Go na content

Go na a tra menu

Go na table of contents

Yehovah Kotoigi

Sranantongo

San Bijbel kan leri wi?

 KAPITEL 5

A lusu-paiman na a moro bigi kado di Gado gi wi

A lusu-paiman na a moro bigi kado di Gado gi wi

1, 2. (a) O ten wan kado abi waarde gi yu? (b) Fu san ede a lusu-paiman na a moro bigi kado di Gado gi wi?

SAN na a moro bigi kado di yu ben kisi? Wan kado no abi fu diri fosi a abi waarde gi yu. Te wan kado e meki yu firi koloku noso te a de wan sani di yu abi tranga fanowdu, dan yu e breiti nanga so wan kado.

2 Gado gi wi furu kado. Ma wan fu den kado disi na wan sani di wi abi tranga fanowdu. A de a moro bigi sani di Gado gi libisma. Na ini a kapitel disi wi o leri taki Yehovah seni en Manpikin, Yesus Krestes kon fu dede gi wi, so taki wi kan libi fu têgo. (Leisi Mateyus 20:28.) Yehovah sori taki a lobi wi trutru fu di a seni Yesus kon na grontapu fu gi en libi leki wan lusu-paiman gi wi.

SAN NA A LUSU-PAIMAN?

3. Fu san ede libisma e dede?

3 Nanga yepi fu a lusu-paiman Yehovah o meki wi kon fri fu sondu nanga dede (Efeisesma 1:7). Fu man frustan fu san ede a lusu-paiman ben de fanowdu, wi musu sabi san ben pasa dusundusun yari pasa na ini a dyari fu Eden. Den fosi bigisma fu wi, Adam nanga Eva ben sondu. Fu di den sondu, meki den dede. Wi e dede tu fu di wi kisi sondu fu Adam nanga Eva.—Luku „Ete wan tu sani” 9.

4. Suma na Adam èn san a kisi fu Yehovah?

 4 A libi di Yehovah ben gi a fosi man Adam ben de wan warti sani. Yehovah meki Adam sondro sondu. En frustan nanga en skin ben bun dorodoro, noiti a ben o kon siki, noiti a ben o owru èn noiti a ben o dede. Fu di na Yehovah ben meki Adam, meki a ben de leki wan papa gi en (Lukas 3:38). Yehovah ben gwenti taki nanga Adam. Gado ben taigi en krin san a musu du nanga san a no musu du, èn a ben gi en wroko di ben e meki a prisiri.Genesis 1:28-30; 2:16, 17.

5. Bijbel e taki dati Gado ben meki Adam „leki fa ensrefi de”. San dati wani taki?

5 Gado ben meki Adam „leki fa ensrefi de” (Genesis 1:27). Adam ben abi den srefi fasi fu Yehovah soleki lobi, koni, retidu nanga makti. Gado no ben meki Adam leki wan robot, ma a ben man teki en eigi bosroiti. Gado meki en na so wan fasi taki a ben kan bosroiti fu du bun noso ogri. Efu Adam ben arki Gado, dan a ben o man libi fu têgo na ini Paradijs.

6. Di Adam trangayesi Gado, dan san a lasi? Sortu bakapisi a sani disi abi gi wi?

6 Di Adam trangayesi Gado a lasi bun furu. A kisi dedestrafu, a no ben de mati nanga Yehovah moro, a kon kisi sondu, èn a no ben mag libi na ini a paradijs moro (Genesis 3:17-19). Adam nanga Eva ben bosroiti fu trangayesi Gado. Dati meki howpu no ben de gi den moro. Fu di Adam trangayesi Gado meki „sondu kon na grontapu èn sondu tyari dede kon. Dati meki ala sma e dede, bika den alamala sondu” (Romesma 5:12). Di Adam sondu a tron wan „srafu” fu sondu nanga dede. Wi srefi na srafu fu sondu nanga  dede (Romesma 7:14). Ma howpu de gi wi dan? Iya, Yehovah sorgu gi wan lusu-paiman.

7, 8. San na wan lusu-paiman?

7 San na wan lusu-paiman? A wortu lusu-paiman abi fu du nanga tu sani. A fosi sani na taki wan lusu-paiman e pai fu sorgu taki wan sma kon fri noso fu bai wan sani baka. A di fu tu sani na taki a lusu-paiman musu abi a srefi waarde leki a sani di yu wan bai baka.

8 Nowan sondu libisma ben o man pai fu meki wi kon fri fu a sondu nanga dede di Adam tyari kon. Ma Yehovah seti sani fu meki wi kon fri. Meki wi go luku san na a lusu-paiman di Yehovah seti gi wi èn fa wi kan kisi wini fu dati.

FA YEHOVAH SETI SANI FU PAI A LUSU-PAIMAN?

9. Sortu lusu-paiman ben de fanowdu?

9 Noiti wan libisma ben o man pai fu kisi a libi baka di Adam lasi. Fu san ede? Fu di wi alamala abi sondu (Psalm 49:7, 8). Na wan sma di no ben abi sondu ben kan pai a lusu-paiman. Dati meki Bijbel e kari en „wan paiman di fiti fu bai ala sma kon fri” (1 Timoteyus 2:6). A lusu-paiman ben musu abi a srefi waarde leki a libi di Adam ben lasi.

10. Sortu sani Yehovah seti fu pai a lusu-paiman?

10 Sortu sani Yehovah seti fu pai a lusu-paiman? Yehovah seni en lobi Manpikin kon na grontapu fu dede gi wi. A Manpikin disi na Yesus, a fosi sani di Yehovah meki (1 Yohanes 4:9, 10). Yesus ben de klariklari fu gowe libi en Tata nanga en oso na hemel (Filipisma 2:7). Yehovah meki Yesus gebore na grontapu leki wan libisma di no ben abi sondu.Lukas 1:35.

Yehovah gi en lobi Manpikin leki wan lusu-paiman gi wi

11. Fa wán man ben kan pai a lusu-paiman gi ala libisma?

 11 Fu di a fosi man Adam trangayesi Gado meki ala libisma abi sondu. Wan tra sma ben o man frulusu den bakapikin fu Adam fu dede? Iya. (Leisi Romesma 5:19.) Yesus di no du nowan sondu gi en libi leki wan lusu-paiman (1 Korentesma 15:45). Fu di a no ben abi sondu a ben man gi en libi fu frulusu den bakapikin fu Adam fu dede.1 Korentesma 15:21, 22.

12. Fu san ede Yesus ben musu pina so?

12 Bijbel e sori o furu Yesus pina fosi a dede. Den wipi en na wan ogri-ati fasi, den spikri en na wan postu èn den meki a dede wan hati dede (Yohanes 19:1, 16-18, 30). Fu san ede Yesus ben musu pina so? Fu di Satan ben taki dati nowan libisma ben o tan du san Yehovah wani te den e kisi tesi. Yesus sori taki wan libisma di no abi sondu kan tan du san Yehovah wani, srefi te a e kisi hebi tesi. Prakseri fa Yehovah ben musu fu prisiri nanga Yesus!Odo 27:11; luku „Ete wan tu sani” 15.

13. O ten a lusu-paiman ben pai?

13 O ten a lusu-paiman ben pai? Na ini a yari 33, tapu 14 Nisan fu a Dyu kalender, Yehovah gi pasi taki den feanti fu Yesus kiri en (Hebrewsma 10:10). Baka dri dei Yehovah wiki Yesus baka leki wan yeye. A no ben abi wan libisma skin moro. Di Yesus go na hemel a gi en Tata a waarde fu a libi di a ben gi leki lusu-paiman. Disi wani taki dati Yesus gi Gado a reti di a ben abi fu libi na grontapu fu têgo leki wan libisma di no abi sondu, so taki Gado ben kan gebroiki a reti dati fu gi den bakapikin fu Adam libi (Hebrewsma 9:24).  Yehovah sorgu gi a lusu-paiman disi so taki wi kan abi na okasi fu kon fri fu sondu nanga dede.Leisi Romesma 3:23, 24.

FA YU KAN KISI WINI FU A LUSU-PAIMAN?

14, 15. San wi musu du efu wi wani kisi pardon fu den sondu fu wi?

14 Wi e kisi wini kaba fu a bigi kado di Gado gi wi. Meki wi go luku fa wi e kisi wini na ini a ten disi èn fa wi o kisi wini na ini a ten di e kon.

15 Wi kan kisi pardon fu sondu. A muilek fu du san bun ala ten. Wi e meki fowtu, èn son leisi wi e taki sani di no bun (Kolosesma 1:13, 14). Fa wi kan kisi pardon? Wi musu sori taki a e hati wi taki wi du wan sani di no bun èn wi musu aksi Yehovah fu a gi wi pardon. Te wi du dati, dan wi kan de seiker taki wi o kisi pardon fu den sondu fu wi.1 Yohanes 1:8, 9.

16. San wi musu du efu wi wani kon abi wan bun konsensi?

16 Wi kan abi wan bun konsensi. Efu wi konsensi e trobi wi fu di wi du wan sani di no bun, dan wi kan firi brokosaka. Ma wi no abi fu lasi-ati. Efu wi begi Yehovah fu gi wi pardon, dan wi kan de seiker taki a o arki wi èn taki a o gi wi pardon tu (Hebrewsma 9:13, 14). Yehovah wani taki wi fruteri en iniwan problema noso swakifasi di wi abi (Hebrewsma 4:14-16). Te wi e taki nanga Yehovah fu den sani dati, dan wi kan kon abi wan bun konsensi.

17. Sortu blesi wi kan kisi fu di Yesus dede gi wi?

17 Wi abi a howpu taki wi o libi fu têgo. „A pai fu sondu na dede, ma a kado di Gado e gi sma na têgo libi nanga yepi fu Krestes Yesus wi Masra” (Romesma 6:23). Fu di Yesus dede gi wi meki wi o man  de gosontu èn wi o man libi fu têgo (Openbaring 21:3, 4). Ma san wi musu du fu kisi den blesi disi?

YU O POTI BRIBI NA INI A LUSU-PAIMAN?

18. Fa wi du sabi taki Yehovah lobi wi?

18 Prakseri fa yu e breiti te wan sma gi yu wan moi kado. A lusu-paiman na a moro bigi kado di Yehovah gi wi èn wi musu sori taki wi de nanga tangi gi a kado disi. Yohanes 3:16 e taki dati „Gado ben lobi grontapu so te, taki a gi en wan-enkri Manpikin”. Iya, Yehovah lobi wi so te taki a gi wi en lobi Manpikin, Yesus. Wi sabi tu taki Yesus srefi lobi wi, fu di a ben wani dede gi wi (Yohanes 15:13). Yu kan de seiker taki Yehovah nanga Yesus lobi yu trutru, fu di a lusu-paiman pai gi yu.Galasiasma 2:20.

Te wi e leri sabi Yehovah, dan wi o tron en mati èn wi o kon lobi en moro

19, 20. (a) Fa yu kan tron wan mati fu Yehovah? (b) Fa yu kan sori taki yu e bribi na ini a frulusu-ofrandi fu Yesus?

19 Now di yu leri fa Gado sori bigi lobi gi yu, dan fa yu kan tron wan mati fu en? A no makriki fu lobi wan sma di yu no sabi. Yohanes 17:3 e taki dati wi kan leri sabi Yehovah. Te yu e du dati, dan yu o kon abi moro lobi gi en, yu o wani du san a feni bun, èn yu o tron wan mati fu en. Sobun, tan studeri Bijbel so taki yu kan leri moro fu Yehovah.1 Yohanes 5:3.

20 Poti bribi na ini a frulusu-ofrandi fu Yesus. Bijbel e taki dati „a sma di e bribi na ini a Manpikin, e kisi têgo libi” (Yohanes 3:36). San a wani taki fu bribi na ini a frulusu-ofrandi? A wani taki dati wi musu du san Yesus leri wi (Yohanes 13:15). Wi no kan taki nomo dati wi e bribi na ini Yesus. Na den sani di wi e du o sori efu wi e bribi na ini a lusu-paiman. Na ini  Yakobus 2:26, wi e leisi: „Bribi na wan dede sani te wan sma no e du sani fu sori a bribi fu en.”

21, 22. (a) Fu san ede wi musu memre a dede fu Krestes ibri yari? (b) Fu sortu sani wi o taki na ini kapitel 6 nanga 7?

21 Memre a dede fu Krestes. A neti fosi Yesus dede, a leri wi taki wi musu memre a dede fu en. Dati meki ibri yari wi e hori san wi e kari a Memrefesa, noso „a neti-nyanyan fu Masra” (1 Korentesma 11:20; Mateyus 26:26-28). Yesus wani taki wi memre taki a gi en libi leki wan lusu-paiman gi wi. A ben taki: „Tan du disi fu memre mi.” (Leisi Lukas 22:19.) Te yu e go na a Memrefesa, dan na so wan fasi yu e memre a lusu-paiman èn a bigi lobi di Yehovah nanga Yesus sori gi wi.—Luku „Ete wan tu sani” 16.

22 A lusu-paiman na a moro bigi kado di wi kisi (2 Korentesma 9:14, 15). A moi kado disi o tyari wini srefi gi den milyunmilyun sma di dede kaba. Na kapitel 6 nanga 7 wi o taki moro fu a tori disi.

Kon sabi moro

KON KROSIBEI NA YEHOVAH

Yehovah e sorgu fu ’wan lusu-paiman fu frulusu furu sma’

Wan koni leri di no frekti srefisrefi kan yepi yu fu kon moro krosibei na Gado.