Go na content

Go na a tra menu

Go na table of contents

Yehovah Kotoigi

Sranantongo

San Bijbel kan leri wi?

 KAPITEL 16

Teki a bosroiti fu dini Gado leki fa en wani

Teki a bosroiti fu dini Gado leki fa en wani

1, 2. San wi musu aksi wisrefi èn fu san ede a prenspari?

FU DI yu studeri Bijbel, yu kon si taki furu sma di e taki dati den e anbegi Gado e du sani, noso e leri sma sani di Gado no lobi (2 Korentesma 6:17). Dati meki Yehovah e taigi wi fu komoto na ini falsi bribi, „Babilon a Bigiwan” (Openbaring 18:2, 4). San yu o du? Ibriwan fu wi musu teki wan bosroiti èn wi musu aksi wisrefi: ’Mi wani anbegi Gado na a fasi di en feni bun noso mi wani anbegi en leki fa mi gwenti du dati?’

2 Efu yu komoto kaba na ini falsi bribi dan dati bun. Ma a kan taki yu lobi son sani nanga son gwenti ete di komoto fu falsi bribi. Meki wi go luku wan tu fu den. Wi o si fu san ede a prenspari taki wi si den sani disi leki fa Yehovah e si den.

SMA E ANBEGI POPKI ÈN SOSREFI DEN AFO FU DEN

3. (a) Fu san ede a kan muilek gi son sma fu no gebroiki popki moro te den e anbegi Gado? (b) San Bijbel e taki fu a tori disi?

3 Someni yari kaba son sma e gebroiki popki noso altari na den oso fu anbegi Gado. Efu yu e du dati tu, dan yu kan firi leki yu no o man anbegi Gado sondro den sani disi noso taki a fowtu srefi fu du dati. Ma no frigiti taki Yehovah e leri wi fa wi musu anbegi en. Boiti dati, Bijbel e sori krin taki Yehovah no wani taki wi e gebroiki popki te wi e anbegi en.Leisi Eksodes 20:4, 5; Psalm 115:4-8; Yesaya 42:8; 1 Yohanes 5:21.

4. (a) Fu san ede wi no musu anbegi den afo fu wi? (b) Fu san ede Yehovah taigi en pipel taki den no musu pruberi fu taki nanga den dedewan?

 4 Son sma e gebroiki furu ten nanga moni fu du sani fu meki den afo fu den di dede firi bun. Kande den e anbegi den srefi. Ma soleki fa wi leri dan dedesma no man yepi wi noso du wi ogri. Den no e libi go doro na wan tra presi. Fu taki en leti, a kan du wi ogri efu wi ben o pruberi fu taki nanga den, fu di iniwan boskopu di gersi leki a komoto fu wan famiri di dede, komoto fu ogri yeye. Dati meki Yehovah taigi den Israelsma taki den no musu pruberi fu taki nanga dedewan. A taigi den tu taki den no musu du nowan sani di abi fu du nanga na anbegi fu ogri yeye.Deuteronomium 18:10-12; luku „Ete wan tu sani” 26 nanga 31.

5. San kan yepi yu fu no gebroiki popki moro fu anbegi Gado èn fu tapu nanga na anbegi fu den afo fu yu?

5 San o yepi yu fu no gebroiki popki moro fu anbegi Gado noso fu tapu nanga na anbegi fu den afo fu yu? Yu musu leisi Bijbel èn prakseri bun fa Yehovah e si den sani disi. A ’no lobi den kwetikweti’ (Deuteronomium 27:15). Begi Yehovah ibri dei fu yepi yu fu si sani soleki fa en e si sani èn fu yepi yu fu anbegi en na a fasi di a feni bun (Yesaya 55:9). Yu kan de seiker taki Yehovah o gi yu a krakti fu man puru iniwan sani na ini yu libi di abi fu du nanga falsi bribi.

WI MUSU HORI KRESNETI?

6. Fu san ede den sma teki 25 december leki a dei di Yesus gebore?

6 Kresneti na wan fu den moro pôpi fesa na grontapu èn furu sma e denki taki na a dei dati Yesus gebore. Ma Kresneti abi fu du nanga falsi anbegi. Wan  buku e taki dati den Romesma ben taki dati tapu 25 december a son ben gebore. Den fesiman fu kerki ben wani taki sma di ben e anbegi falsi gado musu tron Kresten èn dati meki den bigin hori a dei dati leki a dei di Yesus gebore, aladi dati no de so (Lukas 2:8-12). Den bakaman fu Yesus no ben hori Kresneti. Wan tra buku e taki: „Na ini den 200 yari baka di Krestes gebore, nowan sma ben sabi soifri o ten a ben gebore èn wan tu sma nomo ben wani kon sabi soifri o ten a ben gebore” (Sacred Origins of Profound Things). Sma bigin hori Kresneti sowan 300 yari baki di Yesus gebore.

7. Fu san ede tru Kresten no e hori Kresneti?

7 Furu sma sabi taki Kresneti nanga den sani di sma gwenti du na a ten dati, soleki fu hori fesa nanga fu gi kado, komoto fu falsi bribi. Fu eksempre, wan ten ben de taki sma na ini Ingrisikondre nanga son pisi fu Amerkankondre, no ben mag hori Kresneti fu di a abi fu du nanga falsi bribi. Iniwan sma di ben hori a fesa ben kisi strafu. Ma baka wan pisi ten sma bigin hori Kresneti baka. Fu san ede tru Kresten no e hori Kresneti? Fu di den wani du sani di Gado feni bun.

WI MUSU HORI FRIYARI-OSO?

8, 9. Fu san ede den fosi Kresten no ben hori friyari-oso?

8 Wan tra pôpi fesa gi furu sma na fu hori friyari-oso. Kresten musu hori friyari-oso? Den tu friyari-oso di kari na ini Bijbel ben de fu sma di no ben anbegi Yehovah (Genesis 40:20; Markus 6:21). Na a ten dati sma ben hori friyari-oso fu gi grani na falsi gado. Dati meki den fosi Kresten „ben si friyari-oso  leki wan gwenti fu sma di e anbegi falsi gado”.The World Book Encyclopedia.

9 Den Romesma nanga den Grikisma fu owruten ben e bribi taki te wan sma ben gebore wan yeye ben de drape di ben o kibri a sma dati en heri libi langa. Wan buku e taki dati a yeye disi ben e wroko makandra nanga a gado di ben e friyari na tapu a dei di a sma gebore.The Lore of Birthdays.

10. Fu san ede Kresten na ini a ten disi no e hori friyari-oso?

10 Yu denki taki Yehovah feni en bun te wi e hori fesa di abi fu du nanga falsi bribi? (Yesaya 65:11, 12) Nôno, Yehovah no e feni en bun. Dati meki wi no e hori friyari-oso noso iniwan tra fesa di abi fu du nanga falsi anbegi.

A PRENSPARI TAKI YU NO E HORI DEN FESA DISI?

11. Fu san ede son sma e hori fesadei? San musu de a moro prenspari sani gi yu?

11 Son sma sabi taki Kresneti nanga tra fesadei komoto fu falsi anbegi, ma toku den e tan hori den. Den e prakseri taki den fesadei na moi okasi fu du sani makandra nanga den famiri. Na so yu e denki tu? A no fowtu fu du sani makandra nanga yu famiri. Na Yehovah sorgu taki a seti fu wan famiri de èn a wani taki wi abi wan bun matifasi nanga den (Efeisesma 3:14, 15). Ma a moro prenspari taki wi de bun mati fu Yehovah, na presi taki wi e hori fesa di abi fu du nanga falsi anbegi soso fu di wi wani plisi wi famiri. Dati meki na apostel Paulus ben taki: „Sorgu ala ten taki unu sabi san Masra feni bun.”Efeisesma 5:10.

12. San e meki taki Yehovah no e feni wan fesadei bun?

 12 Furu sma e denki taki a no abi trobi pe wan fesadei komoto, ma Yehovah no e si en so. A no e feni en bun taki wi e hori fesa di komoto fu falsi anbegi noso di e grani na sma noso sani fu a kondre soleki a fraga. Fu eksempre, den Egeptesma ben abi omeni fesadei gi den falsi gado fu den. Baka di den Israelsma gowe libi Egepte, den hori wan fu den fesa fu den Egeptesma, dan den kari en ’wan fesa gi Yehovah’. Ma Yehovah strafu den di den du dati (Eksodes 32:2-10). Soleki fa a profeiti Yesaya ben taki, wi ’no musu fasi nowan sani di no krin’.Leisi Yesaya 52:11.

SORI SWITIFASI GI TRAWAN

13. Sortu aksi yu kan abi te yu bosroiti fu no hori fesadei moro?

13 Efu yu bosroiti fu no hori fesadei moro, dan a kan taki yu abi wan lo aksi. Kande yu aksi yusrefi: San mi musu du te den sma na wrokope aksi mi fu san ede mi no e hori Kresneti? San mi musu du efu wan sma gi mi wan kado gi Kresneti? San mi musu du te mi trowpatna e fruwakti fu mi taki mi e hori wan fesadei? Fa mi kan yepi den pikin fu mi fu no firi sari fu di den no e hori friyari noso wan tra fesadei?

14, 15. San yu kan du te wan sma e winsi yu wan switi fesadei noso e gi yu wan kado?

14 Te yu o bosroiti san yu o taki èn san yu o du na ini ibri situwâsi, dan a prenspari taki yu gebroiki yu frustan. Fu eksempre, te sma e winsi yu wan switi fesadei, dan yu no abi fu du neleki yu no yere. Yu kan taigi den, „grantangi”. Ma efu wan sma wan sabi moro, dan yu kan bosroiti fu fruteri en fu san ede yu no e hori a fesa dati. Ma ala ten yu musu taki na wan switi fasi èn  nanga lespeki. Bijbel e taki: „Taki na wan switi fasi ala ten. Den wortu fu unu musu abi sowtu. Te unu e taki na so wan fasi, dan unu o sabi fa fu piki ibriwan sma” (Kolosesma 4:6). Kande yu kan fruteri a sma taki yu lobi fu du sani makandra nanga trawan èn fu gi trawan kado, ma taki yu no e du dati te a abi fu du nanga den fesadei disi.

15 San yu musu du te wan sma e gi yu wan kado? Bijbel no e gi wi wan lo wet fu a tori disi, ma a e sori wi taki wi musu sorgu taki wi tan abi wan krin konsensi (1 Timoteyus 1:18, 19). Kande a sma di gi yu a kado no sabi taki yu no e hori a fesadei. Noso a kan taki a e taki: „Mi sabi taki yu no e hori a fesadei, ma toku mi wani gi yu wan sani.” Na ini ala tu situwâsi yusrefi kan bosroiti efu yu o teki a kado noso efu yu no o du dati. Ma awinsi sortu bosroiti yu teki sorgu taki yu tan abi wan krin konsensi. Wi no wani du nowan sani di kan pori a matifasi fu wi nanga Yehovah.

YU NANGA YU FAMIRI

Den wan di e dini Yehovah de koloku

16. San yu musu du te yu famiri wani hori fesadei?

16 San yu musu du te yu famiri wani hori wan fesadei? Yu no abi fu haritaki nanga den. No frigiti taki den abi a reti fu bosroiti san den wani du. Sori switifasi èn lespeki den bosroiti fu den, neleki fa yu wani taki den lespeki den di fu yu. (Leisi Mateyus 7:12.) Ma san yu musu du efu yu famiri wani du sani makandra nanga yu te wan fesadei de? Fosi yu teki wan bosroiti, aksi Yehovah fu yepi yu fu du a yoisti sani. Prakseri fu a situwâsi èn go ondrosuku a tori. No frigiti taki ala ten yu wani prisiri Yehovah.

17. San yu kan du fu yepi yu pikin fu no firi leki den e misi wan sani te trawan e hori fesadei?

 17 San yu kan du fu yepi yu pikin te den e si fa trawan e hori fesadei? We, ten na ten yu kan orga wan prisiri sani gi den. Yu kan gi den kado tu. Wan fu den moro moi kado di yu kan gi yu pikin na yu ten nanga yu lobi.

HORIBAKA GI A TRU ANBEGI

18. Fu san ede wi musu go na den konmakandra?

18 Fu prisiri Yehovah wi musu drai baka gi falsi anbegi nanga den gwenti èn den fesadei fu en. Ma wi musu horibaka gi a tru anbegi tu. Fa wi kan du dati? Wan fasi fa wi e du dati na te wi e go na den konmakandra ala wiki. (Leisi Hebrewsma 10:24, 25.) Den konmakandra na wan prenspari pisi fu a tru anbegi (Psalm 22:22; 122:1). Wi kan gi makandra deki-ati te wi de drape.Romesma 1:12.

19. Fu san ede a prenspari fu fruteri trawan fu den sani di yu leri fu Bijbel?

19 Wan tra fasi fa wi e horibaka gi a tru anbegi na te wi e fruteri trawan san wi leri fu Bijbel. Furu sma e broko den ede nanga den ogri sani di e pasa na grontapu. Kande yu sabi wan tu fu den sma disi. Fruteri den fu a moi howpu di wi abi gi a ten di e kon. Te yu e go na den konmakandra èn yu e fruteri trawan san yu e leri fu Bijbel, dan yu o si taki yu no o wani abi noti fu du moro nanga falsi anbegi nanga den gwenti fu en. Yu kan de seiker taki yu o de koloku èn taki Yehovah o blesi a muiti di yu e du fu anbegi en na a yoisti fasi.Maleaki 3:10.