Go na content

Go na a tra menu

Go na table of contents

Yehovah Kotoigi

Sranantongo

San Bijbel e leri wi trutru?

TRA PRENSPARI SANI

San na a Krutudei?

San na a Krutudei?

FA YU denki taki a Krutudei sa de? Furu sma e denki taki milyardmilyard libisma sa musu go na fesi a kownusturu fu Gado, wan-fru-wan, èn taki drape ibriwan fu den sa kisi krutu. Dan son sma o kisi libi na ini wan hemel paradijs, aladi trawan o kisi skin-ati fu têgo. Ma soleki fa Bijbel e sori, dan a pisi ten dati o de heri tra fasi leki fa sma e denki. Gado Wortu e sori taki a dei dati no sa de wan ten di e meki sma frede, ma a sa de wan ten di e gi howpu èn wan ten pe sani o kon bun baka.

Na ini Openbaring 20:11, 12 wi e leisi san na apostel Yohanes ben taki fu a Krutudei: "Mi si wan bigi weti kownusturu nanga a sma di ben e sidon na en tapu. Grontapu nanga hemel lon gowe gi en èn presi no ben de moro gi den. Dan mi si den dedesma, den bigiwan nanga den pikinwan, e tanapu na fesi a kownusturu, èn bukulolo ben e opo. Ma wan tra bukulolo ben e opo tu; disi na a bukulolo fu libi. Nanga yepi fu den sani di skrifi na ini den bukulolo, den ben krutu den dedesma fu den sani di den du.” Suma na a Krutuman di kari dyaso?

Yehovah Gado na a Moro Hei Krutuman fu a libisma famiri. Ma toku a e gi wan tra sma a frantwortu fu krutu. Soleki fa a skrifi na ini Tori fu den Apostel 17:31, na apostel Paulus ben taki dati Gado "poti wan dei pe a o gi wan man a wroko fu krutu ala sma na grontapu na wan regtfardiki fasi”. A krutuman disi di Gado poti, na Yesus Krestes di kisi wan opobaka (Yohanes 5:22). Ma o ten a Krutudei o bigin? O langa a o teki?

A buku Openbaring e sori taki a Krutudei e bigin baka na orloku fu Armagedon, te a sistema fu Satan na grontapu sa kisi pori (Openbaring 16:14, 16; 19:19-20:3).* Baka Armagedon, Satan nanga den ogri yeye fu en o koti strafu wán dusun yari langa na ini wan dipi peti di no abi gron. Na a ten dati, den 144.000 sma di kisi a kownukondre leki wan gudu na ini hemel, o de krutuman en den o tiri wán ’dusun yari langa leki kownu makandra nanga Krestes’ (Openbaring 14:1-3; 20:1-4; Romesma 8:17). A Krutudei no o pasa esi-esi, na ini wan pisi ten fu 24 yuru nomo. A sa teki wán dusun yari langa.

Na a pisi ten dati fu den wán dusun yari, Yesus Krestes sa "krutu den libiwan nanga den dedewan” (2 Timoteyus 4:1). "Den libiwan” sa de a "bigi ipi sma” di o pasa Armagedon libilibi (Openbaring 7:9-17). Na apostel Yohanes ben si sosrefi taki "den dedesma…e tanapu na fesi a kownusturu” fu kisi krutu. Soleki fa Yesus ben pramisi, dan "den sma di de na ini den grebi o yere [Krestes] sten, èn den o komopo drape”, fu di den sa kisi wan opobaka (Yohanes 5:28, 29; Tori fu den Apostel 24:15). San Yesus sa luku te a o krutu sma?

Soleki fa a fisyun fu na apostel Yohanes e sori, dan "bukulolo ben e opo” èn "nanga yepi fu den sani di skrifi na ini den bukulolo, den ben krutu den dedesma fu den sani di den du”. A de so taki den sani di skrifi na ini den bukulolo, na sani di sma ben du fositen? Nôno, te Yesus sa krutu sma, dan a no sa luku den sani di sma ben du bifo den dede. Fa wi du sabi dati? Bijbel e taki: "Te wan sma dede, dan a kon fri fu den sondu fu en” (Romesma 6:7). Sobun, te sma kisi wan opobaka, dan den sondu di den ben du fosi den dede, no sa teri moro. Dati meki, a no de fu taki dati den bukulolo musu abi fu du nanga tra markitiki di Gado o poti. Efu den sma di pasa Armagedon èn den sma di kisi wan opobaka wani libi fu têgo, dan den musu gi yesi na den komando fu Gado; dati wani taki dati den o abi fu hori densrefi tu na den nyun komando di Yehovah ben sa kan tyari kon na krin na a ten fu den dusun yari. Sobun, te Yesus o krutu sma, dan a o luku den sani di den e du na a ten fu a Krutudei.

Na a ten fu a Krutudei, milyardmilyard sma sa kisi na okasi fu a fosi leisi, fu kon sabi Gado èn fu libi soleki fa a wani. Disi wani taki dati bun furu sma sa musu kisi leri. Iya, "regtfardikifasi na san den sma di e libi na tapu a fatu gron sa leri trutru” (Yesaya 26:9). Ma a no ala sma o wani du a wani fu Gado. Yesaya 26:10 e taki: "Awansi sma ben sa sori na ogriwan bun-ati, toku a no sa leri regtfardikifasi kwetikweti. A sa handri na wan onregtfardiki fasi na ini a kondre fu opregtifasi, èn a no sa si a heifasi fu Yehovah.” Den wan di e du ogri na a ten fu a Krutudei, sa kisi pori fu têgo.—Yesaya 65:20.

Na a kaba fu a Krutudei, den sma di tan na libi, sa "kon na libi” trutru, fu di den o tron volmaakti libisma (Openbaring 20:5). Sobun, na a ten fu a Krutudei, libisma sa kon de volmaakti, neleki fa a ben de na a bigin (1 Korentesma 15:24-28). Baka dati, sma sa kisi wan lasti tesi. Den sa lusu Satan èn a sa kisi pasi fu pruberi fu kori a libisma famiri wán lasti leisi (Openbaring 20:3, 7-10). Den sma di e kakafutu gi Satan, sa ondrofeni trutru san Bijbel e pramisi: "Na den regtfardikisma srefi sa abi grontapu leki a gudu fu den, èn den sa libi na tapu fu têgo” (Psalm 37:29). Iya, a Krutudei sa tyari blesi kon gi ala libisma di tan getrow!


*  Efu yu wani kon sabi moro fu Armagedon, dan grantangi luku Inzicht in de Schrift, Pisi 1, bladzijde 458, 459, 942, 943, nanga kapitel 20 fu a buku Anbegi a wan-enkri tru Gado. Yehovah Kotoigi tyari den tu buku disi kon na doro.

← Luku a kapitel di e taki fu a tori disi