Go na content

Go na table of contents

Yehovah Kotoigi

Tongo Sranantongo

 KAPITEL 11

Fu san ede so furu pina de?

Fu san ede so furu pina de?

1, 2. Sortu aksi furu sma e poti?

ALA dei wi e yere fu ogri sani di e pasa na heri grontapu. Fu eksempre, wan tsunami e pori wan foto. Wan man e bigin sutu tapu sma na ini wan kerki èn furu fu den e kisi mankeri èn trawan e dede. Wan uma di abi kanker e dede èn a e libi feifi pikin na baka.

2 Te den sortu sani disi e pasa, dan sma e aksi densrefi: „Fu san ede den sani disi e pasa?” Den e aksi densrefi fu san ede sma abi so furu bita-ati èn fu san ede sma e pina. Oiti yu aksi yusrefi a sani dati?

3, 4. (a) A fowtu fu aksi fu san ede Gado gi pasi taki pina de? Fruklari dati. (b) Fa Yehovah e prakseri fu ogridu nanga a pina di sma e pina?

3 Na ini Bijbel wi e leisi taki sma di ben abi wan tranga bribi ben poti den sortu aksi disi tu. Fu eksempre, a profeiti Habakuk ben aksi Yehovah: „Fu san ede yu e meki mi si takrudu? Fu san ede yu e tan luku nomo fa sma e du ogri? Fu san ede mi musu si fa sma e fufuru sani èn fa den e pina trawan? Fu san ede sma e meki trobi nanga makandra? Fu san ede den e strei nanga makandra?”Habakuk 1:3.

4 Na ini Habakuk 2:2, 3 wi e leisi a piki di Gado gi Habakuk èn wi e si tu taki a pramisi en taki a ben o tyari wan kenki kon. Yehovah lobi libisma. Bijbel e taki: „A e broko en ede nanga unu” (1 Petrus 5:7). Fu taki  en leti, moro leki iniwan libisma, Gado no lobi en srefisrefi taki sma e pina (Yesaya 55:8, 9). Sobun, meki wi go luku fu san ede so furu pina de na grontapu.

FU SAN EDE SO FURU PINA DE?

5. San furu kerki fesiman e taki fu fruklari fu san ede sma e pina? San Bijbel e leri wi?

5 Nofo tron den pastor, den domri, nanga tra kerki fesiman e leri sma taki na Gado wani taki sma e pina. Ibri leisi te wan sani e pasa nanga sma, dan son kerki fesiman e taki dati na Gado ben wani en so, awinsi na wan ogri sani. Den e taki dati wi no o man frustan fu san ede a e du dati. Trawan e taki dati sma, sosrefi pikin-nengre, e dede so taki den kan de nanga Gado na ini hemel. Ma a sani disi no tru. Noiti Yehovah e meki taki ogri pasa. Bijbel e taki: „A no tru kwetikweti taki Gado e du ogri! Noiti na Almaktiwan e du kruktu sani!”Yob 34:10.

6. Fu san ede furu sma e taki dati na Gado e meki sma pina?

6 Furu sma e taki dati na Gado e meki sma pina fu di den e denki taki na en e tiri a grontapu. Ma soleki fa wi leri na ini kapitel 3, dan na Satan Didibri e tiri a grontapu disi.

7, 8. Fu san ede so furu pina de na grontapu?

7 Bijbel e fruteri wi taki „heri grontapu de na ini a makti fu na ogriwan” (1 Yohanes 5:19). Satan, a tiriman fu a grontapu disi, abi bita-ati èn a ogri. A e „kori sma na heri grontapu” (Openbaring 12:9). Furu sma abi den srefi fasi fu en èn dati na wan sani di e meki taki a grontapu lai nanga sma di e lei, di abi bita-ati èn di e du ogri.

 8 Tra sani de di e meki taki so furu ogri de na grontapu. Baka di Adam nanga Eva opo densrefi teige Gado, ala den pikin fu den gebore nanga sondu. Fu di libisma abi sondu meki den e pina tra sma. Furu tron den wani de prenspari moro trawan. Den e feti nanga makandra, kondre e feti nanga tra kondre èn den e du ogri nanga sma (Preikiman 4:1; 8:9). Son leisi sma e pina fu di „ogri ten nanga sani di den no e fruwakti” e miti den (Preikiman 9:11). A kan de so taki ongoloku noso tra ogri sani e pasa nanga sma, fu di den de drape na a momenti te na ogri e pasa.

9. Fu san ede wi kan de seiker taki Yehovah abi wan bun reide fu no du noti ete na den ogri sani di e pasa?

9 Noiti Yehovah e meki sma pina. A no en e meki taki sma e feti, èn taki den e du ogri nanga trawan. A no Gado e meki rampu soleki gronseki, bigi draiwinti nanga frudu pasa. Ma kande yu e aksi yusrefi: ’Efu Yehovah na a moro makti sma di de, dan fu san ede a no e du wan sani te ogri e pasa?’ Wi sabi taki Gado e broko en ede nanga wi, sobun a sabi fu san ede a no du noti ete.1 Yohanes 4:8.

FU SAN EDE GADO E GI PASI TAKI PINA DE?

10. San Satan taki fu Yehovah?

10 Na ini a dyari fu Eden, Didibri kori Adam nanga Eva. Satan taki dati Gado a no wan bun tiriman. Te yu luku en bun, dan a ben taki dati Gado ben hori wan bun sani na baka gi Adam nanga Eva. Satan ben wani taki den bribi taki en ben o de wan moro bun tiriman leki Yehovah èn taki den no ben abi Gado fanowdu.Genesis 3:2-5; luku „Ete wan tu sani” 27.

11. Sortu aksi wi o go luku now?

 11 Adam nanga Eva trangayesi Yehovah èn den opo densrefi teige en. Den ben denki taki den ben abi a reti fu bosroiti gi densrefi san bun èn san ogri. Fa Yehovah ben o sori taki Adam nanga Eva no ben abi leti èn taki na en sabi san bun gi wi?

12, 13. (a) Fu san ede Yehovah no kiri Adam nanga Eva wantewante? (b) Fu san ede Yehovah gi pasi taki Satan tron a tiriman fu a grontapu disi èn taki libisma seti den eigi regering?

12 Yehovah no kiri Adam nanga Eva wantewante. Na presi fu dati a gi den ten fu kisi pikin. Baka dati Yehovah gi den pikin fu Adam nanga Eva na okasi fu bosroiti suma den wani leki tiriman. Yehovah ben abi na prakseri fu meki grontapu kon furu nanga sma di no abi sondu èn na dati o pasa tu awinsi san Didibri e pruberi fu du.Genesis 1:28; Yesaya 55:10, 11.

13 Milyunmilyun engel yere den lei di Satan taki fu Yehovah (Yob 38:7; Danièl 7:10). Dati meki Yehovah gi Satan ten fu buweisi efu den sani di a taki tru. A gi libisma ten tu fu seti den eigi regering na ondro a tiri fu Satan, so taki den ben kan sori efu sani ben o go bun nanga den sondro a yepi fu Gado.

14. San wi kon sabi baka di libisma tiri dusundusun yari?

14 Dusundusun yari libisma pruberi fu tiri densrefi, ma den no ben man du dati. Disi e sori taki Satan na wan leiman. A de krin taki libisma abi a yepi fu Gado fanowdu. A profeiti Yeremia ben abi leti di a taki: „Yehovah, mi sabi heri bun taki a no de na wan libisma fu taki sortu pasi a o teki. A no de na wan libisma di e waka fu taki srefi pe a o poti en futu.”Yeremia 10:23.

 FU SAN EDE YEHOVAH WAKTI SO LANGA?

15, 16. (a) Fu san ede Yehovah gi pasi taki libisma pina so langa? (b) Fu san ede Yehovah no lusu den problema di Satan tyari kon?

15 Fu san ede Yehovah gi pasi taki libisma pina so langa? Fu san ede a no e du noti fu meki taki ogri no pasa moro? Fu di ten ben de fanowdu fu sori taki Satan a no wan bun tiriman. Libisma seti ala sortu regering, ma nowan fu den ben man yepi sma. Aladi koniman ben man meki wan lo kefalek sani toku kruktudu, pôtifasi, ogridu nanga feti kon moro furu. A de krin taki libisma no man tiri densrefi, den abi Gado fanowdu.

16 Ma Yehovah no lusu den problema di Satan tyari kon. Efu a ben o du dati, a ben o horibaka gi a tiri fu Satan èn noiti Gado o du dati. Boiti dati, libisma ben o bribi taki den man tiri densrefi soleki fa Satan ben taki. Ma dati na wan lei èn Yehovah no o du noti fu horibaka gi so wan lei. Noiti Yehovah e lei.Hebrewsma 6:18.

17, 18. San Yehovah o du fu seti ala sani di Satan pori?

17 Yehovah man seti ala den sani di Satan nanga libisma pori, di den opo densrefi teige en? Iya, Gado man du ala sani. Gado gi Satan pasi fu buweisi efu den sani di a ben taki na sani di tru èn na Gado e taki tu o langa disi o go doro. Na a yoisti ten a o meki grontapu tron wan paradijs, soleki fa a ben abi na prakseri. Dan ala den sma di de na ini „den grebi” o kisi wan opobaka (Yohanes 5:28, 29). Noiti moro sma o siki noso dede. Yesus o seti ala sani kon bun baka. Yehovah o gebroiki Yesus „fu tyari wan kaba kon na den wroko fu Didibri” (1 Yohanes 3:8). Wi de nanga tangi taki te now ete Yehovah abi pasensi nanga wi, so taki wi kan kon sabi en èn wi kan bosroiti taki wi wani en leki tiriman.  (Leisi 2 Petrus 3:9, 10.) Srefi efu wi e pina, a e yepi wi fu horidoro.Yohanes 4:23; leisi 1 Korentesma 10:13.

18 Yehovah no e dwengi wi fu teki en leki tiriman. Yehovah gi libisma wan moi kado èn dati na taki den kan teki den eigi bosroiti. Meki wi go luku fa wi kan gebroiki a kado disi.

FA YU KAN GEBROIKI A KADO DI GADO GI WI?

19. Sortu moi kado Yehovah gi wi? Fu san ede wi musu warderi a kado disi?

19 A moi kado di Yehovah gi wi, e meki taki wi de tra fasi leki den meti. Den meti no man bosroiti san bun noso ogri. Den e du sani fu di Gado meki den so. Ma libisma kan bosroiti fa den o libi èn efu den o gi yesi na Yehovah (Odo 30:24-28). Boiti dati, wi a no masyin di no man du san den wani. Wi kan bosroiti gi wisrefi sortu sma wi wani de, suma wi wani leki mati, èn san wi wani du nanga wi libi. Yehovah wani taki wi prisiri na ini a libi.

20, 21. San na a moro bun bosroiti di yu kan teki now?

20 Yehovah wani taki wi lobi en (Mateyus 22:37, 38). A de leki wan papa di e breiti te a yere en pikin taki: „Mi lobi yu.” A pikin no e du en fu di en papa dwengi en ma fu di a lobi en papa trutru. Yehovah meki wi na so wan fasi taki wisrefi kan bosroiti efu wi o dini en, noso efu wi no o du dati. Satan, Adam, nanga Eva bosroiti fu no dini Yehovah. Sortu bosroiti yu o teki?

21 Teki a bosroiti fu dini Yehovah. Milyunmilyun sma teki a bosroiti fu dini Yehovah èn fu kakafutu gi Satan (Odo 27:11). San yu kan du nownow kaba, so taki yu man de na ini a nyun grontapu te Gado puru ala pina? Na ini a tra kapitel wi o piki na aksi dati.