Go na content

Go na a tra menu

Go na table of contents

Yehovah Kotoigi

Sranantongo

San na a boskopu fu Bijbel?

 PISI 19

Yesus e taki profeititori fu sani di o pasa na heri grontapu

Yesus e taki profeititori fu sani di o pasa na heri grontapu

Yesus e taki fu sani di o sori taki a kisi kownumakti èn taki a kaba fu a grontapu sistema disi doro

FO APOSTEL fu Yesus de nanga en wawan na tapu Olèifbergi, pe den kan si Yerusalem nanga a tempel na ondrosei. Drape den e aksi en wan tu sani di a ben taki na fesi. Didyonsro Yesus ben taki dati a tempel na ini Yerusalem ben o kisi pori. Na wan tra okasi, a ben taigi den tu fu „a kaba fu a grontapu sistema” (Mateyus 13:40, 49). Now den apostel e aksi en: „O ten den sani disi o pasa, èn san o de a marki fu yu denoya èn fu a kaba fu a grontapu sistema disi?”Mateyus 24:3.

Na ini a piki fu en, Yesus taigi den san ben o pasa fosi Yerusalem kisi pori. Ma den sani di a taki, no ben abi fu du nanga Yerusalem wawan. A profeititori fu en ben o abi wan moro bigi kontru na heri grontapu. Yesus ben taki fu difrenti sani di ben o pasa na grontapu, èn ala den difrenti sani dati ben o de wán marki. A marki dati ben o sori sma na grontapu taki Yesus bigin tiri leki Kownu na hemel. Sobun, a marki ben o sori taki Yehovah Gado meki Yesus tron Kownu fu a Mesias Kownukondre di a ben pramisi langa ten kaba. A marki dati ben o wani taki dati a Kownukondre o puru ogridu èn tyari trutru vrede kon gi libisma. Sobun, den sani di Yesus taki na fesi ben o sori taki den lasti dei fu na owru grontapu sistema disi doro èn taki wan nyunwan o bigin. Iya, disi na den lasti dei fu kerki organisâsi, politiek sistema, nanga a libimakandra di de now.

Yesus ben tyari kon na krin san ben o pasa na grontapu te a o tiri leki Kownu na ini hemel. A ben taki dati na heri grontapu feti ben o de, angriten ben o de, bigi gronseki èn siki ben o de na ala sei. Moro nanga moro kruktudu ben o de. Den tru disipel fu Yesus ben o preiki a bun nyunsu fu Gado Kownukondre na heri grontapu. Ala den sani disi ben o pasa teleki a „bigi banawtu” doro, di noiti no ben de ete.Mateyus 24:21.

Fa den bakaman fu Yesus ben o sabi taki a banawtu de krosibei? ’Leri wan sani fu a figabon’, na so Yesus taki (Mateyus 24:32). Te wiwiri e bigin gro na den taki fu a figabon, dan dati na wan marki di e sori krin taki a waran ten fu a yari de krosibei. Na a srefi fasi, den sani di ben o pasa na ini wan spesrutu pisi ten, soleki fa Yesus ben taki, ben o de wan marki di e sori krin taki a kaba de krosibei. Nowan sma boiti a Tata, ben o sabi soifri sortu dei nanga yuru a bigi banawtu ben o bigin. Fu dati ede, Yesus gi den disipel fu en a rai disi: „Tan na ai, bika unu no sabi o ten a reti ten de.”Markus 13:33.

Den tori disi teki puru fu Mateyus kapitel 24 nanga 25; Markus kapitel 13; Lukas kapitel 21.

^ paragraaf 14 Efu yu wani sabi moro fu a profeititori fu Yesus, dan luku kapitel 9 fu a buku San Bijbel kan leri wi? Yehovah Kotoigi tyari a buku disi kon na doro.

Kon sabi moro

San Bijbel e leri wi trutru?

Wi e libi na ini "den lasti dei”?