Go na content

Go na a tra menu

Go na table of contents

Yehovah Kotoigi

Sranantongo

San Bijbel e leri wi trutru?

KAPITEL TIN

Yeye libisani—A krakti di den abi na wi tapu

Yeye libisani—A krakti di den abi na wi tapu

Engel e yepi sma?

Fa ogri yeye ben abi krakti tapu libisma?

Wi musu frede den ogri yeye?

TE WI e leri sabi wan sma, dan furu tron wi e kon sabi na osofamiri fu a sma dati tu. Na so a de tu taki te wi e kon sabi Yehovah Gado, dan wi musu kon sabi moro fu den engel di de wan pisi fu na osofamiri fu Gado na ini hemel. Bijbel e kari den engel "manpikin fu Gado” (Yob 38:7). Sobun, sortu frantwortu den engel abi na ini den sani di Gado abi na prakseri? A de so taki den ben abi krakti tapu den sani di pasa fositen na grontapu? Den engel abi krakti tapu yu libi? Efu dati de so, dan fa?

2 Hondrohondro tron Bijbel e taki fu engel. Meki wi go poti prakseri na wan tu fu den tori disi di skrifi na ini Bijbel, so taki wi kan kon sabi moro fu den engel. Pe den engel komoto? Kolosesma 1:16 e taki: "Nanga yepi fu en [Yesus Krestes], Gado meki ala tra sani na hemel èn na grontapu.” Sobun, nanga yepi fu en fosi gebore Manpikin, Yehovah Gado meki ibriwan fu den yeye libisani, noso engel disi. Omeni engel de? Bijbel e sori taki Gado ben meki milyunmilyun engel, èn taki den alamala abi furu makti.—Psalm 103:20.*

3 Gado Wortu, Bijbel, e fruteri wi taki di Gado ben meki a grontapu, "ala den manpikin fu Gado ben bigin bari fu di den ben breiti srefisrefi” (Yob 38:4-7). Sobun, den engel ben de langa ten fosi Gado meki libisma, èn fosi a meki a grontapu srefi. A bijbeltekst disi e sori wi tu taki den engel abi firi, fu di a e taki dati den alamala makandra "ben bari fu prisiri”. Luku taki na "ala den manpikin fu Gado” makandra, ben e prisiri. Na a ten dati, ala den engel ben de na ini na osofamiri fu Yehovah Gado di e dini en na ini wánfasi.

A YEPI ÈN A KIBRI DI ENGEL E GI

Wan engel e kibri Danièl na ini a lew-olo

"Mi eigi Gado ben seni en engel kon èn a ben tapu a mofo fu den lew.” —Danièl 6:22

4 Sensi a ten di den getrow yeye libisani si fa Gado meki den fosi libisma, den sori taki den wani sabi trutru fa sani e waka nanga a libisma famiri di e kon moro bigi, èn taki den wani sabi fa den prakseri fu Gado sa kon tru (Odo 8:30, 31; 1 Petrus 1:11, 12). Ma bakaten, den engel si fa safrisafri furu fu den libisma no ben wani dini a lobi-ati Mekiman fu den moro. A no de fu taki dati disi ben meki den getrow engel firi sari. Ma na a tra sei, te wán libisma srefi bigin dini Yehovah baka, dan "den engel…e prisiri” (Lukas 15:10). Fu di den engel e broko den ede trutru nanga a tanbun fu den sma di e dini Gado, meki wi kan frustan fu san ede Yehovah gebroiki den engel ibri tron baka fu tranga, èn fu kibri den getrow futuboi fu en na grontapu (Hebrewsma 1:7, 14). Luku wan tu eksempre.

5 Di den ogri foto Sodom nanga Gomora ben o kisi pori, dan tu engel ben yepi a regtfardiki man Lot nanga den umapikin fu en fu lowe komoto na ini a kontren dati, so taki den ben kan tan na libi (Genesis 19:15, 16). Furu yari baka dati, den feanti fu a profeiti Danièl ben trowe en go na ini wan lew-olo, ma noti no ben pasa nanga en, èn a ben taki: "Mi eigi Gado ben seni en engel kon èn a ben tapu a mofo fu den lew” (Danièl 6:22). Na ini a fosi yarihondro G.T., wan engel ben puru na apostel Petrus na dungru-oso (Tori fu den Apostel 12:6-11). Boiti dati, engel ben gi Yesus deki-ati na a bigin fu en diniwroko na grontapu (Markus 1:13). Èn syatu bifo Yesus dede, wan engel kon na en èn a "gi en krakti” (Lukas 22:43). Na den tumusi prenspari momenti dati fu Yesus en libi, den engel ben de wan trowstu gi en trutru!

6 Na ini a ten disi, engel no e sori densrefi moro na Gado pipel di de na grontapu. Aladi libisma no man si den makti engel fu Gado, toku den e kibri a pipel fu en te now ete, spesrutu gi sani di kan du den ogri na yeye fasi. Bijbel e taki: "Na engel fu Yehovah e seti ensrefi lontu den wan di e frede en, èn a e frulusu den” (Psalm 34:7). Fu san ede den wortu dati musu de wan bigi trowstu gi wi? Fu di ogri-ati yeye de di wani kiri wi! Suma na den ogri yeye disi? Pe den komoto? Fa den e suku fu du wi ogri? Fu feni piki tapu den aksi disi, dan meki wi poti prakseri syatu na wan sani di pasa na a bigin fu a historia fu libisma.

YEYE LIBISANI DI DE WI FEANTI

7 Soleki fa wi ben leri na ini kapitel 3 fu a buku disi, dan wán fu den engel ben kon kisi a firi fu tiri abra trawan, èn dati meki a drai baka gi Gado. Bakaten, na engel disi tron Satan Didibri (Openbaring 12:9). Na ini den 1600 yari baka di a kori Eva, Satan meki taki pikinmoro ala libisma drai baka gi Gado, boiti wan tu getrow sma soleki Abel, Heinok, nanga Noa.—Hebrewsma 11:4, 5, 7.

8 Na ini den dei fu Noa, tra engel ben opo densrefi teige Yehovah tu. Den gowe libi a presi di den ben abi na ini na osofamiri fu Gado na ini hemel, den saka kon na grontapu, èn den teki libisma skin. Fu san ede? Na ini Genesis 6:2 wi e leisi: "Den manpikin fu a tru Gado ben bigin luku den umapikin fu libisma, èn den ben si fa den uma moi; èn den go teki wefi gi densrefi, iya, alamala di den ben wani.” A fasi fa den engel disi ben e handri, ben meki taki a heri libisma famiri ben kon ogri. Ma Yehovah Gado no ben gi pasi taki sani ben go so doro. A ben tyari wan frudu kon na heri grontapu di kiri ala den ogrisma, èn a kibri soso den getrow futuboi fu en (Genesis 7:17, 23). Na so fasi den engel di ben opo densrefi teige Gado, den ogri yeye sobun, ben abi fu gowe libi a libisma skin fu den èn drai go baka na hemel leki yeye libisani. Den teki a sei fu Didibri di ben tron "a tiriman fu den ogri yeye”.—Mateyus 9:34.

9 Di den trangayesi engel ben drai go baka na hemel, dan Gado no ben teki den moro na ini na osofamiri fu en, neleki fa a ben du nanga Satan, a tiriman fu den (2 Petrus 2:4). Aladi den no man teki libisma skin gi densrefi moro na ini a ten disi, toku den e meki libisma du wan lo ogri sani. Fu taki en leti, den ogri yeye disi e yepi Satan fu "kori sma na heri grontapu” (Openbaring 12:9; 1 Yohanes 5:19). Fa? Furu tron den ogri yeye e gebroiki triki fu kori sma (2 Korentesma 2:11). Meki wi go luku wan tu fu den triki dati.

FA DEN OGRI YEYE E KORI SMA

10 Den ogri yeye e gebroiki afkodrei fu kori sma. Te sma e du afkodrei, dan den e kisi fu du nanga den ogri yeye, a kan taki den e du disi langalanga, noso nanga yepi fu wan sma di e taki nanga den ogri yeye. Bijbel e krutu afkodrei, èn a e warskow wi fu tan fara fu iniwan sani di abi fu du nanga afkodrei (Galasiasma 5:19-21). Neleki fa wan fisiman e gebroiki beti fu fanga fisi, na so den ogri yeye e gebroiki afkodrei fu kori sma. Wan fisiman e gebroiki difrenti sortu beti fu kisi difrenti sortu fisi. Na a srefi fasi, den ogri yeye e gebroiki difrenti fasi fu du afkodrei fu kan abi krakti tapu ala sortu sma.

1. Wan horoscoop prenki; 2. den e leisi anu; 3.

Den ogri yeye e gebroiki difrenti sani fu kori sma

11 Wán fasi fu afkodrei di den ogri yeye e gebroiki leki beti, na lukuman-wroko. San na lukuman-wroko? Dati na a fasi fa sma e pruberi fu kon sabi san o pasa na ini a ten di e kon, noso fu kon sabi sani di tra sma no sabi. Wan tu fasi fa sma e du lukuman-wroko, na sani soleki horoscoop pe sma e luku den stari fu kon sabi san o pasa na ini a ten di e kon, a luku di sma e luku na ini na anu fu trawan fu kon sabi fa den libi o waka, noso a suku di sma e suku marki noso boskopu na ini dren. Aladi furu sma e denki taki a lukuman-wroko na wan sani di no kan du yu ogri, toku Bijbel e sori wi taki den lukuman e wroko makandra nanga ogri yeye. Fu eksempre, Tori fu den Apostel 16:16-18 e taki fu ’wan ogri yeye di ben e meki taki wan meisje ben man du lukuman-wroko’. Ma baka di den puru na ogri yeye na en tapu, a no ben man du dati moro.

12 Wan tra fasi fa den ogri yeye e kori sma, na taki den e gi sma deki-ati fu taki nanga den dedewan. Furu tron sma di e sari fu di den lasi wan lobiwan na ini dede, e bribi den fowtu denki di abi fu du nanga den dedewan. Wan sma di e wroko nanga ogri yeye kan fruteri spesrutu sani di abi fu du nanga a sma di dede, noso a kan taki nanga wan sten di gersi a sten fu a sma di dede. A bakapisi na taki furu sma e bribi taki den dedewan de na libi trutru èn den e bribi taki te den e taki nanga den dedewan, dan dati sa yepi den fu no sari so furu moro. Ma nowan fu den sani disi e "trowstu” sma trutru, èn den kan tyari takru bakapisi gi wi. Fu san ede? Bika den ogri yeye kan taki neleki a sma di dede èn den kan fruteri a sma di e wroko nanga ogri yeye, wan tu sani fu a dedesma (1 Samuel 28:3-19). Boiti dati, wi ben si na ini kapitel 6 taki den dedewan no de moro (Psalm 115:17). Sobun, "iniwan sma di e aksi sani na den dedewan”, e meki taki den ogri yeye e kori en èn so wan sma no e du a wani fu Gado (Deuteronomium 18:10, 11; Yesaya 8:19). Fu dati ede, yu musu du tranga muiti fu tan fara fu a beti disi di den ogri yeye e gebroiki fu du sma ogri.

13 Ogri yeye no e kori sma wawan, ma den e tapu skreki gi den tu. Na ini a ten disi, Satan nanga den ogri yeye fu en sabi taki a "ten syatu” bifo Gado o meki taki den no o man du noti moro, èn dati meki now den kon moro ogri leki iniwan ten na fesi (Openbaring 12:12, 17). Toku a de so, taki dusundusun sma di ben e frede den ogri yeye disi ibri dei, no e frede den moro. Fa dati du kon? San wan sma kan du, awansi a e du afkodrei kaba?

FA FU KAKAFUTU GI OGRI YEYE

14 Bijbel e fruteri wi fa wi kan kakafutu gi ogri yeye èn san wi musu du fu komoto na ini a makti fu den. Luku na eksempre fu den fosi yarihondro Kresten di ben e libi na ini a foto Efeise. Sonwan fu den ben e du afkodrei bifo den ben tron Kresten. San den du di den bosroiti fu tapu nanga afkodrei? Bijbel e taki: "Bun furu fu den sma di ben e du bonuwroko tyari den buku fu den kon na wán èn den bron den na fesi ala sma” (Tori fu den Apostel 19:19). Den nyun Kresten dati ben bron den buku fu den di ben abi fu du nanga bonu, èn na so fasi den gi wan eksempre na den wan di abi a winsi fu kakafutu gi ogri yeye na ini a ten disi. Sma di wani dini Yehovah musu pori iniwan sani di abi fu du nanga afkodrei. Dati wani taki sani soleki buku, tijdschrift, kino, fowtow, nanga poku di e gi sma deki-ati fu du afkodrei èn di e meki a gersi leki a de wan sani di e gi prisiri. Tra sani di sma musu trowe gowe noso pori, na sani soleki den tapu di den e weri na den skin fu ogri no miti den.—1 Korentesma 10:21.

FA FU KAKAFUTU GI OGRI YEYE

  • Pori ala sani di abi fu du nanga afkodrei
  • Studeri Bijbel
  • Begi Gado
Wan man e du sani fu kon fri fu kon fri fu afkodrei

15 Wan tu yari baka di den Kresten fu Efeise ben pori den buku fu den di ben abi fu du nanga bonu, dan na apostel Paulus ben skrifi den, taki: ’Wi e feti nanga den ogri yeye’ (Efeisesma 6:12). Den ogri yeye ben e feti ete. Den ben e tan pruberi fu abi krakti tapu den Efeisesma. Sobun, san den Kresten dati ben musu du moro fara? Paulus ben taki: "Teki spesrutu a bigi skilt, dati na a bribi, èn nanga dati unu sa man kiri a faya fu ala den peiri di na ogriwan [Satan] e sutu kon na unu tapu” (Efeisesma 6:16). Wi bribi musu de leki wan skilt èn o moro tranga wi bribi de, o moro bun wi sa man kakafutu gi den ogri yeye.—Mateyus 17:20.

16 Fa wi kan tranga wi bribi dan? We, wi musu studeri Bijbel. Efu wi wani abi wan tranga skotu, dan a fondamenti fu a skotu musu steifi. Na so a de tu taki, efu wi wani abi wan tranga bribi, dan wi musu abi wan tranga fondamenti tu, èn dati wani taki dati wi musu abi soifri sabi fu Gado Wortu, Bijbel. Efu wi e leisi èn e studeri Bijbel ala dei, dan a bribi fu wi sa kon tranga. So wan bribi sa de leki wan skotu di e kibri wi so taki den ogri yeye no abi krakti na wi tapu.—1 Yohanes 5:5.

17 San na ete wan sani di den Kresten na ini Efeise ben musu du? Den ben abi kibri fanowdu, fu di den ben e libi na ini wan foto pe furu sma ben e anbegi ogri yeye. Dati meki Paulus ben taigi den: "Tan begi na ibri okasi èn na ala fasi, èn du dati fayafaya nanga yepi fu a yeye” (Efeisesma 6:18). Wi srefi e libi na ini wan grontapu pe furu sma e anbegi ogri yeye. Sobun, efu wi wani kakafutu gi ogri yeye, dan a de tumusi prenspari fu begi Yehovah fayafaya fu kibri wi. A no de fu taki dati wi musu kari a nen fu Yehovah te wi e begi (Odo 18:10). Dati meki wi musu tan begi Gado fu "frulusu wi fu na ogriwan”, Satan Didibri (Mateyus 6:13). Yehovah sa gi piki tapu den sortu fayafaya begi disi.—Psalm 145:19.

18 Ogri yeye kan du wi ogri trutru, ma efu wi e kakafutu gi Didibri èn efu wi e kon krosibei na Gado fu di wi e du a wani fu En, dan wi no abi fu frede den (Yakobus 4:7, 8). Den ogri yeye no abi a makti fu du ala san den wani. Na ini den dei fu Noa, Gado ben strafu den, èn heri esi den sa kisi krutu fu a lasti leisi (Yudas 6). Hori na prakseri tu taki den makti engel fu Yehovah e kibri wi (2 Kownu 6:15-17). Den engel dati wani trutru taki wi kakafutu gi den ogri yeye. Te yu luku en bun, dan a de leki den regtfardiki engel tanapu na seisei e gi wi deki-ati fu go doro. Dati meki wi musu wani tan krosibei na Yehovah èn na en osofamiri fu getrow yeye libisani. Meki wi wai pasi tu gi ibri sortu afkodrei èn meki wi du ala ten san Gado Wortu e taki (1 Petrus 5:6, 7; 2 Petrus 2:9). Dan wi kan abi a dyaranti taki wi sa wini a strei teige den ogri yeye.

19 Ma fu san ede Gado gi pasi taki den ogri yeye de te now ete, èn fu san ede a gi pasi taki sma e pina so furu fu ogridu ede? Na aksi dati o kisi piki na ini a kapitel di e kon.

SAN BIJBEL E LERI WI

  • Getrow engel e yepi den wan di e dini Yehovah.—Hebrewsma 1:7, 14.
  • Satan nanga den ogri yeye fu en e kori sma fu meki den drai baka gi Gado.—Openbaring 12:9.
  • Te yu e du a wani fu Gado èn e kakafutu gi Didibri, dan Satan sa lon gowe fu yu.—Yakobus 4:7, 8.

*  Openbaring 5:11 e taki fu den regtfardiki engel, taki: "Tin dusun tron tin dusun engel ben de.” Sobun, Bijbel e sori krin taki Gado ben meki milyunmilyun engel.


Den aksi fu a studie

1. Fu san ede wi musu wani kon sabi moro fu den engel?

2. Pe den engel komoto, èn omeni fu den de?

3. San Yob 38:4-7 e fruteri wi fu den engel?

4. Fa Bijbel e sori taki getrow engel e poti furu prakseri na san libisma e du?

5. Sortu eksempre skrifi na ini Bijbel di e sori fa engel ben e yepi sma?

6. (a) Fa den engel e kibri a pipel fu Gado na ini a ten disi? (b) Na sortu aksi wi sa poti prakseri now?

7. O furu sma Satan ben man kori fu drai baka gi Gado?

8. (a) Fa son engel kon tron ogri yeye? (b) San den ogri yeye ben musu du fu kan tan na libi, di a Frudu ben kon na ini den dei fu Noa?

9. (a) San pasa nanga den ogri yeye di den ben drai go baka na hemel? (b) Sortu sani di den ogri yeye e du wi sa go luku?

10. San na afkodrei?

11. San na lukuman-wroko, èn fu san ede wi musu wai pasi gi dati?

12. Fu san ede a kan abi takru bakapisi gi wi te wi e suku fu taki nanga den dedewan?

13. San furu sma di ben e frede den ogri yeye fositen, ben man du?

14. Fa wi kan komoto na ini a makti fu den ogri yeye, neleki fa den fosi yarihondro Kresten fu Efeise ben du?

15. San wi musu du fu man kakafutu gi den ogri yeye?

16. Fa wi kan tranga a bribi fu wi?

17. Sortu sani wi musu du fu man kakafutu gi ogri yeye?

18, 19. (a) Fu san ede wi kan abi a dyaranti taki wi o wini a strei teige den ogri yeye? (b) Sortu aksi o kisi piki na ini a kapitel di e kon?