man no e libi bun nanga en wefi, dan dati kan tapu pasi gi den begi fu en (1 Petrus 3:7). Na dati ben pasa nanga den Israelsma. Te den ben e tan du ogri, dan Gado ben e weigri fu arki den begi fu den. A de krin taki a de wan grani fu begi Gado. Toku Gado de klariklari fu arki den begi fu sma di sori berow, awinsi den du bigi sondu.Leisi Yesaya 1:15; 55:7.

2. Fa wi musu begi?

Begi abi fu du nanga na anbegi fu wi. Fu dati ede wi musu begi wi Mekiman, Yehovah, wawan (Mateyus 4:10; 6:9). Wi no musu frigiti tu taki wi na sondu sma. Dati meki wi musu begi na ini a nen fu Yesus, fu di a dede gi den sondu fu wi (Yohanes 14:6). Te wi e begi, dan Yehovah no feni en bun taki wi e taki sani di wi leri na ede, noso sani di skrifi na tapu papira. A wani taki wi begi komoto fu wi ati.Leisi Mateyus 6:7; Filipisma 4:6, 7.

Wi Mekiman man yere srefi te wi e begi na ini wi ati (1 Samuel 1:12, 13). A e gi wi a kari fu begi na ibri okasi, soleki na a bigin èn na a kaba fu a dei, te wi o nyan, èn te wi abi problema.Leisi Psalm 55:22; Mateyus 15:36.

3. Fu san ede Kresten e hori konmakandra?

A no makriki fu kon krosibei na Gado, fu di wi e libi na mindri sma di no e bribi na ini Gado. Den e spotu nanga a pramisi fu Gado taki freide o de na grontapu (2 Timoteyus 3:1, 4; 2 Petrus 3:3, 13). Fu dati ede wi musu kon makandra  nanga wi Kresten brada nanga sisa, so taki wi kan gi makandra deki-ati.Leisi Hebrewsma 10:24, 25.

Te wi abi demakandra nanga sma di lobi Gado, dan dati e yepi wi fu kon krosibei na En. Den konmakandra fu Yehovah Kotoigi na moi okasi fu kisi wini fu a bribi fu trawan.Leisi Romesma 1:11, 12.

4. Fa yu kan kon krosibei na Gado?

Yu kan kon krosibei na Yehovah te yu e denki dipi fu den sani di yu leri na ini a Wortu fu en. Denki dipi fu den sani di a du, fu den rai di a e gi, èn fu den sani di a pramisi. Te wi e begi Gado èn e denki dipi fu den sani disi, dan dati o yepi wi fu kisi warderi gi a lobi nanga a koni fu En.Leisi Yosua 1:8; Psalm 1:1-3.

Yu kan kon krosibei na Gado soso te yu e frutrow na en tapu èn te yu e bribi na ini en. Ma bribi de leki wan libi sani di yu musu sorgu bun so taki a kan gro bun. Sobun, fu sorgu taki a bribi fu yu e tan gro, dan yu musu denki dipi doronomo fu den sani di yu leri.Leisi Mateyus 4:4; Hebrewsma 11:1, 6.

5. Sortu wini yu o kisi te yu e kon krosibei na Gado?

Yehovah e broko en ede nanga den sma di lobi en. A kan kibri den gi iniwan sani di kan meki a bribi fu den kon swaki èn di kan meki den lasi a howpu di den abi fu kisi têgo libi (Psalm 91:1, 2, 7-10). A e warskow wi gi wan fasi fu libi di kan meki wi kon siki èn di kan tapu pasi gi wi fu de koloku. Yehovah e leri wi san na a moro bun fasi fu libi.Leisi Psalm 73:27, 28; Yakobus 4:4, 8.

 

Kon sabi moro

FA WI E STUDERI BIJBEL NANGA SMA

Fu san ede wi musu studeri Bijbel?

Na heri grontapu, milyunmilyun sma e feni piki tapu prenspari aksi fu a libi, na ini Bijbel. Yu wani de wan fu den tu?

San Bijbel e leri wi trutru?

Kon krosibei na Gado nanga yepi fu begi