FURU fu den kerkifesa nanga tra sortu fesa di sma e hori na ala sei fu grontapu, no komoto fu Bijbel. Pe den fesa disi komoto dan? Efu yu abi na okasi fu go na wan bibliotheek fu ondrosuku a tori disi moro fini, dan yu sa feni en wan moi sani fu kon sabi san tra buku e taki fu den fesadei di furu sma na ini a libimakandra fu yu e hori. Luku wan tu eksempre.

Pasen. Wan buku e taki: "Nowan presi na ini a Nyun Testamenti wi e leisi fu sma di ben e hori Pasen” (The Encyclopædia Britannica). Fa a du kon taki sma bigin hori Pasen? A fesa disi komoto fu heiden bribi. Aladi sma e taki dati den e hori a fesa disi fu memre na opobaka fu Yesus, toku den gwenti di abi fu du nanga Pasen, no komoto fu a Kresten bribi. Luku fu eksempre san wan buku e taki fu a "Paas-konikoni” di de wan pôpi sani: "Langa ten kaba den heiden ben e gebroiki konikoni fu prenki a meki di sma man meki furu pikin” (The Catholic Encyclopedia).

Nyun Yari fesa. A dei te sma e hori a Nyun Yari fesa, èn den gwenti di abi fu du nanga a fesa disi, no de a srefi na ini ala kondre. Wan buku e taki fu pe a fesa disi komoto: "Na ini a yari 46 G.T., Yulius Caesar, a tiriman fu Rome, poti 1 yanuari leki a dei fu hori a Nyun Yari fesa. Den Romesma ben e hori a dei disi fu gi grani na Yanus, a gado fu den portu, den doro, èn fu a bigin. A mun di nen yanuari komoto fu a nen Yanus, wan gado di ben abi tu fesi; wán ben e luku go na fesisei èn a trawan ben e luku go na bakasei” (The World Book Encyclopedia). Sobun, a Nyun Yari fesa komoto fu heiden gwenti.

Halloween. Wan buku e taki: "Wan tu fu den gwenti di abi fu du nanga Halloween de fu si na den seremonia di den druïden [den priester fu a Kelt bribi fu owruten] ben e hori bifo a pisi ten fu den Kresten. Den Keltsma ben e hori fesa gi tu prenspari gado, namku a son-gado èn a gado fu den dedewan. A fesa gi a gado fu den dedewan, ben hori tapu 1 november, èn tapu a dei dati a Nyun Yari fu den Keltsma ben bigin. Safrisafri sma kenki a fesa gi den dedewan, kon tron wan Kresten fesa” (The Encyclopedia Americana).

Tra fesadei.Wi no man taki fu ala den fesa di sma e hori na heri grontapu. Ma fesadei di e gi grani na libisma, noso na libisma organisâsi, na fesa di Yehovah no feni bun (Yeremia 17:5-7; Tori fu den Apostel 10:25, 26). Hori na prakseri tu, taki a de prenspari fu sabi pe wan kerkifesa komoto, fu di dati kan meki taki Gado feni wi bun, noso taki a no feni wi bun (Yesaya 52:11; Openbaring 18:4). Den Bijbel gronprakseri di kari na ini kapitel 16 fu a buku disi, sa yepi yu fu kon sabi fa Gado e prakseri fu a hori di sma e hori den fesadei fu grontapu.

← Luku a kapitel di e taki fu a tori disi