Go na content

Go na a tra menu

Go na table of contents

Yehovah Kotoigi

Sranantongo

Gado abi bun nyunsu gi wi!

 LES 11

Sortu wini den leri fu Bijbel abi gi wi?

Sortu wini den leri fu Bijbel abi gi wi?

1. Fu san ede a de fanowdu taki wi kisi tiri?

Fa den leri fu Bijbel e yepi wi fu no du sani di kan meki wi kisi mankeri noso lasi wi libi?PSALM 36:9.

A Mekiman fu wi koni moro wi. Leki wan lobi-ati papa, a e broko en ede nanga wi. Boiti dati, a no ben meki wi fu tiri wisrefi (Yeremia 10:23). Sobun, neleki fa wan yongu pikin abi en papa nanga mama fanowdu fu tiri en, na so wi alamala abi a tiri fu Gado fanowdu (Yesaya 48:17, 18). A tiri di wi e kisi fu Bijbel, de leki wan kado di wi kisi fu Gado.Leisi 2 Timoteyus 3:16.

Den wèt nanga den leri fu Yehovah e sori wi san na a moro bun fasi fu libi na ini a ten disi èn den e sori wi tu fa wi kan kisi têgo libi na ini a ten di e kon. Fu di na Gado meki wi, meki a fiti taki wi sori warderi gi a tiri fu en.Leisi Psalm 19:7, 11; Openbaring 4:11.

2. Fa Gado Wortu e tiri wi?

Son prenspari tru tori na ini Bijbel e leri wi san Gado wani wi fu du na ini difrenti situwâsi. Ma wèt de gi spesrutu situwâsi (Deuteronomium 22:8). Wi musu gebroiki wi frustan fu kon si sortu leri fu Bijbel e fiti na ini wan spesrutu situwâsi (Odo 2:10-12). Fu eksempre, Bijbel e leri wi taki a libi fu wi na wan kado fu Gado. A prenspari tru tori disi kan tiri wi te wi de na wroko, te wi de na oso, noso te wi de na pasi fu go na wan presi. A o tapu wi fu du sani di kan meki taki wisrefi noso tra sma lasi den libi.Leisi Tori fu den apostel 17:28.

3. San na den tu moro bigi komando na ini Bijbel?

Yesus ben taki fu tu komando di prenspari srefisrefi. A fosiwan e sori krin fu san ede wi de na libi. Dati na fu leri sabi  Gado, fu sori taki wi lobi en, èn fu dini en nanga wi heri ati. Ibri tron te wi e teki bosroiti wi musu hori a komando disi na prakseri (Odo 3:6). Den wan di e du dati o tron mati fu Gado, den o de koloku trutru, èn den o kisi têgo libi.Leisi Mateyus 22:36-38.

A di fu tu komando kan yepi wi fu libi na ini freide nanga tra sma (1 Korentesma 13:4-7). Te wi e gi yesi na a komando dati, dan wi o libi nanga trawan soleki fa Gado e du dati.Leisi Mateyus 7:12; 22:39, 40.

4. Sortu wini den leri fu Bijbel abi gi wi?

Den leri fu Bijbel e yepi osofamiri fu sori lobi gi makandra so taki den kan de wán (Kolosesma 3:12-14). Boiti dati, Gado Wortu e kibri osofamiri, fu di a e leri den taki a trowlibi musu de fu ala ten.Leisi Genesis 2:24.

Te wi e du san Bijbel e leri wi, dan dati kan yepi wi fu no pina èn fu no kisi tumusi furu broko-ede. Fu eksempre, furu basi e suku wrokoman di no e bedrigi sma èn di e wroko tranga soleki fa Bijbel e leri wi (Odo 10:4, 26; Hebrewsma 13:18). Gado Wortu e leri wi tu taki te wi abi den sani di de fanowdu fu tan na libi, dan wi musu breiti nanga dati. A e leri wi tu taki wi musu si a matifasi di wi abi nanga Gado leki wan sani di warti moro gudu.Leisi Mateyus 6:24, 25, 33; 1 Timoteyus 6:8-10.

Te wi e du san Gado e leri wi, dan dati e yepi wi fu abi wan bun gosontu (Odo 14:30; 22:24, 25). Fu eksempre, Bijbel e taki dati wi no musu dringi sopi te fu drungu. Te wi e gi yesi na a wèt dati, dan dati o kibri wi gi takru siki èn gi bigi mankeri (Odo 23:20). Yehovah e gi pasi taki wi dringi sopi, solanga wi no e du dati pasa marki (Psalm 104:15; 1 Korentesma 6:10). Boiti taki den leri fu Gado e yepi wi fu luku bun nanga san wi e du, den e yepi wi tu fu kibri wi frustan (Psalm 119:97-100). Ma tru Kresten no e lespeki den leri fu Gado soso fu kisi wini gi densrefi. Den e du dati fu gi Gado grani.Leisi Mateyus 5:14-16.