Go na content

Go na a tra menu

Go na table of contents

Yehovah Kotoigi

Sranantongo

San Bijbel kan leri wi?

 KAPITEL 18

Mi musu gi misrefi abra na Gado èn mi musu dopu?

Mi musu gi misrefi abra na Gado èn mi musu dopu?

1. San yu kan aksi yusrefi baka te yu studeri a buku disi bun?

YU LERI furu sani fu Bijbel di yu studeri a buku disi. Yu kon sabi taki Gado pramisi fu gi wi têgo libi. Yu kon sabi tu san e pasa nanga den dedewan èn san na a opobaka (Preikiman 9:5; Lukas 23:43; Yohanes 5:28, 29; Openbaring 21:3, 4). Kande yu e go na den konmakandra fu Yehovah Kotoigi èn yu e bribi taki den abi a tru bribi (Yohanes 13:35). A kan taki yu tron wan bun mati fu Yehovah èn kande yu teki a  bosroiti taki yu wani dini en. Ma kande yu e aksi yusrefi: ’San mi musu du now fu man dini Gado?’

2. Fu san ede wan Etiopia man ben wani dopu?

2 Dati na san wan man fu Etiopia di ben e libi na ini a ten fu Yesus ben aksi ensrefi. Wan pisi ten baka di Yesus kisi wan opobaka, a disipel Filipus preiki gi a man disi. Filipus sori en krin taki Yesus na a Mesias. Den sani di a man disi leri naki en ati so te taki wantewante a taki: „Luku watra dya! San e tapu mi fu dopu?”Tori fu den apostel 8:26-36.

3. (a) Sortu komando Yesus gi den bakaman fu en? (b) Fa wan sma musu dopu?

3 Bijbel e sori krin taki yu musu dopu efu yu wani dini Yehovah. Yesus ben taigi den bakaman fu en: „Go na sma fu ala kondre èn meki den tron disipel. Dopu den” (Mateyus 28:19). Yesus srefi gi wi na eksempre fu di a dopu tu. A ben dukrun go na ondro watra, den no ben trowe pikinso watra na tapu en ede nomo (Mateyus 3:16). Sobun, te wan Kresten e dopu na ini a ten disi, dan en heri skin musu dukrun go na ondro watra.

4. Te yu e dopu, dan san dati e sori trawan?

4 Te yu e dopu, dan dati e sori trawan taki yu wani de wan mati fu Yehovah trutru èn yu wani dini en (Psalm 40:7, 8). Ma kande yu e aksi yusrefi: ’San mi musu du fu man dopu?’

SABI NANGA BRIBI

5. (a) San yu musu du, fosi yu man dopu? (b) Fu san ede den Kresten konmakandra prenspari?

5 Yu musu kon sabi Yehovah nanga Yesus, fosi yu man dopu. Yu bigin du disi kaba fu di yu e studeri  Bijbel. (Leisi Yohanes 17:3.) Ma dati no nofo. Bijbel e taki dati yu musu „sabi finifini” san na a wani fu Yehovah (Kolosesma 1:9). Den konmakandra fu Yehovah Kotoigi o yepi yu fu tron wan moro bun mati fu Yehovah. Dati meki a prenspari taki yu go na den konmakandra ala ten.Hebrewsma 10:24, 25.

Yu musu studeri Bijbel, fosi yu kan dopu

6. O furu yu musu sabi fu Bijbel, fosi yu kan dopu?

6 A no de fu taki dati Yehovah no e fruwakti taki yu sabi ala sani di de na ini Bijbel, fosi yu man dopu. A no ben fruwakti fu na Etiopiaman dati a ben musu sabi ala sani, fosi a ben man dopu (Tori fu den apostel 8:30, 31). Fu têgo wi o tan leri sani fu Yehovah (Preikiman 3:11). Ma fosi yu kan dopu, dan yu musu sabi èn bribi den moro prenspari leri fu Bijbel.Hebrewsma 5:12.

7. Fa a Bijbelstudie di yu e kisi yepi yu?

7 Bijbel e taki: „Sondro bribi wan sma no kan prisiri Gado” (Hebrewsma 11:6). Sobun yu musu abi bribi, fosi yu kan dopu. Bijbel e fruteri wi taki son sma na ini a foto Korente, ben yere san den bakaman fu Yesus ben e leri sma èn a bakapisi na taki den „tron bribiman èn den teki dopu” (Tori fu den apostel 18:8). Na so a de tu nanga yu. Fu di yu e studeri Bijbel meki yu kon abi bribi na ini den pramisi fu Gado èn ini a krakti fu na ofrandi fu Yesus di kan frulusu wi fu sondu nanga dede.Yosua 23:14; Tori fu den apostel 4:12; 2 Timoteyus 3:16, 17.

FRUTERI TRAWAN DEN TRU TORI FU BIJBEL

8. Fu san ede yu o wani fruteri trawan den sani di yu leri?

8 Te yu e leri moro fu Bijbel èn yu e si fa a e yepi yu  na ini yu libi, dan yu bribi o kon moro tranga. Yu o wani fruteri trawan den sani di yu e leri (Yeremia 20:9; 2 Korentesma 4:13). Ma suma yu o fruteri?

Te yu abi bribi, dan yu o wani fruteri trawan den sani di yu e leri

9, 10. (a) Suma yu kan bigin fruteri den sani di yu e leri? (b) San yu musu du efu yu wani preiki nanga a gemeente?

9 Yu kan fruteri yu famiri, yu mati, birtisma, noso sma na wrokope den sani di yu e leri. A bun taki yu e du dati, ma ala ten yu musu du disi na wan switi fasi. Te fu kaba yu o man go preiki nanga a gemeente. Te yu wani du disi, dan yu kan taki nanga a Kotoigi di e studeri nanga yu èn yu kan taigi en taki yu wani go preiki makandra nanga a gemeente. Efu a sma dati si taki yu man go na ini a preikiwroko èn taki yu e libi soleki fa Bijbel e taki, dan yu nanga en o abi wan takimakandra nanga tu owruman fu a gemeente.

10 Fu sortu sani den o taki na a takimakandra? Den owruman o taki nanga yu fu si efu yu e frustan èn bribi den moro prenspari leri fu Bijbel. Den o luku tu efu yu e libi soleki fa Bijbel e leri èn efu yu wani tron wan Yehovah Kotoigi trutru. Hori na prakseri taki den owruman e sorgu gi ala den sma fu a gemeente èn yu na wan fu den tu. Dati meki yu no abi fu frede fu taki nanga den (Tori fu den apostel 20:28; 1 Petrus 5:2, 3). Baka a takimakandra disi den owruman o taigi yu efu yu kan bigin preiki nanga a gemeente.

11. Fu san ede a prenspari taki yu tyari kenki kon fosi yu man preiki nanga a gemeente?

11 Kande den owruman o taigi yu taki yu musu kenki ete wan tu sani fosi yu kan bigin preiki nanga a gemeente. Fu san ede a prenspari taki yu tyari den kenki disi kon? Te wi e go taki nanga sma fu Gado,  dan wi e teki presi gi Yehovah èn dati meki wi musu libi na wan fasi di e gi en glori.1 Korentesma 6:9, 10; Galasiasma 5:19-21.

ABI BEROW ÈN DRAI YU LIBI

12. Fu san ede ala sma musu abi berow?

12 Wan tra sani de di yu musu du, fosi yu kan dopu. Na apostel Petrus ben taki: „Fu dati ede un musu abi berow èn un musu drai un libi, so taki Yehovah kan figi un sondu puru” (Tori fu den apostel 3:19). San a wani taki fu abi berow? A wani taki dati yu e firi sari fu ala den ogri sani di yu du. Fu eksempre, efu yu ben libi wan hurulibi, dan yu musu abi berow fu dati. Srefi efu yu ben meki muiti fu du san bun yu heri libi kaba, dan toku yu musu abi berow, fu di wi alamala e sondu èn wi musu aksi Gado fu gi wi pardon.Romesma 3:23; 5:12.

13. San a wani taki fu ’drai yu libi’?

13 A nofo taki yu e firi sari fu den sani di yu du? Nôno. Petrus ben taki tu dati yu musu ’drai yu libi’. Disi wani taki dati yu no musu libi moro soleki fa yu ben libi fosi, ma taki yu musu bigin du san bun. Meki wi luku wan eksempre: Prakseri taki yu e rèi go na wan presi fu a fosi leisi. Baka wan pisi ten yu e si taki yu no de na a yoisti pasi. San yu o du? A no de fu taki dati yu o stop, yu o drai baka èn dan yu o go na a yoisti pasi. Na so a de tu te yu e studeri Bijbel. Kande yu e si taki yu abi wan tu gwenti noso tra sani di yu musu kenki na ini yu libi. Te dati de so, dan yu musu de klariklari fu ’drai yu libi’, dati wani taki dati yu o tyari kenki kon, so taki yu kan bigin du san bun.

 GI YUSREFI ABRA NA GADO

Yu pramisi Yehovah taki yu o anbegi en?

14. Fa yu e gi yusrefi abra na Gado?

14 Wan tra prenspari sani di yu musu du fosi yu dopu na taki yu musu gi yusrefi abra na Yehovah. Te yu e gi yusrefi abra na Yehovah, dan yu e pramisi en na ini begi taki yu o anbegi en wawan èn taki a wani fu en o de a moro prenspari sani na ini yu libi.Deuteronomium 6:15.

15, 16. San e meki taki wan sma wani gi ensrefi abra na Gado?

15 Te yu e pramisi fu anbegi Yehovah wawan, dan a de neleki te yu e pramisi wan sma di yu lobi taki yu o tan nanga en yu heri libi langa. Kon meki wi taki dati wan man nanga wan uma e hori nanga makandra. O moro a man e kon sabi na uma, o moro a e kon lobi en èn te fu kaba a o wani trow nanga en. Aladi a bosroiti disi na wan seryusu sani, toku a man de klariklari fu teki a frantwortu na en tapu fu di a lobi na uma.

16 Te yu e kon sabi Yehovah moro bun, dan yu o kon lobi en èn yu o du ala san yu man fu anbegi en. Disi o meki taki yu o pramisi en na ini begi taki yu o dini en. Bijbel e taki dati iniwan sma di wani tron wan bakaman fu Yesus „no musu teri ensrefi moro” (Markus 8:34). San dati wan taki? Dati wani taki dati yu o gi yesi na Yehovah awinsi san e pasa. A wani fu Yehovah o prenspari moro leki den sani di yu wani du na ini a libi.Leisi 1 Petrus 4:2.

NO FREDE TAKI YU O MEKI FOWTU

17. Fu san ede son sma no wani gi densrefi abra na Yehovah?

17 Son sma no wani gi densrefi abra na Yehovah fu  di den e frede taki den no o man hori densrefi na a pramisi fu den. Den no wani meki Yehovah firi sari. Noso kande den e denki taki efu den no gi densrefi abra na Yehovah, dan den no abi fu gi frantwortu na en fu san den e du.

18. San o yepi yu fu no frede taki yu o du wan sani di o meki Yehovah firi sari?

18 Te yu lobi Yehovah, dan dati o yepi yu fu no frede taki yu o du wan sani di o meki a firi sari. Fu di yu lobi en, yu o du ala san yu man fu du san yu pramisi (Preikiman 5:4; Kolosesma 1:10). Yu no o denki taki a muilek tumusi fu du a wani fu Yehovah. Na apostel Yohanes ben skrifi: „Te wi lobi Gado, dan wi o hori den komando fu en. Toku den komando fu en no de wan hebi.”1 Yohanes 5:3.

19. Fu san ede yu no musu frede fu gi yusrefi abra na Yehovah?

19 Yu no abi fu de wan sma di no e meki fowtu, fu man gi yusrefi abra na Yehovah. Noiti a e fruwakti fu wi taki wi du moro leki san wi man (Psalm 103:14). A o yepi yu fu du san bun (Yesaya 41:10). Frutrow na tapu Yehovah nanga yu heri ati èn a „o meki yu pasi kon reti”.Odo 3:5, 6.

MEKI ALA SMA SABI TAKI YU GI YUSREFI ABRA NA YEHOVAH

20. San yu kan du, baka te yu gi yusrefi abra na Gado?

20 Yu denki taki yu kaba fu gi yusrefi abra na Yehovah? Baka te yu gi yusrefi abra na Yehovah, yu kan dopu.

21, 22. Fa yu kan meki ala sma sabi taki yu e bribi na ini Yehovah?

21 Taigi a fesiman fu den owruman fu yu gemeente taki yu gi yusrefi abra na Yehovah èn taki yu wani  dopu. A o seti sani so taki wan tu owruman kan luku den moro prenspari Bijbel leri nanga yu. Efu den si taki yu man dopu, dan den o taigi yu dati èn yu kan dopu na a fosi kring konmakandra noso kongres di e kon. Na a konmakandra dati wan lezing o hori di e fruteri san a wani taki fu dopu. A takiman di e hori a lezing o poti tu aksi gi den sma di wani dopu.  Te yu o piki den aksi dati, yu o meki ala sma sabi taki yu e bribi na ini Yehovah.Romesma 10:10.

22 Baka dati yu kan dopu. Yu heri skin o dukrun go na ondro watra. A dopu o sori ala sma taki yu gi yusrefi abra na Yehovah èn taki yu na wan Yehovah Kotoigi now.

 SAN A DOPU FU YU WANI TAKI?

23. San a wani taki fu dopu „na ini a nen fu a Tata, fu a Manpikin, èn fu a santa yeye”?

23 Yesus ben taki dati den disipel fu en ben o dopu „na ini a nen fu a Tata, fu a Manpikin, èn fu a santa yeye”. (Leisi Mateyus 28:19.) San dati wani taki? A wani taki dati yu e lespeki a makti fu Yehovah, yu e frustan sortu prenspari wroko Yesus kisi, èn fa Yehovah e gebroiki en santa yeye fu du san a abi na prakseri.Psalm 83:18; Mateyus 28:18; Galasiasma 5:22, 23; 2 Petrus 1:21.

Te yu e dopu yu e sori sma taki yu wani du a wani fu Gado

24, 25. (a) San a dopu fu yu wani taki? (b) San wi o luku na ini a lasti kapitel?

24 Dopu wani taki wan prenspari sani. Te den e dukrun yu heri skin go na ondro a watra, dan dati wani taki dati yu no o libi moro leki fa yu ben gwenti libi. Te yu o komoto na ini a watra, dan yu o bigin wan nyun libi pe a wani fu Yehovah e kon na fosi presi. A dopu fu yu e sori taki yu o dini Yehovah now. Hori na prakseri taki yu no gi yusrefi abra na wan libisma, wan organisâsi, noso wan wroko. Yu gi yusrefi abra na Yehovah.

25 Te yu gi yusrefi abra na Gado, dan dati e yepi yu fu tron wan bun mati fu en (Psalm 25:14). Disi no wani taki dati wan sma o kisi frulusu soso fu di a dopu. Na apostel Paulus ben skrifi: „Nanga frede èn nanga beifi un musu tan meki muiti fu kisi frulusu” (Filipisma 2:12). Dopu na a fosi sani di yu musu du fu kisi frulusu. Ma fa wi kan tan krosibei fu Yehovah? A lasti kapitel fu a buku disi o piki na aksi dati.