Go na content

Go na a tra menu

Go na table of contents

Yehovah Kotoigi

Sranantongo

Gado abi bun nyunsu gi wi!

 LES 3

A tru taki a bun nyunsu e kon fu Gado?

A tru taki a bun nyunsu e kon fu Gado?

1. Suma na a Skrifiman fu Bijbel?

A bun nyunsu taki sma o libi fu têgo na grontapu, skrifi na ini Bijbel (Psalm 37:29). Bijbel abi 66 pikin buku. Gado meki sowan 40 reti-ati man skrifi den. Moses skrifi den fosi feifi buku fu Bijbel sowan 3500 yari pasa. Na apostel Yohanes skrifi a lasti buku sowan 1900 yari pasa. Den prakseri fu suma skrifi na ini Bijbel? Gado ben meki den Bijbel skrifiman skrifi den prakseri fu en nanga yepi fu en santa yeye (2 Samuel 23:2). Den no ben skrifi den eigi prakseri, ma den di fu Gado. Sobun, Yehovah na a Skrifiman fu Bijbel.Leisi 2 Timoteyus 3:16; 2 Petrus 1:20, 21.

2. Fa wi kan kon sabi efu den sani di skrifi na ini Bijbel na tru tori?

Wi sabi taki Bijbel e komoto fu Gado, bika a e taki finifini san o pasa na ini a ten di e kon. Nowan libisma ben o man du dati (Yosua 23:14). Na a Almakti Gado wawan kan taki finifini san o pasa nanga libisma na ini a ten di e kon.Leisi Yesaya 42:9; 46:10.

Wi ben o fruwakti taki wan buku di e kon fu Gado, na wan buku di de tra fasi leki ala trawan, èn na so a de tu. Milyunmilyun Bijbel tyari kon na doro na ini hondrohondro difrenti tongo. Aladi Bijbel na fu owruten, toku a e kruderi nanga den sani di sabiman kon sabi. Boiti dati, den 40 Bijbel skrifiman no skrifi sani di no e kruderi nanga makandra. * Bijbel e sori krin tu taki Gado lobi wi trutru èn te now ete, a man kenki sma libi, so taki den tron moro bun sma. Den buweisi disi e gi milyunmilyun sma na overtoigi taki Bijbel na Gado Wortu.Leisi 1 Tesalonikasma 2:13.

 3. Sortu sani skrifi na ini Bijbel?

Bijbel e poti prakseri na a bun nyunsu di e taki dati Gado abi wan lobi-ati sani na prakseri gi libisma. Bijbel e tyari kon na krin fa a du kon taki na a bigin, libisma lasi a grani fu libi na ini wan paradijs na grontapu. A e sori tu fa grontapu o tron wan paradijs baka te fu kaba.Leisi Openbaring 21:4, 5.

Gado Wortu abi sosrefi wèt, gronprakseri, nanga bun rai. Boiti dati, a e sori fa Gado ben libi nanga libisma na ini a ten di pasa, èn den tori dati e yepi wi fu kon sabi den fasi fu en. Sobun, Bijbel kan yepi yu fu kon leri sabi Gado. A e sori yu fa yu kan tron wan mati fu en.Leisi Psalm 19:7, 11; Yakobus 2:23; 4:8.

4. Fa yu kan kon frustan Bijbel?

A brochure disi o yepi yu fu frustan Bijbel moro bun. A e tyari sani kon na krin na a srefi fasi fa Yesus ben du dati. Yesus ben taki fu a wan tekst baka a trawan èn a ben e yepi sma fu frustan „san Gado Buku ben taki”.Leisi Lukas 24:27, 45.

A bun nyunsu fu Gado moi srefisrefi. Toku son sma no wani arki a bun nyunsu dati èn trawan no lobi en srefisrefi. Ma no lasi-ati. Efu yu wani kisi têgo libi, dan a de prenspari fu kon leri sabi Gado.Leisi Yohanes 17:3.

 

^ paragraaf 3 Luku a brochure San na a boskopu fu Bijbel?

Kon sabi moro

GADO ABI BUN NYUNSU GI WI!

Fa wi kan de seiker taki Bijbel e taki san tru?

Efu Bijbel e kon fu Gado, dan a no musu de leki den tra buku di sma skrifi.

San Bijbel e leri wi trutru?

Bijbel—Wan buku di Gado gi wi

San Bijbel e leri wi trutru?

Suma na Gado trutru?