Go na content

Go na a tra menu

Go na table of contents

Yehovah Kotoigi

Sranantongo

San Bijbel kan leri wi?

 KAPITEL 2

Bijbel na wan buku di kon fu Gado

Bijbel na wan buku di kon fu Gado

1, 2. Fu san ede Bijbel na wan moi kado di Gado gi wi?

FA YU e firi te wan mati gi yu wan kado? Kande yu no man wakti fu opo en, èn yu breiti taki yu mati prakseri yu. Yu e taki en tangi gi a kado.

2 Bijbel na wan kado di Gado gi wi. Wi e leisi tori na ini di wi no man feni na nowan tra presi. A buku disi e fruteri wi taki Gado meki hemel, grontapu, nanga a fosi man nanga uma. Bijbel abi rai di kan yepi wi te wi abi problema. Bijbel e fruteri wi fa Gado o meki grontapu tron wan moro bun presi, soleki fa a ben wani na a bigin. Bijbel na wan moi kado!

3. San yu o leri te yu e studeri Bijbel?

3 Te yu e studeri Bijbel, dan yu o si taki Gado wani taki yu tron wan mati fu en. O moro yu e leri sabi Gado, o moro yu o tron wan bun mati fu en.

4. San yu feni moi fu Bijbel?

4 Bijbel vertaal na ini moro leki 2800 tongo, èn milyunmilyun fu a buku disi druk. A moro bigi pisi fu den sma na grontapu kan leisi Bijbel na ini den eigi tongo. Ibri wiki moro leki wán milyun sma e kisi wan Bijbel. Iya, nowan tra buku de leki Bijbel.

5. Fu san ede wi kan taki dati ’na Gado ben meki sma skrifi’ Bijbel?

5 Kande son sma e prakseri: ’Na libisma skrifi Bijbel, dan fa a kan kon fu Gado?’ Ma Bijbel e taki: „Na  Gado srefi ben meki sma skrifi ala den sani di de na ini Gado Buku.” (Leisi 2 Timoteyus 3:16.) Fa a du dati? Bijbel e taki: „Libisma ben taki san ben komoto fu Gado, soleki fa a santa yeye ben e sori den” (2 Petrus 1:21). Yu kan si a tori disi so: Efu wan bisnisman e aksi en sekretarsi fu skrifi wan brifi gi en, dan suma abi a brifi? Na fu a bisnisman, a no fu a sekretarsi. Na so a de tu taki Bijbel na wan buku fu Gado, a no fu den man di a gebroiki fu skrifi en. Gado meki den man disi skrifi san en ben wani. Bijbel na trutru „a wortu fu Gado”.1 Tesalonikasma 2:13; luku „Ete wan tu sani” 2.

A Bijbel—Nyun-Grontapuvertaling de na ini furu tongo

 ALA SAN SKRIFI NA INI BIJBEL TRU

6, 7. Fu san ede wi kan taki dati san skrifi na ini Bijbel e kruderi nanga makandra?

6 A ben teki moro leki 1600 yari fu skrifi a heri Bijbel. Den man di skrifi Bijbel no ben libi na a srefi ten. Sonwan fu den ben kisi bun skoroleri, ma a no alamala. Fu eksempre, wan fu den ben de wan datra. Trawan ben de gronman, fisiman, skapuman, profeiti, krutuman, nanga kownu. Aladi na difrenti man skrifi Bijbel, toku ala sani na ini Bijbel e kruderi nanga makandra. Yu no o leisi wan sani na ini a wan kapitel, dan a tra kapitel e taki dati a sani dati no de so. *

7 Den fosi kapitel fu a buku Genesis e fruteri wi fa den problema na grontapu bigin, èn den lasti kapitel fu a buku Openbaring e fruteri wi fa Gado o lusu den problema dati, so taki grontapu tron wan paradijs. Bijbel e sori wi san pasa na ini den someni dusun yari di libisma de na grontapu. A e sori tu taki te Gado abi wan sani na prakseri, a o du dati ala ten.

8. Kari wan tu sani di e sori taki Bijbel no e lei te a e taki fu sani di sabiman ondrosuku.

8 Bijbel a no wan skorobuku èn a no skrifi fu leri wi sani di sabiman ondrosuku. Ma te a e taki fu den sortu sani dati, dan wi e si taki a e taki san tru. Na dati wi kan fruwakti fu wan buku di kon fu Gado. Fu eksempre, na ini a buku Lefitikus wi e leisi sortu rai Gado ben gi den Israelsma so taki siki no panya esi-esi. A sani disi ben skrifi langa ten fosi sma kon sabi fa siki e  panya. Bijbel e taki krin tu taki grontapu no e anga na noti (Yob 26:7). Na a ten di furu sma ben e bribi taki grontapu plata, Bijbel ben taki dati grontapu lontu.Yesaya 40:22.

9. Den man di skrifi Bijbel ben taki fa sani pasa trutru. San disi e leri wi?

9 Ala san Bijbel e taki fu owruten na tru tori. Ma furu fu den buku di e taki fu sani di pasa na ini owruten, no e fruteri fa ala sani pasa trutru, fu di den sma di skrifi den ben kibri son tori. Fu eksempre, a no ala ten den e skrifi fu den feti di den kondre fu den lasi. Ma den man di skrifi Bijbel no ben de so. Den skrifi srefi fu den feti di Israel ben lasi. Den skrifi tu fu den fowtu di densrefi ben meki. Fu eksempre, na ini a buku Numeri, Moses e fruteri wi taki a ben meki wan seryusu fowtu èn Gado ben abi fu strafu en (Numeri 20:2-12). Den skrifiman disi ben taki krin fa sani de. Disi e sori taki Bijbel kon fu Gado èn taki wi kan frutrow san skrifi na ini.

WAN BUKU DI ABI BUN RAI

10. Fu san ede den rai fu Bijbel bun gi wi na ini a ten disi?

10 „Na Gado srefi ben meki sma skrifi ala den sani di de na ini Gado Buku. Den sani disi bun fu gi leri, fu gi rai, fu poti sani kon reti” (2 Timoteyus 3:16). Iya, den rai fu Bijbel kan yepi wi na ini a ten disi. Yehovah sabi fa wi meki. Sobun, a e frustan fa wi e denki èn fa wi e firi. A sabi wi moro bun leki wisrefi èn a wani taki wi de koloku. A sabi san bun gi wi èn san no bun gi wi.

11, 12. (a) Sortu bun rai Yesus gi na Mateyus kapitel 5 te go miti 7? (b) Sortu tra sani wi kan leri fu Bijbel?

11 Na ini Mateyus kapitel 5 te go miti 7, Yesus gi  wi bun rai di e sori fa wi kan de koloku, fa wi musu libi nanga tra sma, fa wi musu begi, èn fa wi musu si moni. Aladi a gi den rai dati moro leki 2000 yari pasa, toku den bun gi wi ete na ini a ten disi.

12 Na ini Bijbel Yehovah e leri wi tu fa wi osofamiri kan de koloku, fa wi kan de bun wrokoman, èn fa wi kan libi na ini freide nanga tra sma. Den rai fu Bijbel kan yepi wi ala ten, a no abi trobi suma na wi, pe wi e libi, noso sortu problema wi abi.Leisi Yesaya 48:17; luku „Ete wan tu sani” 3.

YU KAN BRIBI DEN PROFEITITORI NA INI BIJBEL

A Bijbel skrifiman Yesaya ben taki dati sma ben o wini Babilon

13. San ben o pasa nanga a foto Babilon, soleki fa Yesaya ben taki?

13 Furu Bijbel profeititori kon tru kaba. Wan fu den na a di fu Yesaya di e taki dati Babilon ben o kisi pori (Yesaya 13:19). Yesaya ben taki finifini fa sma ben o teki a foto abra. A foto ben abi bigi portu nanga wan liba di ben e sorgu taki feanti no ben man broko go na ini. Ma Yesaya ben taki dati a watra fu a liba ben o drei èn den portu fu a foto ben o opo. Den feanti ben o teki a foto abra sondro fu feti. Yesaya taki srefi dati wan man di nen Sirus ben o wini Babilon.Leisi Yesaya 44:27–45:2; luku „Ete wan tu sani” 4.

14, 15. Fa a profeititori fu Yesaya kon tru?

14 Tu hondro yari baka di Yesaya taki a profeititori, wan legre go fu feti nanga Babilon. Suma ben de a fesiman fu a legre? A ben de Sirus, a kownu fu Persia, soleki fa a profeititori ben taki. A legre fu Sirus ben o man wini Babilon?

15 A neti di a legre go feti, den Babilonsma ben abi wan fesa. Den no ben prakseri taki ogri ben kan miti  den, fu di a foto fu den ben abi bigi skotu èn wan liba ben lontu en. Ma Sirus nanga a legre fu en diki wan gotro so taki a watra fu a liba kan lon gowe. Na so a watra saka èn den srudati fu Persia ben man waka pasa na ini a liba. Ma fa a legre ben o man pasa den skotu fu Babilon? Neleki fa a profeititori ben taki, dan sma ben  libi den portu fu a foto opo. Sobun den srudati teki a foto abra sondro fu feti.

16. (a) San ben o pasa nanga Babilon, soleki fa Yesaya ben taki? (b) Fa wi du sabi taki a profeititori fu Yesaya kon tru?

16 Yesaya ben taki tu taki te fu kaba nowan sma ben o libi moro na ini Babilon. A ben skrifi: „Noiti moro wan sma o tan [noso, libi] na ini Babilon. Noiti moro a o de” (Yesaya 13:20). A sani disi kon tru? A presi pe a foto Babilon ben de, sowan 80 kilometer na a zuidsei fu a foto Bagdad na ini Irak, na wan brokopresi now. Te na a dei fu tide, nowan sma e libi drape. Yehovah ’figi Babilon puru neleki fa sma e figi wan sani nanga wan sisibi’.Yesaya 14:22, 23. *

A foto Babilon na wan brokopresi now

17. Fu san ede wi kan bribi ala den sani di Gado pramisi?

17 Furu Bijbel profeititori kon tru kaba. Dati meki wi kan bribi den sani di Bijbel e taki fu a ten di e kon. Wi  kan de seiker taki Yehovah o meki grontapu tron wan paradijs soleki fa a pramisi. (Leisi Numeri 23:19.) Iya, „wi abi a howpu fu libi fu têgo. Na dati Gado, di no man lei, pramisi wi langa ten pasa kaba.”Titus 1:2. *

BIJBEL KAN KENKI YU LIBI

18. San Paulus e taki fu „a wortu fu Gado”?

18 Wi leri taki nowan tra buku de leki Bijbel. Ala den tori na ini Bijbel e kruderi nanga makandra. Te a e taki fu sani di sabiman ondrosuku noso fu sani di pasa na ini owruten, dan den sani dati tru ala ten. Bijbel e gi wi bun rai tu èn furu fu den profeititori na ini kon tru kaba. Ma luku wan tra moi sani fu Bijbel. Na apostel Paulus ben skrifi: „A wortu fu Gado de na libi. A abi krakti.” San dati wani taki?Leisi Hebrewsma 4:12.

19, 20. (a) Fa Bijbel kan yepi yu fu kon sabi yusrefi moro bun? (b) Fa yu kan sori taki yu de nanga tangi gi a kado disi?

19 Bijbel kan kenki yu libi. A kan yepi yu fu kon sabi yusrefi moro bun. A kan yepi yu fu frustan fa yu e denki èn fa yu e firi dipi na ini yu ati. Son leisi wi kan denki taki wi lobi Gado. Ma te wi e leisi Bijbel a e yepi wi fu si taki lobi a no wan firi nomo, ma taki wi musu du san Bijbel e taki fu sori Gado taki wi lobi en.

20 Bijbel na trutru wan buku di kon fu Gado. Gado wani taki yu lobi a Bijbel, taki yu leisi en, èn taki yu studeri en. Sori taki yu de nanga tangi gi a kado disi èn tan studeri en. Dan yu o kon sabi san Gado o du gi libisma. Na ini a kapitel di e kon, wi o taki moro fara fu a tori disi.

^ paragraaf 6 Son sma e taki dati den sani di skrifi na ini Bijbel no e kruderi nanga makandra, ma dati no de so. Luku bladzijde 3 nanga 31 fu a brochure San na a boskopu fu Bijbel?, di Yehovah Kotoigi tyari kon na doro.

^ paragraaf 16 Efu yu wani sabi moro fu Bijbel profeititori, dan luku bladzijde 27-29 fu a brochure Een boek voor alle mensen. Yehovah Kotoigi tyari en kon na doro.

^ paragraaf 17 A pori di Babilon kisi na wán fu den profeititori na ini Bijbel di kon tru. Yu kan feni wan tu tra profeititori di e taki fu Yesus Krestes, na „Ete wan tu sani” 5.

Kon sabi moro

GADO ABI BUN NYUNSU GI WI!

Fa wi kan de seiker taki Bijbel e taki san tru?

Efu Bijbel e kon fu Gado, dan a no musu de leki den tra buku di sma skrifi.

SUMA E DU A WANI FU YEHOVAH NA INI A TEN DISI?

Fa sma kon sabi den tru tori fu Bijbel baka?

Fa wi kan de seiker taki wi e frustan bun san Bijbel e leri trutru?