Go na content

Go na a tra menu

Go na table of contents

Yehovah Kotoigi

Sranantongo

San Bijbel e leri wi trutru?

KAPITEL AITI

San na a Kownukondre fu Gado?

San na a Kownukondre fu Gado?

San Bijbel e fruteri wi fu a Kownukondre fu Gado?

San a Kownukondre fu Gado sa du?

O ten a Kownukondre sa meki taki a wani fu Gado pasa na grontapu?

MILYUNMILYUN sma na heri grontapu sabi a begi di furu sma e kari a Wi Tata Begi. A begi disi di furu sma sabi, na a begi di Yesus srefi ben gi leki eksempre. Den sani di Yesus taki na ini a begi disi prenspari trutru èn te yu poti prakseri na den fosi dri sani di Yesus ben aksi, dan dati sa yepi yu fu kon frustan moro krin san Bijbel e leri wi trutru.

2 Na a bigin fu a begi disi di Yesus ben leri sma, a ben taigi den arkiman fu en: "Fu dati ede un musu begi so: ’Wi Tata na hemel, meki yu nen kon santa. Meki yu kownukondre kon. Meki yu wani pasa na grontapu soleki fa a e pasa na hemel’” (Mateyus 6:9-13). San den dri sani disi di Yesus ben aksi na ini a begi fu en, wani taki?

3 Wi leri furu kaba fu a nen fu Gado, Yehovah. Èn wi ben taki pikinso kaba fu a wani fu Gado, san a du kaba gi a libisma famiri èn san a o du gi den ete. Ma fu san Yesus ben e taki di a taigi wi fu begi: "Meki yu kownukondre kon”? San na a Kownukondre fu Gado? Te a Kownukondre dati kon, dan fa a sa meki a nen fu Gado kon santa? Èn san a kon di a Kownukondre o kon abi fu du nanga a wani fu Gado di musu pasa?

SAN NA A KOWNUKONDRE FU GADO

4 A Kownukondre fu Gado na wan tirimakti di Yehovah Gado seti èn di abi wan Kownu di Gado poti. Suma na a Kownu fu a Kownukondre fu Gado? We, dati na Yesus Krestes. Leki Kownu, Yesus bun moro ala libisma tiriman, èn Bijbel e kari en "Kownu fu den wan di e tiri leki kownu èn Masra fu den wan di e tiri leki masra” (1 Timoteyus 6:15). A abi a makti fu du bun, moro leki iniwan libisma tiriman; srefi a moro bun tiriman no man du bun leki Yesus.

5 Fu pe a Kownukondre fu Gado o tiri? We, pe Yesus de now? Yu sa memre taki yu ben leri taki den ben kiri en na wan pina-postu, èn taki baka dati a ben kisi wan opobaka. Syatu baka dati, a opo go na hemel (Tori fu den Apostel 2:33). Sobun, na drape a Kownukondre fu Gado de, iya na ini hemel. Na fu dati ede Bijbel e kari a Kownukondre disi wan "kownukondre na hemel” (2 Timoteyus 4:18). Aladi a Kownukondre fu Gado de na ini hemel, toku a sa tiri grontapu.—Openbaring 11:15.

6 Fu san ede Yesus na wan kefalek bun Kownu? Wan sani na taki a no sa dede noiti. Te Bijbel e teki Yesus gersi nanga libisma kownu, dan a e kari Yesus "a wan-enkri sma di no man dede, èn a e tan na ini wan leti pe sma no man go” (1 Timoteyus 6:16). Disi wani taki dati ala den bun sani di Yesus e du o tan fu têgo. Èn a no de fu taki dati a sa du furu sani di o tyari wini kon gi libisma trutru.

7 Luku san a Bijbel profeititori disi e taki fu Yesus: "A yeye fu Yehovah musu kon na en tapu, a yeye fu koni nanga frustan, a yeye fu rai nanga makti, a yeye fu sabi èn fu a frede gi Yehovah; èn a frede gi Yehovah sa gi en prisiri. Èn a no sa krutu sma akruderi wan sani di den ai fu en e si nomo èn a no sa piri-ai gi sma akruderi a sani di den yesi fu en e yere nomo. Èn nanga regtfardikifasi a musu krutu den mofinawan, èn nanga opregtifasi a musu gi piri-ai fu a bun fu den safri-atiwan fu grontapu” (Yesaya 11:2-4). Den wortu disi e sori taki Yesus sa de wan regtfardiki Kownu di sa sori sari-ati te a o tiri libisma na grontapu. Yu ben sa wani so wan tiriman?

8 Luku wan tra tru tori di abi fu du nanga a Kownukondre fu Gado: Yesus no sa tiri en wawan. Trawan sa tiri makandra nanga en. Fu eksempre, na apostel Paulus ben taigi Timoteyus: "Efu wi e tan horidoro, dan wi sa tiri tu leki kownu makandra nanga en” (2 Timoteyus 2:12). Iya, Paulus, Timoteyus, nanga tra getrow sma di Gado poti leki tiriman, sa tiri makandra nanga Yesus na ini a Kownukondre di de na hemel. Omeni sma sa abi a grani dati?

9 Soleki fa a kon na krin na ini kapitel 7 fu a buku disi, dan na apostel Yohanes ben kisi wan fisyun pe a ben si "a Pikin Skapu [Yesus Krestes] e tanapu na tapu Sionbergi [a posisi di a abi leki kownu na ini hemel] makandra nanga wan hondro fotenti na fo dusun sma; a nen fu en nanga a nen fu en Tata ben skrifi na tapu den fesi-ede”. Suma na den 144.000 sma? Yohanes srefi e fruteri wi: "Den na den wan di e tan waka na baka a Pikin Skapu awansi pe a e go. Den na den fosiwan di bai puru na mindri libisma gi Gado èn gi a Pikin Skapu” (Openbaring 14:1, 4). Iya, den sma disi na getrow bakaman fu Yesus Krestes di Gado teki spesrutu fu tiri na ini hemel makandra nanga Yesus. Baka te den kisi wan opobaka fu libi na ini hemel, dan "den o tiri grontapu leki kownu” makandra nanga Yesus (Openbaring 5:10). Sensi a ten fu den apostel, Gado e tyari getrow Kresten kon na wán fu doro a nomru fu 144.000 sma.

10 A de wan lobi-ati sani trutru taki Gado seti sani fu meki Yesus nanga den 144.000 sma tiri a libisma famiri. Wi kan taki disi fu di Yesus sabi san a wani taki fu de wan libisma èn fu nyan pina. Paulus ben taki dati Yesus no de "wan granpriester di no man frustan den swakifasi fu wi, ma wi abi wan granpriester di kisi tesi na ala fasi neleki wi, ma en no ben abi sondu” (Hebrewsma 4:15; 5:8). Den wan di sa tiri makandra nanga en nyan pina tu leki libisma èn den horidoro. Boiti dati, den ben abi fu feti teige den sondu firi fu den èn den ben abi fu du nanga ala sortu siki. A no de fu taki dati den sa man frustan den problema fu a libisma famiri heri bun!

SAN A KOWNUKONDRE FU GADO SA DU?

11 Di Yesus taigi den disipel fu en fu begi taki Gado Kownukondre musu kon, dan a ben taki tu dati den musu begi fu meki a wani fu Gado pasa "na grontapu soleki fa a e pasa na hemel”. Gado de na ini hemel, èn ala ten den getrow engel du a wani fu en. Ma na ini kapitel 3 fu a buku disi, wi ben leri fu wan ogri engel di no ben du a wani fu Gado moro èn di ben meki taki Adam nanga Eva sondu. Na ini kapitel 10, wi sa luku moro fara san Bijbel e leri wi fu na ogri engel dati, di wi sabi leki Satan Didibri. Satan nanga den engel, noso ogri yeye, di ben frukisi fu waka na en baka, ben mag tan na ini hemel fu wan pisi ten. Sobun, a no ala den engel na ini hemel ben e du a wani fu Gado na a ten dati. Dati ben o kenki te a Kownukondre fu Gado ben o bigin tiri. A nyun Kownu, Yesus Krestes, ben o feti teige Satan.—Openbaring 12:7-9.

12 A pisi fu a profeititori di e kon now, e sori wi san ben o pasa: "Mi yere wan tranga sten na ini hemel e taki: ’Now a ten doro taki a Gado fu wi o frulusu sma, taki a o sori en krakti, taki a kownukondre fu en o tiri, èn taki a Krestes fu en o sori en makti, bika a sma di e taki ogri fu wi brada èn di e taki lei fu den na fesi wi Gado dei nanga neti, fringi go na ondro!’” (Openbaring 12:10) Yu si na ini a bijbeltekst disi san na tu tumusi prenspari sani di pasa? A fosi sani, na taki Gado en Kownukondre, di abi Yesus Krestes leki tiriman, e bigin tiri. A di fu tu sani, na taki den fringi Satan komoto fu hemel kon na grontapu.

13 San ben de a bakapisi fu den tu sani dati di ben pasa? Wi e leisi san ben pasa na ini hemel: "Fu dati ede prisiri, un hemel èn unu di e libi drape!” (Openbaring 12:12) Iya, den getrow engel na ini hemel e prisiri fu di Satan nanga den ogri yeye fu en no de drape moro, èn dati meki ala den engel di de na ini hemel now, de getrow na Yehovah Gado. Vrede nanga wánfasi de drape ala ten. Now a wani fu Gado e pasa na ini hemel.

14 Ma fa a de nanga grontapu? Bijbel e taki: "Helu fu grontapu èn fu a se, bika Didibri saka kon na unu èn a abi bigi atibron fu di a sabi taki en ten syatu” (Openbaring 12:12). Satan e atibron fu di den fringi en komoto fu hemel, èn fu di a abi wan syatu pisi ten nomo. Fu di a e atibron, meki a e tyari bruya, noso "helu” kon na grontapu. Na ini kapitel 9, wi sa leri moro fu a "helu” dati. Ma now di wi sabi disi, dan a kan taki wi e aksi wisrefi fa a Kownukondre kan meki taki a wani fu Gado pasa na grontapu.

15 Memre san Gado wani gi a grontapu. Na ini kapitel 3 yu ben leri fu dati. Na ini Eden, Gado ben sori taki a wani a grontapu disi tron wan paradijs di furu nanga regtfardiki libisma di noiti no sa dede. Satan ben meki Adam nanga Eva sondu. A sani dati no kenki a prakseri fu Gado, ma a ben abi krakti tapu a fasi fa Gado ben o meki den prakseri fu en kon tru. Te now ete Yehovah wani taki ’den regtfardikisma srefi kisi grontapu leki a gudu fu den, èn taki den libi na tapu grontapu fu têgo’ (Psalm 37:29). A Kownukondre fu Gado sa du dati. Fa a sa du dati?

Fu di den ben fringi Satan nanga den ogri yeye fu en komoto fu hemel, meki bigi problema kon de na grontapu. Heri esi, den problema disi sa kon na wan kaba

Orloku, ogridu nanga a dede di sma e dede fu angri

16 Luku a profeititori di skrifi na ini Danièl 2:44. Drape wi e leisi: "Na ini den dei fu den kownu dati, a Gado fu hemel sa opo wan kownukondre di noiti no sa kisi pori. Èn a kownukondre srefi no sa gi na nowan tra pipel. A sa broko ala den kownukondre disi na pisipisi èn tyari wan kaba kon na den, èn ensrefi sa tan te ten di no skotu.” San disi e sori wi fu a Kownukondre fu Gado?

17 A fosi sani di a bijbeltekst disi e sori wi, na taki a Kownukondre fu Gado ben o seti "na ini den dei fu den kownu dati”, noso na wan ten pe tra kownukondre ben o de ete. A di fu tu sani di a e fruteri wi, na taki a Kownukondre o tan fu têgo. Nowan tra tirimakti o wini en èn teki en presi. A di fu dri sani, na taki wan orloku sa de na mindri a Kownukondre fu Gado nanga den kownukondre fu a grontapu disi. A Kownukondre fu Gado sa wini a feti. Te fu kaba, a sa de a wan-enkri tirimakti di sa tiri a libisma famiri. Dan libisma sa abi a moro bun tirimakti di den ben sabi oiti.

18 Bijbel e fruteri wi furu fu a lasti orloku na mindri a Kownukondre fu Gado nanga den tirimakti fu a grontapu disi. Fu eksempre, a e leri wi taki o moro wi e kon krosibei na a kaba, o moro den ogri yeye sa panya lei fu kori "ala den kownu na heri grontapu”. Fu san ede? "Fu tyari den [kownu] kon na wán fu feti a feti na tapu a bigi dei fu Gado na Almaktiwan.” Den kownu fu a grontapu disi sa tyari kon na wán na "a presi di sma kari Har-Magedon na ini Hebrewtongo” (Openbaring 16:14, 16). Den sani di skrifi na ini den tu vers disi e sori fu san ede sma e kari a lasti orloku na mindri libisma tirimakti nanga a Kownukondre fu Gado, a feti fu Armagedon.

19 San a Kownukondre fu Gado sa du nanga yepi fu Armagedon? Memre baka san Gado abi na prakseri gi a grontapu. Yehovah Gado ben wani taki a grontapu musu kon furu nanga regtfardiki èn volmaakti libisma di e dini en na ini Paradijs. San e meki taki disi no man pasa ete? Na a fosi presi, wi abi sondu, wi e kon siki èn wi e dede. Ma na ini kapitel 5 wi leri taki Yesus dede gi wi, so taki wi kan libi fu têgo. Kande yu e memre den wortu di skrifi na ini na Evangelie fu Yohanes, pe skrifi: "Gado ben lobi grontapu so te, taki a gi en wan-enkri Manpikin, so taki ala sma di e bribi na ini en no sa dede, ma sa kisi têgo libi.”—Yohanes 3:16.

20 Wan tra problema na taki furu sma e du ogri sani. Den e lei, den e bedrigi sma, èn den e du hurudu. Den no wani du a wani fu Gado. Sma di e du ogri sani sa kisi pori na ini Armagedon, na orloku fu Gado (Psalm 37:10). Ma wan tra sani fu san ede a wani fu Gado no e pasa na grontapu ete, na taki den tiriman no e gi sma deki-ati fu du a wani fu Gado. Furu tirimakti no abi a makti fu tiri a pipel, den e du ogri-ati sani, noso den e handri na wan kruka fasi. Bijbel e taki krin: "A wan libisma tiri a tra libisma nanga takru bakapisi gi en.”—Preikiman 8:9.

21 Baka Armagedon, wán tirimakti nomo sa tiri a libisma famiri, namku a Kownukondre fu Gado. A Kownukondre dati sa du a wani fu Gado èn a sa tyari tumusi moi blesi kon. Fu eksempre, a sa puru Satan nanga den ogri yeye fu en (Openbaring 20:1-3). Gado sa gebroiki a krakti fu a frulusu-ofrandi fu Yesus, so taki getrow libisma no sa kon siki moro èn dede. Na presi fu dati, den sa man libi fu têgo ondro a tiri fu a Kownukondre (Openbaring 22:1-3). Grontapu sa tron wan paradijs. Na so fasi a Kownukondre sa meki a wani fu Gado pasa na grontapu, èn a sa meki a nen fu Gado kon santa. San disi wani taki? A wani taki dati, te a Kownukondre fu Gado e tiri te fu kaba, ala sma di de na libi sa gi grani na a nen fu Yehovah.

O TEN A KOWNUKONDRE FU GADO O DU WAN SANI?

22 Di Yesus taigi den bakaman fu en fu begi, "Meki yu kownukondre kon”, dan a ben de krin taki a Kownukondre no ben kon ete na a ten dati. A de so taki a Kownukondre kon di Yesus ben opo go na hemel? Nôno, bika Petrus nanga Paulus ben sori taki a profeititori di skrifi na ini Psalm 110:1 ben kon tru, baka di Yesus kisi wan opobaka. Na ini a tekst dati wi e leisi: "Yehovah taigi mi Masra, taki: ’Sidon na mi reti-anu, teleki mi poti den feanti fu yu leki wan futubangi gi yu futu’” (Tori fu den Apostel 2:32-34; Hebrewsma 10:12, 13). Yesus ben musu wakti wan pisi ten.

Nanga yepi fu a Kownukondre, a wani fu Gado sa pasa na grontapu leki fa a e pasa na hemel

Son e dongo na tapu a se

23 O langa a ben musu wakti? Na ini a di fu 19 yarihondro, opregti Bijbel ondrosukuman ben kon si taki a ten di Yesus ben musu wakti ben o kaba na ini 1914 (Na a pisi tori di nen "Tra prenspari sani”, yu kan leisi moro fu a yari disi). Sani di pasa sensi 1914 e buweisi taki den opregti Bijbel ondrosukuman ben abi leti. Bijbel profeititori di kon tru e sori taki Krestes tron Kownu na ini 1914, èn taki a hemel Kownukondre fu Gado bigin tiri na a ten dati. Sobun, wi e libi na ini a ’syatu pisi ten’ di Satan abi ete fu libi (Openbaring 12:12; Psalm 110:2). Wi kan de seiker taki heri esi a Kownukondre fu Gado sa du sani fu meki a wani fu Gado pasa na grontapu. Yu breiti nanga a nyunsu disi? Yu e bribi taki a nyunsu disi tru? A kapitel di e kon sa yepi yu fu si taki disi na trutru san Bijbel e leri wi.

SAN BIJBEL E LERI WI

  • A Kownukondre fu Gado na wan tirimakti na hemel di abi Yesus Krestes leki Kownu, èn na mindri a libisma famiri Gado teki 144.000 sma fu tiri makandra nanga Yesus.—Openbaring 14:1, 4.
  • A Kownukondre bigin tiri na ini 1914, èn na a ten dati den fringi Satan komoto fu hemel kon na grontapu.—Openbaring 12:9.
  • Heri esi, a Kownukondre fu Gado sa pori libisma tirimakti, èn grontapu sa tron wan paradijs.—Openbaring 16:14, 16.

Den aksi fu a studie

1. Sortu begi di furu sma sabi, wi sa luku now?

2. San na dri fu den sani gi san den disipel fu Yesus ben musu begi, soleki fa a ben leri den?

3. San wi musu kon sabi fu a Kownukondre fu Gado?

4. San na a Kownukondre fu Gado, èn suma na a Kownu fu a Kownukondre dati?

5. Fu pe a Kownukondre fu Gado e tiri, èn san a e tiri?

6, 7. Fu san ede Yesus na wan kefalek bun Kownu?

8. Suma o tiri makandra nanga Yesus?

9. Omeni sma o tiri makandra nanga Yesus, èn o ten Gado bigin tyari den kon na wán?

10. Fu san ede a de wan lobi-ati seti taki Yesus nanga den 144.000 sma sa tiri a libisma famiri?

11. Fu san ede Yesus ben taki dati den disipel fu en musu begi fu meki a wani fu Gado pasa na ini hemel?

12. San na tu prenspari sani di pasa, soleki fa a kon na krin na ini Openbaring 12:10?

13. San ben de a bakapisi di den fringi Satan komoto fu hemel?

14. San pasa baka di den fringi Satan kon na grontapu?

15. San Gado wani gi a grontapu?

16, 17. San Danièl 2:44 e fruteri wi fu a Kownukondre fu Gado?

18. San na a nen fu a lasti orloku na mindri a Kownukondre fu Gado nanga den tirimakti fu a grontapu disi?

19, 20. Fu san ede a wani fu Gado no e pasa na grontapu na ini a ten disi?

21. Fa a Kownukondre fu Gado sa meki a wani fu Gado pasa na grontapu?

22. Fa wi du sabi taki a Kownukondre fu Gado no kon di Yesus ben de na grontapu, èn taki a no kon wantewante baka di a kisi wan opobaka?

23. (a) O ten a Kownukondre fu Gado bigin tiri? (b) San wi sa luku na ini a kapitel di e kon?