Go na content

Go na table of contents

Yehovah Kotoigi

Tongo Sranantongo

 KAPITEL 6

Pe den dedewan de?

Pe den dedewan de?

1-3. Sortu sani sma e aksi densrefi te wan sma dede? San den kerki e taki fu a tori disi?

BIJBEL e pramisi wi taki wan dei „dede no o de moro” (Openbaring 21:4). Na ini kapitel 5 wi leri taki a lusu-paiman meki taki wi o man kisi têgo libi. Ma toku sma e dede ete (Preikiman 9:5). Sobun, wan fu den prenspari sani di wi wani kon sabi na: ’San e pasa nanga wi te wi dede?’

2 Wi e angri fu kisi piki tapu na aksi disi spesrutu te wan sma di wi lobi dede. Kande wi e aksi wisrefi: ’Pe a sma fu mi go? A man si mi? A man yepi mi? Mi o si en baka wan dei?’

3 Den kerki e leri sma difrenti sani fu a tori disi. Son kerki e leri taki efu yu na wan bun sma yu o go na hemel. Ma efu yu na wan ogri sma yu o bron na ini hel. Trawan e taki dati te yu dede yu e tron wan yeye èn yu e go libi nanga den tra famiri fu yu di dede kaba. Tra kerki e taki dati te yu dede, yu e kisi krutu èn baka dati yu e gebore baka. Den e bribi taki yu e gebore leki wan tra sma, noso leki wan meti srefi.

4. San den kerki e leri sma fu den dedewan?

4 Kande a gersi leki den kerki e leri difrenti sani fu a tori disi. Ma te yu luku en bun, dan den alamala e leri a srefi sani. Den e leri taki te wan sma dede, dan wan sani fu en e libi go doro. A sani disi tru?

 SAN E PASA NANGA WI TE WI DEDE?

5, 6. San e pasa nanga wi te wi dede?

5 Yehovah sabi san e pasa nanga wi te wi dede. A taigi wi taki te wan sma dede, a no e libi go doro. Sobun a no abi firi moro èn a no e memre noti moro. * Te wi dede, wi no man si, wi no man yere, èn wi no man prakseri noti moro.

Kownu Salomo ben skrifi taki „den dedewan no sabi notinoti”. Dedesma no man lobi sma èn den no man teige sma tu. ’Na ini Grebi sma no e wroko, den no e prakseri, den no sabi sani èn den no abi koni.’ (Leisi Preikiman 9:5, 6, 10.) Na Psalm 146:4, Bijbel e taki dati te wan sma dede „den prakseri fu en” e lasi gowe.

SAN YESUS BEN TAKI FU SMA DI DEDE?

Yehovah ben meki libisma fu libi fu têgo na grontapu

7. San Yesus ben taki fu sma di dede?

7 Di Lasarus, wan bun mati fu Yesus ben dede, dan Yesus taigi den disipel fu en: „Wi mati Lasarus e sribi.” Ma Yesus no ben wani taki dati Lasarus ben e rostu. Dati meki a taki moro fara: „Lasarus dede” (Yohanes 11:11-14). Sobun, Yesus ben e si dede leki wan sribi. A no ben taki dati Lasarus go na hemel noso taki a ben de nanga den famiri fu en di dede kaba. A no taki tu dati Lasarus ben e pina na ini hel noso taki a ben gebore leki wan tra sma noso leki wan meti. Nôno, a ben de leki Lasarus de na ini wan dipi sribi. Na wan tra presi ini Bijbel, Yesus e agersi dede nanga sribi tu. Di a  meisje fu Yairus ben dede, dan Yesus ben taki dati „a no dede, ma a e sribi”.Lukas 8:52.

8. Fa wi du sabi taki Gado no ben meki libisma fu dede?

8 Di Gado meki Adam nanga Eva, a ben wani taki den dede te fu kaba? Nôno! Yehovah ben wani taki den prisiri fu têgo fu a libi sondro fu kon siki. Gado meki libisma nanga a firi fu libi fu têgo (Preikiman 3:11). Nowan papa noso mama wani taki en pikin kon siki èn dede. Yehovah no wani dati tu. Ma efu Gado meki wi fu libi fu têgo, dan fu san ede wi e dede?

 FU SAN EDE WI E DEDE?

9. Fu san ede a no ben muilek gi Adam nanga Eva fu gi yesi na a wet fu Yehovah?

9 Na ini a dyari fu Eden, Yehovah taigi Adam: „Fu ibri bon na ini a dyari yu kan nyan teleki yu bere furu. Ma fu a bon di nen ’Sabi san bun èn san ogri’, yu no musu nyan, bika na a dei di yu o nyan fu en, na dede yu o dede” (Genesis 2:9, 16, 17). A no ben muilek fu gi yesi na Yehovah, fu di a ben sori den krin san den no ben musu du. Yehovah ben abi a reti tu fu taigi Adam nanga Eva san bun èn san ogri. Te den ben gi yesi na Yehovah, dan den ben o sori taki den e lespeki en leki Tiriman. Den ben o sori tu taki den de nanga tangi gi ala san Yehovah ben gi den.

10, 11. (a) Fa Satan meki taki Adam nanga Eva trangayesi Gado? (b) Fu san ede Adam nanga Eva no ben kan kisi pardon gi san den du?

10 A sari taki Adam nanga Eva bosroiti fu trangayesi Yehovah. Satan taigi Eva: „A de so trutru taki Gado taki dati un no musu nyan fu ala den bon na ini a dyari?” Eva piki en: „Wi kan nyan den froktu fu den bon na ini a dyari. Ma fu den froktu fu a bon di de na mindrisei fu a dyari, Gado taki: ’Un no musu nyan den, nôno, un no musu fasi a bon srefi, noso unu o dede.’”Genesis 3:1-3.

11 Ne Satan taki: „Unu no o dede kwetikweti, bika Gado sabi taki na a dei di unu o nyan den froktu, un ai o opo èn unu o de leki Gado. Unu o sabi san bun èn san ogri” (Genesis 3:4-6). Satan ben wani meki Eva bribi taki ensrefi ben kan bosroiti san bun èn san ogri. Boiti dati a lei gi en taki a no ben o dede efu a ben trangayesi Yehovah. Dati meki Eva nyan fu a froktu èn a gi en  masra meki a nyan tu. Adam nanga Eva ben sabi taki Yehovah ben taigi den taki den no ben musu nyan fu a froktu. Di den nyan a froktu, dan fu espresi den trangayesi Yehovah di ben sori den krin san den no ben musu du. Den ben sori taki den no abi lespeki gi den Tata na hemel di ben lobi den. Den no ben kan kisi pardon gi a sani di den du!

12. Fu san ede a de wan sari sani taki Adam nanga Eva trangayesi Yehovah?

12 A de wan sari sani taki den fosi bigisma fu wi no ben abi nowan lespeki gi a Mekiman fu den. Fa yu ben o firi efu yu du tranga muiti fu kweki wan boi nanga wan meisje, dan bakaten den e du san den wani, na presi fu du san yu taigi den? A sani dati no ben o hati yu?

Gado ben meki Adam fu doti èn a tron doti baka

13. Fu san ede Yehovah taigi Adam taki a ben o tron doti baka?

13 Di Adam nanga Eva trangayesi Gado, dan den no ben man libi fu têgo moro. Dati meki Yehovah taigi Adam: „Na fu doti yu meki èn na doti yu o tron baka.” (Leisi Genesis 3:19.) Sobun, Adam ben o kon tron doti baka. A ben o de leki Gado noiti no ben meki en (Genesis 2:7). Baka di Adam sondu, a dede èn noti fu en ben de moro.

14. Fu san ede wi e dede?

14 Efu Adam nanga Eva ben arki Gado, den ben o de na libi te now  ete. Ma di den trangayesi Gado, den tron sondusma èn den dede te fu kaba. Sondu de leki wan takru siki di wi kisi fu Adam nanga Eva. Wi alamala gebore nanga sondu èn dati meki wi e dede (Romesma 5:12). Ma a no dati Gado ben wani gi libisma. Noiti Gado ben wani taki libisma ben musu dede. Dati meki Bijbel e kari dede wan „feanti”.1 Korentesma 15:26.

WI E KON FRI TE WI SABI SAN E PASA TE WAN SMA DEDE

15. Fa wi e kon fri te wi sabi san e pasa nanga den dedewan?

15 Te wi kon sabi san e pasa te wan sma dede, dan wi no o bribi ala sortu sani moro. Bijbel e leri wi taki dedesma no e firi pen èn de no e sari tu. Wi no man taki nanga den èn den no man taki nanga wi. Wi no man yepi dedesma èn den no man yepi wi. Den no man du nowan ogri nanga wi, fu dati ede wi no abi fu frede den. Toku furu kerki e leri taki den dedesma e libi go doro na wan tra presi, èn taki wi kan yepi den te wi e pai priester noso tra kerki fesiman fu begi gi den. Te wi kon sabi san Bijbel e leri fu den dedewan, dan wi no o bribi den sortu lei dati.

16. Sortu lei furu kerki e leri sma?

16 Satan e gebroiki falsi kerki fu fruteri lei. Den e meki sma bribi taki sma di dede e libi go doro. Fu eksempre, son kerki e leri taki te wi dede, wan sani fu wi e libi go doro na wan tra presi. Na dati a kerki fu yu leri yu, noso a e leri yu san Bijbel e taki fu sma di dede? Satan e kori sma so taki den no wani kon sabi Yehovah.

17. Fu san ede Yehovah e kisi porinen te sma e taki dati dedesma e bron na ini hel?

17 Yu o skreki fu sabi san furu kerki e leri. Sonwan e  leri taki ogrisma o bron fu têgo na ini hel. A lei disi e gi Yehovah porinen. Noiti a ben o meki sma pina na a fasi dati! (Leisi 1 Yohanes 4:8.) Fa yu ben o feni en efu wan sma e bron den anu fu en pikin na ini faya, soso fu di a wani strafu en? Yu ben o si en leki wan ogri-ati sma. Yu no ben o wani tron mati fu so wan sma. Na so Satan wani taki wi denki fu Yehovah.

18. Fu san ede wi no musu frede dedesma?

18 Son kerki e leri taki sma di dede e tron yeye. Den sortu kerki disi e leri taki wi musu lespeki noso frede sma di dede, fu di den kan tron makti yeye di kan du bun gi wi noso di kan du ogri nanga wi. Furu sma e bribi den lei disi. Den e frede dedesma èn dati meki den e anbegi den dedewan na presi fu anbegi Yehovah. No frigiti taki sma di dede no sabi notinoti. Sobun wi no abi fu frede den. Yehovah na a sma di meki ala sani. En na a tru Gado èn wi musu anbegi en wawan.Openbaring 4:11.

19. Te wi kon sabi san Bijbel e leri fu den dedewan, dan fa dati e yepi wi?

19 Te wi kon sabi san Bijbel e leri fu den dedewan, dan wi no o bribi den lei di kerki e leri sma. A sani disi e yepi wi fu frustan den moi sani di Yehovah pramisi wi gi a ten di e kon.

20. San wi o leri na ini a tra kapitel?

20 Langa ten pasa, wan futuboi fu Gado di nen Yob, ben aksi: „Efu wan libisma dede, a kan kon na libi baka?” (Yob 14:14) Yu denki taki wan sma di dede man kon na libi baka? Yu o breiti fu sabi san Gado e taigi wi na ini Bijbel. Na ini a tra kapitel wi o taki fu a tori disi.

^ paragraaf 5 Son sma e bribi taki libisma abi wan yeye noso sili di e libi go doro baka te den dede. Ma Bijbel no e taki dati. Efu yu wani sabi moro, dan luku „Ete wan tu sani” 17 nanga 18.