Go na content

Go na a tra menu

Go na table of contents

Yehovah Kotoigi

Sranantongo

San Bijbel e leri wi trutru?

KAPITEL WÁN

Suma na Gado trutru?

Suma na Gado trutru?

Gado e broko en ede nanga yu trutru?

Fa Gado tan? A abi wan nen?

Wi man kon krosibei na Gado?

OITI yu poti prakseri na a fasi fa pikin-nengre e poti aksi? Furu fu den e bigin poti aksi, so esi leki den man taki pikinso. Den wani kon sabi sani trutru. Dati meki den e piri den ai luku yu èn den e aksi: Fu san ede a loktu blaw? Fu san den stari meki? Suma leri den fowru fa fu singi? Kande yu e meki muiti fu piki den aksi dati, ma a no ala ten a makriki. Srefi a moro bun piki di yu e gi kan meki taki den aksi yu ete wan tron: Ma dan fu san ede dati de so?

2 A no pikin-nengre wawan e poti aksi. Te wi e gro kon bigi, wi e tan poti aksi. Wi e du disi fu kan feni wan presi, fu kon sabi gi sortu ogri wi musu wai pasi, noso fu di wi wani kon sabi sani. Ma soleki fa a sori, dan furu sma no e poti aksi moro te fu kaba, spesrutu den moro prenspari aksi. Fu taki en leti, den no e suku piki moro tapu den aksi fu den.

Wan pikin-nengre di e poti wan aksi

3 Prakseri na aksi di skrifi na tapu a kafti fu a buku disi, den aksi di poti na a bigin fu a buku, noso den aksi na a bigin fu a kapitel disi. Disi na wan tu fu den moro prenspari aksi di yu kan poti. Toku furu sma no e meki muiti moro fu feni den piki tapu den aksi dati. Fu san ede? A de so taki Bijbel abi den piki? Son sma feni taki den piki di Bijbel e gi, muilek tumusi fu frustan. Trawan e frede taki den o kisi syen te den o poti aksi. Èn son sma feni taki a moro bun fu libi den sortu aksi disi gi kerki fesiman nanga kerki leriman. Ma fa a de nanga yu?

4 A musu de so taki yu wani kon sabi den piki tapu den moro prenspari aksi fu a libi. A no de fu taki dati son leisi yu e aksi yusrefi: ’San na a marki fu a libi? A de so taki disi na a trutru libi? Fa Gado de trutru?’ A bun taki yu e poti den sortu aksi disi, èn a de prenspari taki yu tan meki muiti teleki yu feni den yoisti piki. A barinen leriman Yesus Krestes ben taki: "Tan aksi, dan unu sa kisi; tan suku, dan unu sa feni; tan naki na tapu a doro, dan a doro sa opo gi unu.”—Mateyus 7:7.

5 Efu yu "e tan suku” piki tapu den prenspari aksi fu a libi, dan yu sa si taki disi kan tyari furu wini kon gi yu (Odo 2:1-5). No luku san tra sma taigi yu, bika den piki tapu den aksi disi de fu feni trutru, èn yu man feni den tu. Pe? Na ini Bijbel. Den piki no de tumusi muilek fu frustan. San moro moi srefi, na taki den e gi howpu nanga prisiri. Den piki disi kan yepi yu fu libi na wan fasi di e gi yu prisiri nownow kaba. Ma meki wi go poti prakseri fosi na wan aksi di furu sma no man piki.

A DE SO TAKI GADO NO E BROKO EN EDE NANGA WI ÈN TAKI A NO ABI FIRI?

6 Furu sma e denki taki a piki tapu na aksi disi na, iya. Den e taki: ’Efu Gado ben e broko en ede nanga wi, dan grontapu ben o de heri tra fasi, a no tru?’ Te wi e luku lontu wi, dan wi e si wan grontapu di furu nanga orloku, bita-ati, èn furu sari. Boiti dati, ibriwan fu wi e kon siki, wi e pina, wi e lasi lobiwan na ini dede. Fu dati ede furu sma e taki: ’Efu Gado ben e broko en ede nanga wi èn nanga den problema fu wi, dan a no ben o meki taki den sani disi e pasa nanga wi, a no tru?’

7 San moro ogri, na taki son leisi kerki leriman e meki sma prakseri taki Gado no e firi gi sma. Fa so? Te rampu e miti sma, dan den e taki dati na Gado wani en so. Te yu luku en bun, dan den sortu leriman disi e sori dati na Gado e meki den rampu disi pasa. Ma na so Gado de? San Bijbel e leri wi trutru? Yakobus 1:13 e piki: "Te tesi miti wan sma, no meki a taki: ’Na Gado e tesi mi.’ Bika nowan sma kan tesi Gado nanga ogri sani, èn Gado srefi no e tesi sma tu.” Sobun, na ogridu di yu e si na grontapu noiti e kon fu Gado (Yob 34:10-12). A tru taki a e gi pasi taki ogri sani e pasa. Ma te wan sma e gi pasi taki wan sani pasa, dan dati no de a srefi leki te a e meki wan sani pasa.

8 Leki eksempre, prakseri wan koni èn lobi-ati papa di abi wan manpikin di bigi kaba èn di e tan na en papa nanga mama ete. A manpikin bigin opo ensrefi teige en papa nanga en mama, èn a e bosroiti fu gowe libi na oso. Ma en papa no e tapu en fu du dati. A manpikin e bigin libi wan bruya libi èn a e kisi problema. A de so taki a papa meki taki en manpikin kisi problema? Nôno (Lukas 15:11-13). Na a srefi fasi, Gado no tapu libisma di den ben wani go libi wan takru libi, ma en a no a sma di meki taki den kisi problema bakaten. Sobun, a no ben o fiti fu taki dati na Gado de frantwortu gi ala problema di e miti libisma.

9 Gado sabi fu san ede a e gi pasi taki libisma e tyari densrefi na so wan ogri fasi. Fu di en na wi koni èn makti Mekiman, meki a no abi fu fruklari gi wi fu san ede a e du dati. Ma fu di Gado lobi wi, meki a e fruteri wi fu san ede a e gi pasi taki den sani disi e pasa. Kapitel 11 sa fruteri yu moro fu a pisi tori disi. Ma yu kan abi a dyaranti taki Gado a no a Sma di e tyari den problema kon na wi tapu. Na presi fu dati, en wawan e gi wi a howpu taki wan lusu o kon!—Yesaya 33:2.

10 Boiti dati, Gado de santa (Yesaya 6:3). Disi wani taki dati Gado de soifri èn krin. A no e du ogri kwetikweti. Sobun, wi kan frutrow na en tapu dorodoro. Ma dati wi no kan taki fu libisma di kan kon kruka son tron. Srefi a moro opregti libisma di abi makti, no man puru den takru bakapisi fu den sani di ogri-ati libisma e du. Ma Gado abi ala makti. A man puru ala den takru bakapisi di ogridu ben tyari kon gi libisma, èn a sa du dati tu. Te Gado o handri, dan a o du sani na so wan fasi taki a o puru ogridu fu ala ten!—Psalm 37:9-11.

FA GADO E PRAKSERI FU ALA KRUKTUDU DI WI E ONDROFENI?

11 Ma fa Gado e prakseri fu den sani di e pasa now na ini grontapu èn na ini wi libi? We, Bijbel e leri wi taki Gado "lobi retidu” (Psalm 37:28). Sobun, a e broko en ede trutru nanga san bun èn nanga san ogri. A e tegu gi ala sortu kruktudu. Bijbel e taki dati a ben ’broko Gado en ati’ di a si fa ogridu ben furu grontapu na ini owruten (Genesis 6:5, 6). Gado no kenki (Maleaki 3:6). Te nanga now, a no man si kwetikweti fa sma na heri grontapu e nyan pina. Gado no lobi a sani dati kwetikweti. "A e broko en ede nanga unu”, na so Bijbel e taki.—1 Petrus 5:7.

12 Sortu dyaranti wi abi taki Gado no lobi kwetikweti te libisma e pina? Meki wi poti prakseri na ete wan tu buweisi. Bijbel e leri wi taki Gado ben meki libisma akruderi a prenki fu en (Genesis 1:26). Fu dati ede, wi abi bun eigifasi fu di Gado abi bun eigifasi. Fu eksempre, fa yu e firi te sma di no du nowan ogri e pina? A no e hati yu? Efu yu e broko yu ede nanga den sortu kruktudu disi, dan yu kan abi a dyaranti taki Gado e broko en ede moro nanga den tori dati.

13 Wan fu den moro bun sani di wi leki libisma man du, na taki wi kan sori lobi. Disi e sori tu fa Gado de. Bijbel e leri wi taki "Gado na lobi” (1 Yohanes 4:8). Wi man sori lobi, fu di Gado e sori lobi. A de so taki a lobi di yu abi ben o pusu yu fu puru ala pina nanga kruktudu di yu e si na grontapu? Yu ben o du dati efu yu ben abi a makti? A no de fu taki dati yu ben o du en! Yu kan abi a dyaranti taki Gado sosrefi sa tyari wan kaba kon na pina nanga kruktudu. Den pramisi di kari na a bigin fu a buku disi a no dren nomo, noso sani di no sa kon tru. Iya, san Gado pramisi o kon tru seiker! Ma efu yu wani bribi na ini den pramisi disi, dan yu musu kon sabi moro fu a Gado di pramisi wi den sani disi.

GADO WANI TAKI YU MUSU KON SABI SUMA NA EN

14 Efu yu wani taki wan sma musu kon sabi yu, dan san yu musu du? Yu no ben o fruteri a sma fa yu nen? Gado abi wan nen? Furu kerki e taki dati a nen fu en na "Gado” noso "Masra”, ma den wortu disi a no nen. Den e sori nomo sortu posisi wan sma abi, soleki fa den wortu "kownu” nanga "presidenti” e sori sortu posisi wan sma abi. Bijbel e leri wi taki Gado abi difrenti posisi. Den wortu "Gado” nanga "Masra”, e poti prakseri na tu fu den posisi dati. Ma Bijbel e leri wi tu taki Gado abi wan nen, èn dati na Yehovah. Psalm 83:18 e taki: "Yu, di nen na Yehovah, yu wawan na a Moro Heiwan fu heri grontapu.” Efu a nen dati no skrifi na ini a Bijbel fu yu, dan yu kan luku a pisi tori "Tra prenspari sani”, di de fu feni na ini a buku disi, fu kon sabi fu san ede a no skrifi na ini yu eigi Bijbel. Te yu luku en bun, dan a nen fu Gado de fu feni dusundusun tron na ini den owru Bijbel di sma ben skrifi nanga anu. Sobun, Yehovah wani taki yu musu kon sabi a nen fu en, èn taki yu musu gebroiki a nen dati. Wi ben kan taki dati, a e gebroiki Bijbel fu meki yu kon sabi suma na en.

Wan uma di e taki fa a nen

Te yu wani taki wan sma musu kon sabi yu, dan yu e taigi en fa yu nen, a no so? Gado gebroiki Bijbel fu sori wi san na en nen

15 Gado gi ensrefi wan nen, èn a nen disi wani taki furu difrenti sani. A nen fu en, Yehovah, wani taki dati Gado kan meki iniwan pramisi fu en kon tru èn a kan du iniwan sani di a abi na prakseri.* Gado abi wan aparti nen; nowan tra sma abi a nen dati. En wawan kan tyari a nen dati. Yehovah de aparti na difrenti fasi. Fa so?

16 Soleki fa wi ben si kaba, dan Psalm 83:18 e taki fu Yehovah: "Yu wawan na a Moro Heiwan.” Na so a de tu taki Yehovah na a wan-enkri Sma di Bijbel e kari "na Almaktiwan”. Openbaring 15:3 e taki: "Den sani di yu e du bigi èn den e fruwondru sma srefisrefi, Yehovah Gado na Almaktiwan. Yu di de Kownu fu têgo, e du sani na wan fasi di e sori taki yu de regtfardiki èn getrow.” Den wortu "na Almaktiwan” e leri wi taki Yehovah na a moro makti sma di de. Nowan sma abi so furu makti leki en; moro bigi makti leki dati no de. Èn den wortu "Kownu fu têgo” e memre wi taki Yehovah de aparti na wan tra fasi tu. En wawan ben de kaba ala ten. Psalm 90:2 e taki: "Fu ten di no skotu te ten di no skotu [noso, fu têgo] yu na Gado.” Te yu e prakseri a tori dati, dan a e furu yu ati nanga bigi lespeki, a no so?

17 Wan tra fasi fa Yehovah de aparti na taki en wawan na a Mekiman. Na ini Openbaring 4:11 wi e leisi: "Na yu, Yehovah, iya, wi Gado, warti fu kisi glori, grani nanga makti, bika na yu meki ala sani; den ben kon de èn yu meki den, fu di yu ben wani.” Iniwan sani di yu kan kari, den yeye na ini hemel di wi no man si, den stari di e furu a loktu te neti, den froktu di den bon e gi, nanga den fisi di e swen na ini den se èn na ini den liba, iya, ala den sani disi kon de fu di Yehovah na a Mekiman fu den!

YU KAN ABI WAN BUN BANTI NANGA YEHOVAH?

18 Son sma e kon frede pikinso te den e leisi fu den tumusi moi fasi fu Yehovah. Den e frede taki Gado hei tumusi gi den, taki noiti den sa man kon krosibei na en, noso taki noiti Gado sa abi a ten fu poti prakseri na den. Ma a denki dati bun? Bijbel e leri wi wan heri tra sani. A e taki fu Yehovah: "Fu taki en leti, a no de fara fu nowan fu wi” (Tori fu den Apostel 17:27). Bijbel e gi wi a deki-ati srefi: "Kon krosibei na Gado, èn a sa kon krosibei na unu.”—Yakobus 4:8.

Bijbel e leri wi taki Yehovah na a lobi-ati Mekiman fu hemel nanga grontapu

Den sani di Gado meki

19 Fa yu kan kon krosibei na Gado? Na a fosi presi, yu musu tan du san yu e du now, namku fu kon sabi moro fu Gado. Yesus ben taki: "Efu sma wani kisi têgo libi, dan den musu tan leri sabi yu, a wan-enkri tru Gado, èn a sma di yu seni kon, Yesus Krestes” (Yohanes 17:3). Iya, Bijbel e leri wi taki te wi e kon sabi moro fu Yehovah nanga Yesus, dan wi kan kisi "têgo libi”! Soleki fa wi ben si kaba, dan "Gado na lobi” (1 Yohanes 4:16). Yehovah abi furu tra moi fasi tu, di e hari sma. Fu eksempre, Bijbel e taki dati Yehovah na "wan Gado di abi sari-ati nanga switifasi, di no e atibron esi-esi èn di abi lobi bun-ati nanga waarheid pasa marki” (Exodus 34:6). A de wan sma "di bun èn di de klariklari fu gi pardon” (Psalm 86:5). Gado abi pasensi (2 Petrus 3:9). A de loyaal (Openbaring 15:4). O moro yu e leisi Bijbel, o moro yu sa si fa Yehovah sori taki a abi ala den moi fasi disi, èn taki a abi furu tra moi fasi tu.

20 A tru taki yu no man si Gado, fu di a de wan yeye di yu no man si (Yohanes 1:18; 4:24; 1 Timoteyus 1:17). Ma te yu e leisi Bijbel fu leri moro fu en, dan yu kan kon sabi suma na en. Soleki fa a psalm skrifiman ben taki, dan yu kan "si fa Yehovah moi” (Psalm 27:4; Romesma 1:20). O moro yu e kon sabi Yehovah, o moro a sa kon tron wan trutru sma gi yu. Yu sa abi moro reide fu lobi en èn fu firi taki yu de krosibei na en.

Wan papa nanga en manpikin

A lobi di wan bun papa abi gi den pikin fu en e sori pikinso o furu lobi wi hemel Tata abi gi wi

21 Yu sa kon frustan fu san ede Bijbel e leri wi fu si Yehovah leki wi Tata (Mateyus 6:9). Gado no gi wi libi wawan, ma a wani taki wi e libi na a moro bun fasi, neleki fa iniwan lobi-ati papa wani dati gi den piki fu en (Psalm 36:9). Bijbel e leri wi tu taki libisma kan tron mati fu Yehovah (Yakobus 2:23). Prakseri a tori dati, yu kan tron wan mati fu a Mekiman fu hemel nanga grontapu!

22 Te yu e leri moro fu Bijbel, dan a kan taki son sma di abi a bun fu yu na prakseri, sa wani gi yu deki-ati fu tapu nanga so wan studie. Kande den e frede taki yu sa teki wan tra bribi. Ma no meki nowan sma tapu yu fu kisi a moro bun matifasi di yu kan abi.

23 A no de fu taki dati wan tu sani sa de di yu no sa frustan wantewante. Yu musu abi sakafasi fu man aksi wan sma fu yepi yu, ma no firi syen fu aksi yepi. Yesus ben taki dati a bun fu abi sakafasi neleki yongu pikin (Mateyus 18:2-4). Soleki fa wi sabi, pikin-nengre lobi poti ala sortu aksi. Gado wani taki yu feni den piki. Bijbel e taki bun fu son sma di ben wani kon sabi Gado trutru. Den ben e luku bun san skrifi na ini den Buku fu Bijbel, so taki den ben kan abi a dyaranti dati den sani di den ben e leri, na waarheid.—Tori fu den Apostel 17:11.

24 A moro bun fasi fa wi kan kon sabi moro fu Yehovah na fu studeri Bijbel. Bijbel e difrenti fu iniwan tra buku. Na sortu fasi? A tra kapitel sa poti prakseri na a tori dati.

SAN BIJBEL E LERI WI


*  Na a pisi tori di nen "Tra prenspari sani”, yu kan leisi moro fini san a nen fu Gado wani taki èn fa wi musu leisi en.


Den aksi fu a studie

1, 2. Fu san ede a bun fu poti aksi furu tron?

3. Fu san ede furu sma no e meki muiti moro fu feni piki tapu den moro prenspari aksi?

4, 5. San na wan tu fu den moro prenspari sani di wi kan aksi wisrefi na ini a libi, èn fu san ede wi musu suku fu kisi piki tapu den aksi dati?

6. Fu san ede furu sma e denki taki Gado no e broko en ede nanga a pina di libisma e pina?

7. (a) Fa kerki leriman poti a denki gi sma taki Gado no e firi gi wi? (b) San Bijbel e leri wi trutru fu den tesi di wi kan kisi?

8, 9. (a) Sortu eksempre yu kan gebroiki fu sori a difrenti na mindri wan sma di e gi pasi taki ogridu de, nanga wan sma di e meki taki ogridu de? (b) Fu san ede a no ben o de wan reti sani fu krutu a bosroiti di Gado teki fu gi pasi taki libisma e libi soleki fa densrefi wani?

10. Fu san ede wi kan frutrow taki Gado o puru ala den takru bakapisi fu ogridu?

11. (a) Fa Gado e prakseri fu kruktudu? (b) Fa Gado e prakseri fu a pina di yu e pina?

12, 13. (a) Fa a du kon taki wi abi difrenti bun eigifasi soleki lobi, èn fa lobi abi krakti tapu a fasi fa wi e prakseri fu den sani di wi e si na ini grontapu? (b) Fu san ede yu kan abi a dyaranti taki Gado sa lusu den problema na grontapu?

14. San na a nen fu Gado, èn fu san ede wi musu gebroiki a nen dati?

15. San a nen Yehovah wani taki?

16, 17. San wi kan leri fu Yehovah te wi e leisi taki en de: (a) "na Almaktiwan”? (b) "Kownu fu têgo”? (c) "Mekiman”?

18. Fu san ede son sma e denki taki noiti den sa man kon krosibei na Gado, ma san Bijbel e leri wi?

19. (a) San wi musu bigin du fu kon krosibei na Gado, èn sortu wini wi sa kisi fu dati? (b) Sortuwan fu den fasi fu Yehovah yu lobi moro furu?

20-22. (a) A de so taki wi no man kon krosibei na Gado, fu di wi no man si en? Taki fu san ede yu e piki so. (b) San son sma di abi a bun fu yu na prakseri kan gi yu deki-ati fu du, ma san yu musu du?

23, 24. (a) Fu san ede yu musu tan poti aksi fu den sani di yu e leri? (b) Sortu tori wi sa luku na ini a kapitel di e kon?