Go na content

Go na a tra menu

Go na table of contents

Yehovah Kotoigi

Sranantongo

San Bijbel e leri wi trutru?

TRA PRENSPARI SANI

Suma na Mikael, a gran engel?

Suma na Mikael, a gran engel?

BIJBEL no e taki furu fu a yeye libisani di nen Mikael. Ma ibri tron te Bijbel e taki fu Mikael, dan a e du wan sani. Na ini a buku Danièl, wi e leisi fa Mikael e feti nanga ogri engel; na ini a brifi fu Yudas, a e haritaki nanga Satan; èn na ini a buku Openbaring, a e feti teige Didibri nanga den ogri yeye fu en. Fu di Mikael e horibaka gi a tirimakti fu Yehovah èn fu di a e feti teige den feanti fu Gado, meki a e handri akruderi a nen fu en, san wani taki "Suma de leki Gado?” Ma suma na Mikael?

Son leisi sma kan abi moro leki wán nen. Fu eksempre, sma sabi a famiri-edeman Yakob leki Israel tu, èn na apostel Petrus leki Simon (Genesis 49:1, 2; Mateyus 10:2). Na a srefi fasi, Bijbel e sori taki Mikael na wan tra nen gi Yesus Krestes, bifo a kon na grontapu èn baka di a go na hemel. Meki wi go poti prakseri na wan tu bijbeltekst di e horibaka gi disi.

Gran engel. Gado Wortu e taki dati Mikael na "a gran engel” (Yudas 9). Den wortu disi wan taki "a moro hei engel”. Luku taki Bijbel e kari Mikael a gran engel. Disi e sori taki wán gran engel nomo de. Fu taki en leti, Bijbel e taki soso fu a gran engel, noiti a e taki fu den gran engel. Boiti dati, Bijbel e sori taki Yesus e tyari a frantwortu fu wan gran engel. Na ini 1 Tesalonikasma 4:16 wi e leisi fu Masra Yesus Krestes di kisi wan opobaka, taki: "Masra srefi o saka komoto fu hemel èn a o gi komando nanga wan tranga sten, iya, a sten fu wan gran engel.” Sobun, a tekst e sori taki a sten fu Yesus na di fu wan gran engel. Fu dati ede, a tekst disi e sori taki Yesus srefi na a gran engel Mikael.

Legre Fesiman. Bijbel e taki dati "Mikael nanga den engel fu en ben feti nanga a bigi kaiman…nanga den engel fu en” (Openbaring 12:7). Sobun, Mikael na a Fesiman fu wan legre fu getrow engel. A buku Openbaring e taki tu dati Yesus na a Fesiman fu wan legre fu getrow engel (Openbaring 19:14-16). Èn na apostel Paulus e taki spesrutu fu "Masra Yesus” nanga "den tranga engel fu en” (2 Tesalonikasma 1:7). Sobun, Bijbel e taki fu Mikael nanga "den engel fu en” èn sosrefi fu Yesus nanga "den engel fu en” (Mateyus 13:41; 16:27; 24:31; 1 Petrus 3:22). Nowan presi na ini Gado Wortu e sori taki tu legre fu getrow engel de na ini hemel, namku wan legre di abi Mikael leki fesiman èn wan tra legre di abi Yesus leki fesiman. Fu dati ede wi kan taki dati Mikael na Yesus Krestes srefi, di abi makti na ini hemel.*


*  Tra sani di e sori taki a nen Mikael abi fu du nanga a Manpikin fu Gado, de fu feni na ini a buku Inzicht in de Schrift Pisi 2, bladzijde 315, 316. Yehovah Kotoigi tyari a buku disi kon na doro.

← Luku a kapitel di e taki fu a tori disi