Go na content

Go na table of contents

Yehovah Kotoigi

Tongo Sranantongo

 KAPITEL 3

San Gado wani gi libisma?

San Gado wani gi libisma?

1. San Gado wani gi libisma?

GADO wani taki libisma abi wan bun libi. A ben meki a fosi man nanga uma, Adam nanga Eva, èn a poti den fu libi na ini wan moi dyari. Gado ben wani taki den meki pikin, taki den meki a heri grontapu tron wan paradijs, èn taki den sorgu gi den meti. Na a libi dati Gado wani gi libisma te now ete.Genesis 1:28; 2:8, 9, 15; luku „Ete wan tu sani” 6.

2. (a) Fa wi sabi taki Gado o du san a ben wani? (b) Sortu sma Gado wani fu libi na grontapu èn fu o langa?

2 Yu denki taki wan ten o kon pe wi o man libi na ini wan paradijs? Yehovah e taigi wi: „Mi teki mi bosroiti kaba èn na dati mi o du tu” (Yesaya 46:9-11; 55:11). Iya, a o du san a taki èn nowan sani o man tapu en. Yehovah taki dati ’a no meki grontapu fu soso’ (Yesaya 45:18). A wani taki sma libi na grontapu. Sortu sma Gado wani fu libi na grontapu? Èn o langa a wani taki den libi na grontapu? Bijbel e taki: „Na den reti-ati sma [noso, den wan di e gi yesi] o kisi grontapu èn fu têgo den o tan libi drape.”Psalm 37:29; Openbaring 21:3, 4.

3. San wan sma kan aksi ensrefi te a e si fa sma e siki èn e dede?

3 Now sma e siki èn den e dede. Na furu presi sma e feti èn den e kiri makandra. Wi kan de seiker taki a no disi Gado ben wani. Sobun san kon pasa? Fu san ede sma e siki èn e dede? Bijbel wawan kan gi wi a piki.

 WAN FEANTI FU GADO

4, 5. (a) Suma gebroiki wan sneki fu taki nanga Eva na ini a dyari fu Eden? (b) Fa wan bun sma e tron wan fufuruman?

4 Bijbel e fruteri wi taki Gado abi wan feanti di den „e kari Didibri nanga Satan”. Satan ben gebroiki wan sneki fu taki nanga Eva na ini a dyari fu Eden (Openbaring 12:9; Genesis 3:1). A ben meki a gersi leki na a sneki ben e taki.—Luku „Ete wan tu sani” 7.

5 A de so taki na Gado meki Satan Didibri? Nôno, Gado no ben meki en leki fa a de now! Wan engel di ben de na ini hemel di Gado ben e sreka grontapu gi Adam nanga Eva, kenki kon tron Didibri (Yob 38:4, 7). Fa dati pasa? We, fa wan bun sma e tron wan fufuruman? Wan sma no e gebore leki wan fufuruman. Ma kande a wani wan sani di a no fu en. Efu a e tan denki a sani dati, dan den firi fu en o kon moro tranga. Te a kisi wan okasi, dan a o fufuru a sani. Na so wan fasi a e tron wan fufuruman.Leisi Yakobus 1:13-15; luku „Ete wan tu sani” 8.

6. Fa wan engel tron wan feanti fu Gado?

6 Na disi pasa nanga na engel dati. Baka di Yehovah meki Adam nanga Eva, a taigi den fu meki pikin ’teleki sma kon lai na grontapu’ (Genesis 1:27, 28). Kande na engel disi ben prakseri: ’Ala den sma disi kan anbegi mi na presi fu Yehovah!’ O moro a ben prakseri a sani disi, o moro a ben wani taki sma anbegi en na presi fu Yehovah. Dati meki a fruteri Eva wan lei èn a kori en. (Leisi Genesis 3:1-5.) Di a du a sani dati, dan a tron Satan Didibri, wan feanti fu Gado.

7. (a) Fu san ede Adam nanga Eva dede? (b) Fu san ede wi e kon owru èn e dede?

7 Adam nanga Eva trangayesi Gado èn den nyan a  froktu (Genesis 2:17; 3:6). Den sondu teige Yehovah èn bakaten den dede soleki fa Yehovah ben taki (Genesis 3:17-19). Den pikin fu Adam nanga Eva tron sondusma tu èn dati meki den dede te fu kaba. (Leisi Romesma 5:12.) Meki wi go luku wan eksempre di o yepi wi fu frustan fa den pikin fu Adam nanga Eva tron sondusma. Kon meki wi taki dati yu e baka kuku na ini wan blik di abi wan fow. A kuku o kisi a srefi fow fu a blik. Di Adam trangayesi Gado a tron wan sondusma. Fu di wi na bakapikin fu Adam, meki wi alamala na sondusma tu. Yu kan taki dati wi abi a srefi „fow” leki en. Fu di wi alamala abi sondu, meki wi e kon owru èn wi e dede.Romesma 3:23; luku „Ete wan tu sani” 9.

8, 9. (a) San Satan ben wani meki Adam nanga Eva bribi? (b) Fu san ede Yehovah no kiri den sma di trangayesi en wantewante?

8 Di Satan kisi Adam nanga Eva fu trangayesi Gado, dan a ben wani sori taki Yehovah no e tiri bun. A ben wani meki Adam nanga Eva bribi taki Yehovah e lei, taki en a no wan bun tiriman, èn taki a ben hori wan bun sani na baka gi den. Satan ben wani sori taki libisma no abi Gado fanowdu fu taigi den san den musu du èn taki Adam nanga Eva srefi kan bosroiti san bun èn san no bun. San Yehovah ben o du? A ben kan kiri ala den sma di trangayesi en èn sori taki a abi leti. Ma dati ben o sori taki Satan na wan leiman? Nôno!

9 Dati meki Yehovah no kiri den wantewante di den trangayesi en. Na presi fu dati a gi libisma na okasi fu tiri densrefi. Na so wan fasi a ben o kon na krin taki Satan na wan leiman èn taki Yehovah sabi san moro bun gi libisma. Wi o taki moro fara fu a tori disi na ini kapitel 11. Ma san yu e denki fu a sani di Adam nanga Eva  du? Yu denki taki den ben abi leti fu bribi Satan èn trangayesi Gado? Yehovah ben gi Adam nanga Eva ala sani di den ben abi fanowdu. Di a meki den, den no ben abi sondu, den ben libi na ini wan moi presi, èn a gi den wroko di ben e gi den prisiri. Ma Satan no ben du nowan bun sani gi den. Efu yu ben de drape, san yu ben o du?

10. Sortu prenspari bosroiti ibriwan fu wi musu teki?

 10 Na ini a ten disi ibriwan fu wi musu teki wan bosroiti tu. A bosroiti dati kan meki taki wi tan na libi noso taki wi lasi wi libi. Wi kan bosroiti fu arki Yehovah leki wi Tiriman. Na so wan fasi wi kan sori taki Satan na wan leiman. Noso wi kan bosroiti fu teki Satan leki wi tiriman. (Psalm 73:28; leisi Odo 27:11.) Furu sma na ini a grontapu disi no e arki Gado. Fu taki en leti, a no Gado e tiri a grontapu disi. Ma efu a no Gado e tiri a grontapu, dan suma e tiri en?

SUMA E TIRI GRONTAPU?

Yu denki taki Satan ben o man gi Yesus ala den kownukondre fu grontapu, efu den no ben de fu en?

11, 12. (a) Satan ben wani gi Yesus ala den kownukondre fu grontapu. San dati e leri wi? (b) Sortu tekst e sori taki Satan na a tiriman fu grontapu?

11 Yesus ben sabi suma e tiri grontapu. Wan leisi, Satan „sori Yesus ala den kownukondre fu grontapu nanga a moi fu den”. Ne Satan taigi Yesus: „Mi o gi yu ala den sani disi efu yu boigi èn anbegi mi wán leisi nomo” (Mateyus 4:8, 9; Lukas 4:5, 6). Aksi yusrefi: ’Efu den kownukondre dati no ben de fu Satan, a ben o man gi Yesus den?’ Nôno. Na Satan abi ala den kownukondre fu grontapu.

12 Kande yu e aksi yusrefi: ’Fa Satan kan de a tiriman fu grontapu? A no Yehovah na a Almakti Gado di meki hemel nanga grontapu?’ (Openbaring 4:11) Iya, dati tru, ma toku Yesus ben kari Satan „a tiriman fu grontapu” (Yohanes 12:31; 14:30; 16:11). Na apostel Paulus ben kari Satan Didibri „a gado fu a grontapu disi” (2 Korentesma 4:3, 4). Na apostel Yohanes ben skrifi tu taki „heri grontapu de na ini a makti fu na ogriwan”.1 Yohanes 5:19.

 FA A GRONTAPU FU SATAN O KISI PORI?

13. Fu san ede wi abi wan nyun grontapu fanowdu?

13 A grontapu disi e kon moro ogri dei fu dei. Wi e si taki feti lai, sma e du kruka sani, sma e kori trawan, èn ogri e pasa na ala sei. Awinsi o furu muiti libisma e meki, den no man puru ala den problema disi. Ma heri esi Gado o pori na ogri grontapu disi na ini a feti fu en di Bijbel e kari Armagedon. Dan a o tyari wan nyun grontapu kon pe retidu o de.Openbaring 16:14-16; luku „Ete wan tu sani” 10.

14. Suma Gado poti leki Kownu fu en Kownukondre? San Bijbel ben taki fu Yesus?

14 Yehovah poti Yesus Krestes leki Kownu fu en Kownukondre, a regering fu en di de na hemel. Dusundusun yari pasa, Bijbel ben taki dati Yesus ben o tiri leki „Granman fu Freide” èn taki a ben o tiri fu ala ten (Yesaya 9:6, 7). Yesus ben leri den bakaman fu en fu begi gi a regering disi. A ben taki: „Meki yu Kownukondre kon. Meki yu wani pasa na grontapu soleki fa a e pasa na hemel” (Mateyus 6:10). Na ini kapitel 8, wi o leri fa Gado Kownukondre o tron a wan-enkri regering di o tiri a grontapu disi. (Leisi Danièl 2:44.) Baka dati Gado Kownukondre o meki grontapu tron wan moi paradijs.—Luku „Ete wan tu sani” 11.

WAN NYUN GRONTAPU DE KROSIBEI!

15. San na a „nyun grontapu”?

15 Bijbel e pramisi: „Wi e fruwakti nyun hemel nanga wan nyun grontapu” èn „na drape retidu o de” (2 Petrus 3:13; Yesaya 65:17). Son leisi te Bijbel e taki fu „grontapu”, dan a wani taki den sma na grontapu (Deuteronomium 32:1). Sobun a „nyun  grontapu” na ala libisma di e gi yesi na Gado èn di Gado e blesi.

16. Sortu moi kado Gado o gi den sma di o libi na ini a nyun grontapu, èn san wi musu du fu man kisi a kado dati?

16 Yesus e pramisi taki den wan di o libi na ini a nyun grontapu fu Gado o kisi „ têgo libi” (Markus 10:30). San wi musu du efu wi wani kisi a kado disi? Grantangi, leisi Yohanes 3:16 nanga 17:3 fu feni a piki. Meki wi go luku now fa a libi o de na ini a Paradijs soleki fa Bijbel e taki.

17, 18. Fa wi du sabi taki freide o de na ala sei fu grontapu èn taki wi no o frede nowan sani?

17 Sma no o du ogri moro èn feti no o de moro. Nowan ogri sma o de na grontapu moro (Psalm 37:10, 11). ’Na ala sei fu grontapu Gado o meki feti kon na wan kaba’ (Psalm 46:9; Yesaya 2:4). Grontapu o furu nanga sma di lobi Gado èn di e du san a wani. Freide o de fu ala ten.Psalm 72:7.

18 A pipel fu Yehovah no o frede taki ogri o miti den. Na ini Bijbel ten, Gado ben kibri den Israelsma te den ben e gi yesi na en (Lefitikus 25:18, 19). Na ini a Paradijs wi no o frede taki wan sma noso wan sani o du wi ogri. Noiti wi o frede taki ogri o miti wi!Leisi Yesaya 32:18; Mika 4:4.

19. Fu san ede wi kan de seiker taki nofo nyanyan o de na ini a nyun grontapu?

19 Nofo nyanyan o de. „Furu nyanyan o kon de na grontapu. Srefi na tapu den ede fu den bergi nyanyan o de pasa marki” (Psalm 72:16). Yehovah „wi Gado, o blesi wi” èn „grontapu srefi o meki nyanyan”.Psalm 67:6.

20. Fa wi du sabi taki grontapu o tron wan paradijs?

20 Heri grontapu o tron wan paradijs. Libisma o  abi moi oso nanga moi dyari. (Leisi Yesaya 65:21-24; Openbaring 11:18.) Heri grontapu o kon moi leki a dyari fu Eden. Ala ten Yehovah o gi wi san wi abi fanowdu. Luku san Bijbel e taki fu Gado: „Yu e opo yu anu èn yu e gi ala libisani san den e angri fu kisi.”Psalm 145:16.

21. Fa wi du sabi taki libisma nanga meti o libi na ini freide?

21 Libisma nanga meti o libi na ini freide. Meti no o du ogri nanga libisma moro. Pikin-nengre no o frede nowan meti, srefi den meti di sma e frede na ini a ten disi.Leisi Yesaya 11:6-9; 65:25.

22. San Yesus o du gi sma di siki?

22 Nowan sma o siki. Di Yesus ben de na grontapu, a ben dresi furu sma (Mateyus 9:35; Markus 1:40-42; Yohanes 5:5-9). Ma leki Kownu fu a Kownukondre fu Gado, Yesus o meki ala sma kon betre. Nowan sma o taki: „Mi siki.”Yesaya 33:24; 35:5, 6.

23. San Gado o du gi sma di dede?

23 Dedesma o kon na libi baka. Gado pramisi taki a o wiki milyunmilyun sma di dede. „Gado sa gi wan opobaka na den sma di du san reti èn na den sma di no du san reti.”Leisi Yohanes 5:28, 29; Tori fu den apostel 24:15.

24. Fa yu denki a o de fu libi na ini a Paradijs?

24 Wi alamala man teki bosroiti. Wi kan bosroiti fu leri sabi Yehovah èn fu dini en, noso wi kan du san wi wani. Efu wi bosroiti fu dini Yehovah, wi o abi wan moi howpu gi a ten di e kon. Di wan man ben aksi Yesus fu memre en baka te a dede, dan Yesus pramisi en: „Yu o de nanga mi na ini Paradijs” (Lukas 23:43). Meki wi go luku moro fini now suma na Yesus Krestes èn fa a o meki den moi pramisi fu Gado kon tru.