Go na content

Go na a tra menu

Go na table of contents

Yehovah Kotoigi

Sranantongo

San Bijbel e leri wi trutru?

TRA PRENSPARI SANI

San na "Babilon a Bigiwan”?

San na "Babilon a Bigiwan”?

FURU tron a buku Openbaring e taki fu sani na wan agersi fasi (Openbaring 1:1). Fu eksempre, a Bijbel buku disi e taki fu wan uma di abi a nen "Babilon a Bigiwan” di skrifi na tapu en fesi-ede. A buku Openbaring e taki dati na uma disi e sidon na tapu "den ipi-ipi sma, èn den sma fu ala kondre” (Openbaring 17:1, 5, 15). Fu di nowan trutru uma kan du dati, meki a musu de so taki Babilon a Bigiwan e prenki wan sani. Ma san na agersi huru-uma disi e prenki?

Openbaring 17:18 e taki dati a srefi agersi uma disi, e prenki "a bigi foto di e tiri den kownu fu grontapu”. A wortu "foto” e sori go na wan grupu fu sma di orga. Fu di a "bigi foto” disi abi makti tapu "den kownu fu grontapu”, meki a musu fu de so taki na uma di nen Babilon a Bigiwan, na wan organisâsi di abi makti na heri grontapu. Nanga reti wi kan kari en wan grontapumakti. Na sortu fasi a de wan grontapumakti? A de wan grontapumakti di abi fu du nanga kerki afersi. Luku fa tra tekst na ini Openbaring di abi fu du nanga a pisi tori disi e sori wi taki dati de so.

Wan grontapumakti kan abi fu du nanga politiek afersi, bisnis afersi, noso kerki afersi. Na uma di nen Babilon a Bigiwan no de wan politiek tirimakti, fu di Gado Wortu e taki dati "den kownu fu grontapu”, noso a politiek sistema fu a grontapu disi, "du hurudu” nanga en. A hurudu fu na uma disi e sori go na den frubontu di a sroto nanga den tiriman fu a grontapu disi, èn dati meki wi e frustan fu san ede Bijbel e kari en "a bigi huru-uma”.—Openbaring 17:1, 2; Yakobus 4:4.

Babilon a Bigiwan no kan de wan bisnis tirimakti fu di "den bisnisman fu grontapu”, di e prenki a bisnis sistema fu grontapu, o sari trutru te na uma disi kisi pori. Fu taki en leti, Openbaring e taki dati den kownu èn sosrefi den bisnisman tanapu "farawe” e luku san e pasa nanga Babilon a Bigiwan (Openbaring 18:3, 9, 10, 15-17). Fu dati ede, a fiti fu taki dati Babilon a Bigiwan a no wan tirimakti di abi fu du nanga politiek afersi noso bisnis afersi, ma nanga kerki afersi.

Ete wan sani di e buweisi taki Babilon a Bigiwan abi fu du nanga kerki, na taki Openbaring e sori taki na uma disi e kori ala den pipel nanga yepi fu "na afkodrei” fu en (Openbaring 18:23). Fu di ala den difrenti sortu afkodrei abi fu du nanga anbegi èn sosrefi nanga ogri yeye, meki wi no e fruwondru te Bijbel e kari Babilon a Bigiwan, "wan presi pe ogri yeye e tan” (Openbaring 18:2; Deuteronomium 18:10-12). Bijbel e taki tu dati a tirimakti disi e du ala san a man fu gens a tru anbegi, fu di a e frufolgu "den profeiti” nanga "den santawan” (Openbaring 18:24). Fu taki en leti, Babilon a Bigiwan abi so furu bita-ati gi a tru anbegi, taki a e frufolgu "den kotoigi fu Yesus” na wan ogri-ati fasi èn e kiri den srefi (Openbaring 17:6). Sobun, a de krin taki na uma disi di nen Babilon a Bigiwan, e prenki a grontapumakti fu falsi bribi, èn sosrefi ala den kerki di e gens Yehovah Gado.

← Luku a kapitel di e taki fu a tori disi