Go na content

Go na a tra menu

Go na table of contents

Yehovah Kotoigi

Sranantongo

San na a boskopu fu Bijbel?

 PISI 15

Wan profeiti na ini katibo e kisi fisyun fu a ten di e kon

Wan profeiti na ini katibo e kisi fisyun fu a ten di e kon

Danièl e taki na fesi fu a Kownukondre fu Gado èn fu a Mesias di o kon. Babilon e fadon

DANIÈL, wan yonkuman di tan gi yesi na Gado, ben go na ini katibo na Babilon bifo Yerusalem kisi pori. A ben de makandra nanga wan tu tra Dyu katiboman di ben komoto fu a kownukondre Yuda di kisi pori. Den man disi ben kisi primisi fu den basi fu du wan tu sani gi densrefi. Na ini a langa pisi ten di Danièl libi na ini Babilon, Gado ben gi en furu blesi. Gado kibri en srefi na ini wan lew olo, èn a kisi fisyun di meki a si bun fara na ini a ten di e kon. Den moro prenspari profeititori fu Danièl e taki fu a Mesias èn fu a tiri fu En.

Danièl e kon sabi o ten a Mesias ben o kon. Danièl ben kisi fu yere o ten a pipel fu Gado ben kan fruwakti a „Mesias a Fesiman”. Dati ben o de 69 wiki baka te a komando ben gi fu bow èn fu meki den skotu fu Yerusalem kon bun baka. Na ini a profeititori disi, den wiki dati a no wiki fu seibi dei, ma na seibi yari. A komando disi ben gi langa baka a ten fu Danièl, èn dati ben de na ini a yari 455 bifo Krestes. Den 69 wiki di ben de 483 yari, bigin na ini 455 bifo Krestes èn den kaba na ini a yari 29. Na ini a pisi di e kon wi o taki fu den sani di pasa na ini a yari dati. Danièl ben taki tu dati den ben o „kiri” a Mesias, so taki sma ben o man kisi pardon fu sondu.Danièl 9:24-26.

A Mesias ben o tron Kownu na ini hemel. Na ini wan aparti fisyun fu hemel, Danièl si a Mesias èn a taki dati a si en leki ’wan sma di gersi libisma pikin’. A sma disi go na fesi a kownusturu fu Yehovah. Yehovah gi en a „makti fu tiri èn a gi en glori sosrefi. A gi en wan kownukondre tu.” A Kownukondre dati ben o tan fu têgo. Danièl e kon sabi ete wan moi sani fu a Mesias Kownukondre. A Kownu ben o tiri makandra nanga trawan èn dati ben o de wan grupu sma di a kari „den santawan fu a Moro Hei Gado”.Danièl 7:13, 14, 27.

A Kownukondre o pori den tirimakti fu a grontapu disi. Gado gi Danièl a koni fu fruklari wan dren di Kownu Nebukadnesar fu Babilon ben kisi èn di ben bruya en. A kownu ben si wan bun bigi popki nanga wan ede fu gowtu, borsu nanga anu fu solfru, bere nanga bowtu fu kopro, bonfutu fu isri, èn platafutu fu isri moksi nanga kleidoti. Wan ston di koti puru fu wan bergi naki den swaki platafutu fu a popki èn a masi a popki kon tron puiri. Danièl fruklari taki den difrenti pisi fu a popki e prenki difrenti grontapumakti di ben o kon baka makandra, bigin nanga Babilon leki na ede fu gowtu. Danièl ben si na fesi taki na ini a ten fu a lasti tirimakti fu na ogri grontapu disi, Gado Kownukondre ben o du wan sani. A ben o broko ala den tirimakti fu a grontapu disi pisipisi. Dan a ben o tiri fu têgo.Danièl kapitel 2.

Di Danièl ben de bun owru kaba, a si fa Babilon fadon. Kownu Sirus ben wini a foto soifri soleki fa den profeiti ben taki na fesi. Syatu baka dati, den Dyu kon fri fu katibo na a yoisti ten. Dati ben de 70 yari baka di a kondre ben kon tron wan brokopresi pe sma no ben tan. Na ondro a tiri fu granman, priester nanga profeiti di ben gi yesi na Gado, den Dyu bow Yerusalem baka èn den meki a tempel fu Yehovah kon bun baka. Ma san ben o pasa na a kaba fu den 483 yari?

Den tori disi teki puru fu a buku Danièl.