Go na content

Go na a tra menu

Go na table of contents

Yehovah Kotoigi

Sranantongo

San na a boskopu fu Bijbel?

 PISI 5

Gado e blesi Abraham nanga en famiri

Gado e blesi Abraham nanga en famiri

Sani e go bun nanga den bakapikin fu Abraham. Gado e kibri Yosef na ini Egepte

YEHOVAH ben sabi taki a Sma di a lobi so te, ben o abi fu nyan pina èn dede wan dei. A profeititori di skrifi na ini Genesis 3:15 ben sori dati. A de so taki Gado ben o man sori libisma o bigi na ofrandi fu en Manpikin ben o de? Bijbel e gi wan eksempre di e sori san ben pasa nanga wan man nanga en manpikin. Gado ben aksi Abraham fu gi en lobi manpikin Isak leki ofrandi.

Abraham ben abi wan tranga bribi. Hori na prakseri taki Gado ben pramisi en taki a Frulusuman di ben o kon, noso a pramisi Pikin, ben o de wan bakapikin fu Isak. Abraham ben abi a frutrow taki Gado ben o gi Isak wan opobaka efu dati ben de fanowdu. Dati meki Abraham gi yesi èn a ben de klariklari fu gi en eigi manpikin leki wan srakti-ofrandi. Ma wan engel fu Gado tapu Abraham na a yoisti momenti. Gado prèise Abraham, di ben tan gi yesi na en, fu di a ben de klariklari fu gi a moro warti sani di a ben abi. Boiti dati, Gado pramisi a man disi baka san a ben taigi en bifo.

Bakaten, Isak ben meki tu manpikin, Esau nanga Yakob. Tra fasi leki Esau, Yakob ben warderi santa sani èn a kisi blesi fu dati ede. Gado kenki a nen fu Yakob, kon tron Israel, èn den 12 manpikin fu Israel ben kon tron den edeman fu den lo fu Israel. Ma fa a famiri disi tron wan bigi pipel?

Di moro furu fu den manpikin dati bigin dyarusu tapu Yosef, a moro yongu brada fu den, dan wan tu prenspari sani pasa baka makandra. Den ben seri Yosef leki srafu, èn sma tyari en go na Egepte. Ma Gado ben blesi a yonkuman disi di tan gi yesi na en èn di ben abi deki-ati. Aladi Yosef kisi fu du nanga hebi problema, toku te fu kaba Farao, a tiriman fu Egepte, gi en bun furu makti. A sani disi pasa na a yoisti ten, fu di wan angriten ben meki taki Yakob seni wan tu fu den manpikin fu en go na Egepte fu bai nyanyan sani. Soleki fa a sori, dan Yosef ben abi a frantwortu fu ala den nyanyan sani. Baka di Yosef miti baka nanga den brada fu en di sori berow, a gi den pardon èn a seti sani so taki a heri famiri froisi kon na Egepte. Drape den ben kisi wan bun pisi kontren pe den ben kan tron wan bigi pipel èn sani ben kan go bun nanga den. Yosef ben frustan taki Gado meki sani waka na so wan fasi, taki den pramisi fu En ben kan kon tru.

Yakob di ben kon owru kaba, tan libi na ini Egepte teleki a dede. A famiri fu en di ben kon moro bigi, ben libi drape tu. Syatu bifo Yakob dede, a ben taki dati a pramisi Pikin, noso Frulusuman, ben o de wan makti Tiriman di ben o de wan bakapikin fu en manpikin Yuda. Bifo Yosef dede furu yari baka dati, a ben taki wan profeititori taki wan dei Gado ben o tyari a famiri fu Yakob komoto na ini Egepte.

—Den tori disi teki puru fu Genesis kapitel 20 te go miti 50; Hebrewsma 11:17-22.