Go na content

Go na a tra menu

Go na table of contents

Yehovah Kotoigi

Sranantongo

San Bijbel kan leri wi?

Ete wan tu sani

Ete wan tu sani

1 YEHOVAH

Gado en nen na Yehovah èn wi kon frustan taki a nen wani taki „A e meki kon tron”. Yehovah na a Almakti Gado èn na en meki ala sani. A abi a makti fu du iniwan sani.

Na ini Hebrewtongo, Gado en nen ben skrifi nanga fo letter. Na ini Ingrisitongo den letter disi na YHWH noso JHVH. Na ini den fosi Hebrew Buku fu Bijbel di ben skrifi, wi kan feni Gado nen sowan 7000 tron. Na heri grontapu sma abi difrenti fasi fa den e skrifi a nen Yehovah èn den e taki en soleki fa den gwenti taki na ini a tongo fu den.

Kap. 1, par. 15

2 BIJBEL NA GADO BUKU

Bijbel na Gado buku, ma Gado gebroiki libisma fu skrifi en. Wi kan agersi en nanga wan bisnisman di e aksi en sekretarsi fu skrifi wan brifi gi en èn a e taigi en san a musu skrifi. Gado gebroiki en santa yeye fu meki den Bijbel skrifiman kon sabi den prakseri fu en, so taki den ben kan skrifi den. A santa yeye tiri den na difrenti fasi. Son leisi den ben kisi fisyun noso dren di den ben skrifi bakaten.

Kap. 2, par. 5

3 BIJBEL RAI

Den rai na ini Bijbel e yepi wi fu teki bun bosroiti. Fu eksempre, Bijbel e taki dati „takru kompe e pori bun gwenti”. Disi e leri wi taki den mati fu wi kan abi krakti na wi tapu, den kan meki wi du bun noso ogri (1 Korentesma 15:33). Bijbel e taki tu dati „san wan sma e sai, na dati a sa koti tu”. Disi e leri wi taki ala san wi e du abi bakapisi.Galasiasma 6:7.

Kap. 2, par. 12

  4 PROFEITITORI

Disi na wan boskopu fu Gado. Na ini wan profeititori Gado kan fruteri wi san a wani, noso fa a wani taki wi musu tyari wisrefi. Wan profeititori kan de wan komando fu Gado tu, noso a kan fruteri wi fa Gado o strafu wan sma noso wan kondre. A kan de wan boskopu tu fu wan sani di o pasa na ini a ten di e kon. Furu profeititori na ini Bijbel kon tru kaba.

Kap. 2, par. 13

5 PROFEITITORI DI E TAKI FU A MESIAS

Yesus meki furu Bijbel profeititori di e taki fu a Mesias kon tru. Luku a faki „ Profeititori di e taki fu a Mesias”.

Kap. 2, par. 17, futuwortu.

6 SAN YEHOVAH ABI NA PRAKSERI GI GRONTAPU

Di Yehovah meki grontapu a ben abi na prakseri taki a ben o de wan paradijs pe libisma ben o tan di lobi en. A sani dati o pasa ete. Heri esi, Gado o puru ala ogri na grontapu èn a o gi en pipel têgo libi.

Kap. 3, par. 1

7 SATAN DIDIBRI

Satan na a fosi engel di opo ensrefi teige Gado. Satan wani taki „Gensman”. Bijbel e kari en so, fu di a e feti teige Yehovah. Bijbel e kari en Didibri tu, san wani taki „Ogri-ati leiman”. A kisi a nen disi, fu di a e fruteri lei fu Gado èn a e kori sma.

Kap. 3, par. 4

  8 ENGEL

Langa ten fosi Yehovah meki grontapu a meki den engel. A meki den fu libi na ini hemel. Moro leki wán hondro milyun engel de (Danièl 7:10). Den engel abi nen èn den abi den eigi fasi. Engel di e gi yesi na Gado èn di abi sakafasi no wani taki libisma anbegi den. Den abi difrenti posisi èn den e du difrenti wroko. Sonwan fu den e wroko na fesi a kownusturu fu Yehovah, trawan e tyari den boskopu fu en, den e kibri èn e tiri den anbegiman fu Gado na grontapu, den e strafu sma di Gado krutu èn den e horibaka gi a preikiwroko (Psalm 34:7; Openbaring 14:6; 22:8, 9). Na ini a ten di e kon den o feti makandra nanga Yesus na ini a feti fu Armagedon.Openbaring 16:14, 16; 19:14, 15.

Kap. 3, par. 5; Kap. 10, par. 1

9 SONDU

Ala san wi e firi, prakseri, noso du, di de teige a wani fu Yehovah noso di e meki taki wi gens en, na sondu. Sondu kan pori wi matifasi nanga Gado. Dati meki a gi wi wet nanga rai di kan yepi wi fu no du sani di a no feni bun. Na a bigin, ala sani di Gado ben meki ben bun, ma di Adam nanga Eva trangayesi Yehovah den tron sondusma. Den ben kon owru èn den dede. Fu di wi kisi sondu fu Adam, wisrefi e kon owru èn e dede.

Kap. 3, par. 7; Kap. 5, par. 3

10 ARMAGEDON

Disi na a feti fu Gado pe a o pori a grontapu fu Satan èn a o puru ala ogri.

Kap. 3, par. 13; Kap. 8, par. 18

 11 GADO KOWNUKONDRE

Gado Kownukondre na wan regering di Yehovah seti na ini hemel. Yesus Krestes na a Kownu. Na ini a ten di e kon Yehovah o gebroiki a Kownukondre fu puru ala ogri. Gado Kownukondre o tiri heri grontapu.

Kap. 3, par. 14

12 YESUS KRESTES

Gado meki Yesus fosi ala tra sani. Yehovah seni Yesus kon na grontapu fu dede gi ala libisma. Baka di sma kiri Yesus, Yehovah tyari en kon na libi baka. Now Yesus e tiri na ini hemel leki Kownu fu Gado Kownukondre.

Kap. 4, par. 2

13 A PROFEITITORI FU DEN 70 WIKI

Bijbel ben taki na fesi o ten a Mesias ben o kon. A ben o kon na a kaba fu wan pisi ten di Bijbel e kari den 69 wiki. A pisi ten fu den 69 wiki bigin na ini a yari 455 Fosi Krestes (F.K.) èn a kon na wan kaba na ini a yari 29 Baka Krestes (B.K.).

Fa wi du sabi taki den 69 wiki dati kon na wan kaba na ini a yari 29? Den 69 wiki bigin na ini a yari 455 Fosi Krestes, di Nehemia doro na ini Yerusalem èn a bigin bow a foto baka (Danièl 9:25; Nehemia 2:1, 5-8). Wan wiki abi seibi dei. Ma na ini a profeititori disi, den wiki a no trutru wiki fu seibi dei, ma na wiki fu seibi yari. Nofo tron a de so taki na ini den profeititori fu Bijbel ’ibri dei e teri gi wán yari’ (Numeri 14:34; Esekièl 4:6). Disi wani taki dati ibri wiki na seibi yari èn taki 69 wiki na 483 yari (69 x 7). Efu wi bigin teri na ini a yari 455 Fosi Krestes, èn wi e teri 483 yari moro fara, dan wi e doro na ini a yari 29 (a yari nul no de). Disi na a yari di Yesus dopu èn tron a Mesias.Lukas 3:1, 2, 21, 22.

 A srefi profeititori disi e taki fu ete wan wiki, dati na ete seibi yari. Na ini a pisi ten dati, na ini a yari 33, sma ben o kiri a Mesias. Èn na a bigin fu a yari 36, den ben o bigin preiki a bun nyunsu fu a Kownukondre gi sma fu tra kondre tu. Den no ben o preiki gi den Dyu nomo.Danièl 9:24-27.

Kap. 4, par. 7

 14 A FALSI LERI DI E TAKI DATI GADO NA DRI SMA NA INI WÁN

Bijbel e leri taki Yehovah Gado na a Mekiman èn taki a meki Yesus fosi ala tra sani (Kolosesma 1:15, 16). Yesus a no na Almakti Gado. Noiti a taki dati en nanga Gado na a srefi. Na presi fu dati a taki: „A Tata bigi moro mi” (Yohanes 14:28; 1 Korentesma 15:28). Ma son kerki e leri sma taki Gado na dri sma na ini wán: A Papa, a Manpikin, nanga a santa yeye. A leri disi no de na ini Bijbel. Na wan falsi leri.

A santa yeye na a krakti fu Gado di a e gebroiki fu du a wani fu en. A santa yeye a no wan sma. Fu eksempre, Bijbel e taki dati „santa yeye kon na tapu” den fosi Kresten èn Yehovah ben taki: „Mi o meki mi yeye kon na tapu ala sortu sma.”Tori fu den apostel 2:1-4, 17.

Kap. 4, par. 12; Kap. 15, par. 17

15 A KROISI

Te tru Kresten e anbegi Gado den no e gebroiki a kroisi. Fu san ede?

  1.  Langa ten sma ben gebroiki a kroisi na ini falsi anbegi. Na ini owruten den sma di ben anbegi sani soleki a son ben gebroiki a kroisi èn sma di ben moksi den anbegi nanga seks ben gebroiki a kroisi tu. Na ini den 300 yari baka a dede fu Yesus, den Kresten no gebroiki a kroisi na ini na anbegi fu den. Ma Grankownu Konstantijn fu Rome meki taki den Kresten bigin gebroiki a kroisi. A ben wani taki furu sma teki a Kresten bribi. Ma a kroisi no ben abi noti fu du nanga Yesus Krestes. Wan buku e taki: „A kroisi de fu feni na ini den kulturu di ben de fosi a ten fu den Kresten èn na ini den kulturu fu sma di no de Kresten.”New Catholic Encyclopedia.

  2.    Yesus no dede na wan kroisi. Den Griki wortu di vertaal nanga „kroisi” wani taki „wan postu di e tanapu leti-opo”, wan „udu”, noso wan „bon”. Wan Bijbel e taki dati „noti na ini den buku fu a [Nyun Testamenti] di skrifi na ini Grikitongo, e gi sma a denki taki den Griki wortu abi fu du nanga tu pisi udu” (The Companion Bible). Yesus dede na wan postu di ben tanapu leti-opo.

  3.  Yehovah no wani taki wi gebroiki popki noso prenki na ini wi anbegi.Eksodes 20:4, 5; 1 Korentesma 10:14.

Kap. 5, par. 12

16 A MEMREFESA

Yesus taigi den disipel fu en fu memre a dede fu en. Den e du disi ibri yari tapu 14 Nisan, dati na a srefi dei di den Israelsma ben hori a Paskafesa. Na a Memrefesa, brede nanga win di e prenki a skin nanga brudu fu Yesus e pasa na fesi ala sma. Den wan di o tiri nanga Yesus na ini hemel e nyan a brede èn e dringi a win. Den wan di abi a howpu fu libi fu têgo na grontapu, e go na a Memrefesa, ma den no e nyan a brede, noso dringi a win.

Kap. 5, par. 21

17 SILI

Furu sma e prakseri taki a wortu „sili” abi fu du nanga wan sani di e libi go doro baka te wan sma dede. Den wortu di vertaal furu tron nanga „sili” na a Hebrew wortu nefesj nanga a Griki wortu psuke. Den wortu disi wani taki (1) wan sma, (2) wan meti, noso (3) a libi fu wan sma noso meti. Dati meki a Sranantongo Nyun-Grontapuvertaling, vertaal den tu wortu nefesj nanga psuke na a fasi dati tu. Meki wi go luku wan tu eksempre:

  • Wan sma. Bijbel e taki dati na ini a ten fu Noa „aiti sma [psuke] pasa na ini a watra libilibi” (1 Petrus 3:20). Na  ini a tekst disi a Griki wortu psuke abi fu du nanga sma, sobun, Noa nanga en wefi, den dri boi fu den, nanga den wefi fu den boi.

  • Wan meti. „Dan Gado taki: ’A watra musu kon lai nanga ala sortu meti [nefesj], èn na ala sei fu grontapu, meti [nefesj] di e frei, musu frei na loktu.’ Ne Gado taki: ’Meki grontapu kon lai nanga ala sortu meti [nefesj]. Meki a kon lai nanga ala sortu osometi [nefesj], meti di e kroipi na gron, nanga busimeti [nefesj].’ We, na so a pasa tu.”Genesis 1:20, 24.

  • A libi fu sma noso meti. Yehovah taigi Moses: „Ala den sma di ben suku fu kiri yu [Hebrewtongo „kiri yu nefesj”], dede” (Eksodes 4:19). Di Yesus ben de na grontapu, a taki: „Mi na a moro bun skapuman. A moro bun skapuman e gi en libi [psuke] gi den skapu fu en.”Yohanes 10:11.

    Boiti dati, te wan sma e du wan sani nanga en „heri libi [psuke]”, dan dati wani taki dati a de klariklari fu du ala san a man (Mateyus 22:37; Deuteronomium 6:5). Bijbel e gebroiki nefesj noso psuke tu gi wan dede sma noso wan dedeskin.Numeri 6:6; Hagai 2:13.

Kap. 6, par. 5; Kap. 15, par. 17

18 YEYE

Den Hebrew nanga Griki wortu di vertaal nanga „yeye” na ini na Ingrisitongo Nyun-Grontapuvertaling wani taki difrenti sani. Ma ala ten den abi fu du nanga wan sani di libisma no man si, sani soleki a winti noso a bro fu libisma nanga meti. Den wortu disi kan abi fu du tu nanga yeye soleki den engel èn nanga a santa yeye, dati na a krakti di Gado e gebroiki fu wroko. Bijbel no e leri taki wan sani na ini wan libisma e libi go doro baka te a dede.Psalm 104:29; Mateyus 12:43; Lukas 11:13.

Kap. 6, par. 5; Kap. 15, par. 17

 19 GEHENA

Gehena na a nen fu wan lagipresi, krosibei fu Yerusalem pe sma ben e bron doti. Nowan buweisi no de di e sori taki na ini a ten fu Yesus sma ben pina èn bron meti, noso libisma libilibi na a presi disi. Sobun, Gehena a no wan presi di wi no man si, pe dedesma e pina èn e bron fu têgo. Te Yesus ben taki fu den wan di ben o trowe go na ini Gehena, dan a ben wani taki dati den ben o kisi pori fu têgo.Mateyus 5:22; 10:28.

Kap. 7, par. 20

20 A WI TATA BEGI

Disi na a begi di Yesus taki di a ben leri den disipel fu en fa den musu begi. Yesus ben leri wi fu begi na a fasi disi:

  • „Meki yu nen de santa”

    Wi e begi Yehovah fu krin en nen fu ala lei. Te dati pasa, dan ala sma na hemel èn na grontapu o lespeki a nen fu Gado èn o gi en grani.

  • „Meki yu Kownukondre kon”

    Wi e begi taki a regering fu Gado pori na ogri grontapu fu Satan, taki a tiri grontapu, èn taki a meki a grontapu tron wan paradijs.

  • „Meki yu wani pasa na grontapu”

    Wi e begi taki a prakseri di Gado abi gi grontapu kon tru, so taki sma di e gi yesi na en kan libi fu têgo na ini Paradijs. Dati na san Yehovah ben wani gi libisma di a meki den.

Kap. 8, par. 2

21 A LUSU-PAIMAN

Yehovah seti a lusu-paiman fu frulusu libisma fu sondu nanga dede. A lusu-paiman na a prijs di ben de fanowdu fu bai a libi baka di a fosi man, Adam ben lasi.  A lusu-paiman ben o meki tu taki sondu libisma kan tron mati fu Yehovah baka. Gado seni Yesus kon na grontapu fu dede gi ala sondusma. A dede fu Yesus meki taki ala libisma abi na okasi fu kon fri fu sondu èn fu libi fu têgo.

Kap. 8, par. 21; Kap. 9, par. 13

22 FU SAN EDE A YARI 1914 PRENSPARI SO?

A profeititori na ini Danièl kapitel 4 e leri wi taki Gado ben o seti en Kownukondre na ini 1914.

A profeititori: Yehovah meki taki Kownu Nebukadnesar dren fu wan bigi bon di ben koti trowe. Na ini a dren den poti wan banti fu isri nanga wan banti fu kopro lontu a tompu fu a bon, so taki wan pisi ten langa a no ben o gro. Te „seibi pisi ten” ben pasa, a bon ben o bigin gro baka.Danièl 4:1, 10-16.

San a profeititori wani taki gi wi: A bon e prenki a tirimakti fu Gado. Furu yari langa Yehovah ben poti den kownu fu Yerusalem fu tiri a pipel Israel (1 Kroniki 29:23). Ma den kownu dati no ben gi yesi na Yehovah èn dati meki den no ben o tiri moro. Yerusalem kisi pori na ini a yari 607 Fosi Krestes. Dati ben de a bigin fu den „seibi pisi ten” (2 Kownu 25:1, 8-10; Esekièl 21:25-27). Di Yesus taki dati „trakondre sma o masi Yerusalem, teleki a reti ten fu den trakondre sma pasa”, dan a ben taki fu den „seibi pisi ten” (Lukas 21:24). Sobun, den „seibi pisi ten” no kon na wan kaba di Yesus ben de na grontapu. Yehovah ben pramisi taki a ben o poti wan Kownu na a kaba fu den „seibi pisi ten”. Te a nyun Kownu, Yesus, o tiri, dan fu têgo Gado pipel o kisi furu blesi na grontapu.Lukas 1:30-33.

O langa den „seibi pisi ten” de: Den „seibi pisi ten” ben o de 2520 yari. Efu wi bigin teri na ini a yari 607 Fosi Krestes èn wi teri 2520 yari moro fara, dan wi e doro na a yari 1914. Dati na a yari di Yehovah meki Yesus Krestes tron Kownu fu Gado Kownukondre na ini hemel.

 Fa wi kon na a nomru 2520? Bijbel e taki dati dri nanga afu pisi ten na 1260 dei (Openbaring 12:6, 14). Sobun, „seibi pisi ten” na tu tron a nomru dati, dati na 2520 dei. Den 2520 dei na 2520 yari, fu di na ini furu fu den profeititori fu Bijbel ’ibri dei e teri gi wán yari’.Numeri 14:34; Esekièl 4:6.

Kap. 8, par. 23

23 A GRAN ENGEL MIKAEL

A wortu „gran engel” wan taki „a moro hei engel”. Bijbel e taki fu wán gran engel nomo èn en nen na Mikael.Danièl 12:1; Yudas 9.

Mikael na a fesiman fu Gado en legre fu engel. Openbaring 12:7 e taki: „Mikael nanga den engel fu en ben feti nanga a bigi kaiman . . . nanga den engel fu en.” A buku Openbaring e taki dati a fesiman fu Gado en legre fu engel, na Yesus, sobun Mikael na wan tra nen fu Yesus.Openbaring 19:14-16.

Kap. 9, par. 4

24 DEN LASTI DEI

Disi na a pisi ten fosi Gado Kownukondre pori a grontapu fu Satan. Na ini den lasti dei bigi sani e pasa na grontapu. Na ini son profeititori fu Bijbel a pisi ten disi nen „a kaba fu a grontapu”, noso a ten ’te a Manpikin fu libisma kon’ (Mateyus 24:3, 27, 37). „Den lasti dei” bigin di Gado Kownukondre bigin tiri na hemel na ini 1914 èn den o kon na wan kaba te Satan en grontapu o kisi pori na ini Armagedon.2 Timoteyus 3:1; 2 Petrus 3:3.

Kap. 9, par. 5

 25 NA OPOBAKA

Te Gado e tyari wan sma di ben dede kon na libi baka, dan dati na wan opobaka. Bijbel e taki fu neigi sma di kisi wan opobaka. Elia, Elisa, Yesus, Petrus, nanga Paulus tyari sma kon na libi baka. Den ben kan du den wondru disi soso nanga a krakti fu Gado. Yehovah e pramisi taki „den sma di du san reti” nanga „den sma di no du san reti” o kisi wan opobaka, so taki den kan libi na grontapu (Tori fu den apostel 24:15). Bijbel e taki tu fu sma di o kisi wan opobaka fu go na hemel. Disi e pasa te den wan di Gado teki e kisi wan opobaka fu go libi na ini hemel nanga Yesus.Yohanes 5:28, 29; 11:25; Filipisma 3:11; Openbaring 20:5, 6.

Kap. 9, par. 13

26 NA ANBEGI FU OGRI YEYE (AFKODREI)

Wi e taki dati sma e anbegi ogri yeye, noso e du afkodrei te den e suku fu taki nanga yeye. Kande den e du disi langalanga, noso nanga yepi fu sma, soleki bonuman, noso lukuman. Sma e du afkodrei fu di den e bribi taki te wan sma dede a yeye fu en e libi go doro èn a abi makti. Den ogri yeye e du sani tu fu meki libisma trangayesi Gado. Son sma e luku den stari, den e luku na ini sma anu, noso den e du tra sani fu kon sabi san o pasa. Den sani disi abi fu du nanga ogri yeye tu. Furu buku, tijdschrift, horoskoop, felem, prenki, èn srefi poku e meki taki sani soleki towfruwroko nanga ogri yeye e gersi span tori di no ogri. Furu sani di sma gwenti du te den e go beri, soleki tyari nyanyan noso tra sani gi dedesma, hori fesa baka wan beri, memre den dedewan ibri yari, brokodei, nanga sani di sma e du te den masra noso wefi dede, abi fu du nanga ogri yeye tu. Nofo tron sma e gebroiki sopi noso  drugs te den e pruberi fu gebroiki a makti fu den ogri yeye.Galasiasma 5:20, 21; Openbaring 21:8.

Kap. 10, par. 10; Kap. 16, par. 4

27 A MORO HEI TIRIMAN YEHOVAH

Yehovah na a Almakti Gado èn na en meki ala sani na hemel èn na grontapu (Openbaring 15:3). Dati meki ala sani na fu en èn a abi a reti fu tiri den sani di a meki (Psalm 24:1; Yesaya 40:21-23; Openbaring 4:11). A meki wet gi ala den sani di a meki. Yehovah abi a reti tu fu poti suma a wani leki tiriman. Te wi lobi Gado èn wi e gi yesi na en, dan wi e horibaka gi en leki tiriman.1 Kroniki 29:11.

Kap. 11, par. 10

28 PURU BERE

Wan sma di e puru wan bere e du sani fu espresi fu kiri wan pikin di no gebore ete. Wi no e taki dati wan sma purubere efu a kisi wan mankeri noso efu a lasi a bere. A momenti wan uma hori bere, dan a pikin dati na wan libisma kaba. A no gewoon wan pisi fu en mama skin. Sobun, te wan sma e puru bere a e kiri wan sma.

Kap. 13, par. 5

29 TEKI BRUDU

Wi e taki dati wan sma e teki brudu te datra e gi sma brudu noso wan fu den fo prenspari pisi fu brudu. A kan taki den e gi a sma en eigi brudu di den ben kibri, noso den e gi en brudu fu wan tra sma. Den fo prenspari pisi fu brudu na plasma, redi brudu-cel, weti brudu-cel, nanga brudu-plaat.

Kap. 13, par. 13

 30 STRAFU

Na ini Bijbel a wortu „strafu” kan abi fu du nanga difrenti sani. Son leisi a wani taki dati Yehovah e leri wi fa wi musu tyari wisrefi, fa wi kan du bun, noso taki a e piri-ai gi wi. Ma noiti Yehovah e du disi na wan ogri-ati fasi (Odo 4:1, 2). Yehovah e gi papa nanga mama wan bun eksempre. Te a e piri-ai gi sma, dan a e du dati na so wan fasi taki te fu kaba a sma e breiti taki Yehovah piri-ai gi en (Odo 12:1). Yehovah lobi en pipel èn dati meki a e gi den leri. A e gi den rai di e yepi den fu kenki den fowtu denki fu den, so taki den o man du sani di a feni bun. Papa nanga mama musu yepi den pikin fu frustan fu san ede den musu gi yesi. Den musu leri den tu fu kon lobi Yehovah, en Wortu, nanga den rai na ini.

Kap. 14, par. 13

31 OGRI YEYE

Disi na takru yeye di wi no man si èn den abi makti moro libisma. Den yeye disi na engel di kon ogri. Den kon ogri di den trangayesi Gado èn na so den tron feanti fu en (Genesis 6:2; Yudas 6). Den horibaka gi Satan di a opo ensrefi teige Yehovah.Deuteronomium 32:17; Lukas 8:30; Tori fu den apostel 16:16; Yakobus 2:19.

Kap. 16, par. 4