Go na content

Go na a tra menu

Go na table of contents

Yehovah Kotoigi

Sranantongo

San Bijbel kan leri wi?

 KAPITEL 15

A yoisti fasi fu anbegi Gado

A yoisti fasi fu anbegi Gado

1. Suma musu fruteri wi san na a yoisti fasi fu anbegi Gado?

FURU kerki e taki dati den e leri sma den tru tori fu Gado. Ma dati no kan, fu di san den e leri sma fu a fasi fa Gado de èn fu a fasi fa wi musu anbegi en, no de a srefi. Fa wi kan kon sabi san na a yoisti fasi fu anbegi Gado? Yehovah na a wan-enkri sma di kan fruteri wi fa wi musu anbegi en.

2. Fa yu kan sabi san na a yoisti fasi fu anbegi Gado?

2 Yehovah gi wi a Bijbel so taki wi kan sabi san na a yoisti fasi fu anbegi en. Sobun, studeri Bijbel èn Yehovah o yepi yu fu kisi wini fu den sani di yu e leri. Yehovah e broko en ede nanga yu.Yesaya 48:17.

3. San Gado wani taki wi du?

3 Son sma e taki dati Gado e feni ala kerki bun, ma dati a no san Yesus leri wi. A ben taki: „A no ala sma di e taigi mi: ’Masra, Masra’, o go na ini a Kownukondre fu hemel. Ma na a sma di e du a wani fu mi Tata.” Dati meki a prenspari taki wi kon sabi san na a wani fu Gado èn taki wi du en. Disi na wan seryusu sani fu di Yesus agersi den sma di no e gi yesi na Gado nanga „ogriman”.Mateyus 7:21-23.

4. San Yesus taki fu sori fa a ben o de fu du a wani fu Gado?

4 Yesus ben taki dati a no ala ten a o makriki fu du a wani fu Gado. A ben taki: „Pasa go na ini a smara doro. A pasi di e tyari sma go na dede, bradi èn a bigi. Furu  sma e waka a pasi dati. Ma a doro di e tyari sma go na libi, pikin èn a pasi fu en smara. Wan tu sma nomo e feni en” (Mateyus 7:13, 14). A smara pasi noso a yoisti fasi fu anbegi Gado e tyari sma go na têgo libi. A bradi pasi noso a fowtu fasi fu anbegi Gado e tyari sma go na dede. Ma Yehovah no wani taki nowan sma dede. A e gi ala sma na okasi fu leri fu en.2 Petrus 3:9.

A YOISTI FASI FU ANBEGI GADO

5. Fa yu kan kon sabi den sma di e anbegi Gado na a yoisti fasi?

5 Yesus ben taki dati wi kan kon sabi suma na den sma di e dini Gado na a yoisti fasi. Wi o kon sabi disi te wi e ondrosuku den sani di den e bribi èn den sani di den e du. A ben taki: „Na den froktu fu den, unu o si suma na den.” A taki tu: „Ibri bun bon e meki bun froktu” (Mateyus 7:16, 17). Disi no wani taki dati den wan di e anbegi Gado no e meki fowtu. Ma ala ten den anbegiman fu Gado e pruberi fu du san bun. Now wi o go luku san kan yepi wi fu sabi den sma di e anbegi Gado na a yoisti fasi.

6, 7. (a) Fu san ede den leri fu a tru anbegi musu komoto fu Bijbel? (b) San na eksempre fu Yesus e leri wi?

6 Den sani di wi e leri sma musu komoto fu Bijbel. Bijbel e taki: „Na Gado srefi ben meki sma skrifi ala den sani di de na ini Gado Buku. Den sani disi bun fu gi leri, fu gi rai, fu poti sani kon reti èn fu gi piri-ai na wan reti fasi, so taki wan futuboi fu Gado kan kon bun dorodoro èn a kan de srekasreka fu du ibri bun wroko” (2 Timoteyus 3:16, 17). Na apostel Paulus ben taigi Kresten: „Di unu yere Gado wortu di wi ben preiki gi unu, dan unu no teki a wortu leki a wortu fu libisma, ma leki a  wortu fu Gado èn na dati a de trutru” (1 Tesalonikasma 2:13). Na Gado Wortu, Bijbel, e yepi wi fu kon sabi san na a yoisti fasi fu anbegi Gado. Den denki fu libisma, den gwenti fu den noso iniwan tra sani no man yepi wi fu kon sabi dati.

7 Ala sani di Yesus ben leri sma ben komoto fu Gado Wortu. (Leisi Yohanes 17:17.) Yesus ben gebroiki Gado Wortu furu te a ben taki (Mateyus 4:4, 7, 10). Den tru anbegiman fu Gado e teki na eksempre fu Yesus. Ala sani di den e leri sma komoto fu Bijbel.

8. Suma wi musu anbegi, soleki fa Yesus leri?

8 Wi musu anbegi Yehovah wawan. Psalm 83:18 e taki: „Yu di nen Yehovah, yu wawan na a Moro Heiwan fu heri grontapu.” Yesus ben wani taki sma sabi suma na a tru Gado èn a ben leri sma san na Gado en nen. (Leisi Yohanes 17:6.) Yesus ben taki: „Na Yehovah yu Gado, yu musu anbegi èn na en wawan yu musu dini” (Mateyus 4:10). Sobun, wi leki anbegiman fu Gado e teki na eksempre fu Yesus. Wi e anbegi Yehovah wawan, wi e gebroiki en nen èn wi e leri trawan san na Gado nen èn san a o du gi wi.

9, 10. Fa wi e sori lobi gi makandra?

9 Wi musu lobi sma trutru. Yesus leri den disipel fu en fu lobi makandra. (Leisi Yohanes 13:35.) A no abi trobi pe wi komoto, san na wi kulturu noso efu wi gudu noso pôti. A lobi di wi abi gi makandra leki brada nanga sisa e meki taki wi abi wánfasi (Kolosesma 3:14). Dati meki wi no e go na feti èn wi no e kiri sma. Bijbel e taki: „Disi na fa sma kan sabi suma na den pikin fu Gado èn suma na den pikin fu Didibri: Efu wan sma no abi a gwenti fu du bun sani, dan a sma dati no de fu  Gado. Na so a de tu nanga a sma di no lobi en brada.” A e taki tu: „Wi musu lobi makandra. Wi no musu de leki Kain, di ben de fu na ogriwan èn di ben kiri en brada.”1 Yohanes 3:10-12; 4:20, 21.

10 Wi e gebroiki wi ten, wi krakti nanga den gudu fu wi fu yepi makandra èn wi e gi makandra deki-ati tu (Hebrewsma 10:24, 25). Wi e „du bun gi ala sma”.Galasiasma 6:10.

11. Fu san ede sma kan kisi frulusu soso nanga yepi fu Yesus?

11 Wi musu gi yesi na Yesus fu di soso nanga yepi fu en sma kan kisi frulusu. Bijbel e taki: „Nowan tra sma kan gi wi frulusu, bika Gado no gi sma na grontapu nowan enkri tra nen di sa meki wi kisi frulusu” (Tori fu den apostel 4:12). Na ini kapitel 5 fu a buku disi, wi leri taki Yehovah seni Yesus fu gi en libi leki wan lusu-paiman gi den libisma di e gi yesi na Gado (Mateyus 20:28). Yehovah poti Yesus tu leki Kownu fu tiri a grontapu. Dati meki Bijbel e taigi wi taki wi musu gi yesi na Yesus efu wi wani libi fu têgo.Leisi Yohanes 3:36.

12. Fu san ede wi no e bumui nanga politiek?

12 Wi no musu bumui nanga politiek. Yesus no ben teki prati na ini politiek. Di a ben de fesi krutu, a taigi Pilatus, wan tiriman fu Rome: „Mi kownukondre no de fu a grontapu disi.” (Leisi Yohanes 18:36.) Neleki Yesus wi e horibaka gi Gado Kownukondre di de na hemel. Dati meki wi no e bumui nanga politiek, awinsi pe wi e tan. Ma toku Bijbel e leri wi taki wi musu gi yesi na „den tiriman” (Romesma 13:1). Wi e gi yesi na den wet fu a kondre pe wi e tan. Ma te wan wet fu a kondre de teige den wet fu Gado, dan wi e teki na eksempre fu den apostel di ben taki: „Fu di Gado na wi tiriman,  meki wi musu gi yesi na en moro leki na libisma.”Tori fu den apostel 5:29; Markus 12:17.

13. San wi e leri sma fu Gado Kownukondre?

13 Wi e bribi taki Gado Kownukondre na a wan-enkri lusu gi den problema fu grontapu. Yesus taki dati a ’bun nyunsu fu a Kownukondre’ ben o preiki na heri grontapu. (Leisi Mateyus 24:14.) Nowan libisma regering man du san Gado Kownukondre o du gi wi (Psalm 146:3). Yesus ben leri wi fu begi taki Gado Kownukondre kon. A taki: „Meki yu Kownukondre kon. Meki yu wani pasa na grontapu soleki fa a e pasa na hemel” (Mateyus 6:10). Bijbel e taki dati Gado Kownukondre o pori ala den libisma regering èn taki „a kownukondre srefi o tan fu têgo”.Danièl 2:44.

14. San yu e denki: Suma e anbegi Gado na a yoisti fasi?

14 Baka te yu luku den penti disi, dan aksi yusrefi: ’Suma e leri sma sani di komoto fu Bijbel? Suma e fruteri trawan san na Gado nen? Suma e sori lobi gi makandra trutru èn e bribi taki Gado seni Yesus fu frulusu wi? Suma no e bumui nanga politiek? Suma e leri sma taki Gado Kownukondre wawan kan lusu den problema fu wi?’ A de krin taki na soso Yehovah Kotoigi e du den sani disi.Yesaya 43:10-12.

SAN YU O DU?

15. San wi musu du efu wi wani taki Gado feni na anbegi fu wi bun?

15 A no nofo taki yu e bribi taki wan Gado de. Srefi den ogri yeye e bribi taki wan Gado de, ma den no e gi yesi na en (Yakobus 2:19). Efu wi wani taki Gado feni na anbegi fu wi bun, dan wi no musu bribi nomo taki a de trutru, ma wi musu du tu san a e taki.

16. Fu san ede wi no musu abi noti fu du nanga falsi bribi?

 16 Efu wi wani taki Gado feni na anbegi fu wi bun, dan wi no musu abi noti fu du nanga falsi bribi. A profeiti Yesaya ben skrifi: „Komoto drape. Un hori unsrefi krin” (Yesaya 52:11; 2 Korentesma 6:17). Dati meki wi musu wai pasi gi iniwan sani di abi fu du nanga falsi anbegi.

17, 18. San na „Babilon a Bigiwan”? Fu san ede a prenspari taki wi no abi noti fu du nanga en?

17 San na falsi bribi? Dati na iniwan bribi di e leri sma fu anbegi Gado na wan fasi di de teige a Wortu fu en. Bijbel e kari ala falsi bribi „Babilon a Bigiwan” (Openbaring 17:5). Fu san ede? Baka a frudu fu Noa ten, dan furu falsi leri bigin na ini a foto Babilon. Den falsi leri disi prati na heri grontapu. Fu eksempre, den sma di ben e libi na ini a foto Babilon ben anbegi grupu fu dri gado di den ben e si leki wán. Na ini a ten disi furu bribi e leri sma taki Gado na dri sma na ini wán. Ma Bijbel e sori krin taki wán tru Gado nomo de, Yehovah èn taki Yesus na en Manpikin (Yohanes 17:3). Den sma di ben libi na ini Babilon ben bribi tu taki baka te wan sma dede, wan sani fu en e tan libi go doro èn den ben bribi taki a sani disi kan pina fu têgo na ini hel. A leri disi no tru.—Luku „Ete wan tu sani” 14, 17 nanga 18.

18 Gado taki dati heri esi ala falsi bribi o kisi pori (Openbaring 18:8). Yu e frustan fu san ede a prenspari fu komoto na ini falsi bribi? Yehovah wani taki yu du dati fosi a lati tumusi.Openbaring 18:4.

Te yu e dini Yehovah makandra nanga en pipel, dan yu o kon na ini wan bigi famiri di de na heri grontapu

19. Fa Yehovah o sorgu yu te yu bosroiti fu dini en?

19 Te yu o bosroiti fu komoto na ini falsi bribi fu di  yu wani dini Yehovah, dan son famiriman nanga mati fu yu no o frustan fu san ede yu du dati. Dati meki a kan taki den bigin gens yu, taki den e meki yu firi syen, noso taki den no o wani bumui nanga yu. Ma Yehovah no o gowe libi yu. Yu o kon na ini wan famiri fu milyunmilyun sma di de na heri grontapu èn di lobi makandra trutru. Boiti dati, yu o abi a howpu fu libi fu têgo na ini a nyun grontapu fu Gado (Markus 10:28-30). Kande sonwan fu den famiriman nanga mati fu yu di no wani taki yu dini Yehovah, o bosroiti fu studeri Bijbel bakaten.

20. Fu san ede a prenspari taki yu anbegi Gado na a yoisti fasi?

20 Heri esi Gado o puru ala ogri èn en Kownukondre o tiri grontapu (2 Petrus 3:9, 13). Dati o de wan moi ten! Ala sma o anbegi Yehovah na a fasi fa en wani. Dati meki a prenspari taki yu du wan sani now èn taki yu anbegi Gado na a yoisti fasi.