Go na content

Go na a tra menu

Go na table of contents

Yehovah Kotoigi

Sranantongo

San Bijbel e leri wi trutru?

KAPITEL SIKSI

Pe den dedewan de?

Pe den dedewan de?

San e pasa nanga wi te wi dede?

Fu san ede wi e dede?

Yu denki taki a o de wan trowstu gi wi te wi sabi san e pasa trutru nanga den dedewan?

DUSUNDUSUN yari langa, sma suku fu gi piki tapu den aksi disi. Den aksi disi na prenspari aksi. Awinsi suma wi de, noso awinsi pe wi e libi, den piki tapu den aksi disi abi fu du nanga ibriwan fu wi.

2 Na ini kapitel feifi wi ben taki fa a frulusu-ofrandi fu Yesus Krestes meki taki wi kan kisi têgo libi. Wi leri tu taki Bijbel e taki dati wan ten o kon pe "dede no sa de moro” (Openbaring 21:4). Ma teleki now, wi alamala e dede. "Den libiwan sabi taki den sa dede”, na so a koni Kownu Salomo ben taki (Preikiman 9:5). Wi e pruberi fu libi solanga leki wi man. Toku wi e aksi wisrefi san o pasa nanga wi te wi dede.

3 Te den lobiwan fu wi dede, wi e sari trutru. Èn kande wi e aksi wisrefi: ’San pasa nanga den? Den e pina? A de so taki den e kibri wi fu ogri no miti wi? Wi kan yepi den? Oiti wi sa si den baka?’ Den kerki fu grontapu e gi difrenti piki tapu den aksi disi. Sonwan fu den e leri sma taki efu yu libi wan bun libi, dan yu sa go na hemel, ma efu yu libi wan takru libi, dan yu sa bron na wan presi pe sma e kisi skin-ati. Tra kerki e leri sma taki te den dede, den e tron yeye so taki den kan de nanga den afo fu den di dede kaba. Ma tra kerki e taki dati den dedewan e go na wan yeye kondre di de na ondro gron fu kisi krutu, èn baka dati den e gebore baka na ini wan tra skin.

4 Ala den kerkileri disi abi fu du nanga wán prenspari leri, namku taki wan sani di de na ini wi e libi go doro te a skin fu wi dede. Soleki fa pikinmoro ibri kerki fu fositen èn fu a ten disi leri sma, dan na a wan noso tra fasi wi e libi fu têgo, aladi wi man si, yere, èn denki. Ma fa dati kan? Wi edetonton e wroko na so wan fasi taki wi man si, yere, tesi, smeri, firi èn denki. Te wi dede, dan na edetonton no e wroko moro. Sobun, a no de so taki na wan wondru fasi wi e tan memre, firi, si, yere, tesi, èn smeri sani. Wan sma no man du den sani disi moro te na edetonton pori kaba.

SAN E PASA TRUTRU TE WAN SMA DEDE?

A faya fu a kandra dede

Pe a faya go?

5 Yehovah, a Sma di meki na edetonton, sabi heri bun san e pasa te wan sma dede. A sabi san e pasa trutru, èn na ini en Wortu, Bijbel, a e fruteri wi san e pasa nanga den dedewan. Bijbel e sori wi krin taki: Te wan sma dede, a sma dati no de moro. Sobun, te wan sma dede, dan a no de na libi moro. Den dedewan no man si, den no man yere, èn den no man denki. Nowan sani de na ini wi skin di e libi go doro te a skin dede. Wi no abi wan sili, noso wan yeye di no man dede.*

6 Baka di Salomo taki dati den wan di de na libi sabi taki den o dede, dan a ben skrifi: "Den dedewan no sabi notinoti.” Baka dati a fruteri go doro fu a prenspari tru tori disi, di a taki dati den dedewan no kan sori lobi, taki den no kan abi bita-ati, èn taki "nowan wroko noso prakseri noso sabi noso koni no de na ini [a grebi]” (Preikiman 9:5, 6, 10). Na a srefi fasi, Psalm 146:4 e taki dati te wan sma dede, "den prakseri fu en e lasi gowe”. Nowan fu wi e libi fu têgo, sobun, te a skin fu wi dede, wi no man libi go doro. A libi di wi abi de leki a faya fu wan kandra. Te a faya kiri, a no e go nowan presi. Fu taki en leti, a no de moro.

SAN YESUS BEN TAKI FU DEN DEDEWAN

7 Yesus Krestes ben taki san e pasa nanga den dedewan. A ben taki san ben pasa nanga Lasarus, wan man di a ben sabi heri bun, èn di ben kon dede. Dati meki Yesus ben taigi den disipel fu en: "Lasarus, wi mati, go rostu.” Den disipel ben e prakseri taki Yesus ben taki dati Lasarus e sribi, so taki a ben kan kon betre baka fu wan siki. Ma a no dati Yesus ben abi na prakseri. Yesus ben taki krin: "Lasarus dede” (Yohanes 11:11-14). Luku taki Yesus ben teki dede gersi nanga rostu, èn nanga sribi. Lasarus no ben de na ini hemel èn a no ben de na ini wan faya hel tu. A no ben de nanga den engel, noso nanga den afo fu en di ben dede kaba. Lasarus no ben gebore baka leki wan tra libisma. A ben e rostu na ini dede, neleki te wan sma e sribi dipi sondro fu dren. Tra bijbeltekst de tu di e teki dede gersi nanga sribi. Fu eksempre, di sma ben ston Stefanus kiri, dan Bijbel e taki dati Stefanus "fadon na sribi” (Tori fu den Apostel 7:60, futuwortu). Na a srefi fasi na apostel Paulus ben skrifi fu son sma na ini a ten fu en di ben "fadon na sribi” na ini dede.—1 Korentesma 15:6, futuwortu.

Wan koloku trowpaar

Yehovah meki libisma fu libi fu têgo na tapu grontapu

8 A de so taki na a bigin, Gado ben wani taki libisma musu dede te fu kaba? Kwetikweti! Yehovah ben meki libisma fu libi fu têgo na grontapu. Soleki fa wi leri kaba na ini a buku disi, dan Gado ben poti a fosi man nanga uma na ini wan moi paradijs. A ben gi den wan volmaakti gosontu. Yehovah ben wani taki ala sani waka bun nanga den. Yu denki taki wan lobi-ati papa, noso mama ben sa wani taki en pikin pina, fu di den pikin e kon owru èn dede te fu kaba? Nôno, kwetikweti! Yehovah ben lobi den pikin fu en, èn a ben wani taki den ben musu libi koloku na grontapu fu têgo. Bijbel e taki fu libisma: "Ten di no skotu [Yehovah] poti na ini den ati” (Preikiman 3:11). Gado meki wi nanga a winsi fu libi fu têgo, èn a seti sani so taki a winsi dati kan kon tru.

FU SAN EDE LIBISMA E DEDE

9 Ma fu san ede libisma e dede dan? Efu wi wani feni a piki tapu na aksi disi, dan wi musu luku san ben pasa di wán man nanga wán uma nomo ben de na grontapu. Bijbel e fruklari: "Yehovah Gado ben meki ibri sortu bon gro komoto na ini a gron; den bon ben moi fu si èn den ben e gi bun nyanyan” (Genesis 2:9). Ma wán sani ben de di den no ben mag du. Yehovah ben taigi Adam: "Fu ibri bon fu a dyari yu mag nyan te yu bere furu. Ma fu a bon fu sabi bun nanga ogri, fu dati yu no musu nyan, bika na a dei di yu sa nyan fu dati, yu o dede fu tru” (Genesis 2:16, 17). A no ben muilek gi den fu gi yesi na a komando disi. Someni tra bon ben de fu san Adam nanga Eva ben kan nyan. Ma a komando disi ben gi den a spesrutu okasi fu sori warderi gi a Sma di ben gi den ala sani, èn di ben gi den volmaakti libi sosrefi. Efu den ben gi yesi na a komando disi, dan dati ben o sori taki den e lespeki a makti fu a Tata fu den na hemel èn taki den wani a lobi-ati tiri fu en.

10 A de wan sari sani taki a fosi man nanga uma bosroiti fu trangayesi Yehovah. Nanga yepi fu wan sneki, Satan ben aksi Eva: "A de so trutru, taki Gado ben taki dati unu no musu nyan fu ibri bon fu a dyari?” Eva ben piki en: "Fu a froktu fu den bon fu a dyari wi mag nyan. Ma fu nyan fu a froktu fu a bon di tanapu mindrisei fu a dyari, Gado taki: ’Un no musu nyan fu dati, nôno, un no musu fasi en, so taki unu no dede.’”—Genesis 3:1-3.

11 "Unu no sa dede kwetikweti”, Satan ben taki. "Gado sabi taki na a dei di unu e nyan fu en, un ai sa kon opo trutru èn dan unu sa de leki Gado, fu di unu sa sabi bun nanga ogri” (Genesis 3:4, 5). Satan ben wani taki Eva ben musu bribi dati a ben o kisi wini efu a ben nyan fu a froktu di den no ben mag nyan. Soleki fa a ben taki, dan Eva ben kan bosroiti gi ensrefi san bun èn san ogri; a ben kan du san a wani. Satan ben feni tu taki Yehovah ben lei di a taki dati Adam nanga Eva o dede efu den nyan a froktu. Eva bribi Satan. Dati meki a piki wan fu den froktu èn a nyan fu en. Baka dati a gi en masra, èn en sosrefi ben nyan fu a froktu. A no de so taki den no ben sabi san den ben e du. Den ben sabi heri bun taki den ben e du san Gado ben taigi den fu no du. Di den nyan fu a froktu, dan fu espresi den no gi yesi na wan komando di no ben muilek fu frustan, èn di no ben hebi gi den. Den ben wisiwasi a hemel Tata fu den èn a makti di a abi. Fu di den no ben sori lespeki kwetikweti gi den lobi-ati Mekiman, meki den no ben kan kisi pardon moro!

12 Fu gi wan eksempre: Fa yu ben o firi te wan manpikin, noso wan umapikin di yu kweki èn sorgu, e trangayesi yu na wan fasi di e sori taki a no abi lespeki gi yu èn taki a no lobi yu? Dati ben o hati yu trutru. Prakseri dan fa a ben e hati Yehovah di Adam nanga Eva teki a bosroiti fu opo densrefi teige en.

Gado meki Adam fu doti

Adam ben komoto fu a doti, èn a drai go baka na a doti

13 Fu di Adam nanga Eva trangayesi Yehovah, meki A no ben abi reide fu meki den libi fu têgo. Den dede, neleki fa a ben taki. Adam nanga Eva no ben de moro. Den no ben go libi na wan tra presi leki yeye. Disi wi sabi fu di Yehovah ben taigi Adam wan sani baka di A aksi en fu san ede a trangayesi En. Gado ben taigi en: "Yu [sa] drai go baka na a gron, bika na drape [mi] ben teki yu puru. Bika doti yu de èn na a doti yu sa drai go baka” (Genesis 3:19). Gado ben meki Adam fu a doti fu a gron (Genesis 2:7). Fosi dati, Adam no ben de. Dati meki, di Yehovah taki dati Adam ben o drai go baka na doti, A ben sori taki Adam no ben o de moro, neleki fa a ben de bifo Gado ben meki en. Adam no ben o de na libi moro, neleki fa a doti fu san a ben meki no de na libi tu.

14 Adam nanga Eva ben kan de na libi tide, ma den dede fu di den bosroiti fu trangayesi Gado èn na so fasi den sondu. Wi e dede fu di wi leki bakapikin fu Adam kisi sondu nanga a dedestrafu fu en (Romesma 5:12). A sondu dati de neleki wan takru siki di wi kisi fu wi fosi tata, èn nowan sma kan lowe gi dati. A bakapisi fu sondu, namku dede, na wan fluku. Dede na wi feanti, a no de wi mati (1 Korentesma 15:26). Wi kan de nanga tangi trutru taki Yehovah seti sani fu pai a lusu-paiman fu frulusu wi fu a takru feanti disi!

WI E KISI WINI TE WI SABI SAN E PASA TRUTRU NANGA DEN DEDEWAN

15 Den sani di Bijbel e leri wi fu den dedewan e gi wi trowstu. Soleki fa wi si, dan den dedewan no e kisi skin-ati, èn den no e sari. Wi no abi fu frede den dedewan, fu di den no man du wi ogri. Den no abi wi yepi fanowdu, èn den no man yepi wi tu. Wi no man taki nanga den, èn den no man taki nanga wi. Furu kerki fesiman e meki sma kisi a fowtu denki taki den man yepi den dedewan, èn sma di e bribi den fesiman disi e gi den moni. Ma te wi sabi san e pasa trutru nanga den dedewan, dan den sma di e fruteri den sortu lei disi no man kori wi.

16 Yu denki taki furu kerki e leri sma san Bijbel e taki fu den dedewan? Furu tron dati no de so. Fu san ede? Fu di Satan abi krakti tapu den sani di den e leri. A e gebroiki falsi kerki fu meki sma bribi taki baka te a skin fu den dede, den sa libi go doro leki wan yeye. Disi na wan fu den lei di Satan e gebroiki fu meki sma drai den baka gi Yehovah Gado. Fa so?

17 Soleki fa wi ben si kaba, dan son kerki e leri taki efu wan sma di no libi bun, dede te fu kaba, dan a sa go na wan presi pe a o bron èn pina fu têgo. A leri disi no e gi Gado grani. Yehovah na wan Gado fu lobi èn noiti a no ben o meki sma pina na a fasi disi (1 Yohanes 4:8). San yu ben o prakseri fu wan man di e poti den anu fu wan trangayesi pikin na ini faya, soso fu strafu en? Yu ben o abi lespeki gi so wan man? Fu taki en leti, yu ben o wani kon sabi so wan man? Kwetikweti! A no de fu taki dati yu ben o si a man disi leki wan ogri-ati sma trutru. Toku Satan wani taki wi musu bribi dati Yehovah e pina sma na ini faya fu têgo!

18 Satan e gebroiki son kerki tu fu leri sma taki den e tron yeye baka te den dede, èn taki den sma di de na libi musu lespeki den yeye dati èn gi den grani. Soleki fa a leri disi e sori, dan den yeye fu den dedewan kan tron mati di tranga srefisrefi, noso den kan tron ogri feanti. Furu sma e bribi a lei disi. Fu di den e frede den dedewan, meki den e gi den grani èn den e anbegi den. Ma kontrari fu dati, Bijbel e leri wi taki den dedewan e sribi èn taki wi musu anbegi soso a tru Gado, Yehovah, wi Mekiman, a Sma di e gi wi san wi abi fanowdu.—Openbaring 4:11.

19 Te yu sabi san e pasa trutru nanga den dedewan, dan dati sa kibri yu, so taki den falsi kerki no kori yu. A e yepi yu tu fu kon frustan tra Bijbel leri. Fu eksempre, te yu sabi taki sma no e tron yeye, baka te den dede, dan a têgo libi di Gado pramisi wi na tapu wan paradijs grontapu, sa de wan trutru howpu gi yu.

20 Langa ten pasa, a regtfardiki man Yob ben poti na aksi disi: "Efu wan tranga man dede, a kan libi baka?” (Yob 14:14) A de so taki wan sma di e sribi na ini dede kan kisi libi baka? Soleki fa a kapitel di e kon sa sori, dan den sani di Bijbel e leri wi fu a tori disi e gi wi trowstu trutru.

SAN BIJBEL E LERI WI


*  Fu kon sabi san den wortu "sili” nanga "yeye” wani taki, dan grantangi luku a pisi "Tra prenspari sani”.


Den aksi fu a studie

1-3. Sortu sani di abi fu du nanga den dedewan sma e aksi densrefi, èn sortu piki den difrenti kerki e gi?

4. Sortu prenspari leri di abi fu du nanga dede, de a srefi na ini pikinmoro ibri kerki?

5, 6. San e pasa nanga den dedewan, soleki fa Bijbel e sori wi?

7. Fa Yesus yepi sma fu kon frustan san e pasa nanga den dedewan?

8. Fa wi du sabi taki na a bigin, Gado no ben wani taki libisma musu dede te fu kaba?

9. San Yehovah ben taki dati Adam no ben mag du, èn fu san ede a no ben muilek fu gi yesi na a komando dati?

10, 11. (a) Fa a du kon taki a fosi man nanga uma ben trangayesi Gado? (b) Fu san ede a ben de wan seryusu sani di Adam nanga Eva trangayesi Gado?

12. San kan yepi wi fu frustan fa Yehovah ben e firi di Adam nanga Eva teki a bosroiti fu opo densrefi teige en?

13. Soleki fa Yehovah ben taki, dan san ben o pasa nanga Adam te a ben o dede, èn san dati wani taki?

14. Fu san ede wi e dede?

15. Fu san ede a e gi wi trowstu te wi sabi san e pasa trutru nanga den dedewan?

16. Suma abi krakti tapu den sani di bun furu fu den kerki e leri sma, èn fa a e du dati?

17. Fu san ede a leri di e taki dati sma sa pina fu têgo, no e gi Yehovah grani?

18. Na anbegi fu den dedewan abi fu du nanga sortu falsi kerkileri?

19. Sortu tra Bijbel leri wi o man frustan te wi sabi san e pasa trutru nanga den dedewan?

20. Sortu aksi wi sa luku na ini a kapitel di e kon?