Go na content

Go na a tra menu

Go na table of contents

Yehovah Kotoigi

Sranantongo

San Bijbel e leri wi trutru?

KAPITEL FO

Suma na Yesus Krestes?

Suma na Yesus Krestes?

Sortu spesrutu frantwortu Yesus abi?

Pe a komoto?

Sortu sma a ben de?

FURU pôpi sma de na ini grontapu. Sonwan fu den na pôpi sma na ini a birti, a foto, noso a kondre fu den. Trawan pôpi so kefalek, taki heri grontapu sabi den. Ma fu sabi a nen nomo fu wan pôpi sma, no wani taki dati yu sabi a sma trutru. A no wani taki tu dati yu sabi finifini tori fu a sma èn taki yu sabi fa a de trutru.

2 Na ala sei fu grontapu sma yere wan sani fu Yesus Krestes, aladi a ben libi na grontapu sowan 2000 yari pasa. Ma furu sma no sabi soifri suma Yesus ben de trutru. Son sma e taki dati a ben de wan bun man nomo. Trawan e taki dati a ben de soso wan profeiti. Trawan baka, e bribi taki Yesus na Gado èn taki sma musu anbegi en. A tru taki wi musu anbegi en?

3 A de prenspari taki yu kon sabi suma na Yesus trutru. Fu san ede? Fu di Bijbel e taki: "Efu sma wani kisi têgo libi, dan den musu tan leri sabi yu, a wan-enkri tru Gado, èn a sma di yu seni kon, Yesus Krestes” (Yohanes 17:3). Iya, te yu sabi trutru suma na Yehovah Gado èn suma na Yesus Krestes, dan dati kan meki taki yu kisi têgo libi na tapu wan paradijs grontapu (Yohanes 14:6). Boiti dati, Yesus e gi a moro bun eksempre fu a fasi fa wi musu libi èn fa wi musu handri nanga trawan (Yohanes 13:34, 35). Na ini a fosi kapitel fu a buku disi, wi ben luku suma na Gado trutru. Meki wi go luku now san Bijbel e leri wi trutru fu Yesus Krestes.

A MESIAS DI GADO BEN PRAMISI

4 Langa ten bifo Yesus gebore, Bijbel ben taki na fesi fu a sma di Gado ben o seni kon leki Mesias, noso Krestes. Den tu wortu "Mesias” (di teki puru fu a Hebrewtongo) nanga "Krestes” (di teki puru fu a Grikitongo) wani taki "Salfuwan”. Gado ben pramisi taki a Sma disi ben o kisi salfu, san wani taki dati Gado ben o gi en wan spesrutu frantwortu. Na ini tra kapitel fu a buku disi, wi sa leri o prenspari a Mesias de gi a kontru fu den pramisi fu Gado. Wi sa leri tu sortu blesi wi kan kisi nanga yepi fu Yesus, srefi na ini a ten disi. Ma a no de fu taki dati bifo Yesus gebore, furu sma ben e aksi densrefi: ’Suma sa de a Mesias?’

5 Na ini a fosi yarihondro G.T., den disipel fu Yesus fu Nasaret ben abi na overtoigi taki Yesus ben de a Mesias di ben musu kon (Yohanes 1:41). Wán fu den disipel, wan man di ben nen Simon Petrus, ben taigi Yesus krin: "Yu na Krestes” (Mateyus 16:16). Ma fa den disipel ben kan de seiker taki Yesus ben de trutru a Mesias di Gado ben pramisi, èn fa wi kan kon sabi dati sosrefi?

6 Den profeiti fu Gado di ben e libi na grontapu fosi Yesus, ben fruteri finifini tori fu a Mesias. Den finifini tori disi ben o yepi trawan fu kon sabi suma na a Mesias. Wi kan agersi a tori disi na a fasi disi: Kon meki wi taki dati wan sma aksi yu fu go teki wan tra sma di yu no miti noiti ete. Yu musu go miti a sma disi na wan presi pe furu sma e teki bus, noso boto, noso na wan opolanigron pe furu sma de. Yu no denki taki a ben o moro makriki gi yu, efu wan sma ben sa fruteri yu pikinso fa a sma dati tan? Na a srefi fasi, Yehovah e fruteri finifini nanga yepi fu den Bijbel profeititori, san a Mesias ben o du èn san a ben o ondrofeni. A kontru fu den someni profeititori disi ben o yepi getrow sma fu si krin suma na a Mesias.

7 Luku tu eksempre nomo. A fosiwan na a profeititori fu Mika. Sowan 700 yari na fesi, a profeiti Mika ben taki dati a Sma di Gado ben pramisi, ben o gebore na ini Betlehem, wan pikin foto na ini a kondre Yuda (Mika 5:2). Pe Yesus gebore trutru? We, na ini a srefi foto di ben kari na ini a profeititori! (Mateyus 2:1, 3-9) A di fu tu profeititori di skrifi hondrohondro yari na fesi na ini Danièl 9:25, ben sori go na a yari te a Mesias ben o kon, namku 29 G.T.* A kontru fu den profeititori disi èn fu tra profeititori sosrefi, e buweisi taki Yesus ben de a Mesias di Gado ben pramisi.

Yesus e teki dopu

Di Yesus teki dopu, a tron a Mesias, noso Krestes

8 Krosibei fu a kaba fu 29 G.T., a ben kon de moro krin taki Yesus na a Mesias. Dati ben de a yari di Yesus go na Yohanes a Dopuman fu teki dopu na ini a Yordanliba. Yehovah ben pramisi Yohanes taki a ben o gi en wan marki, so taki a ben o kon sabi suma na a Mesias. Yohanes ben si a marki dati di Yesus teki dopu. Luku san Bijbel e taki fu a tori disi: "Di Yesus dopu, dan wantewante a opo komoto fu a watra; ne hemel opo èn Yohanes si Gado en yeye e saka kon na Yesus tapu leki wan doifi. Luku! Wan sten komoto fu hemel tu, èn a taki: ’Disi na mi Manpikin, a lobiwan di mi feni bun’” (Mateyus 3:16, 17). Baka di Yohanes si èn yere san pasa, a ben de seiker taki na Gado ben seni Yesus kon (Yohanes 1:32-34). Na a momenti di a yeye, noso wroko krakti fu Gado, ben kanti go na tapu Yesus a dei dati, dan Yesus tron a Mesias, noso Krestes, a wan di Gado poti leki Fesiman èn leki Kownu.—Yesaya 55:4.

9 A kontru fu den Bijbel profeititori èn den sani di Yehovah Gado srefi ben taki, e sori krin taki Yesus ben de a Mesias di Gado ben pramisi. Ma Bijbel e gi piki tapu tu tra prenspari aksi di abi fu du nanga Yesus Krestes, namku: Pe a komoto, èn sortu sma a ben de?

PE YESUS BEN KOMOTO?

10 Bijbel e leri wi taki Yesus ben e libi na ini hemel, bifo a kon na grontapu. A profeititori fu Mika ben sori taki a Mesias ben o gebore na ini Betlehem èn taki a Mesias ben o de wan sma "fu sensi owruten” (Mika 5:2). Na furu okasi, Yesus srefi ben taki dati a ben libi na ini hemel, bifo a gebore leki wan libisma (Yohanes 3:13; 6:38, 62; 17:4, 5). Leki wan yeye libisani na ini hemel, Yesus ben abi wan spesrutu banti nanga Yehovah.

11 Yehovah lobi Yesus srefisrefi, èn nanga leti. Bijbel e kari en "a fosiwan fu ala sani di Gado meki” (Kolosesma 1:15).# Wan tra sani de di e meki taki Yehovah lobi a Manpikin disi srefisrefi. En na a "wan-enkri Manpikin di Gado srefi meki” (Yohanes 3:16, futuwortu). Disi wani taki dati Yesus na a wan-enkri sma di Gado meki langalanga. Yesus na a wan-enkri sma tu di yepi Gado fu meki ala tra sani (Kolosesma 1:16). Bijbel e kari Yesus "a Wortu” sosrefi (Yohanes 1:14). Disi e sori wi taki a ben e taki gi Gado, èn taki a ben e tyari den boskopu fu en Tata, gi den tra manpikin fu Gado, namku gi den wan na ini hemel èn den wan na grontapu.

12 A de so taki a fosi gebore Manpikin na a srefi leki Gado, soleki fa son sma e bribi? Dati a no san Bijbel e leri wi. Soleki fa wi si na ini a paragraaf na fesi, dan Gado ben meki a Manpikin. Disi wani taki dati a ben abi wan bigin, aladi Yehovah Gado no abi wan bigin èn a no abi wan kaba (Psalm 90:2). A wan-enkri gebore Manpikin noiti no kisi a denki srefi fu pruberi fu de a srefi leki en Tata. Bijbel e leri wi krin taki a Tata bigi moro a Manpikin (Yohanes 14:28; 1 Korentesma 11:3). Yehovah wawan na "Gado na Almaktiwan” (Genesis 17:1). Fu dati ede, nowan tra sma no de a srefi leki en.%

13 Milyardmilyard yari langa, Yehovah nanga en fosi gebore Manpikin ben abi krosibei demakandra, iya, srefi bifo hemel nanga ala den stari èn bifo grontapu ben meki. A no de fu taki dati den ben lobi makandra srefisrefi! (Yohanes 3:35; 14:31) A lobi Manpikin disi ben de neleki en Tata. Dati meki Bijbel e taki dati a Manpikin na "a prenki fu a Gado di sma no man si” (Kolosesma 1:15). Iya, neleki fa wan libisma manpikin kan gersi en papa na difrenti fasi, na so a yeye Manpikin disi de neleki fa en Tata de èn a e sori densrefi fasi fu en Tata.

14 A wan-enkri gebore Manpikin fu Gado ben de klariklari fu gowe libi hemel èn fu kon libi na grontapu leki wan libisma. Ma kande yu e aksi yusrefi: ’Fa wan yeye libisani ben kan gebore leki wan libisma?’ Fu man du dati, Yehovah du wan wondru. A poti a libi fu en fosi gebore Manpikin di ben de na ini hemel, go na ini a muru fu wan Dyu nyunwenke di ben nen Maria. Nowan libisma papa ben de ini a tori. Na so fasi, Maria ben meki wan volmaakti manpikin èn a kari en Yesus.—Lukas 1:30-35.

SORTU SMA YESUS BEN DE?

15 Den sani di Yesus ben taki èn den sani di a ben du di a ben de na grontapu, e yepi wi fu kon sabi en bun. San moro prenspari, na taki nanga yepi fu Yesus wi e kon sabi Yehovah moro bun. Fu san ede wi kan taki dati? Memre taki a Manpikin disi na wan volmaakti prenki fu en Tata. Dati meki Yesus ben taigi wan fu den disipel fu en: "A sma di si mi, si a Tata tu” (Yohanes 14:9). Den fo Bijbel buku di wi sabi leki den Evangelie, namku Mateyus, Markus, Lukas, nanga Yohanes, e fruteri wi furu fu a libi fu Yesus Krestes, fu den sani di a ben du, èn fu a fasi fa a ben de.

16 Furu sma ben sabi Yesus leki a "Leriman” (Yohanes 1:38; 13:13). San a ben e leri sma? A moro prenspari boskopu di a ben e tyari na "a bun nyunsu fu a kownukondre”, dati na a Kownukondre fu Gado, a tirimakti na ini hemel di sa tiri heri grontapu èn di sa tyari têgo blesi kon gi den libisma di e gi yesi na Gado (Mateyus 4:23). Fu suma a boskopu disi ben komoto? Yesus srefi ben taki: "Den sani di mi e leri sma, a no fu misrefi, ma den de fu a sma di seni mi kon”, namku Yehovah (Yohanes 7:16). Yesus ben sabi taki en Tata wani taki libisma musu yere a bun nyunsu fu a Kownukondre. Na ini kapitel 8, wi sa leri moro fu a Kownukondre fu Gado èn san a sa du.

Yesus e gi leri na den disipel fu en

Yesus ben e preiki na ala sei pe a ben e miti sma

17 Pe Yesus ben e gi sma leri? Na ala sei pe a ben e miti sma, soleki na den boitipresi, den foto, den dorpu, den wowoyo, èn na ini den oso fu den sma. Yesus no ben e fruwakti taki sma ben o kon na en. Na en ben e go na den sma (Markus 6:56; Lukas 19:5, 6). Yesus ben e meki furu muiti èn a gebroiki furu ten fu du a preikiwroko èn fu gi sma leri. Fu san ede a ben e du dati? Bika dati na san Gado ben wani taki a ben musu du. Ala ten Yesus ben du a wani fu en Tata (Yohanes 8:28, 29). Ma ete wan tra sani ben de fu san ede a ben e preiki. A ben firi sari gi den furu sma di ben e kon fu si en (Mateyus 9:35, 36). Den kerki fesiman di ben musu leri den sma disi san na a waarheid fu Gado èn san na den sani di a abi na prakseri fu du, no ben e poti prakseri na den. Yesus ben sabi o prenspari a ben de taki den sma yere a Kownukondre boskopu.

18 Yesus ben de wan man di ben abi switifasi èn di ben e firi gi sma trutru. Dati meki sma no ben e frede fu go na en èn den ben lobi fa a ben de. Srefi pikin-nengre no ben frede te den ben de nanga en (Markus 10:13-16). Yesus no ben e teki sma sei. A no ben lobi kruktudu nanga krukafasi kwetikweti (Mateyus 21:12, 13). Na ini wan ten pe sma no ben abi lespeki gi umasma èn pe umasma no ben e kisi nowan grani, a ben e handri nanga den na wan wartifasi (Yohanes 4:9, 27). Yesus ben abi sakafasi trutru. Wan leisi, a ben wasi den futu fu den disipel fu en, aladi dati ben de wan wroko di soso wan lagi dinari ben e du.

1. Yesus e preiki; 2. Yesus e dresi sma

19 Yesus ben e firi gi trawan di ben de na nowtu. Disi ben de krin fu si, spesrutu te a ben e dresi sma na wan wondru fasi nanga yepi fu a krakti fu a yeye fu Gado (Mateyus 14:14). Fu eksempre, wan man di ben abi gwasi ben kon na Yesus èn a ben taki: "Efu yu wani nomo, yu kan meki mi kon krin.” Yesus ben sabi san a man disi ben e firi èn a ben sabi o furu a ben e pina. Fu di Yesus ben firi sari gi en, meki a langa en anu, a fasi a man, èn a taki: "Mi wani. Kon krin.” Èn a sikiman ben kon betre! (Markus 1:40-42) Yu kan prakseri fa a man disi ben e firi?

GETROW TE NA A KABA

20 Yesus ben de wan tumusi bun eksempre na ini a fasi fa a ben e gi yesi na Gado na wan getrow fasi. A tan getrow na en hemel Tata na ini ala sortu situwâsi, aladi sma ben e gens en èn ben e pina en na ala sortu fasi. Yesus ben man kakafutu gi den tesi fu Satan nanga bun bakapisi (Mateyus 4:1-11). Wan pisi ten, son memre fu Yesus en eigi famiri no ben bribi en, den ben taki srefi dati "a lasi en frustan” (Markus 3:21). Ma Yesus no ben meki den abi krakti na en tapu; a tan du a wroko fu Gado. Aladi sma ben e kosi en èn aladi den ben e du ogri nanga en, toku Yesus no ben lasi ensrefi èn noiti a pruberi fu du ogri nanga den wan di ben e gens en.—1 Petrus 2:21-23.

21 Aladi den feanti fu Yesus pina en èn kiri en na wan ogri-ati fasi, toku Yesus tan getrow te na dede (Filipisma 2:8). Prakseri san a ondrofeni na a lasti dei fu en libi leki wan libisma. Den ben grabu en, falsi kotoigi taki ala sortu ogri fu en, kruka krutuman ben leisi strafu gi en, bigi grupu ogri-atisma ben lafu en, èn srudati ben gi en skin-ati. Den ben spikri en na wan postu, èn di a hari en lasti bro, a bari: "A kaba!” (Yohanes 19:30) Ma na a di fu dri dei baka di Yesus dede, en hemel Tata gi en libi baka leki wan yeye (1 Petrus 3:18). Wan tu wiki baka dati, a drai go baka na hemel. Drape, a go "sidon na a reti-anusei fu Gado”, pe a ben e wakti fu tron kownu.—Hebrewsma 10:12, 13.

22 Sortu marki Yesus ben man doro fu di a tan getrow te na dede? A dede fu Yesus opo a pasi gi wi fu kisi têgo libi na ini wan paradijs grontapu, soleki fa Yehovah ben abi na prakseri na a bigin. Na ini a tra kapitel wi sa luku fa a dede fu Yesus ben man opo a pasi gi wi fu kisi têgo libi.

SAN BIJBEL E LERI WI

  • Profeititori di kon tru èn sosrefi den sani di Gado srefi taki, e buweisi taki Yesus na a Mesias, noso Krestes.—Mateyus 16:16.
  • Langa ten bifo Yesus kon na grontapu, a ben e libi na ini hemel leki wan yeye libisani.—Yohanes 3:13.
  • Yesus ben de wan leriman, wan man di ben abi switifasi trutru, èn a ben de wan volmaakti eksempre fu wan sma di e gi yesi na Gado.—Mateyus 9:35, 36.

*  Efu yu wani kon sabi moro fu a fasi fa a profeititori fu Danièl di abi fu du nanga Yesus, ben kon tru, dan luku a pisi tori di nen "Tra prenspari sani”.

#  Yehovah na wan Tata fu di en na a Mekiman (Yesaya 64:8). Yesus na a Manpikin fu Gado fu di na Gado meki en. Fu a srefi sani dati ede, den tra yeye mekisani nanga a man Adam srefi, na manpikin fu Gado.—Yob 1:6; Lukas 3:38.

%  Luku a pisi tori di nen "Tra prenspari sani”, so taki yu kan leisi fu moro buweisi di e sori taki a Manpikin no de a srefi leki Gado.


Den aksi fu a studie

1, 2. (a) Fu san ede yu no kan taki dati yu sabi wan pôpi sma trutru, te yu sabi a nen fu a sma nomo? (b) Sortu difrenti prakseri sma abi fu Yesus?

3. Fu san ede a de prenspari taki yu kon sabi suma na Yesus trutru?

4. San den wortu "Mesias” nanga "Krestes” wani taki?

5. San den disipel fu Yesus ben sabi seiker?

6. Gi wan agersitori fu sori fa Yehovah yepi getrow sma fu kon sabi suma na a Mesias.

7. San na tu fu den profeititori di abi fu du nanga Yesus èn di ben kon tru?

8, 9. San ben pasa na a dopu fu Yesus, èn fa dati ben e sori krin taki en ben de a Mesias?

10. San Bijbel e leri wi fu a libi di Yesus ben abi, bifo a ben kon na grontapu?

11. Fa Bijbel e sori taki Yehovah lobi Yesus srefisrefi?

12. Fa wi du sabi taki a fosi gebore Manpikin no de a srefi leki Gado?

13. San a wani taki te Bijbel e kari a Manpikin "a prenki fu a Gado di sma no man si”?

14. Fa a wan-enkri gebore Manpikin fu Yehovah ben gebore leki wan libisma?

15. Fu san ede wi kan taki dati nanga yepi fu Yesus, wi e kon sabi Yehovah moro bun?

16. San na a moro prenspari boskopu di Yesus ben e tyari, èn fu pe den leri fu en ben komoto?

17. Pe Yesus ben e gi sma leri, èn fu san ede a ben e meki so furu muiti fu gi trawan leri?

18. Sortu fasi fu Yesus yu lobi moro?

19. Sortu eksempre e sori taki Yesus ben e firi gi trawan di ben de na nowtu?

20, 21. Fa Yesus ben de wan eksempre na ini a fasi fa a gi yesi na Gado na wan getrow fasi?

22. Sortu marki Yesus ben man doro fu di a tan getrow te na dede?