Go na content

Go na a tra menu

Go na table of contents

Yehovah Kotoigi

Sranantongo

San Bijbel e leri wi trutru?

KAPITEL NEIGI

Wi e libi na ini "den lasti dei”?

Wi e libi na ini "den lasti dei”?

Fu sortu sani di e pasa na ini a ten fu wi, Bijbel ben taki na fesi?

San Gado Wortu e taki fu a fasi fa sma ben o de na ini "den lasti dei”?

Fu sortu bun sani di e pasa na ini "den lasti dei” Bijbel taki na fesi?

OITI yu sidon luku a nyunsu tapu telefisi èn aksi yusrefi: ’San o pasa nanga a grontapu disi te fu kaba?’ Fu di rampu e pasa wantronso èn sondro taki sma e fruwakti dati, meki nowan libisma kan taki na fesi san o pasa na ini a ten di e kon (Yakobus 4:14). Ma Yehovah sabi san o pasa na ini a ten di e kon (Yesaya 46:10). Langa ten pasa a Wortu fu Gado, Bijbel, ben taki fu den ogri sani di ben o pasa na ini a ten fu wi, ma a ben taki tu fu den tumusi moi sani di o pasa na ini a ten di e kon.

2 Yesus Krestes ben taki fu a Kownukondre fu Gado di sa tyari wan kaba kon na ogridu èn di sa meki grontapu tron wan paradijs (Lukas 4:43). Sma ben wani sabi o ten a Kownukondre ben o kon. Fu taki en leti, den disipel fu Yesus ben aksi en: "San o de a marki fu yu denoya èn fu a kaba fu a grontapu sistema disi?” (Mateyus 24:3) Yesus ben piki den taki Yehovah Gado wawan sabi soifri o ten a sistema disi o kon na wan kaba (Mateyus 24:36). Yesus no ben taigi den disipel soifri o ten a kaba ben o kon, ma a ben taki na fesi san ben o pasa na grontapu syatu bifo a ten doro te a Kownukondre o tyari trutru vrede kon èn te a o meki taki ala sani waka bun nanga a libisma famiri. Den sani di a ben taki na fesi, e pasa nownowde!

3 Fosi wi go ondrosuku den buweisi di e sori taki wi e libi na ini a pisi ten fu "a kaba fu a grontapu sistema disi”, dan meki wi poti prakseri syatu na wan feti di nowan libisma ben man si kwetikweti. Na feti disi ben pasa na ini hemel, èn a bakapisi fu na feti disi abi krakti na wi tapu.

WAN FETI NA INI HEMEL

4 Na ini kapitel aiti fu a buku disi wi ben si taki Yesus Krestes tron Kownu na ini hemel na ini a yari 1914 (Danièl 7:13, 14). Syatu baka di a kisi Kownu makti, Yesus opo du wan sani. "Wan feti bigin na ini hemel” Bijbel e taki. "Mikael [wan tra nen gi Yesus] nanga den engel fu en ben feti nanga a bigi kaiman [Satan Didibri], èn a bigi kaiman nanga den engel fu en ben feti nanga den.”* Satan nanga den ogri engel, noso ogri yeye fu en, lasi a feti dati èn Yesus nanga den engel fu en ben trowe den komoto fu hemel kon na grontapu. Den getrow yeye manpikin fu Gado ben e prisiri fu di Satan nanga den ogri yeye fu en no ben de moro na ini hemel. Ma libisma no ben o prisiri kwetikweti. Na presi fu dati, Bijbel ben taki na fesa: "Helu fu grontapu…bika Didibri saka kon na unu, èn a abi bigi atibron, fu di a sabi taki en ten syatu.”—Openbaring 12:7, 9, 12.

5 Grantangi, luku san ben o de a bakapisi fu a feti di ben de na ini hemel. Fu di Satan atibron, meki a ben o tyari bigi problema kon gi den wan di e libi na grontapu. Soleki fa yu sa si, dan wi e libi now na ini a ten dati fu bigi problema. Ma a pisi ten dati no sa tan tumusi langa, a sa tan fu ’wan syatu pisi ten’ nomo. Satan srefi sabi dati. Bijbel e kari a pisi ten disi "den lasti dei” (2 Timoteyus 3:1). Wi kan breiti trutru taki heri esi Gado sa tyari wan kaba kon na a makti di Didibri abi tapu grontapu! Meki wi go luku wan tu fu den sani di Bijbel ben taki na fesi èn di e kon tru nownowde. Den profeititori disi e buweisi taki wi e libi na ini den lasti dei èn taki heri esi a Kownukondre fu Gado sa tyari têgo blesi kon gi den wan di lobi Yehovah. Meki wi poti prakseri fosi na fo pisi fu a marki di Yesus ben gi èn di ben o sori wi na ini sortu ten wi e libi.

PRENSPARI SANI DI BEN O PASA NA INI DEN LASTI DEI

Feti, angriten, nanga rampu

6"A wan pipel o opo go feti nanga a tra pipel, èn a wan kownukondre nanga a tra kownukondre” (Mateyus 24:7). Na ini den wan hondro yari di pasa, milyunmilyun sma dede na ini orloku. Wan historia skrifiman fu Ingrisikondre ben skrifi: "Na ini a di fu 20 yarihondro, libisma kiri makandra moro leki iniwan ten na ini historia…. Na ini a yarihondro dati, yu ben abi orloku pikinmoro a wan baka a trawan; na mindri den orloku disi yu ben abi soso wan tu syatu pisi ten pe feti no ben de.” Wan raportu fu wan organisâsi di nen Worldwatch Institute, e taki: "Na ini [a di fu 20] yarihondro, dri tron so furu sma dede leki na ini ala den orloku di pasa sensi a fosi yarihondro baka di Krestes gebore te go miti a yari 1899.” Moro leki 100 milyun sma dede na ini orloku sensi 1914. Milyunmilyun sma firi sari èn den pina srefisrefi di wan lobiwan fu den dede na ini orloku. Kande yusrefi lasi wan lobiwan na so wan fasi tu.

7’Angriten o de’ (Mateyus 24:7). Ondrosukuman e taki dati sma meki moro furu nyanyan sani na ini den 30 yari di pasa. Ma te nanga now, furu sma no abi nofo nyanyan fu di den no abi nofo moni fu bai nyanyan, noso fu bai wan gron fu prani sani fu nyan. Na ini pôti kondre, moro leki wan milyard sma e wroko wán Amerkan dala (wán euro) wan dei noso moro mendri srefi èn nanga dati den musu libi. Moro furu fu den sma disi e libi nanga angri. Soleki fa na organisâsi fu gosontu afersi na heri grontapu (WHO) e taki, dan wan fu den bigi sani di e meki taki moro leki feifi milyun pikin-nengre e dede ibri yari, na taki den no e kisi gosontu nyanyan.

8"Bigi gronseki o de” (Lukas 21:11). Wan Amerkan organisâsi di e ondrosuku a naturu (U.S. Geological Survey), kon si taki na ini a pisi ten sensi 1990, sowan 17 fu ala den gronseki di e pasa ibri yari, na gronseki di hebi nofo fu man broko difrenti oso èn fu man priti a gron opo. Èn te yu luku en bun, dan pikinmoro ibri yari yu ben abi gronseki di ben hebi so kefalek taki den ben man pori furu oso krinkrin. Wan tra organisâsi e taki: "Na ini den 100 yari di pasa, gronseki meki taki dusundusun sma lasi den libi, èn aladi sabidensi go na fesi, toku dati no ben man tyari furu kenki kon.”

9’Pestsiki o de’ (Lukas 21:11). Aladi sma kan kisi moro bun datrayepi, toku a libisma famiri e kisi fu du doronomo nanga siki di ben de kaba èn nyun siki di e opo kon. Wan raportu e fruteri fu 20 sortu siki di sma sabi na ala sei, siki soleki tuberculose, malaria, nanga cholera. A raportu e sori taki den 20 sortu siki disi kon de fu si moro nanga moro na ini den yari di pasa èn taki a e kon moro muilek fu dresi den nanga yepi fu den dresi di datra abi. Fu taki en leti, sowan 30 nyun siki opo kon. Gi sonwan fu den siki disi dresi no de, èn den kan kiri sma srefi.

A FASI FA SMA BEN O DE NA INI DEN LASTI DEI

Furu sma no wani arki a koni rai na ini Gado Wortu

10 Boiti taki Bijbel e sori sortu bigi kenki ben de fu si na grontapu na ini den lasti dei, dan a ben taki na fesi tu dati libisma ben o tyari densrefi na wan heri tra fasi na a pisi ten dati. Na apostel Paulus ben sori fa furu sma ben o tyari densrefi. Na ini 2 Timoteyus 3:1-5 wi e leisi: "Na ini den lasti dei muilek ten o de, di tranga fu pasa.” Paulus ben taki fu eksempre, taki na a pisi ten dati yu ben o abi sma di

  • sa lobi densrefi nomo
  • no sa de loyaal
  • sa lobi moni
  • sa trangayesi papa nanga mama
  • no sa lobi trawan
  • no sa man dwengi densrefi
  • sa du sani nanga trawan na wan ogri-ati fasi
  • sa lobi prisiri na presi taki den lobi Gado
  • sa du leki den e dini Gado na wan getrow fasi, ma a libi fu den o sori taki dati no de so

11 A de so taki den sma na ini a birti fu yu e tyari densrefi na a fasi disi tu? A musu fu de so. Na ala sei yu abi sma di e tyari densrefi na wan takru fasi. Disi e sori wi taki Gado sa handri heri esi, fu di Bijbel e taki: "Te den ogriwan e sproiti leki grasi èn ala den sma di e du ogri e gi bromki, dan dati e pasa so taki den kan kisi pori fu têgo.”—Psalm 92:7.

BUN SANI DI E PASA!

12 Soleki fa Bijbel ben taki na fesi, dan bigi problema ben o de na ini den lasti dei. Ma na ini a bruya grontapu disi, bun sani e pasa na mindri den anbegiman fu Yehovah.

"A bun nyunsu disi fu a kownukondre o preiki gi sma na heri grontapu.”—Mateyus 24:14.

Yehovah Kotoigi e preiki a bun nyunsu

13"A tru sabi o lai srefisrefi”, na so a Bijbel buku Danièl ben taki na fesi. O ten dati ben o pasa? Na "a ten fu a kaba” (Danièl 12:4). Spesrutu sensi 1914, Yehovah yepi den wan di e angri trutru fu dini en, fu frustan Bijbel moro bun. Den kon frustan moi tru tori di abi fu du nanga a nen fu Gado, den sani di a abi na prakseri, èn a frulusu-ofrandi fu Yesus Krestes. Den kon sabi tu san e pasa nanga den dedewan, èn taki sma o kisi wan opobaka. Boiti dati, anbegiman fu Yehovah leri fa den musu libi na wan fasi di e gi den wini èn di e gi Gado glori. Den kon frustan moro bun tu san a Kownukondre fu Gado sa du èn fa a sa meki sani kon bun baka na grontapu. San a pipel fu Gado e du nanga den sani di den kon sabi? Na aksi disi e memre wi fu ete wan tra profeititori di e kon tru na ini den lasti dei disi.

14"A bun nyunsu disi fu a kownukondre o preiki gi sma na heri grontapu”, na so Yesus ben taki na ini a profeititori fu en di abi fu du nanga "a kaba fu a grontapu sistema” (Mateyus 24:3, 14). Na heri grontapu a bun nyunsu fu a Kownukondre e preiki na ini moro leki 230 kondre èn na ini moro leki 400 tongo. A nyunsu disi e sori sma san na a Kownukondre, san a sa du, èn fa wi kan kisi den blesi di a e tyari kon. Milyunmilyun Yehovah Kotoigi e preiki a bun nyunsu fu a Kownukondre fayafaya. Den komoto fu "ala kondre, lo, pipel nanga tongo” (Openbaring 7:9). Sondro fu aksi moni, den Kotoigi e hori oso-bijbelstudie nanga milyunmilyun sma di wani kon sabi san Bijbel e leri wi trutru. A profeititori disi e kon tru na wan kefalek moi fasi, spesrutu fu di Yesus ben taki na fesi dati ’ala sma o teige wi’ fu di wi na tru Kresten!—Lukas 21:17.

SAN YU O DU?

15 Efu so furu Bijbel profeititori e kon tru na ini a ten disi, dan a de krin taki wi e libi na ini den lasti dei, a no so? Te a bun nyunsu preiki soleki fa Yehovah ben wani, dan "a kaba” sa kon trutru (Mateyus 24:14). "A kaba” na a ten te Gado sa puru ogridu na grontapu. Yehovah sa gebroiki Yesus nanga den makti engel fu pori ala sma di e gens En fu espresi (2 Tesalonikasma 1:6-9). Satan nanga den ogri yeye fu en no sa kori den pipel fu grontapu moro. Baka dati, a Kownukondre fu Gado sa tyari bun furu blesi kon gi ala sma di e saka densrefi ondro a regtfardiki tirimakti fu en.—Openbaring 20:1-3; 21:3-5.

16 Fu di a kaba fu a sistema fu Satan de krosibei, meki wi musu aksi wisrefi: ’San mi musu du now?’ A de wan koni sani fu tan teki moro sabi fu Yehovah èn fu den sani di a wani taki wi musu du (Yohanes 17:3). Studeri Bijbel fayafaya. Kon kisi a gwenti fu abi demakandra nanga trawan di e suku fu du a wani fu Yehovah (Hebrewsma 10:24, 25). Teki a sabi di Yehovah Gado e gi bogobogo na sma na heri grontapu. Tyari kenki kon na ini yu libi so taki Gado kan feni yu bun.—Yakobus 4:8.

17 Yesus ben taki na fesi dati furu sma no ben o poti prakseri na den buweisi di e sori taki wi e libi na ini den lasti dei. Den ogriwan sa kisi pori wantronso te den no fruwakti dati. Furu sma o skreki, neleki fa den ben o skreki te wan fufuruman e kon te neti (1 Tesalonikasma 5:2). Yesus ben warskow: "Neleki fa sani ben de na ini a ten fu Noa, na so a denoya fu a Manpikin fu libisma o de. Bika na ini a ten dati bifo a frudu, sma ben nyan, den ben dringi, man ben teki uma fu trow èn uma ben trow nanga man, teleki a dei doro di Noa go na ini na ark; ma den no ben poti prakseri na san ben e pasa, teleki a frudu kon èn a wai den alamala puru; na so a denoya fu a Manpikin fu libisma o de tu.”—Mateyus 24:37-39.

18 Dati meki Yesus ben taigi den sma di ben e arki en: "Poti prakseri na unsrefi taki noiti un ati e kon hebi fu di unu e nyan pasa marki, noso fu di unu e dringi tumusi furu, noso fu di unu e broko un ede nanga den sorgu fu na aladei libi, so taki a dei dati no e kon na un tapu wantronso leki wan trapu. Bika a o kon na tapu ala den sma di e libi na grontapu. Fu dati ede, tan na ai èn begi ala ten taki unu man lowe gi ala den sani di musu pasa, èn taki unu kan tanapu na fesi a Manpikin fu libisma [fu di Gado feni unu bun]” (Lukas 21:34-36). A de wan koni sani fu poti seryusu prakseri na den wortu fu Yesus. Fu san ede? Bika den wan di Yehovah Gado nanga "a Manpikin fu libisma” Yesus Krestes, feni bun, abi a howpu fu pasa a kaba fu a sistema fu Satan libilibi, èn fu libi fu têgo na ini wan kefalek moi nyun grontapu di de so krosibei!—Yohanes 3:16; 2 Petrus 3:13.

SAN BIJBEL E LERI WI

  • Den marki di e sori taki wi e libi na ini den lasti dei na feti, angriten, gronseki, nanga pestsiki.—Mateyus 24:7; Lukas 21:11.
  • Na ini den lasti dei disi, furu sma lobi densrefi, den lobi moni, èn den lobi meki prisiri, ma den no lobi Gado.—2 Timoteyus 3:1-5.
  • Na ini den lasti dei disi, a bun nyunsu fu a Kownukondre e preiki na heri grontapu.—Mateyus 24:14.

*  Efu yu wani leisi moro sani di e sori taki Mikael na wan tra nen gi Yesus Krestes, dan luku a pisi tori di nen "Tra prenspari sani”.


Den aksi fu a studie

1. Fa wi kan kon sabi san o pasa na ini a ten di e kon?

2, 3. San den disipel fu Yesus ben aksi en, èn san a piki den?

4, 5. (a) San ben pasa na ini hemel syatu baka di Yesus ben tron Kownu? (b) San ben o de a bakapisi fu na feti di ben de na ini hemel, soleki fa Openbaring 12:12 e sori?

6, 7. Fa den sani di Yesus ben taki fu feti nanga angriten e kon tru na ini a ten disi?

8, 9. San e sori taki a profeititori fu Yesus di abi fu du nanga gronseki èn nanga pestsiki, kon tru?

10. Fa sma e tyari densrefi na ini a ten disi, soleki fa skrifi na ini a profeititori fu 2 Timoteyus 3:1-5?

11. Fa Psalm 92:7 e sori san o pasa nanga den ogriwan?

12, 13. Fa "a tru sabi” kon furu srefisrefi na ini "a ten fu a kaba”?

14. Na ini omeni kondre a bun nyunsu fu a Kownukondre e preiki na ini a ten disi, èn suma e du a preikiwroko?

15. (a) Yu e bribi taki wi e libi na ini den lasti dei? Fu san ede yu e bribi dati? (b) Te "a kaba” doro, dan san o pasa nanga den wan di e gens Yehovah, èn nanga den wan di e saka densrefi ondro a tiri fu Gado Kownukondre?

16. San na wan koni sani di yu kan du?

17. Fu san ede furu sma o skreki te den ogriwan e kisi pori?

18. Na sortu warskow fu Yesus wi musu poti seryusu prakseri?