Go na content

Go na a tra menu

Go na table of contents

Yehovah Kotoigi

Sranantongo

San Bijbel kan leri wi?

 KAPITEL 12

Fa yu kan tron wan mati fu Gado?

Fa yu kan tron wan mati fu Gado?

1, 2. Kari wan tu sma di ben de mati fu Yehovah.

SUMA yu wani leki mati? Yu wani de mati nanga wan sma te yu lobi fa a de. Yu musu man feni en nanga a sma èn a musu man feni en nanga yu. A musu abi switifasi èn a musu abi tra moi fasi tu di yu lobi.

2 Yehovah Gado e teki son sma fu de en mati. Fu eksempre, Abraham ben de wan mati fu Yehovah (Yesaya 41:8; Yakobus 2:23). Yehovah ben lobi David tu. A ben taki dati David ben de ’wan man di a lobi’ (Tori fu den apostel 13:22). Èn a profeiti Danièl ben de wan sma di Yehovah „lobi srefisrefi”.Danièl 9:23.

3. Fa a du kon taki Abraham, David, nanga Danièl ben de Yehovah mati?

3 Fa a du kon taki Abraham, David, nanga Danièl ben tron mati fu Yehovah? Yehovah ben taigi Abraham: „Yu arki mi” (Genesis 22:18). Yehovah e tron mati fu sma di abi sakafasi èn di e gi yesi na en. Srefi wan heri pipel ben kan tron mati fu en. Yehovah ben taigi den Israelsma: „Gi yesi na mi, dan mi o tron un Gado èn unu o tron mi pipel” (Yeremia 7:23). Sobun, yu musu gi yesi na Yehovah efu yu wani tron en mati.

YEHOVAH E KIBRI DEN MATI FU EN

4, 5. Fa Yehovah e kibri den mati fu en?

4 Bijbel e taki dati Yehovah e suku fasi fu „sori a krakti fu en fu yepi den wan di e dini en nanga den  heri ati”(2 Kroniki 16:9). Na ini Psalm 32:8, Yehovah e pramisi den mati fu en: „Mi o gi yu koni èn mi o sori yu a pasi di yu musu waka. Mi o gi yu rai èn mi o luku yu.”

5 Wan makti feanti e suku fu tapu wi fu de Gado mati. Ma Yehovah wani kibri wi. (Leisi Psalm 55:22.) Leki mati fu Yehovah wi e dini en nanga wi heri ati. Wi e tan gi yesi na en, srefi te a muilek gi wi. Wi abi a srefi frutrow leki a psalm skrifiman. A ben skrifi fu Yehovah: „Fu di a de na mi reti-anusei, meki mi no o naki futu” (Psalm 16:8; 63:8). Fa Satan e suku fu tapu wi fu de mati fu Yehovah?

SATAN E TAKI OGRI FU LIBISMA

6. San Satan taki fu libisma?

6 Na ini kapitel 11 wi leri dati Satan ben taki dati Yehovah na wan leiman èn taki a no e du sani na wan reti fasi, fu di a no meki Adam nanga Eva bosroiti gi densrefi san bun èn san ogri. A Bijbel buku Yob e leri wi taki Satan taki dati libisma wani tron mati fu Gado fu di den e suku den eigi bun. Den no e dini Gado fu di den lobi en. Satan taki srefi dati a man meki iniwan sma drai baka gi Gado. Meki wi go luku san wi kan leri fu Yob èn fa Yehovah kibri en.

7, 8. (a) Suma na Yob? (b) San Satan ben taki fu Yob?

7 Suma na Yob? Yob ben de wan bun man di ben libi sowan 3600 yari pasa. Yehovah ben taki dati na a ten dati nowan sma na grontapu ben de leki en. Yob ben abi dipi lespeki gi Gado èn a no ben lobi ogri srefisrefi (Yob 1:8). Iya, Yob ben de wan trutru mati fu Yehovah.

 8 Satan taki dati Yob ben dini Gado fu di a e suku en eigi bun. Satan ben taigi Yehovah: „A no yusrefi meki wan skotu lontu en, lontu en oso, èn lontu ala sani di a abi? Yu blesi ala den sani di a du, èn srefi den meti fu en kon furu na grontapu. Ma grantangi, langa yu anu now èn puru ala den sani di a abi, dan yu o si efu a no o fluku yu leti na ini yu fesi.”Yob 1:10, 11.

9. Sortu okasi Yehovah gi Satan?

9 Satan ben taki dati Yob ben dini Yehovah soso fu di a ben e kisi sani fu en. Satan ben taki tu dati a ben kan meki taki Yob no dini Yehovah moro. Aladi Yehovah no ben agri nanga Satan, toku a gi en na okasi fu tesi Yob. Disi ben o sori efu Yob na wan mati fu Yehovah fu di a ben lobi Gado.

SATAN E TESI YOB

10. San Satan du nanga Yob èn san Yob du di dati pasa?

10 A fosi sani di Satan du, na taki a meki sma fufuru noso kiri den meti fu Yob. Baka dati Satan kiri bijna ala den wrokoman fu Yob. Yob lasi ala sani. Te fu kaba Satan kiri den tin pikin fu Yob na ini wan bigi winti. Ma Yob no drai baka gi Yehovah. „Aladi den sani disi ben e pasa nanga Yob, toku a no sondu èn a no taki nowan ogri fu Gado.”Yob 1:12-19, 22.

Yob no drai baka gi Yehovah èn dati meki Yehovah blesi en

11. (a) San moro Satan du nanga Yob? (b) San Yob du di dati pasa?

11 Ma Satan no ben kaba nanga Yob. A taigi Gado: „Du wan ogri sani nanga Yob srefi. Meki a firi en te na ini en bonyo srefi, dan yu o si efu a no o fluku yu leti na ini yu fesi.” Dati meki Satan meki Yob kisi wan siki di ben gi en furu skin-ati (Yob 2:5, 7). Ma toku, Yob  no drai baka gi Yehovah. A taki: „Mi o tai hori na Gado teleki mi hari mi lasti bro!”Yob 27:5.

12. Fa Yob sori taki Satan na wan leiman?

12 Yob no ben sabi noti fu den lei di Satan ben taki èn a no ben sabi fu san ede a ben e pina so. A ben denki taki na Yehovah ben meki den sani pasa nanga en (Yob 6:4; 16:11-14). Ma toku, a ben tai hori na Yehovah. Now a ben de krin taki Yob no ben e prakseri ensrefi nomo. A ben de Yehovah mati fu di a ben lobi en. Satan ben lei gi en.

13. San ben de a bakapisi di Yob no drai baka gi Yehovah?

13 Aladi Yob no ben sabi san ben pasa na ini hemel, toku a no drai baka gi Gado. A sori taki Satan abi ogri-ati. Yob ben de Yehovah mati trutru èn dati meki Yehovah blesi en.Yob 42:12-17.

SAN SATAN E TAKI FU YU?

14, 15. San Satan e taki fu ala man nanga uma?

14 Yu kan leri wan tu prenspari sani fu a tori fu Yob. Na ini a ten disi tu Satan e taki dati wi e dini Yehovah fu di wi e suku wi eigi bun. Na ini Yob 2:4, Satan e taki: „Te wan sma de fu dede, a o gi ala san a abi fu man tan na libi.” Sobun, Satan no ben taki fu Yob wawan dati a e prakseri ensrefi nomo, ma a ben taki dati fu ala man nanga uma. Hondrohondro yari baka di Yob dede, Satan ben e taki lei ete fu Yehovah nanga den anbegiman fu en. Fu eksempre, na ini Odo 27:11 wi e leisi: „Mi manpikin, de koni èn meki mi ati prisiri, so taki mi kan gi wan piki na a sma di e spotu mi.”

15 Yu kan bosroiti fu gi yesi na Yehovah èn fu de en mati. Na so yu e sori dati Satan na wan leiman. Srefi  efu yu musu tyari bigi kenki kon na ini yu libi fu tron wan mati fu Gado, a o de a moro bun bosroiti di yu teki. A bosroiti disi na wan seryusu sani. Satan e taki dati yu o drai baka gi Gado te yu abi problema. A e pruberi fu kori wi fu no gi yesi na Gado. Fa a e du dati?

16. (a) San na wan tu fasi fa Satan e pruberi fu tapu sma fu dini Yehovah? (b) Fa Didibri kan pruberi fu tapu yu fu dini Yehovah?

16 Satan abi furu fasi fa a e pruberi fu tapu wi fu de mati nanga Yehovah. Son leisi a e kon na wi tapu „leki wan lew di e bari, fu di a e suku fu swari wan sma” (1 Petrus 5:8). Dati meki yu no musu skreki te mati, famiriman nanga trawan e pruberi fu tapu yu fu studeri Bijbel èn fu du san bun. Kande a o gersi leki ala sma de teige yu (Yohanes 15:19, 20). * Satan e du tu „neleki en na wan engel fu leti”. A kan pruberi fu kori wi fu trangayesi Yehovah (2 Korentesma 11:14). Wan tra fasi fa Satan e pruberi fu tapu wi fu anbegi Yehovah, na taki a e meki wi denki taki wi no bun nofo fu dini Gado.Odo 24:10.

GI YESI NA DEN WET FU YEHOVAH

17. Fu san ede wi e gi yesi na Yehovah?

17 Te wi e gi yesi na Yehovah, dan wi e sori taki Satan na wan leiman. San o yepi wi fu gi yesi? Bijbel e taki: „Un musu lobi Yehovah un Gado nanga un heri ati, nanga un heri libi, èn nanga ala un krakti”  (Deuteronomium 6:5). Wi e gi yesi na Yehovah fu di wi lobi en. Te wi e kisi moro lobi gi Yehovah, dan wi o wani du ala sani di a e aksi fu wi. Na apostel Yohanes ben skrifi: „Te wi lobi Gado, dan wi o hori den komando fu en. Toku den komando fu en no de wan hebi.”1 Yohanes 5:3.

18, 19. (a) San na wan tu sani di Yehovah no feni bun? (b) Fa wi du sabi taki Yehovah no e aksi wi fu du sani di wi no man?

18 Ma san na wan tu sani di Yehovah no feni bun? Wan tu eksempre kari na ini a faki „ No lobi den sani di Yehovah no lobi”. Kande yu e denki taki wan tu fu den sani di kari no ogri so. Ma te yu e leisi den Bijbeltekst èn yu e denki dipi fu den, dan yu o si taki na wan koni sani fu gi yesi na den wet fu Yehovah. Kande yu e si tu taki yu musu kenki wan tu sani na ini yu libi. A sani disi kan muilek son leisi. Ma te yu tyari den kenki  kon, dan yu o abi freide èn yu o de koloku fu di yu na wan mati fu Gado (Yesaya 48:17, 18). Fa wi du sabi taki unu man tyari kenki kon?

19 Noiti Yehovah e aksi wi fu du wan sani di wi no man (Deuteronomium 30:11-14). Leki wan trutru mati a sabi wi moro bun leki fa wi sabi wisrefi. A sabi san wi man du èn san wi no man du (Psalm 103:14). Na apostel Paulus e gi wi a deki-ati disi: „Unu kan frutrow Gado. A no o meki unu kisi tesi di hebi moro leki san unu man tyari. Ma te tesi miti unu, a o yepi unu, so taki unu man horidoro”(1 Korentesma 10:13). Wi kan de seiker taki ala ten Yehovah o gi wi a krakti fu du san bun. A o gi yu „a krakti di bigi pasa marki”, so taki yu kan horidoro na ini muilek situwâsi (2 Korentesma 4:7). Baka di Paulus si fa Yehovah yepi en na ini muilek situwâsi a taki: „Mi man du ala  sani nanga yepi fu a sma di e gi mi krakti.”Filipisma 4:13.

KON LOBI DEN SANI DI GADO LOBI

20. Sortu fasi yu musu meki muiti fu abi, èn fu san ede?

20 Efu wi wani de wan mati fu Yehovah, dan wi no musu du sani moro di a no feni bun (Romesma 12:9). Ma a no dati wawan. Den mati fu Gado musu lobi den sani di a lobi tu. Den sani disi skrifi na Psalm 15:1-5. (Leisi en.) Den mati fu Yehovah e meki muiti fu abi den srefi fasi leki en. Wan tu fu den fasi disi na „lobi, prisiri, freide, langa pasensi, switifasi, bun-ati, bribi, safri-ati, a dwengi di wan sma man dwengi ensrefi”.Galasiasma 5:22, 23.

21. Fa yu kan kon abi den fasi di Gado lobi?

21 Fa yu kan kon abi den moi fasi disi? Yu musu abi a gwenti fu leisi èn studeri Bijbel fu kon sabi san Yehovah lobi (Yesaya 30:20, 21). Te yu e du disi, dan yu o kon abi moro lobi gi Yehovah èn disi o meki taki yu o wani gi yesi na en.

22. San o de a bakapisi te yu e gi yesi na Yehovah?

22 Den kenki di yu musu tyari kon na ini yu libi de neleki yu e puru owru krosi, dan yu e weri nyunwan. Bijbel e taki dati yu musu ’kenki a fasi fa yu ben de fosi’ èn tron wan nyun sma di kisi „nyun fasi” (Kolosesma 3:9, 10). A kan muilek fu gi yesi na Yehovah èn fu tyari den kenki disi kon. Ma Yehovah e pramisi fu gi wi „furu blesi” te wi e du dati (Psalm 19:11). Iya, teki a bosroiti fu gi yesi na Yehovah èn sori taki Satan na wan leiman. No dini Yehovah fu den sani di yu kan kisi, ma dini en fu di yu lobi en. Te yu e du dati, dan yu o de wan trutru mati fu Gado!

^ paragraaf 16 Disi no wani taki dati te wan sma e suku fu tapu wi fu studeri Bijbel, dan na Satan seni en fu du dati. Ma Satan na „a gado fu a grontapu disi” èn „heri grontapu de na ini a makti” fu en. Dati meki wi no e fruwondru te son sma wani tapu wi fu dini Yehovah.2 Korentesma 4:4; 1 Yohanes 5:19.

Kon sabi moro

KON KROSIBEI NA YEHOVAH

A de so trutru taki yu kan „kon krosibei na Gado”?

Yehovah Gaado, a Mekiman fu hemel nanga grontapu, e gi wi wan kari di abi wan pramisi na ini tu.

STUDIE-WAKTITOREN

Fa wi kan sori taki wi lobi Yehovah?

A de moro leki wan firi nomo di wi abi na ini wi ati.