Go na content

Go na a tra menu

Go na table of contents

Yehovah Kotoigi

Sranantongo

Gado abi bun nyunsu gi wi!

 LES 13

San o pasa nanga den kerki?

San o pasa nanga den kerki?

1. Ala kerki bun?

Reti-ati sma de na ini ala kerki. A bun fu sabi taki Gado e si den sma dati èn taki a e broko en ede nanga den. Ma a de wan sari sani taki kerkisma du bun furu ogri-ati sani (2 Korentesma 4:3, 4; 11:13-15). Nyunsu e taki dati son kerki e horibaka srefi gi ogri-ati sma di e gens tirimakti, gi a kiri di sma e kiri ipi-ipi trawan, gi orloku, èn gi na ogri di sma e du nanga pikin-nengre. A sani disi e meki sma di e bribi fayafaya na ini Gado firi sari trutru!Leisi Mateyus 24:3-5, 11, 12.

Tra fasi leki a tru anbegi di e gi Gado glori, falsi bribi de wan tegu sani gi en. Falsi bribi e leri sma sani di no e kruderi nanga Bijbel, soleki falsi leri di abi fu du nanga Gado èn nanga den dedewan. Ma Yehovah wani taki sma musu sabi den tru tori fu en.Leisi Esekièl 18:4; 1 Timoteyus 2:3-5.

2. San o pasa nanga den kerki?

Koloku taki den kerki di e taki dati den lobi Gado, aladi den lobi a grontapu fu Satan, no man kori Gado (Yakobus 4:4). Gado wortu e kari ala falsi kerki „Babilon a Bigiwan”. Babilon ben de a nen fu na owruten foto pe falsi bribi bigin, baka a Frudu fu a ten fu Noa. Heri esi, Gado o tyari wan kaba kon wantronso na kerki di e kori èn e kwinsi libisma.Leisi Openbaring 17:1, 2, 5, 16, 17; 18:8.

Ma dati a no ala. Yehovah no frigiti den reti-ati sma di de na ini den falsi kerki na heri grontapu. A e leri den sma disi san tru èn a e yepi den fu komoto na ini falsi kerki.Leisi Mika 4:2, 5.

 3. San reti-ati sma musu du?

A tru anbegi e meki taki sma kon de na ini wánfasi

Yehovah e broko en ede nanga sma di lobi san tru èn san bun. A e gi den a rai fu komoto na ini den falsi kerki. Sma di lobi Gado de klariklari fu tyari kenki kon na ini den libi fu kan plisi en.Leisi Openbaring 18:4.

Di den apostel na ini a fosi yarihondro fruteri den reti-ati sma a bun nyunsu, dan den sma dati ben breiti nanga a nyunsu. Yehovah leri den wan nyun fasi fu libi di ben o meki taki den de moro koloku. Now den no ben o libi fu soso moro èn den ben o abi wan howpu. Den sma dati de wan bun eksempre gi wi na ini a ten disi, fu di den poti Yehovah na a fosi presi na ini den libi di den teki a bun nyunsu.Leisi 1 Tesalonikasma 1:8, 9; 2:13.

Yehovah e gi den sma di drai baka gi falsi bribi, wan switi kon na ini a famiri fu sma di e anbegi en. Efu yu teki a switi kari di Yehovah e gi yu, dan yu o tron wan mati fu en, yu o kisi wan nyun famiri fu lobi-ati sma di e anbegi Yehovah makandra nanga yu, èn yu o kisi têgo libi.Leisi Markus 10:29, 30; 2 Korentesma 6:17, 18.

4. Fa Gado o meki prisiri de na ala sei fu grontapu?

A moi srefisrefi fu sabi taki Gado o krutu ala falsi kerki. Disi o meki sma na heri grontapu kon fri fu a kwinsi di trawan e kwinsi den. Noiti moro falsi kerki o kori sma noso tyari prati kon na den mindri. Ala sma di o libi na a ten dati o anbegi a wan-enkri tru Gado na ini wánfasi.Leisi Openbaring 18:20, 21; 21:3, 4.

 

Kon sabi moro

San Bijbel e leri wi trutru?

A fasi fu anbegi di Gado feni bun

San Bijbel e leri wi trutru?

Sori krin taki yu teki a sei fu a tru anbegi