Go na content

Go na a tra menu

Go na table of contents

Yehovah Kotoigi

Sranantongo

San Bijbel e leri wi trutru?

KAPITEL TINAFO

Fa yu kan sorgu taki yu abi wan koloku osofamiri-libi

Fa yu kan sorgu taki yu abi wan koloku osofamiri-libi

San wan man musu du fu de wan bun masra?

Fa wan uma kan de wan bun wefi?

San a wani taki fu de wan bun papa, noso wan bun mama?

San pikin kan du fu meki na osofamiri de koloku?

YEHOVAH GADO wani taki yu musu abi wan koloku osofamiri-libi. En Wortu, Bijbel, e sori fa Gado wani taki ibri memre fu na osofamiri musu tyari ensrefi. Te memre fu na osofamiri e tyari a frantwortu fu den soleki fa Gado wani, dan den sa kisi bigi prisiri. Yesus ben taki: "Koloku fu den sma di e yere a wortu fu Gado èn di e du san a wortu e taki!”—Lukas 11:28.

2 Efu wi wani wan koloku osofamiri-libi, dan a de tumusi prenspari taki wi e si Yehovah leki a sma di seti na osofamiri-libi. En na a sma di Yesus ben kari "Wi Tata” (Mateyus 6:9). Ibri osofamiri na grontapu kon de fu di wi hemel Tata ben wani dati, èn a no de fu taki dati a sabi heri bun san de fanowdu fu meki osofamiri de koloku (Efeisesma 3:14, 15). Sobun, san Bijbel e leri wi fu a frantwortu di ibri memre fu na osofamiri abi?

NA OSOFAMIRI-LIBI NA WAN SETI FU GADO

3 Yehovah ben meki den fosi libisma, Adam nanga Eva, èn a tyari den kon na wán leki masra nanga wefi. A poti den fu libi na ini wan tumusi moi tanpresi, iya, wan paradijs na grontapu, namku a dyari fu Eden, èn a taigi den fu meki pikin. "Un meki pikin èn un kon furu èn un furu grontapu”, na so Yehovah ben taki (Genesis 1:26-28; 2:18, 21-24). Disi a no wan anansitori, fu di Yesus ben sori taki den sani di Genesis e taki fu a bigin fu na osofamiri-libi, na tru tori (Mateyus 19:4, 5). A tru taki wi e kisi fu du nanga furu problema èn taki a libi na ini a ten disi no de soleki fa Gado ben wani taki a musu de, ma toku wi kan abi wan koloku osofamiri-libi. Meki wi go luku fu san ede dati kan.

4 Ibri memre fu na osofamiri kan yepi fu meki na osofamiri de koloku, te den e sori lobi neleki fa Gado du dati (Efeisesma 5:1, 2). Ma efu wi no man si Gado, dan fa wi kan waka baka na eksempre fu en dan? Wi kan kon sabi fa Yehovah e handri bika a ben seni en fosi gebore Manpikin kon na grontapu (Yohanes 1:14, 18). Di a Manpikin disi, Yesus Krestes, ben de na grontapu, a ben e waka baka na eksempre fu en hemel Tata na so wan bun fasi, taki te sma ben e si èn e arki Yesus, dan a ben de neleki Yehovah ben de leti drape e taki nanga den (Yohanes 14:9). Sobun, te wi e ondrosuku a fasi fa Yesus ben sori lobi èn te wi e teki na eksempre fu en, dan ibriwan fu wi kan meki taki wi kon abi wan moro koloku osofamiri-libi.

WAN EKSEMPRE GI DEN MASRA

5 Bijbel e taki dati den masra musu handri nanga den wefi fu den na a srefi fasi fa Yesus e handri nanga den disipel fu en. Luku san Bijbel e gi leki rai: "Un masra, tan lobi un wefi, neleki fa Krestes lobi a gemeente èn neleki fa a ben gi ensrefi gi a gemeente…Na a srefi fasi den masra musu lobi den wefi leki den eigi skin. A man di lobi en wefi, lobi ensrefi tu, bika nowan man abi bita-ati gi en eigi skin; ma a e sorgu a skin èn a e luku en bun, neleki fa Krestes e du nanga a gemeente.”Efeisesma 5:23, 25-29.

6 A lobi di Yesus abi gi a gemeente fu den disipel fu en, na wan volmaakti eksempre gi masra. Yesus "ben lobi den te na a kaba”, iya, a gi en libi leki wan srakti-ofrandi gi den, aladi den no ben de volmaakti (Yohanes 13:1; 15:13). Masra e kisi a deki-ati fu du a srefi sani: "Tan lobi un wefi èn no abi bita-ati gi den” (Kolosesma 3:19). San o yepi wan masra fu fiti a rai disi, spesrutu te a wefi fu en no e handri nanga koni son leisi? A masra musu memre taki ensrefi e meki fowtu tu èn a musu hori na prakseri san ensrefi musu du fu man kisi pardon fu Gado. San na dati? A musu gi pardon na den sma di e sondu teige en, èn dati wani taki dati a musu gi en wefi pardon tu. A no de fu taki dati en wefi musu du a srefi sani (Mateyus 6:12, 14, 15). Yu e frustan now fu san ede son sma e taki dati te tu sma wani abi wan bun trowlibi, den musu de klariklari fu gi makandra pardon?

7 Den masra musu sabi tu taki Yesus ben e hori den disipel fu en na prakseri ala ten. A ben hori na prakseri san den no man du èn san den abi fanowdu na skin fasi. Fu eksempre, di den ben weri, Yesus ben taigi den: "Kon, meki wi wawan go na wan tiri presi fu kan rostu pikinso” (Markus 6:30-32). Na a srefi fasi den masra musu hori den wefi na prakseri tu. Bijbel e taki dati den wefi de leki "wan moro swaki prapi”, èn den masra e kisi a komando fu gi den "grani”. Fu san ede? Fu di den ala tu, a masra nanga a wefi, kisi ’libi fu Gado aladi den no frudini dati’ (1 Petrus 3:7). Den masra musu hori na prakseri taki, gi Gado a no abi trobi efu wan sma na wan mansma, noso wan umasma; solanga a sma de getrow, a de warti gi Gado.—Psalm 101:6.

8 Bijbel e taki dati wan masra "di lobi en wefi, lobi ensrefi tu”. Dati de so fu di wan man nanga en wefi "no de tu skin moro, ma wán skin”, soleki fa Yesus ben sori (Mateyus 19:6). Sobun, den no kan abi seks demakandra nanga nowan tra sma, boiti a patna fu den (Odo 5:15-21; Hebrewsma 13:4). Den o man du disi efu den e suku fu gi a patna fu den san a abi fanowdu, na presi taki den e suku fu kisi nomo san densrefi wani (1 Korentesma 7:3-5). A prenspari fu no frigiti a rai disi: "Nowan man abi bita-ati gi en eigi skin; ma a e sorgu a skin èn a e luku en bun.” Den masra musu lobi den wefi neleki fa den lobi densrefi, bika den musu memre taki den abi fu gi frantwortu na den eigi edeman, Yesus Krestes.—Efeisesma 5:29; 1 Korentesma 11:3.

9 Na apostel Paulus ben taki fu a ’trutru lobi di Krestes Yesus abi gi unu’ (Filipisma 1:8). A safu-ati di Yesus ben sori ben e meki sma firi bun, èn dati ben hari umasma di ben tron disipel fu en (Yohanes 20:1, 11-13, 16). Èn wefi wani trutru taki den masra sori dipi firi gi den.

WAN EKSEMPRE GI DEN WEFI

10 Na osofamiri de neleki wan organisâsi, èn efu wi wani taki sani waka bun, dan na osofamiri abi wan edeman fanowdu. Srefi Yesus e saka ensrefi ondro a Sma di de na Edeman fu en. "Gado na a ede fu Krestes” soleki fa "a man na a ede fu na uma” (1 Korentesma 11:3). A fasi fa Yesus e saka ensrefi ondro Gado leki en Edeman, na wan moi eksempre gi wi fu di wi alamala musu saka wisrefi ondro wan edeman.

11 Mansma e meki fowtu fu di den no de volmaakti èn furu tron den no de a tumusi bun edeman di den musu de. Sobun, san wan wefi musu du? A no musu si den sani di en masra e du, leki soso sani, èn a no musu pruberi fu teki a frantwortu abra di en masra abi leki edeman. Wan wefi no musu frigiti taki wan sma di tiri èn di abi safri fasi, warti trutru gi Gado (1 Petrus 3:4). Te a e sori den fasi disi, dan a sa de moro makriki gi en fu saka ensrefi soleki fa Gado wani dati, srefi na ini muilek situwâsi. Bijbel e taki moro fara: "A wefi musu abi dipi lespeki gi en masra” (Efeisesma 5:33). Ma fa a de te a masra no e teki Krestes leki en Edeman? Bijbel e gi wefi a deki-ati disi: "Un musu saka unsrefi tu na ondro un eigi masra, so taki te sonwan fu den no e du san a wortu e taki, dan unu kan wini den sondro wortu nanga yepi fu a fasi fa unu e tyari unsrefi, bika den si nanga den eigi ai fa unu e tyari unsrefi na wan krin fasi èn nanga bigi lespeki.”1 Petrus 3:1, 2.

Sortu moi eksempre Sara ben gi wefi?

Sara e taki nanga Abraham

12 Awansi wan masra de na bribi, noso a no de na bribi, te wan wefi e fruteri en masra na wan koni fasi taki en e denki tra fasi fu wan tori, dan dati no wani taki dati a wefi no abi lespeki. Kande a wefi abi leti, èn a heri osofamiri kan kisi wini efu a masra arki en. Sara, a wefi fu Abraham, ben sori en masra wan bun fasi fa a ben kan lusu wan problema di ben de na ini na osofamiri fu den. Aladi Abraham no ben agri nanga Sara, toku Gado ben taigi Abraham: "Arki a sten fu en” (Genesis 21:9-12). A no de fu taki, dati te wan masra teki wan bosroiti di no de kontrari a wet fu Gado, dan a wefi sa sori sakafasi fu di a e horibaka gi a bosroiti di en masra teki.—Tori fu den Apostel 5:29; Efeisesma 5:24.

13 Wan wefi abi a frantwortu fu sorgu tu gi na osofamiri èn a kan du dati na furu difrenti fasi. Fu eksempre, Bijbel e gi umasma di trow a rai "fu lobi den masra, fu lobi den pikin fu den, fu de nanga krin frustan, fu libi wan krin libi, fu wroko bun na oso, fu de bun sma èn fu saka densrefi na ondro den eigi masra” (Titus 2:4, 5). Efu wan uma di abi wan masra nanga pikin, e tyari ensrefi na a fasi dati, dan na osofamiri fu en sa tan lobi en èn den sa lespeki en ala ten (Odo 31:10, 28). Ma fu di a man nanga na uma di e trow nanga makandra na tu sondu sma, meki son leisi bigi problema kan opo kon di e meki taki wan trowpaar e prati, noso taki den e broko trow. Na ini son situwâsi Bijbel e gi pasi taki trowpaar e prati. Ma a de wan seryusu sani te sma e prati, fu di Bijbel e gi a rai: "Wan wefi no musu gowe libi en masra;…èn wan masra no musu gowe libi en wefi” (1 Korentesma 7:10, 11). Èn soso te wan fu den trowpatna du hurudu, Bijbel e gi pasi taki den kan broko trow.—Mateyus 19:9.

WAN VOLMAAKTI EKSEMPRE GI PAPA NANGA MAMA

14 A fasi fa Yesus ben e handri nanga pikin-nengre, na wan volmaakti eksempre gi papa nanga mama. Di sma ben pruberi fu tapu den pikin fu go na Yesus, dan a taki: "Meki den pikin-nengre kon na mi; no pruberi fu tapu den fu kon na mi.” Bijbel e taki moro fara taki Yesus "brasa den pikin-nengre hori, a blesi den, èn a poti en anu na den tapu” (Markus 10:13-16). Efu Yesus ben e meki ten gi pikinwan, dan yu musu du a srefi sani gi yu eigi manpikin nanga umapikin, a no so? Yu no musu meki pikinso ten nomo gi den, ma yu musu meki furu ten gi den. Yu musu teki ten fu gi den leri, fu di dati na san Yehovah wani taki papa nanga mama musu du.—Deuteronomium 6:4-9.

San papa nanga mama kan leri fu a fasi fa Yesus ben e handri nanga pikin?

1. Yesus e taki nanga wan tu pikin; 2. Wan papa e taki nanga en manpikin

15 Fu di a grontapu disi e kon ogri moro nanga moro, meki pikin abi papa nanga mama fanowdu di e kibri den gi sma di wani du den ogri, soleki sma di e suku ala sortu fasi fu kori pikin-nengre fu abi seks nanga den. Luku san Yesus ben du fu kibri den disipel fu en di a ben kari "mi pikin” na wan lobi-ati fasi. Di den grabu Yesus syatu bifo den kiri en, dan a sorgu taki den disipel fu en ben kan lowe (Yohanes 13:33; 18:7-9). Leki papa, noso mama, yu musu luku bun taki Didibri no kisi na okasi fu du ogri nanga den pikinwan fu yu. Yu musu warskow den na fesi (1 Petrus 5:8).* A ten disi ogri moro leki iniwan ten na fesi; ogri kan miti den na skin sei èn na yeye sei, èn den kan lasi den bun gwenti fu den.

16 A neti bifo Yesus dede, den disipel fu en ben e haritaki suma ben de a moro prenspariwan na den mindri. Na presi taki Yesus atibron na den tapu, a yepi den na wan lobi-ati fasi fu di a tan gi den leri èn a tan gi den wan bun eksempre (Lukas 22:24-27; Yohanes 13:3-8). Yu e si fa yu leki wan papa noso wan mama, kan gi den pikin fu yu piri-ai neleki fa Yesus ben gi den disipel fu en piri-ai? A tru taki den musu kisi trangaleri, ma yu musu du dati "na a yoisti fasi”, èn noiti yu musu du dati nanga atibron. Yu no sa wani taki sani sondro fu denki fosi, bika dati sa de neleki yu e "dyuku sma nanga wan feti-owru” (Yeremia 30:11; Odo 12:18). Yu musu gi a pikin fu yu trangaleri na so wan fasi, taki a e kon frustan bakaten taki a ben fiti fu kisi trangaleri.—Efeisesma 6:4; Hebrewsma 12:9-11.

WAN EKSEMPRE GI DEN PIKIN

17 Yu denki taki pikin kan leri wan sani fu Yesus? Iya, den kan leri fu en! Na eksempre fu Yesus e sori pikin fa den musu gi yesi na a papa nanga mama fu den. Yesus ben taki: "Mi e taki den sani disi soleki fa a Tata leri mi.” A ben taki moro fara: "Ala ten mi e du san e plisi en” (Yohanes 8:28, 29). Yesus ben gi yesi na en hemel Tata, èn Bijbel e taki dati pikin musu gi yesi na a papa nanga mama fu den (Efeisesma 6:1-3). Aladi Yesus ben de wan volmaakti pikin, toku a ben e gi yesi na en papa nanga en mama, Yosef nanga Maria, di ben de sondu libisma. A no de fu taki dati disi ben meki taki ibri memre fu na osofamiri fu Yesus ben de koloku!—Lukas 2:4, 5, 51, 52.

18 San pikin kan du fu kon de leki Yesus moro nanga moro, so taki a papa nanga mama fu den kan de koloku? A tru taki a no ala ten a makriki gi yonguwan fu gi yesi na a papa nanga mama fu den, ma dati na san Gado wani taki den musu du (Odo 1:8; 6:20). Ala ten Yesus gi yesi na en hemel Tata, srefi na ini muilek situwâsi. Wan leisi, di Gado ben wani taki Yesus musu du wan tumusi muilek sani, dan Yesus taki: "Puru a kan disi [dati na a sani di Gado ben aksi en fu du] na mi fesi.” Ma toku Yesus ben du san Gado ben aksi, fu di a ben frustan taki en Tata sabi san na a moro bun sani fu du (Lukas 22:42). Efu pikin e leri fu gi yesi, dan den sa prisiri na ati fu a papa nanga a mama fu den, èn sosrefi fu a hemel Tata fu den.#Odo 23:22-25.

San yonguwan musu hori na prakseri te den e kisi tesi?

Wan boi e weigri fu du san den pikin na ini en klas wani

19 Didibri ben tesi Yesus, èn wi kan de seiker taki a sa wani tesi yonguwan fu du sani di no bun (Mateyus 4:1-10). Satan Didibri kan meki taki speri e suku fu kori den fu du ogri, èn a no makriki fu kakafutu gi dati. Dati meki a de tumusi prenspari taki pikin no abi demakandra nanga sma di e du sani di no bun! (1 Korentesma 15:33) Dina, na umapikin fu Yakob, ben abi demakandra nanga sma di no ben e dini Yehovah, èn disi ben tyari furu problema kon (Genesis 34:1, 2). Prakseri fa na osofamiri ben o sari efu wan fu den memre ben o du hurudu!—Odo 17:21, 25.

A MORO PRENSPARI SANI DI E TYARI KOLOKU KON NA INI NA OSOFAMIRI

20 Te sma e fiti den rai di Bijbel e gi, dan a moro makriki fu sabi fa fu handri te problema kon na ini na osofamiri. Fu taki en leti, a moro prenspari sani di e tyari koloku kon na ini na osofamiri, na te sma e du san Bijbel e taki. Sobun, masra, lobi un wefi èn handri nanga en neleki fa Yesus e handri nanga a gemeente fu en. Wefi, saka unsrefi ondro un masra fu di en na a edeman, èn waka baka na eksempre fu a koni wefi fu san Odo 31:10-31 e taki. Papa nanga mama, gi den pikin fu unu leri (Odo 22:6). Papa, ’tiri un osofamiri na wan bun fasi’ (1 Timoteyus 3:4, 5; 5:8). Èn pikin, gi yesi na un papa nanga un mama (Kolosesma 3:20). Nowan sma na ini na osofamiri de volmaakti, bika ala sma e meki fowtu. Sobun, un musu abi sakafasi èn un musu aksi makandra pardon.

21 Fu tru, Bijbel abi bun furu warti rai di abi fu du nanga na osofamiri-libi. Boiti dati, a e leri wi fu a nyun grontapu fu Gado, èn fu a paradijs grontapu di sa furu nanga koloku sma di e anbegi Yehovah (Openbaring 21:3, 4). Disi na trutru wan moi howpu gi a ten di de na wi fesi! Srefi na ini a ten disi, wi kan abi wan koloku osofamiri-libi efu wi du san Gado e taki na ini en Wortu, Bijbel.

SAN BIJBEL E LERI WI

  • Masra musu lobi den wefi fu den leki den eigi skin.—Efeisesma 5:25-29.
  • Wefi musu lobi na osofamiri fu den èn den musu abi lespeki gi a masra fu den.—Titus 2:4, 5.
  • Papa nanga mama musu lobi den pikin fu den, den musu gi den leri, èn den musu kibri den pikin fu den gi sani di kan du den ogri.—Deuteronomium 6:4-9.
  • Pikin musu gi yesi na den papa nanga mama.—Efeisesma 6:1-3.

*  A buku Teki leri fu a Bigi Leriman, kapitel 32, e sori san yu kan du fu sorgu taki ogri no miti den pikin fu yu. Yehovah Kotoigi tyari a buku disi kon na doro.

#  Soso te wan papa noso wan mama ben o aksi en pikin fu pasa a wet fu Gado, dan a no ben o de wan fowtu sani efu a pikin no gi yesi na den.—Tori fu den Apostel 5:29.


Den aksi fu a studie

1. San na a moro prenspari sani di sa meki taki yu abi wan koloku osofamiri-libi?

2. San de tumusi prenspari efu wi wani abi wan koloku osofamiri-libi?

3. San Bijbel e taki fu a fasi fa na osofamiri-libi bigin, èn fu san ede wi sabi taki den sani di skrifi na ini Bijbel na tru tori?

4. (a) San ibri memre fu na osofamiri kan du fu meki taki den abi wan koloku osofamiri-libi? (b) Fu san ede a de prenspari fu ondrosuku a libi fu Yesus, efu wi wani abi wan koloku osofamiri?

5, 6. (a) Sortu eksempre den masra kan teki na a fasi fa Yesus e handri nanga a gemeente? (b) San wan sma musu du fu kisi pardon fu sondu?

7. San Yesus ben hori na prakseri, èn fa dati de wan eksempre gi den masra?

8. (a) San a wani taki dati wan masra "di lobi en wefi, lobi ensrefi tu”? (b) San a wani taki gi wan man nanga en wefi te Bijbel e taki dati den de "wán skin”?

9. Filipisma 1:8 e taki fu wan spesrutu fasi di Yesus abi. Sortu fasi na dati? Fu san ede den masra musu sori a srefi fasi disi gi a wefi fu den?

10. Fa Yesus de wan eksempre gi wefi?

11. Fa wan wefi musu si en masra èn fa dati musu meki a tyari ensrefi? San kan de a bakapisi fu a fasi fa a e tyari ensrefi?

12. Fu san ede a no fowtu te wan wefi e sori na wan lespeki fasi fa a e denki fu wan tori?

13. (a) Sortu deki-ati Titus 2:4, 5 e gi umasma di trow? (b) San Bijbel e taki fu a prati di sma e prati, èn fu brokotrow?

14. Fa Yesus ben e handri nanga pikin-nengre, èn san pikin abi fanowdu fu den papa nanga mama?

15. San papa nanga mama kan du fu sorgu taki ogri no miti den pikin fu den?

16. San papa nanga mama kan leri fu a fasi fa Yesus ben e handri di den disipel fu en ben meki fowtu?

17. Na sortu fasi Yesus de wan volmaakti eksempre gi pikin?

18. Fu san ede Yesus ben gi yesi na en hemel Tata ala ten, èn suma e prisiri te pikin e gi yesi na a papa nanga a mama fu den na ini a ten disi?

19. (a) Fa Satan e tesi pikin? (b) Fa papa nanga mama kan firi efu den pikin e tyari densrefi na wan fasi di no fiti?

20. San ibri memre fu na osofamiri musu du fu man abi wan koloku osofamiri-libi?

21. Sortu tumusi moi howpu wi abi gi a ten di de na wi fesi, èn fa wi kan abi wan koloku osofamiri-libi nownow kaba?