Go na content

Go na a tra menu

Go na table of contents

Yehovah Kotoigi

Sranantongo

San Bijbel kan leri wi?

 KAPITEL 10

San Bijbel e taki fu den engel nanga den ogri yeye?

San Bijbel e taki fu den engel nanga den ogri yeye?

1. Fu san ede wi musu kon sabi suma na den engel?

YEHOVAH wani taki wi kon sabi suma na den engel di de wan pisi fu en osofamiri na ini hemel. Bijbel e kari den „manpikin fu Gado” (Yob 38:7). San den engel e du? Fa den ben yepi sma fositen? Den kan yepi wi na ini a ten disi?—Luku „Ete wan tu sani” 8.

2. Suma meki den engel? Omeni engel de?

2 Wi musu sabi suma meki den engel. Na ini Kolosesma 1:16 wi e leisi taki baka di Yehovah meki Yesus, dan a meki „ala tra sani na hemel èn na grontapu”. Disi wani taki dati a meki engel tu. Omeni engel Gado meki? Bijbel e taki dati milyunmilyun engel de.Psalm 103:20; Openbaring 5:11.

3. San Yob 38:4-7 e taki fu den engel?

3 Bijbel e leri wi dati Yehovah meki den engel, fosi a meki grontapu. Fa den engel ben firi di den si a grontapu? A buku Yob e taki dati den ben e prisiri. Den ben de wán famiri di ben e dini Yehovah na ini wánfasi.Yob 38:4-7.

ENGEL E YEPI GADO PIPEL

4. Fa wi sabi taki engel e broko den ede nanga libisma?

4 Sensi a bigin engel wani sabi fa sani e go nanga libisma èn den wani sabi san Yehovah abi na prakseri gi a grontapu nanga gi libisma (Odo 8:30, 31; 1 Petrus 1:11, 12). Den ben musu firi sari di Adam nanga Eva trangayesi Gado. Now den e sari moro srefi, te den e si taki furu libisma no e gi yesi na Gado. Ma te wan sma abi  berow èn a e drai kon baka na Gado, dan den engel e prisiri (Lukas 15:10). Den engel e broko den ede nanga den anbegiman fu Gado. Yehovah e gebroiki engel fu yepi èn fu kibri den futuboi fu en na grontapu (Hebrewsma 1:7, 14). Luku wan tu eksempre fu a tori disi.

„Mi eigi Gado seni en engel kon èn a tapu a mofo fu den lew.”Danièl 6:22

5. Fa engel yepi den anbegiman fu Yehovah na ini owruten?

5 Yehovah ben seni tu engel fu yepi Lot nanga en famiri fu lowe komoto na den foto Sodom nanga Gomora di ben kisi pori (Genesis 19:15, 16). Furu yari baka dati, den ben  trowe a profeiti Danièl na ini wan lew-olo, ma noti pasa nanga en fu di „Gado seni en engel kon èn a tapu a mofo fu den lew” (Danièl 6:22). Bakaten di na apostel Petrus ben de na strafu-oso, dan Yehovah seni wan engel fu go puru en drape (Tori fu den apostel 12:6-11). Engel yepi Yesus tu di a ben de na grontapu. Fu eksempre, baka di a ben dopu „engel kon yepi en” (Markus 1:13). Èn syatu fosi Yesus dede wan engel „gi en krakti”.Lukas 22:43.

6. (a) Fa wi sabi taki engel e yepi Gado pipel na ini a ten disi? (b) Sortu aksi wi o luku now?

6 Na ini a ten disi engel no man sori densrefi na libisma moro. Ma toku Gado e gebroiki engel fu yepi den anbegiman fu en. Bijbel e taki: „Na engel fu Yehovah de lontu ala den sma di e lespeki Gado èn a e frulusu den” (Psalm 34:7). Fu san ede wi abi kibri fanowdu? Fu di wi abi feanti di abi makti èn di wani du ogri nanga wi. Suma na den feanti disi? Pe den komoto? Fa den wani du wi ogri? Fu feni a piki tapu den aksi disi, dan meki wi go luku san pasa syatu baka di Gado meki Adam nanga Eva.

FEANTI DI WI NO MAN SI

7. San libisma du fu di Satan kori den?

7 Na ini kapitel 3 wi leri taki wan engel ben opo ensrefi teige Gado èn taki a ben wani tiri trawan. Bijbel e kari en Satan Didibri (Openbaring 12:9). Satan ben wani tu taki libisma opo densrefi teige Gado. A ben man kori Eva èn baka dati a kori bun furu libisma. Ma sma soleki Abel, Heinok, nanga Noa tan dini Yehovah nanga den heri ati.Hebrewsma 11:4, 5, 7.

8. (a) Fa wan tu engel ben tron ogri yeye? (b) San den ogri yeye du fu no dede na ini a Frudu?

8 Na ini a ten fu Noa wan tu engel di ben opo densrefi teige Gado, gowe libi a tanpe fu den na hemel fu kon libi  leki libisma na grontapu. Fu san ede den du dati? Bijbel e fruteri wi taki den ben wani libi nanga uma. (Leisi Genesis 6:2.) Ma engel no ben mag du dati (Yudas 6). Na a ten dati furu libisma bigin du ogri-ati nanga kruka sani, neleki den ogri engel disi. Dati meki Yehovah bosroiti fu tyari wan frudu kon na heri grontapu fu kiri ala ogri libisma. Ma a kibri den sma di gi yesi na en (Genesis 7:17, 23). Fu di den ogri engel no ben wani dede meki den drai go baka na hemel. Bijbel e kari den ogri engel disi ogri yeye. Den teki a sei fu Satan èn den opo densrefi teige Gado. Na a fasi dati Didibri tron a tiriman fu den.Mateyus 9:34.

9. (a) San pasa nanga den ogri yeye di den drai go baka na hemel? (b) San wi o go luku now?

9 Fu di den ogri yeye disi ben opo densrefi teige Yehovah, meki a no teki den baka na ini en osofamiri (2 Petrus 2:4). Aladi den ogri yeye no man teki libisma skin moro, toku den „e kori sma na heri grontapu” (Openbaring 12:9; 1 Yohanes 5:19). Meki wi go luku fa den man kori, noso kisi so furu sma.Leisi 2 Korentesma 2:11.

FA OGRI YEYE E KORI SMA

10. Fa ogri yeye e kori sma?

10 Ogri yeye e kori sma na furu difrenti fasi. Te sma e taki nanga den, dan den e du dati langalanga noso den e aksi wan bonuman noso wan lukuman fu yepi den fu du dati. Te sma e suku yepi na ogri yeye, dan dati na afkodrei, noso na anbegi fu ogri yeye. Bijbel e taigi wi fu tan farawe fu iniwan sani di abi fu du nanga ogri yeye (Galasiasma 5:19-21). Fu san ede? Neleki fa wan ontiman e seti trapu fu kisi wan meti, na so den ogri yeye e seti trapu gi libisma fu kan basi den.—Luku „Ete wan tu sani” 26.

11. San na lukuman-wroko èn fu san ede wi musu luku bun nanga en?

 11 Wan fu den triki fu den na lukuman-wroko. Dati wani taki dati sma e gebroiki a krakti fu ogri yeye fu kon sabi san o pasa na ini a ten di e kon. Son sma e luku den stari, den e luku na ini sma anu, noso den e du tra sani fu kon sabi san o pasa. Den sani disi na ogri sani awinsi furu sma no e si en so. Den kan gi wi bigi problema. Fu eksempre, Bijbel e sori taki den ogri yeye nanga den lukuman e wroko makandra. Na ini Tori fu den apostel 16:16-18 wi e leisi fu wan meisje di ben abi ’wan ogri yeye di ben e meki taki a ben man du lukuman-wroko’. A ben „e taigi sma na fesi san ben o pasa na ini den libi”. Baka di na apostel Paulus yagi na ogri yeye disi gowe, a meisje no ben man du lukuman-wroko moro.

12. (a) Fu san ede wi kan kisi bigi problema te wi e suku fu taki nanga dedesma? (b) Fu san ede sma di e dini Gado e luku bun nanga gwenti di abi fu du nanga dedesma?

12 Den ogri yeye e gebroiki wan tra triki tu fu kori sma. Den wani taki wi bribi taki wi man taki nanga den dedewan, taki dedesma e libi ete na wan tra presi, taki den man yepi wi, noso taki den man du wi ogri. Te wan famiriman noso wan mati dede, dan son sma e go na wan sma di e taki dati a man taki nanga den dedewan. Kande a sma e taigi den wan moi sani fu a famiriman noso mati di dede èn kande a e meki a sten fu a dedesma srefi (1 Samuel 28:3-19). Kande wi e denki taki wi e taki nanga a dedesma, ma te yu luku en bun, dan wi e taki nanga ogri yeye. Furu sani di sma gwenti du te den e go beri wan dede e sori tu taki den e prakseri taki den dedewan e libi ete. Na so sma gwenti brokodei gi wan sma di dede, den e hori fesa baka wan beri, den e memre den dedewan ibri  yari, den e tyari nyanyan noso tra sani gi dedesma èn son tron sma musu du wan lo sani te den masra noso wefi dede. Te wan Kresten e weigri fu du den sortu sani disi, dan a kan taki a famiri fu en noso sma na ini a dorpu fu en e kosi en, noso taki den no wani bumui nanga en moro. Ma Kresten sabi taki den dedewan no e libi go doro na wan tra presi. Yu no man taki nanga den moro èn den no man du noti nanga wi (Psalm 115:17). Sobun, luku bun nanga den sani dati. Noiti no du muiti fu taki nanga den dedewan noso nanga den ogri yeye èn noiti no go du sani di abi fu du nanga na anbegi fu den. *Leisi Deuteronomium 18:10, 11; Yesaya 8:19.

13. San furu sma di ben e frede ogri yeye fosi ben man du?

13 Den ogri yeye no e kori sma nomo, ma den e du sani tu fu meki sma kon frede. Na ini a ten disi Satan nanga den ogri yeye fu en sabi taki den „ten syatu”. Fu di den sabi taki Gado o puru den na pasi, meki den abi bigi atibron èn den e du moro bigi ogri leki fosi (Openbaring 12:12, 17). Ma dusundusun sma di ben e frede den ogri yeye wan pisi ten no e frede den moro. Fu san ede den no e frede den ogri yeye moro?

KAKAFUTU GI DEN OGRI YEYE ÈN SORGU TAKI DEN NO ABI MAKTI NA YU TAPU

14. Fa wi kan sorgu taki ogri yeye no abi krakti na wi tapu moro, neleki den fosi Kresten?

14 Bijbel e fruteri wi fa wi kan kakafutu gi ogri yeye èn fa wi kan sorgu taki den no abi makti na wi tapu. Fu  eksempre, wan tu sma na ini a foto Efeise ben e taki nanga ogri yeye, fosi den kon sabi den tru leri fu Gado. Fa den ben man sorgu taki den ogri yeye no abi krakti na den tapu moro? Bijbel e taki: „Bun furu fu den sma di ben e du bonuwroko tyari den buku fu den kon na wán èn den bron den na fesi ala sma” (Tori fu den apostel 19:19). Fu di den ben wani tron Kresten meki den bron ala den bonu buku fu den. Na ini a ten disi wi musu du a srefi sani. Ala sma di wani dini Yehovah musu trowe noso pori ala sani di abi fu du nanga ogri yeye. Disi kan de iniwan sani soleki buku, tijdschrift, horoskoop, felem, poku, noso game di e meki towfruwroko nanga ogri yeye gersi span tori di no ogri. Tra sani di wi musu trowe na den sani di sma e weri na den skin fu ogri no miti den.1 Korentesma 10:21.

15. San wi musu du ete efu wi wani kakafutu gi Satan nanga den ogri yeye?

15 Wan tu yari baka di den Kresten fu Efeise bron den bonu buku fu den, na apostel Paulus skrifi taki den ben musu „feti” ete nanga den „ogri yeye” (Efeisesma 6:12). Iya, aladi den ben bron den buku kaba, toku den ogri yeye ben wani du ogri nanga den ete. Sobun, san moro den ben musu du? Paulus taigi den: „Un bribi musu de leki wan bigi skelt. Nanga dati unu o man kiri a faya fu ala den peiri di na ogriwan e sutu kon na un tapu” (Efeisesma 6:16). Neleki fa wan skelt e kibri wan srudati di e feti, na so wi bribi kan kibri wi. Efu wi de seiker taki Yehovah man kibri wi, dan wi o man kakafutu gi Satan nanga den ogri yeye.Mateyus 17:20.

16. Fa wi kan tranga wi bribi na ini Yehovah?

16 Fa wi kan tranga wi bribi na ini Yehovah? Wi musu leisi Bijbel ibri dei èn wi musu leri frutrow en taki a man  kibri wi. Efu wi e frutrow tapu Yehovah, dan Satan nanga den ogri yeye no o man du ogri nanga wi.1 Yohanes 5:5.

17. Sortu tra sani kan meki taki den ogri yeye no du ogri nanga wi?

17 Sortu tra sani den Kresten na ini Efeise ben musu du? Den ben e libi na ini wan foto pe furu sma ben e anbegi ogri yeye. Dati meki na apostel Paulus ben taigi den: ’Tan begi na ibri okasi’ (Efeisesma 6:18). Ala ten den ben musu aksi Yehovah fu kibri den. Fa a de nanga wi? Wisrefi e libi na ini wan grontapu pe furu sma e anbegi ogri yeye. Dati meki wi musu gebroiki Yehovah nen te wi e begi èn wi musu aksi en fu kibri wi. (Leisi Odo 18:10.) Efu wi e tan aksi Yehovah fu frulusu wi fu Satan, dan Yehovah o arki den begi fu wi.Psalm 145:19; Mateyus 6:13.

18, 19. (a) Fa wi kan wini Satan nanga den ogri yeye? (b) Sortu aksi wi o luku na ini a kapitel di e kon?

18 Efu wi no e du sani moro di abi fu du nanga na anbegi fu ogri yeye, efu wi trowe ala sani di abi fu du nanga dati, èn efu wi e bribi taki Yehovah man kibri wi, dan wi o man kakafutu gi Satan nanga den ogri yeye. Wi no abi fu frede den. (Leisi Yakobus 4:7, 8.) Yehovah tranga moro den ogri yeye. Na ini a ten fu Noa a ben strafu den èn na ini a ten di e kon a o pori den (Yudas 6). No frigiti taki wi no de wi wawan na ini a feti disi. Yehovah e gebroiki den engel fu kibri wi (2 Kownu 6:15-17). Wi kan de seiker taki nanga a yepi fu Yehovah, wi kan wini Satan nanga den ogri yeye.1 Petrus 5:6, 7; 2 Petrus 2:9.

19 Ma fu san ede Gado no kiri Satan nanga den ogri yeye ete, efu den e pina sma so? Wi o piki na aksi disi na ini a kapitel di e kon.

^ paragraaf 12 Efu yu wani kon sabi moro fu den tori disi, dan luku den brochure A pasi di e tyari sma go na têgo libiYu feni en? nanga Jeje foe den dedewan—Den man jepi joe noso den man doe joe ogri? Den de troetroe?, di Yehovah Kotoigi tyari kon na doro.