Go na content

Go na a tra menu

Go na table of contents

Yehovah Kotoigi

Sranantongo

San Bijbel kan leri wi?

 KAPITEL 1

Suma na Gado?

Suma na Gado?

1, 2. Sortu aksi furu sma abi?

PIKIN-NENGRE lobi aksi furu sani. Awinsi yu fruteri den fa wan sani de, toku son leisi den e aksi: ’Fu san ede?’ Te yu e pruberi fu piki den, dan kande den e aksi yu baka: ’Ma fu san ede dan?’

2 A no yongusma wawan e poti aksi, bigisma e poti aksi tu. Kande wi e aksi wisrefi san wi o nyan, san wi o weri, noso san wi o bai. Noso kande wi abi prenspari aksi di abi fu du nanga a libi èn nanga a ten di e kon. Ma te wi no e feni bun piki tapu den aksi disi, dan kande wi ben o kon weri fu suku piki.

3. Fu san ede furu sma e denki taki den no o man feni piki tapu prenspari aksi fu a libi?

3 Bijbel abi a piki tapu prenspari aksi fu a libi? Son sma e taki, ’iya’, ma den feni taki Bijbel muilek tumusi fu frustan. Kande den e denki taki na soso den fesiman fu kerki noso tra leriman kan piki den aksi dati. Tra sma e syen fu taki dati den no sabi den piki. Fa yu e denki fu a tori disi?

4, 5. Sortu prenspari aksi yu abi? Fu san ede yu musu tan suku den piki?

4 Kande yu wani sabi a piki tapu den aksi disi: Fu san ede mi de na grontapu? San e pasa nanga wan sma te a dede? Fa Gado de? Yesus, a bigi Leriman ben taki: „Tan aksi, dan unu o kisi. Tan suku, dan unu o feni. Tan naki na tapu a doro, dan a doro o opo gi  unu” (Mateyus 7:7). Sobun, yu musu tan suku teleki yu feni bun piki tapu den aksi fu yu.

5 Iya, efu yu e „tan suku”, dan yu o feni den piki na ini Bijbel (Odo 2:1-5). Den piki no muilek tumusi fu frustan. Den sani di yu o leri o meki taki yu de koloku nownow kaba èn yu o abi wan moi howpu gi a ten di e kon. Meki wi go luku wan aksi di furu sma no man piki.

GADO E BROKO EN EDE NANGA WI NOSO A E MEKI OGRI MITI SMA?

6. Fu san ede son sma di e pina e denki taki Gado no e broko en ede nanga den?

6 Furu sma e denki taki Gado no e broko en ede nanga wi. Den feni taki efu Gado ben e broko en ede nanga wi, dan grontapu ben o de heri tra fasi. Nownow feti de, sma abi bita-ati èn problema de na ala sei. Sma e kon siki, den e pina èn den e dede. Dati meki son sma e taki: ’Efu Gado e broko en ede nanga wi, dan fu san ede a no e puru den sani disi?’

7. (a) Fa den fesiman fu kerki leri sma taki na Gado e meki ogri miti wi? (b) Fu san ede wi kan de seiker taki a no Gado e meki ogri sani pasa?

7 Son leisi den fesiman fu kerki e meki sma bribi taki na Gado e meki ogri miti sma. Te wan sari sani pasa, dan den e taki dati na so Gado ben wani en. Na so wan fasi den e leri sma taki na Gado e meki ogri miti wi. Ma Bijbel e leri taki noiti Gado e meki ogri sani pasa. Yakobus 1:13 e sori taki Gado no e tesi sma nanga ogri sani. A tekst e taki: „Te tesi e miti wan sma, a no musu taki: ’Na Gado e tesi mi’, bika nowan sma kan tesi Gado nanga ogri sani èn Gado srefi no e tesi sma tu.” Sobun, aladi Gado no stop den ogri di e  pasa, toku a no e meki den pasa tu. (Leisi Yob 34:10,12.) Luku wan eksempre.

8, 9. Fu san ede a no ben o bun fu taki dati na Gado e meki problema miti wi? Gi wan eksempre.

8 Wan yonguman e libi na oso nanga en papa nanga mama. En papa lobi en trutru èn a leri en fa fu teki bun bosroiti. Ma now a yonguman no wani arki en papa èn a e gowe libi oso. A e du wan tu ogri sani èn a e kisi problema. Yu ben o taki dati na a papa meki a kisi problema, fu di a no tapu en fu gowe libi oso? Nôno! (Lukas 15:11-13) Na so a de tu taki di libisma bosroiti fu trangayesi Gado èn fu du ogri, dan neleki a papa dati, Yehovah no tapu den. Sobun, te wan ogri sani e pasa, dan wi no musu frigiti taki a no Gado e meki a pasa. A no ben o bun fu gi Gado a porinen dati.

9 Wan bun reide de di meki taki Gado no stop den ogri ete di e pasa na ala sei. Na ini kapitel 11 yu o leri san Bijbel e taki fu a tori disi. Ma yu kan de seiker taki Gado lobi wi èn taki a no en e meki problema miti wi. Fu taki en leti, na en wawan kan lusu den problema fu wi.Yesaya 33:2.

10. Fu san ede wi kan de seiker taki Gado o seti ala sani baka di ogrisma pori?

10 Gado santa (Yesaya 6:3). Ala san a e du de soifri èn bun, noiti a e meki fowtu. Dati meki wi kan frutrow en. Ma libisma no de so. Son leisi den e du ogri èn srefi den moro bun tiriman no man seti ala den sani baka di ogrisma pori. Nowan sma abi so furu makti leki Gado. A abi a makti fu seti ala sani baka di ogrisma pori èn a o du dati tu. A o puru ogridu fu ala ten.Leisi Psalm 37:9-11.

 FA GADO E FIRI TE SMA E PINA?

11. Fa Gado e firi te yu e pina?

11 Fa Gado e firi te a e si san e pasa na grontapu èn te a e si taki ogri e miti yu? Bijbel e leri wi taki Gado „lobi retidu” (Psalm 37:28). Sobun, Gado lobi bun sani, a no lobi ogri. A no lobi en srefisrefi te sma e pina. Bijbel e taki dati „a ben e sari srefisrefi” di a si taki libisma ben e du furu ogri na grontapu na ini owruten (Genesis 6:5, 6). Gado no kenki (Maleaki 3:6). Bijbel e sori taki Gado e broko en ede trutru nanga yu.Leisi 1 Petrus 5:7.

Bijbel e leri wi taki Yehovah, a Gado di lobi wi, meki hemel nanga grontapu

12, 13. (a) Fa a du kon taki wi lobi tra sma, èn fa sma e denki te den e si taki trawan e pina? (b) Fu san ede wi kan de seiker taki Gado o puru ala pina nanga ogri?

12 Bijbel e sori tu taki Gado meki wi fu de leki en (Genesis 1:26). Disi wani taki dati Gado meki wi na so wan fasi taki wi man sori den srefi moi fasi fu en. Fu eksempre, Bijbel e leri wi taki „Gado na lobi” (1 Yohanes 4:8). Ala san Gado e du, a e du fu di a abi lobi. Sobun, wi man sori lobi, fu di Gado abi lobi. Dati wani taki dati efu yu e sari te sma di no du ogri e pina, dan a musu de so taki Gado e firi moro sari.

13 Prakseri a sani disi: Yu ben o puru ala pina nanga ogri na grontapu efu yu ben abi a makti fu du dati? Seiker yu ben o du dati, fu di yu lobi sma. Fa a de nanga Gado dan? A abi makti èn a lobi sma. Dati meki a o puru ala pina nanga ogri. Yu kan de seiker taki ala den sani di kari na a bigin fu a buku disi, o kon tru soleki fa Gado pramisi! Ma fu man bribi taki den pramisi disi o kon tru, dan yu musu leri sabi Gado moro bun.

 GADO WANI TAKI YU KON SABI EN

Te yu wani tron wan mati fu wan sma, dan yu e taigi en fa yu nen. Na ini Bijbel, Gado taigi wi fa a nen

14. San na a nen fu Gado èn fa wi du sabi taki wi musu gebroiki en?

14 Te yu wani tron wan mati fu wan sma, dan san na a fosi sani di yu e taigi en? Yu e taigi en fa yu nen. Gado abi wan nen? Furu kerki e taki dati en nen na Gado noso Masra, ma dati a no nen, neleki fa „kownu” noso „president” a no nen. Gado taigi wi taki en nen na Yehovah. Psalm 83:18 e taki: „Na so sma o sabi taki yu di nen Yehovah, yu wawan na a Moro Heiwan fu heri grontapu.” Den skrifiman fu Bijbel gebroiki a nen fu Gado moro leki 7000 leisi. Yehovah wani taki yu sabi en nen èn taki yu gebroiki en. A fruteri yu en nen, so taki yu kan tron wan mati fu en.

15. San a nen Yehovah wani taki?

15 A nen fu Gado, Yehovah, wani taki dati a man du ala san a pramisi èn taki a man du san a abi na prakseri. Nowan sani man tapu en fu du san a wani. Na Yehovah wawan kan abi a nen disi. *

16, 17. San den wortu disi wani taki: (a) „na Almaktiwan”? (b) „Kownu fu têgo”? (c) „Mekiman”?

 16 Soleki fa wi ben leisi kaba, dan Psalm 83:18 e taki dati Yehovah „wawan na a Moro Heiwan”. Openbaring 15:3 e taki tu: „Yehovah Gado na Almaktiwan, den sani di yu e du bigi èn den e fruwondru sma srefisrefi. Yu na Kownu fu têgo. Den sani di yu e du, na sani di reti èn di sma kan frutrow.” San a wortu „Almaktiwan” wani taki? A wani taki dati Yehovah abi makti moro iniwan sma na hemel èn na grontapu.  Den wortu „Kownu fu têgo” wani taki dati a ben de ala ten kaba soleki fa Psalm 90:2 e sori tu. Dati na wan moi sani!

17 Yehovah wawan na a Mekiman. Openbaring 4:11 e taki: „Na yu, Yehovah wi Gado, warti fu sma prèise yu gi a glori, a grani nanga a makti di yu abi, bika na yu meki ala sani. Na fu di yu ben wani, meki den sani disi kon de èn na yu meki den.” Sobun, na Yehovah meki den engel na ini hemel, den stari na loktu, den froktu na den bon, nanga den fisi na ini se. Iya, iniwan sani di yu kan kari, na Yehovah meki en!

 YU KAN DE WAN MATI FU YEHOVAH?

18. Fu san ede son sma e denki taki den no man tron wan mati fu Gado? San Bijbel e taki fu a tori dati?

18 Te son sma e leisi sortu moi fasi Yehovah abi, dan den e denki: ’Gado abi so furu makti, a de so wan prenspari sma, èn a de so fara fu wi. Fu san ede a ben o broko en ede nanga mi?’ Ma na so Gado wani taki wi denki? Nôno. Yehovah wani de krosibei fu wi. Bijbel e taki dati Gado „no de fara fu nowan fu wi” (Tori fu den apostel 17:27). Gado wani taki yu kon krosibei na en èn a e pramisi taki ’a o kon krosibei na yu’.Yakobus 4:8.

19. (a) Fa yu kan tron wan mati fu Gado? (b) Sortuwan fu den fasi fu Yehovah yu moro lobi?

19 Fa yu kan tron wan mati fu Gado? Yesus ben taki: „Efu sma wani kisi têgo libi, den musu leri sabi yu, a wan-enkri tru Gado, èn a sma di yu seni kon, Yesus Krestes” (Yohanes 17:3). Tan leri sani fu Yehovah nanga Yesus, dan yu o kon sabi den moro bun. Na so yu o man libi fu têgo. Wi leri kaba taki „Gado na lobi” (1 Yohanes 4:16). Ma a abi tra moi fasi tu. Bijbel e taki dati Yehovah abi „sari-ati nanga switifasi. En ati no e bron esi, a abi bun-ati pasa marki, èn ala ten a e du san a e taki” (Eksodes 34:6). Yehovah na ’wan bun Gado èn a de klariklari fu gi sma pardon’ (Psalm 86:5). Gado abi pasensi èn a e horibaka gi en pipel (2 Petrus 3:9; Openbaring 15:4). Yu o leri furu tra moi fasi fu en te yu e leisi Bijbel.

20, 21. Fa wi kan tron wan mati fu Gado efu wi no man si en?

20 Ma fa yu kan de wan mati fu Gado efu yu no  man si en? (Yohanes 1:18; 4:24; 1 Timoteyus 1:17) Te yu e leisi sani fu Yehovah na ini Bijbel, dan yu o kon si en leki wan trutru sma (Psalm 27:4; Romesma 1:20). O moro yu e leri sani fu Yehovah, o moro yu o kon lobi en èn yu o tron wan moro bun mati fu en.

Wan papa lobi en pikin, ma wi hemel Tata lobi wi moro srefi

21 Yu o kon si taki Yehovah na wi Papa (Mateyus 6:9). Na en gi wi libi èn a wani taki wi abi wan bun libi. Na dati wan papa di lobi en pikin wani (Psalm 36:9). Iya, Bijbel e sori taki yu kan tron wan mati fu Yehovah (Yakobus 2:23). Denki a tori: Yehovah, a Gado di meki hemel nanga grontapu, wani de yu mati!

22. San yu musu du efu tra sma wani tapu yu fu studeri Bijbel?

22 Kande son sma wani taki yu tapu fu studeri Bijbel. A kan taki den frede taki yu o go na wan tra kerki. Ma no meki nowan sma tapu yu fu tron wan mati fu Yehovah. En na a moro bun mati di yu kan abi.

23, 24. (a) Fu san ede yu musu tan poti aksi? (b) San wi o luku na ini a tra kapitel?

23 Te yu e studeri Bijbel, son sani o de di yu no e frustan. Ma yu no musu syen fu poti aksi noso fu suku yepi. Yesus taki dati wi musu abi sakafasi neleki pikin-nengre (Mateyus 18:2-4). Pikin-nengre e poti furu aksi. Gado wani taki yu feni piki tapu den aksi fu yu. Fu dati ede yu musu studeri Bijbel finifini, so taki yu kan de seiker taki den sani di yu e leri tru.Leisi Tori fu den apostel 17:11.

24 A moro bun fasi fa yu kan leri sabi Yehovah, na fu studeri Bijbel. Na ini a tra kapitel wi o luku fu san ede Bijbel no de a srefi leki tra buku.

^ paragraaf 15 Efu a nen Yehovah no skrifi na ini yu Bijbel, noso efu yu wani sabi moro fini san a nen disi wani taki èn fa yu musu taki en, dan grantangi luku „Ete wan tu sani” 1.

Kon sabi moro

GADO ABI BUN NYUNSU GI WI!

Gado abi wan nen?

Gado abi furu titel soleki Moro Hei Gado, Mekiman nanga Masra. Ma Gado en eigi nen skrifi sowan 7000 tron na ini Bijbel.