Go na content

Go na a tra menu

Go na table of contents

Yehovah Kotoigi

Sranantongo

Gado abi bun nyunsu gi wi!

 LES 8

Fu san ede Gado e gi pasi taki ogri de èn taki sma e pina?

Fu san ede Gado e gi pasi taki ogri de èn taki sma e pina?

1. Fa ogri bigin?

Gado gi pasi taki libisma tiri densrefi langa nofo, fu sori taki den no man lusu den problema fu den

Di Satan fruteri a fosi lei, dan ogri bigin na grontapu. Na a bigin, Satan ben de wan engel di no ben abi fowtu, ma „a drai baka gi san tru” (Yohanes 8:44). Safrisafri a bigin angri fu kisi na anbegi di Gado wawan abi reti na tapu. Satan fruteri Eva, a fosi uma, wan lei èn a kori en fu gi yesi na en na presi fu Gado. Neleki Eva, Adam trangayesi Gado tu. A bosroiti fu Adam tyari pina nanga dede kon.Leisi Genesis 3:1-6, 19.

Di Satan kori Eva fu trangayesi Gado, dan na so a bigin meki sma opo densrefi teige Gado di abi a reti fu tiri èn di de a Moro Heiwan. Bun furu sma teki a sei fu Satan èn den weigri fu teki Gado leki a Tiriman fu den. Na so Satan kon tron „a tiriman fu grontapu”.Leisi Yohanes 14:30; 1 Yohanes 5:19.

2. Gado ben meki sani di no bun?

Ala sani di Gado meki bun dorodoro. Den libisma nanga den engel di Gado ben meki, ben man gi yesi na Gado dorodoro (Deuteronomium 32:4, 5). Gado gi wi na okasi fu bosroiti efu wi o du bun noso ogri. Na so wi kan sori taki wi lobi Gado.Leisi Yakobus 1:13-15; 1 Yohanes 5:3.

3. Fu san ede Gado e gi pasi taki sma e pina te now ete?

Sensi a ten fu Eden te nanga now, Yehovah gi pasi taki sma opo densrefi teige a tiri fu en. Fu san ede? Fu sori taki sani no o waka bun te libisma wani tiri sondro en (Preikiman 7:29; 8:9). Baka 6000 yari, den buweisi e sori taki a sani dati tru. Libisma tiriman no ben  man tyari wan kaba kon na feti, ogridu, kruktudu nanga siki.Leisi Yeremia 10:23; Romesma 9:17.

Tra fasi leki libisma tirimakti, a tirimakti fu Gado e tyari wini kon gi den wan di e saka densrefi na en ondro (Yesaya 48:17, 18). Heri esi, Yehovah o tyari wan kaba kon na ala libisma tirimakti. Soso den sma di e saka densrefi na ondro a tiri fu Gado, o libi na grontapu.Yesaya 11:9.Leisi Danièl 2:44.

4. Sortu okasi sma e kisi fu di Gado abi pasensi?

Satan taki dati libisma e dini Gado fu di den e suku den eigi bun. Yu wani sori taki a sani dati no tru? We, fu di Gado abi pasensi, meki wi alamala abi na okasi fu sori efu wi wani taki Gado e tiri wi, na presi fu libisma. A fasi fa wi e libi e sori suma wi wani leki tiriman.Leisi Yob 1:8-12; Odo 27:11.

5. Fa wi kan sori taki wi teki Gado leki Tiriman?

A bosroiti di wi e teki e sori efu wi wani abi Gado leki wi Tiriman

Wi e sori taki wi teki Gado leki Tiriman te wi e anbegi en na a yoisti fasi soleki fa en Wortu, Bijbel e taki (Yohanes 4:23). Te wi e weigri fu teki Satan leki wi tiriman, dan neleki Yesus, wi no o teki prati na politiek èn na feti.Leisi Yohanes 17:14.

Satan e gebroiki en makti fu gi sma deki-ati fu du hurudu nanga tra sani di no bun kwetikweti. Te wi e weigri fu du den sortu sani dati, dan kande son mati nanga famiriman fu wi o spotu wi noso gens wi (1 Petrus 4:3, 4). Sobun, wi musu teki wan bosroiti. Wi o abi demakandra nanga sma di lobi Gado? Wi o gi yesi na den wèt fu Gado di bun gi wi èn di e sori taki a lobi wi? Te wi du dati, dan wi e sori taki Satan ben lei di a taki dati nowan sma ben o du san Gado taki te tesi ben o miti en.Leisi 1 Korentesma 6:9, 10; 15:33.

A lobi di Gado abi gi libisma e gi wi a dyaranti taki wan kaba o kon na ogri nanga pina. Den sma di e sori taki den e bribi na ini Gado o man libi fu têgo na grontapu.Leisi Yohanes 3:16.