Go na content

Go na a tra menu

Go na table of contents

Yehovah Kotoigi

Sranantongo

San Bijbel e leri wi trutru?

KAPITEL ERFU

Fu san ede Gado e gi pasi taki libisma e pina?

Fu san ede Gado e gi pasi taki libisma e pina?

Na Gado meki taki sma na grontapu e pina?

Sortu strei ben bigin na ini a dyari fu Eden?

Fa Gado sa tyari wan kaba kon na a pina di libisma e pina?

BAKA wan ogri feti na ini wan kondre pe orloku de, sma ben meki wan bigi olo pe den ben beri den dusundusun uma nanga pikin di dede na ini a feti, èn den ben poti pikin kroisi lontu na olo disi. Na tapu ibriwan fu den kroisi ben skrifi: "Fu san ede?” Son leisi sma e poti na aksi disi fu sori taki den e sari trutru taki wan ogri sani pasa di no ben abi fu pasa. Nanga sari, sma e poti na aksi disi te orloku, rampu, siki, noso ogridu meki taki den lasi lobiwan na ini dede, te den sani disi meki taki den lasi den oso, èn sosrefi te den sortu sani dati e meki taki den e nyan furu pina na tra fasi. Den wani kon sabi fu san ede den sortu rampu disi e miti den.

2 Fu san ede Gado e gi pasi taki libisma e pina? Efu Yehovah Gado abi ala makti, èn efu a abi lobi, koni, nanga retidu, dan fu san ede so furu bita-ati nanga kruktudu de na ini grontapu? Oiti yu aksi yusrefi den sani disi?

3 Yu denki taki a fowtu fu aksi fu san ede Gado e gi pasi taki libisma e pina? Son sma e denki taki te den e poti so wan aksi, dan dati e sori taki den no abi nofo bribi, noso taki den no e sori lespeki gi Gado. Ma te yu e leisi Bijbel, dan yu sa si taki getrow sma di ben abi frede gi Gado, poti den srefi sortu aksi disi. Fu eksempre, a profeiti Habakuk ben aksi Yehovah: "Fu san ede yu e meki mi e si sani di e hati sma, èn yu e tan luku san de trobi nomo? Èn fu san ede ogri-ati fufuru nanga ogri di sma e du nanga tranga de na mi fesi, èn fu san ede trobi e meki, èn fu san ede strei e opo en ede kon?”—Habakuk 1:3.

Yehovah sa tyari wan kaba kon na ala pina di e miti libisma

Wan beri

4 A de so taki Yehovah ben atibron nanga a getrow profeiti Habakuk fu di a ben poti den aksi dati? Nôno. Na presi fu dati, Gado ben meki Habakuk skrifi den opregti wortu dati na ini Bijbel di skrifi nanga yepi fu santa yeye. Gado ben yepi en tu fu kon frustan sani moro bun èn fu kisi wan moro tranga bribi. Yehovah wani du a srefi gi yu. Memre taki Bijbel e leri wi taki ’a e broko en ede nanga yu’ (1 Petrus 5:7). Moro leki iniwan libisma, Gado e tegu gi ogridu èn gi a pina di sma e pina leki bakapisi fu dati (Yesaya 55:8, 9). Ma dan, fu san ede so furu sma na ini grontapu e pina?

FU SAN EDE SO FURU SMA E PINA?

5 Sma fu difrenti kerki go na den kerki fesiman nanga den leriman fu den, fu aksi den fu san ede so furu sma e pina. Furu tron, den kerki fesiman disi e taigi den sma taki na Gado wani taki sma e pina, èn taki ibri sani di ben o pasa na grontapu, dati wani taki den rampu sosrefi, ben o pasa fu di na so Gado ben seti sani langa ten na fesi. Furu sma leri taki Gado e wroko na wan fasi di libisma no man frustan, noso taki na en e sorgu taki libisma, srefi pikin-nengre, e dede, so taki den kan de makandra nanga En na ini hemel. Ma soleki fa yu leri kaba, dan noiti Yehovah Gado e meki taki ogri e pasa. Bijbel e taki: "Noiti a tru Gado sa handri na wan kruktu fasi; noiti na Almaktiwan sa du san no de reti!”—Yob 34:10.

6 Yu sabi fu san ede sma e meki a fowtu fu taki dati na Gado e meki taki sma na grontapu e pina? Furu tron den e taki a sani dati, fu di den e prakseri taki na Almakti Gado na a trutru tiriman fu a grontapu disi. Ma san den no sabi, na taki Bijbel e leri wi wan prenspari tru tori di no muilek fu frustan. Na ini kapitel 3 fu a buku disi yu ben leri fu a tru tori disi. A sma di e tiri a grontapu disi trutru, na Satan Didibri.

7 Bijbel e taki krin: "Heri grontapu de na ini a makti fu na ogriwan” (1 Yohanes 5:19). Te yu e prakseri a tori disi, dan yu e si taki a tru, a no so? A grontapu disi e sori den fasi fu a yeye libisani di wi no man si èn di e "kori sma na heri grontapu” (Openbaring 12:9). Satan abi bita-ati, a e kori sma, èn a ogri. Dati meki a grontapu di de ondro a makti fu en, lai nanga sma di abi bita-ati, sma di e kori trawan, èn di e du ogri-ati sani. Disi na wán reide fu san ede so furu sma e pina.

8 A di fu tu reide fu san ede so furu sma e pina, na fu di ala libisma kisi sondu, baka di Adam nanga Eva opo densrefi teige Gado na ini a dyari fu Eden, soleki fa wi ben si na ini kapitel 3. Furu tron, sondu libisma e du ala san den man fu basi trawan, èn a bakapisi fu dati na taki orloku de, sma e kwinsi trawan, èn sma e pina (Preikiman 4:1; 8:9). A di fu dri reide fu san ede libisma e pina, na fu di "ten nanga sani di e pasa sondro fu sma fruwakti dati” e miti wi alamala (Preikiman 9:11). Fu di den sma fu a grontapu disi no abi Yehovah leki Tiriman fu kibri den, meki iniwan momenti wan ogri kan miti den, awinsi pe den de.

9 A e gi wi trowstu fu sabi taki a no Gado e meki sma pina. A no Gado e meki taki orloku de, taki sma e du ogri, taki sma e kwinsi trawan, noso taki rampu srefi e meki sma pina. Toku wi musu kon sabi fu san ede Yehovah e gi pasi taki so furu libisma e pina. Efu Gado na a Almaktiwan, dan a abi a makti fu tyari wan kaba kon na a pina di sma e pina. Fu san ede a no e gebroiki a makti dati dan? A musu fu de so, taki a lobi-ati Gado di wi kon sabi, abi wan bun reide fu san ede a no du noti ete.—1 Yohanes 4:8.

WAN TUMUSI PRENSPARI STREI OPO KON

10 Fu kon sabi fu san ede Gado e gi pasi taki sma e pina, wi musu prakseri baka fa a du kon taki sma bigin pina. Di Satan meki taki Adam nanga Eva trangayesi Yehovah, dan wan prenspari aksi opo kon. Satan no ben tyalensi a makti fu Yehovah, fu di ensrefi sabi heri bun taki a makti fu Yehovah no skotu. Na presi fu dati, a ben tyalensi Yehovah en reti fu tiri. Satan ben taki dati Gado na wan leiman di e hori bun sani na baka gi den sma di de na En ondro. Te yu luku en bun, dan a ben taki dati Yehovah a no wan bun tiriman (Genesis 3:2-5). Satan ben wani sori taki sani ben o waka moro bun nanga a libisma famiri, efu Gado no ben e tiri den. Na a fasi disi a ben wani sori taki Yehovah no abi a reti fu tiri leki a Moro Heiwan.

11 Adam nanga Eva ben opo densrefi teige Yehovah. Te yu luku en bun, den ben taki: "Wi no abi Yehovah fanowdu leki wi Tiriman. Wi kan bosroiti gi wisrefi san bun èn san ogri.” San Yehovah ben kan du fu tyari wan kaba kon na a strei dati? Fa a ben kan leri ala den libisani di abi frustan, taki den wan di opo densrefi teige en no ben abi leti, èn taki a fasi fa en e tiri na a moro bun fasi? Wan sma kan taki dati Gado ben musu kiri den wan di opo densrefi teige en èn taki a ben musu meki tra libisma. Ma Yehovah ben taki dati a wani grontapu kon furu nanga den bakapikin fu Adam nanga Eva, èn a ben wani taki den musu libi na ini wan paradijs grontapu (Genesis 1:28). Ala ten Yehovah e du san a abi na prakseri (Yesaya 55:10, 11). Boiti dati, efu a ben kiri den wan di opo densrefi teige en na ini Eden, dan dati no ben o tyari kon na krin efu Yehovah abi a reti fu tiri trutru.

Wan skoromeester nanga den studenti fu en

A studenti koni moro a skoromeester?

12 Meki wi go luku wan agersitori. Kon meki wi taki dati wan skoromeester e sori den studenti fu en fa fu meki wan muilek som. Wan studenti di koni, ma di e opo ensrefi teige a skoromeester, e feni taki a fasi fa a skoromeester e meki a som no bun. Fu di a studenti disi wani sori taki a skoromeester no man meki a som, meki a e hori nomo taki a sabi meki a som na wan moro bun fasi. Wan tu tra studenti feni taki a abi leti, èn densrefi e bigin opo densrefi teige a skoromeester. San a skoromeester musu du? Efu a yagi ala den studenti di opo densrefi teige en, dan san den tra studenti o prakseri? Den kan go prakseri taki a studenti di opo ensrefi èn sosrefi den wan di waka na en baka, abi leti, a no so? Ala den tra studenti na ini a klas kan lasi lespeki gi a skoromeester, èn den kan denki taki a e frede taki den wan di opo densrefi teige en, o buweisi taki a fowtu. Ma kon meki wi taki dati a skoromeester e gi a studenti di opo ensrefi, na okasi fu sori den trawan na ini a klas fa en ben o meki a som.

13 Yehovah du wan srefi sortu sani leki san a skoromeester na ini na agersitori fu wi ben o du. Memre taki den wan di opo densrefi teige Gado na ini Eden, no ben de den wan-enkri sma di ben de ini a tori. Milyunmilyun engel ben e luku san e pasa (Yob 38:7; Danièl 7:10). A fasi fa Yehovah ben o handri nanga den wan di ben opo densrefi teige en, ben o abi krakti tapu ala den engel dati, èn te fu kaba tapu ala tra libisani di abi frustan. Sobun, san Yehovah du? A gi Satan pasi fu sori fa en ben o tiri a libisma famiri. Gado gi libisma pasi tu fu tiri densrefi ondro a makti fu Satan.

14 A skoromeester na ini na agersitori fu wi, sabi taki a studenti di opo ensrefi teige en èn sosrefi den trawan di waka na en baka, no abi leti. Ma a sabi tu taki te a gi den na okasi fu du san den abi na prakseri, dan dati sa tyari wini kon gi ala den tra studenti na ini a klas. Te den wan di opo densrefi no man du san den taki, dan ala den opregti studenti sa si taki a skoromeester wawan abi a koni fu teki fesi na ini a klas. A no sa fruwondru den te a skoromeester e yagi iniwan tra studenti di e opo ensrefi teige en. Na a srefi fasi, Yehovah sabi taki ala opregti libisma nanga ala opregti engel sa kisi wini te den si taki Satan nanga den wan di teki en sei, no ben abi leti, èn taki libisma no man tiri densrefi. Neleki Yeremia fu owruten, den sa kon sabi a tumusi prenspari tru tori disi: "Mi sabi heri bun, o Yehovah, taki a no de na libisma fu luku gi ensrefi sortu pasi a wani teki. A no de na wan libisma di e waka srefi fu taki pe a wani poti en futu.”—Yeremia 10:23.

FU SAN EDE YEHOVAH GI PASI TAKI SMA PINA SO LANGA?

15 Ma fu san ede Yehovah gi pasi taki sma pina so langa? Fu san ede a no e du sani fu meki taki ogri no pasa? We, luku tu sani di a skoromeester na ini na agersitori fu wi no ben o du. A fosi sani, na taki a no ben o tapu a studenti di opo ensrefi teige en, fu meki a sori fa a ben o meki a som. A di fu tu sani, na taki a skoromeester no ben o yepi a studenti nanga a som. Na so a de sosrefi, taki tu sani de di Yehovah no sa du noiti. Na a fosi presi, a no tapu Satan nanga den wan di teki en sei, fu pruberi fu sori taki den abi leti. Dati meki a ben de fanowdu fu gi den ten. Na ini den dusundusun yari di pasa, libisma kisi na okasi fu pruberi fu tiri densrefi na someni difrenti fasi. Libisma go na fesi pikinso na a sei fu sabidensi èn na ini tra sani tu, ma toku kruktudu, pôtifasi, ogridu, nanga feti kon moro furu. Now a de krin fu si taki libisma no man tiri densrefi.

16 Leki a di fu tu sani, Yehovah no yepi Satan fu tiri a grontapu disi. Ma efu Gado ben sorgu taki nowan ogri-ati sani no pasa, dan a ben o gersi leki den wan di opo densrefi teige en abi leti, a no so? A ben o meki sma denki taki libisma man tiri densrefi sondro takru bakapisi. Efu Yehovah ben handri na a fasi dati, dan a ben o horibaka gi wan lei. Ma "Gado no man lei kwetikweti”.—Hebrewsma 6:18.

Gado sa yepi yu fu horidoro te pina miti yu

Wan uma di e kisi trowstu fu Gado Wortu

17 Ma fa a de nanga ala den takru bakapisi di kon fu den ogri sani di sma du na ini a heri pisi ten di den opo densrefi teige Gado? Wi musu memre taki Yehovah abi ala makti. Fu dati ede, a kan puru den takru bakapisi fu a pina di libisma e pina, èn a sa du dati tu. Soleki fa wi leri kaba, dan libisma no sa pori grontapu moro, te a kenki kon tron wan Paradijs. Regtfardiki sma di e bribi na ini a frulusu-ofrandi fu Yesus, no sa kisi fu du nanga den takru bakapisi fu sondu moro, èn den takru bakapisi fu dede no sa de moro fu di sma sa kisi wan opobaka. Na so fasi Gado sa gebroiki Yesus "fu tyari wan kaba kon na den wroko fu Didibri” (1 Yohanes 3:8). Yehovah sa du ala den sani disi na a yoisti ten. Wi musu breiti taki a no handri moro fruku, bika na fu di a abi pasensi, meki wi kisi na okasi fu kon sabi a waarheid èn fu dini en (2 Petrus 3:9, 10). Na a srefi ten, Gado tan suku opregti sma di wani anbegi en, èn a e yepi den fu horidoro ondro iniwan tesi di den kan kisi na ini a bruya grontapu disi.—Yohanes 4:23; 1 Korentesma 10:13.

18 Ma kande son sma e aksi densrefi: ’A de so taki sma no ben o abi fu pina efu Gado ben meki Adam nanga Eva na so wan fasi taki den no ben man opo densrefi teige en? Fosi yu gi piki tapu na aksi dati, dan yu musu memre taki Yehovah gi yu wan warti presenti.

FA YU SA GEBROIKI A PRESENTI DI GADO GI YU?

19 Soleki fa wi si na ini kapitel 5, dan Gado meki libisma nanga wan fri wani. Yu e frustan o warti a presenti disi de? Gado meki bun furu meti, èn furu sani den e du fu di na so Gado meki den (Odo 30:24). Libisma meki wan tu masyin (robot) di kan du iniwan sani di yu komanderi den fu du. Wi ben o breiti efu Gado ben meki wi neleki den masyin dati? Nôno, wi breiti taki wi de fri fu bosroiti sortu sma wi wani tron, fa wi wani libi, suma wi wani teki leki mati, èn so moro fara. Wi breiti te wi de fri, èn dati na soifri san Gado wani.

20 Yehovah no wani taki sma dini en fu di trawan e dwengi den (2 Korentesma 9:7). Leki eksempre: San ben o gi wan papa, noso wan mama moro prisiri? Na te wan pikin e taigi en "mi lobi yu” fu di trawan taigi en fu taki dati, noso te a pikin e taki "mi lobi yu” nanga en heri ati, fu di ensrefi wani? Sobun, na aksi de now: Fa yu sa gebroiki a fri wani di Yehovah gi yu? Satan, Adam, nanga Eva gebroiki a fri wani fu den na a moro ogri fasi. Den drai baka gi Yehovah Gado. San yu o du?

21 Yu abi na okasi fu gebroiki a tumusi moi presenti disi na a moro bun fasi fa wan sma kan gebroiki en. Yu kan teki a sei fu Yehovah makandra nanga den milyunmilyun sma di du dati kaba. Den e prisiri na ati fu Gado fu di den e sori nanga a fasi fa den e handri, taki Satan na wan leiman èn wan takru tiriman di no man du san a taki (Odo 27:11). Yu kan prisiri na ati fu Yehovah sosrefi te yu e tyari yusrefi na a yoisti fasi. Na ini a kapitel di e kon wi sa luku fa yu kan du dati.

SAN BIJBEL E LERI WI

  • A no Gado e meki taki ogri e pasa na grontapu.—Yob 34:10.
  • Satan tyalensi a reti di Yehovah abi fu tiri, fu di a kari Gado wan leiman èn fu di a taki dati Gado e hori bun sani na baka gi den wan di de na En ondro.—Genesis 3:2-5.
  • Yehovah sa gebroiki en Manpikin, a Tiriman fu a Mesias Kownukondre, fu tyari wan kaba kon na a pina di libisma e pina èn na den takru bakapisi di kon fu dati.—1 Yohanes 3:8.

Den aksi fu a studie

1, 2. Na sortu fasi sma e pina na ini a ten disi, èn sortu aksi furu sma e poti fu dati ede?

3, 4. (a) San e sori wi taki a no fowtu fu aksi fu san ede Gado e gi pasi taki libisma e pina? (b) Fa Yehovah e prakseri fu ogridu nanga a pina di sma e pina?

5. San sma e taki son leisi fu fruklari fu san ede libisma e pina, ma san Bijbel e leri wi?

6. Fu san ede furu sma e meki a fowtu fu taki dati na Gado e meki taki libisma na grontapu e pina?

7, 8. (a) Fa sma na grontapu e sori den srefi fasi fu a sma di e tiri den? (b) Fa a sondu di sma abi e meki taki den e pina? Fa "ten nanga sani di e pasa sondro fu sma fruwakti dati”, e meki sma pina tu?

9. Fu san ede wi kan de seiker taki Yehovah abi wan bun reide fu san ede a gi pasi taki libisma e pina ete?

10. Sortu sani Satan ben tyalensi, èn fa a du dati?

11. Fu san ede Yehovah no kiri den wan di ben opo densrefi teige en na ini Eden?

12, 13. Gi wan agersitori di e sori fu san ede Yehovah gi pasi taki Satan tron a tiriman fu a grontapu disi èn fu san ede Gado gi pasi taki libisma e tiri densrefi.

14. Sortu wini wi sa kisi fu di Yehovah bosroiti fu gi pasi taki libisma tiri densrefi?

15, 16. (a) Fu san ede Yehovah gi pasi taki sma pina so langa? (b) Fu san ede Yehovah no tapu sma fu du tumusi ogri-ati sani?

17, 18. San Yehovah sa du fu puru den takru bakapisi di kon fu di libisma e tiri densrefi ondro a makti fu Satan?

19. Sortu warti presenti Yehovah gi wi, èn fu san ede wi musu warderi a presenti dati?

20, 21. San na a moro bun fasi fa wi kan gebroiki a fri wani di wi kisi leki presenti, èn fu san ede wi musu wani du dati?