Go na content

Go na a tra menu

Go na table of contents

Yehovah Kotoigi

Sranantongo

San Bijbel e leri wi trutru?

KAPITEL TINANEIGI

Sorgu taki Gado tan lobi yu

Sorgu taki Gado tan lobi yu

San a wani taki fu lobi Gado?

Fa wi kan sorgu taki Gado tan lobi wi?

Fa Yehovah sa blesi den wan di e sorgu taki a tan lobi den?

KON meki wi taki dati yu e teki wan koiri wan dei. Ma aladi yu e waka, yu e si fa a loktu e kon dungru moro nanga moro. Faya e bigin koti na loktu, dondru e bari, dan wan hebi alen e fadon. Yu e hasti yusrefi, aladi yu e feti e suku wan presi fu go kibri. Ne yu e si wan presi na sei pasi pe yu kan go kibri. A presi bow bun, a drei, èn a moi. A no de fu taki dati yu breiti srefisrefi nanga a kibripresi dati!

Wan man e suku fu kibri gi wan hebi alen

Yu sa teki Yehovah leki yu kibripresi na ini den bruya ten disi?

2 We, wi e libi na ini bruya ten, di yu kan teki gersi nanga bigi sibibusi. A situwâsi na grontapu e kon ogri moro nanga moro. Ma wan kibripresi de pe wi kan lon go, iya, wan presi pe nowan sani kan du wi ogri na so wan fasi taki den bakapisi e tan fu têgo. San na a presi dati? Luku san Bijbel e leri wi: "Mi sa taigi Yehovah: ’Yu na mi kibripresi nanga mi fortresi, mi Gado di mi sa frutrow.’”—Psalm 91:2.

3 Prakseri dati pikinso! Yehovah, a Mekiman èn a Moro Heiwan fu hemel nanga grontapu, kan de leki wan kibripresi gi wi. A kan kibri wi, fu di a tranga omeni tron moro iniwan sma, noso iniwan sani di ben sa kan du wi ogri. Srefi te wan ogri miti wi, toku Yehovah kan puru ala den takru bakapisi. Fa wi kan sorgu taki Yehovah tron wi kibripresi? Wi musu frutrow na en tapu. Boiti dati, Gado Wortu e gi wi a deki-ati fu ’sorgu taki Gado tan lobi wi’ (Yudas 21). Iya, wi musu sorgu taki Gado tan lobi wi, fu di wi e tan abi wan lobi-ati banti nanga wi hemel Tata. Te wi du dati, dan wi kan abi a dyaranti taki a sa de wi kibripresi. Ma fa wi kan kon kisi so wan banti?

KON SABI DEN DIFRENTI FASI FA GADO SORI LOBI, ÈN SORI WARDERI GI DATI

4 Efu wi wani taki Gado tan lobi wi, dan wi musu kon sabi fosi fa Yehovah sori lobi gi wi. Prakseri fu wan tu fu den Bijbel leri di yu kon sabi nanga yepi fu a buku disi. Fu di Yehovah na a Mekiman, meki a gi wi a grontapu leki wi moi tanpresi. Na ini a moi tanpresi disi, a poti bogobogo nyanyan, watra, ala sortu gudu na ini a naturu, kefalek moi meti, nanga presi di moi fu si. Fu di Gado na a Gran Skrifiman fu Bijbel, meki a tyari kon na krin gi wi fa a nen èn sortu sma a de. Boiti dati, a Wortu fu en e sori wi taki a seni en eigi lobi Manpikin kon na grontapu, èn taki a gi pasi dati Yesus pina èn dede gi wi (Yohanes 3:16). Na a fasi dati Gado gi wi wan bigi kado. Ma san dati wani taki gi wi? A e gi wi a howpu fu wan tumusi moi tamara.

5 Gado du ete wan sani di e meki taki wi kan abi howpu gi a ten di e kon. Yehovah seti wan hemel tirimakti, namku a Mesias Kownukondre. Heri esi, a Kownukondre disi sa tyari wan kaba kon na ala pina èn a sa meki grontapu tron wan paradijs. Prakseri san dati wani taki! Drape wi sa man libi na ini vrede èn wi sa de koloku fu têgo (Psalm 37:29). Ma na ini a ten disi, Gado gi wi rai di e sori san na a moro bun fasi fu libi now. Wan tra sani di a gi wi leki kado, na taki wi kan begi en ala ten awinsi pe wi de. Disi na wan tu fasi nomo fa Yehovah sori taki a lobi a libisma famiri, èn taki a lobi yu sosrefi.

6 A tumusi prenspari sani di yu musu aksi yusrefi, na disi: Fa mi o sori warderi gi a lobi fu Yehovah? Furu sma o piki taki den fu den sei, musu sori lobi gi Yehovah tu. Na so yu e prakseri fu a tori? Yesus ben taki dati a komando disi na a moro prenspariwan: "Yu musu lobi Yehovah yu Gado nanga yu heri ati, nanga yu heri sili, èn nanga yu heri frustan” (Mateyus 22:37). A no de fu taki dati furu reide de fu lobi Yehovah Gado. Kande yu abi a firi taki yu lobi Yehovah, ma dati wani taki dati yu lobi en trutru nanga yu heri ati, yu heri sili, nanga yu heri frustan?

Wan apra siri

7 We, teki wan aprabon leki eksempre. Efu yu wani wan aprabon di e gi froktu, dan a no de fu taki dati a de tumusi prenspari fu abi a siri fosi. Ma efu yu ben sa wani wan apra fu a bon dati, dan yu ben o breiti efu wan sma ben sa gi yu wan siri nomo? Kwetikweti! We, soleki fa Bijbel e sori, dan na so a de tu nanga a lobi di wan sma abi gi Yehovah Gado. Aladi a de tumusi prenspari fu abi a firi taki yu lobi Yehovah, toku trutru lobi no musu tan wan firi nomo, bika a firi di wan sma abi taki a lobi Yehovah, na soso a bigin. Bijbel e leri wi: "Disi na san a lobi fu Gado wani taki, dati wi e hori wisrefi na den komando fu en; ma toku den komando fu en no de wan hebi” (1 Yohanes 5:3). Efu wi wani sori trutru lobi gi Gado, dan na wan agersi fasi wi musu meki froktu. Dati wani taki dati a fasi fa wi e tyari wisrefi, musu sori taki wi abi trutru lobi gi Gado.—Mateyus 7:16-20.

8 Wi e sori lobi gi Gado te wi e hori den komando fu en, èn te wi e tyari wisrefi akruderi den gronprakseri fu en. A no hebi tumusi fu du dati. Na presi taki den wet fu Yehovah hebi, dan den meki na so wan fasi taki den e yepi wi fu abi wan bun èn koloku libi (Yesaya 48:17, 18). Te wi e libi soleki fa Yehovah e sori wi, dan wi e sori a hemel Tata fu wi taki wi abi warderi trutru gi ala den sani di a du gi wi. A de wan sari sani taki wan tu sma nomo e sori so wan warderi na ini a ten disi. Wi no wani de sma di no e sori warderi, neleki wan tu fu den sma di ben e libi na a ten di Yesus ben de na grontapu. Yesus ben dresi tin gwasiman, ma wán nomo ben drai kon baka fu taki en tangi (Lukas 17:12-17). Fu tru, wi wani de leki a wán gwasiman di sori warderi. Wi no wani de leki den neigi gwasiman di no sori warderi!

9 We, dan san na den komando fu Yehovah di wi musu hori? Wi taki fu wan tu fu den komando dati na ini a buku disi, ma meki wi go luku wan tu fu den syatu baka. Te wi e hori wisrefi na den komando fu Gado, dan dati sa yepi wi fu sorgu taki Gado tan lobi wi.

KON MORO KROSIBEI NA YEHOVAH

10 Wan tumusi prenspari sani di de fanowdu fu kan kon moro krosibei na Yehovah, na taki wi musu leri sabi en. Dati na wan sani di wi musu du doronomo. Kon meki wi taki dati yu de na dorosei na wan kowru neti, èn yu e sidon sei wan faya e waran yu skin. Yu ben o libi a faya teleki a dede? Nôno. Yu ben o tan poti udu so taki a faya kan tan bron bun, bika yu ben kan lasi yu libi srefi efu a faya dede! Sobun, neleki fa udu e meki taki wan faya e tan bron, na so "a sabi fu Gado srefi” sa yepi wi fu tan abi wan tranga lobi gi Yehovah.—Odo 2:1-5.

Neleki fa yu musu poti udu fu meki wan faya tan bron, na so yu musu du sani fu meki taki yu kan tan lobi Yehovah

Wan man e waran ensrefi na wan faya

11 Yesus ben wani taki den bakaman fu en musu tan abi tranga lobi gi Yehovah èn gi en Wortu fu waarheid di warti trutru. Baka di Yesus kisi wan opobaka, a ben leri tu fu den disipel fu en fa wan tu profeititori di skrifi na ini den Hebrew Buku fu Bijbel ben kon tru na ini en. Sortu krakti dati ben abi tapu den disipel? Bakaten den disipel ben taki: "A no dati meki wi ati ben prisiri trutru di a ben e taki nanga wi di wi ben de na pasi, èn sosrefi di a ben meki wi frustan finifini san skrifi na ini Gado Buku?”—Lukas 24:32.

12 Di yu ben kon si fu a fosi leisi san Bijbel e leri trutru, dan yu ati ben kon furu nanga prisiri, faya, èn lobi gi Gado, a no so? A no de fu taki. Furu sma kisi a srefi firi dati. A tyalensi di wi abi now, na fu sorgu taki wi tan lobi Gado èn fu meki a lobi dati gro. Wi no wani waka baka na eksempre fu a grontapu disi. Yesus ben taki na fesi: "A lobi fu bun furu sma o kon kowru” (Mateyus 24:12). Fa yu kan sorgu taki a lobi di yu abi gi Yehovah èn gi den tru tori na ini Bijbel, no kon kowru?

13 Tan du muiti fu kon leri sabi Yehovah Gado nanga Yesus Krestes (Yohanes 17:3). Denki dipi fu den sani di yu e leri fu Gado Wortu, èn aksi yusrefi: ’San disi e leri mi fu Yehovah Gado? Fa disi e sori mi moro krin fu san ede mi musu lobi Gado nanga mi heri ati, mi heri frustan, èn nanga mi heri sili?’ (1 Timoteyus 4:15) Te yu e denki dipi na a fasi disi, dan dati o meki taki yu tan lobi Yehovah trutru.

14 Wan tra fasi fa wi kan sorgu taki wi tan lobi Yehovah trutru, na fu begi doronomo (1 Tesalonikasma 5:17). Na ini kapitel 17 fu a buku disi, wi leri taki begi na wan tumusi warti kado di Gado gi wi. Neleki fa a matifasi na mindri libisma e kon moro bun te den e tan taki doronomo nanga makandra fu ala sortu sani, na so a banti di wi abi nanga Yehovah sa kon moro bun te wi e begi en doronomo. A de tumusi prenspari taki te wi e begi, wi no e taki den srefi sani ibri tron baka sondro fu taki komoto fu wi ati, noso sondro taki wi sabi fu san ede wi e begi. Wi musu taki nanga Yehovah neleki fa wan pikin e taki nanga en lobi papa. A no de fu taki dati wi o taki nanga lespeki, ma toku wi musu taki na wan fri fasi, na wan opregti fasi, èn komoto fu wi ati (Psalm 62:8). Iya, wi musu studeri Bijbel èn wi musu begi Gado komoto fu wi ati, fu di den sani dati de tumusi prenspari na ini na anbegi fu wi, èn den sa yepi wi fu sorgu taki Gado tan lobi wi.

PRISIRI NA INI NA ANBEGI FU YU

15 Wi kan studeri Bijbel èn wi kan begi Gado te wi de wi wawan. Ma meki wi go luku wan tra sani now di abi fu du nanga na anbegi fu wi èn di wi musu du na fesi tra sma, namku fu taki nanga trawan fu a bribi fu wi. Yu fruteri trawan kaba fu wan tu fu den tru tori di skrifi na ini Bijbel? Efu yu du dati, dan yu kisi wan tumusi moi grani (Lukas 1:74). Te wi e taki nanga trawan fu den tru tori di wi leri fu Yehovah Gado, dan wi e du wan tumusi prenspari wroko di ala tru Kresten kisi fu du, namku fu preiki a bun nyunsu fu Gado Kownukondre.—Mateyus 24:14; 28:19, 20.

16 Na apostel Paulus ben kari a diniwroko fu en wan gudu, fu di a ben e si en leki wan tumusi warti sani (2 Korentesma 4:7). A moro bun wroko di yu kan du, na fu taki nanga trawan fu Yehovah Gado èn fu den prakseri fu en. Disi de so, fu di yu e wroko gi a moro bun Masra, èn fu di yu e kisi moro wini fu a wroko disi leki fu iniwan tra wroko. Te yu e du a diniwroko disi, dan yu e yepi opregtisma fu kon krosibei na wi hemel Tata èn fu bigin waka a pasi di sa tyari den go na têgo libi! Sortu tra wroko ben kan gi wi so furu prisiri? Boiti dati, te yu e taki nanga trawan fu Yehovah èn fu a Wortu fu en, dan na so fasi yu e tranga yu eigi bribi èn yu e kisi moro lobi gi Gado. Èn Yehovah e warderi a muiti di yu e meki (Hebrewsma 6:10). Te yu e du a wroko disi doronomo èn fayafaya, dan dati sa yepi yu fu sorgu taki Gado tan lobi yu.—1 Korentesma 15:58.

17 Wi musu hori na prakseri taki a Kownukondre preikiwroko na wan wroko di wi musu du fayafaya. Bijbel e taki: "Preiki a wortu, du disi fayafaya” (2 Timoteyus 4:2). Fu san ede a de so prenspari fu du dati fayafaya na ini a ten disi? Gado Wortu e taigi wi: "A bigi dei fu Yehovah de krosibei. A de krosibei, èn a e hasti ensrefi fu tru” (Sefanya 1:14). Iya, heri esi a ten o doro pe Yehovah sa tyari wan kaba kon na a heri grontapu sistema disi. Sma musu kisi warskow! Den musu kon sabi taki now na a ten fu teki Yehovah leki a Moro Hei Tiriman fu den. A kaba "no sa kon lati”.—Habakuk 2:3.

18 Yehovah wani taki wi musu kon makandra nanga tru Kresten fu anbegi en. Dati meki a Wortu fu en e taki: "Meki wi poti prakseri na makandra tu, so taki wi kan gi makandra deki-ati fu abi lobi èn fu du bun wroko. No meki wi misi konmakandra, soleki fa son sma gwenti du, ma gi makandra deki-ati o moro unu e si a dei e kon krosibei” (Hebrewsma 10:24, 25). Te wi e kon makandra nanga tra bribiman na den Kresten konmakandra, dan wi abi wan tumusi moi okasi fu prèise èn fu anbegi wi lobi Gado. Wi e gi makandra deki-ati tu.

19 Te wi abi demakandra nanga tra anbegiman fu Yehovah, dan wi e meki taki a lobi èn a matifasi na mindri den wan na ini a gemeente, kon moro tranga. A de prenspari taki wi e luku den bun fasi di trawan abi, neleki fa Yehovah e luku den bun fasi di wi abi. No fruwakti taki tra bribiman sa handri na wan volmaakti fasi. Hori na prakseri taki a wan sma lepi moro a trawan na yeye fasi, èn taki ibriwan fu wi e meki fowtu (Kolosesma 3:13). Pruberi fu tron bun mati nanga den wan di lobi Yehovah trutru, èn yu sa si taki yu sa gro na yeye fasi. Iya, te yu e anbegi Yehovah makandra nanga den Kresten brada nanga sisa fu yu, dan dati sa yepi yu fu sorgu taki Gado tan lobi yu. Fa Yehovah e blesi den wan di e sorgu taki a tan lobi den fu di den e dini en na wan getrow fasi?

MEKI MUITI FU KISI "A TRUTRU LIBI”

20 Yehovah e blesi den getrow futuboi fu en, fu di a e gi den libi. Ma sortu libi a o gi den? We, yu feni taki yu de na libi trutru? Furu fu wi ben o piki taki a de krin dati wi de na libi, fu di wi e bro, wi e nyan, èn wi e dringi. Sobun, a musu de taki wi de na libi. Èn te wan sani e meki wi firi prisiri, dan kande wi e taki srefi: "Ai, disi na a libi trutru!” Ma soleki fa Bijbel e taki, dan te yu luku en bun, nowan libisma na ini a ten disi e nyan bun fu a libi trutru.

Wan osofamiri e prisiri na ini paradijs

Yehovah wani taki yu nyan bun fu "a trutru libi”. Yu sa nyan bun fu en tu?

21 Gado Wortu e gi wi a deki-ati fu "grabu a trutru libi hori bun steifi” (1 Timoteyus 6:19). Den wortu dati e sori taki "a trutru libi” na wan sani di wi e howpu fu kisi na ini a ten di e kon. Iya, te wi de volmaakti, dan wi sa de na libi trutru, bika wi sa libi soleki fa Gado ben abi na prakseri di a bigin meki libisma. Te wi o de na ini a paradijs grontapu èn te wi o abi wan bun gosontu, vrede, nanga wan koloku libi, dan fosi wi sa nyan bun fu "a trutru libi”, namku têgo libi (1 Timoteyus 6:12). Dati na wan tumusi moi howpu, a no so?

22 Fa wi kan "grabu a trutru libi hori bun steifi”? Nanga a srefi sani na prakseri, Paulus ben gi Kresten a deki-ati fu "du bun” èn fu "du furu bun wroko” (1 Timoteyus 6:18). A de krin taki efu wi wani kisi a trutru libi, dan a de prenspari fu handri akruderi den tru tori di wi leri na ini Bijbel. Ma a de so taki Paulus ben taki dati wi e frudini fu kisi "a trutru libi” te wi e du bun wroko? Nôno, fu di wi e kisi a moi howpu disi nanga yepi fu a "no-frudini bun-ati” fu Gado (Romesma 5:15). Ma nanga prisiri Yehovah e blesi den wan di e dini en na wan getrow fasi. A e angri fu si taki yu e libi "a trutru libi”. Den sma di e sorgu taki Gado tan lobi den, o libi fu têgo na ini vrede èn den sa de koloku.

23 Ibriwan fu wi musu aksi ensrefi: ’Mi e anbegi Gado soleki fa a sori na ini Bijbel?’ Efu wi e sorgu taki wi e du dati ibri dei, dan sani sa waka bun nanga wi te fu kaba. Wi kan abi a frutrow taki Yehovah sa kibri wi. A sa kibri a getrow pipel fu en na ini den lasti bruya dei fu na owru sistema disi. Yehovah sa frulusu wi, èn a sa tyari wi go na ini a tumusi moi nyun sistema di de krosibei. Wi sa prisiri trutru fu kan libi na a ten dati! Èn wi sa prisiri trutru taki wi teki a yoisti bosroiti na ini den lasti dei disi! Efu yu teki bun bosroiti now, dan yu sa kisi "a trutru libi”, a libi di Gado ben abi na prakseri sensi a bigin, iya, têgo libi!

SAN BIJBEL E LERI WI


Den aksi fu a studie

1, 2. Pe wi kan feni wan bun kibripresi na ini a ten disi?

3. Fa wi kan sorgu taki Yehovah tron wi kibripresi?

4, 5. San na wan tu fasi fa Yehovah sori taki a lobi wi?

6. Fa yu kan sori warderi gi a lobi di Yehovah sori gi yu?

7. Kande yu abi a firi taki yu lobi Gado, ma dati de nofo fu sori taki yu lobi en trutru? Fruklari dati.

8, 9. Fa wi kan sori taki wi lobi Gado èn taki wi e warderi san a du gi wi?

10. Fruklari fu san ede a de prenspari fu tan leri sabi Yehovah Gado.

11. Sortu krakti den leri fu Yesus ben abi tapu den bakaman fu en?

12, 13. (a) San pasa nanga a lobi di furu sma na ini a ten disi ben abi gi Gado èn gi Bijbel? (b) Fa wi kan sorgu taki a lobi fu wi no kon kowru?

14. Fa begi kan yepi wi fu tan lobi Yehovah trutru?

15, 16. Fu san ede a fiti fu si a Kownukondre preikiwroko leki wan grani èn leki wan gudu?

17. Fu san ede wi musu du a Kownukondre preikiwroko fayafaya na ini a ten disi?

18. Fu san ede wi musu kon makandra nanga tru Kresten fu anbegi Yehovah?

19. San wi kan du fu kisi moro lobi gi den wan na ini a Kresten gemeente?

20, 21. San na "a trutru libi”, èn fu san ede dati de wan tumusi moi howpu?

22. Fa yu kan "grabu a trutru libi hori bun steifi”?

23. Fu san ede a de prenspari fu sorgu taki Gado tan lobi wi?