Go na content

Go na a tra menu

Go na table of contents

Yehovah Kotoigi

Sranantongo

San Bijbel e leri wi trutru?

KAPITEL TU

Bijbel—Wan buku di Gado gi wi

Bijbel—Wan buku di Gado gi wi

Na sortu fasi Bijbel e difrenti fu iniwan tra buku?

Fa Bijbel kan yepi yu fu kakafutu gi den problema fu yu?

Fu san ede yu kan frutrow tapu den profeititori di skrifi na ini Bijbel?

YU KAN memre wan dei di yu ben kisi wan moi kado fu wan mati di yu lobi? A kan taki di yu kisi a kado dati yu ben e firi bun èn yu ben e prisiri srefisrefi. Te yu luku en bun, dan wan kado e sori yu taki a sma di gi yu en e warderi a matifasi di a abi nanga yu. A no de fu taki dati yu sori a mati taki yu breiti dati a prakseri yu èn taki yu e warderi a kado fu en.

2 Bijbel na wan kado noso wan presenti fu Gado, wan presenti di wi musu warderi trutru. Na aparti buku disi e tyari sani kon na krin di wi no ben o man kon sabi na wan tra fasi. Fu eksempre, a e fruteri wi fu den sani di Gado meki, soleki den stari na hemel, a grontapu, èn a fosi man nanga uma. Bijbel abi markitiki na ini di wi kan frutrow èn di kan yepi wi fu kakafutu gi den problema nanga den broko-ede fu a libi. A e fruteri wi fa den prakseri fu Gado sa kon tru èn fa a o sorgu taki a situwâsi na grontapu kon moro bun. Fu tru, Bijbel na wan tumusi moi kado!

3 Bijbel na wan presenti di e naki wi ati sosrefi, bika a e fruteri wi wan sani fu a Sma di gi wi en, namku Yehovah Gado. A gi di Yehovah gi wi so wan buku, e buweisi dati a wani taki wi kon sabi en bun. Fu tru, Bijbel kan yepi yu fu kon krosibei na Yehovah.

4 Kande yusrefi abi wan Bijbel neleki fa someni tra sma abi wan Bijbel tu. A heri Bijbel, noso pisi fu Bijbel, tyari kon na doro na ini moro leki 2300 tongo, èn fu dati ede moro leki 9 fu ibri 10 sma na grontapu kan abi den eigi Bijbel. Te yu luku en bun, dan moro leki wán milyun Bijbel e prati gi sma ibri wiki! Milyardmilyard Bijbel, noso pisi fu Bijbel tyari kon na doro kaba. Iya, a de krin taki nowan tra buku de leki Bijbel.

A Nyun-Grontapuvertaling fu den Santa Buku fu Bijbel de fu feni na ini furu tongo

A Nyun-Grontapuvertaling na ini furu tongo

5 Wan tra sani na taki "Gado srefi ben meki sma skrifi” Bijbel (2 Timoteyus 3:16). Fa a du dati? Bijbel srefi e gi piki: "Libisma ben taki san ben komoto fu Gado, fu di a santa yeye ben e tiri den” (2 Petrus 1:21). Leki eksempre: Wan bisnisman kan meki wan sekretarsi skrifi wan brifi gi en. Den sani di a sekretarsi o skrifi na ini a brifi dati, na san a bisnisman taigi en fu skrifi. Dati meki a brifi no de fu a sekretarsi, ma fu a bisnisman. Na a srefi fasi, wi kan taki dati den Bijbel skrifiman no ben skrifi san densrefi ben wani, ma taki den skrifi a boskopu fu Gado. Sobun, a heri Bijbel na trutru "a wortu fu Gado”.—1 Tesalonikasma 2:13.

ALA DEN PISI FU BIJBEL E KRUDERI NANGA MAKANDRA ÈN DEN DE SOIFRI

6 A ben teki sowan 1600 yari fu skrifi Bijbel. Den sma di skrifi en ben e libi na ini difrenti pisi ten èn sonwan fu den ben gudu aladi trawan ben pôti. Sonwan fu den ben de gronman, fisiman, nanga skapuman. Trawan ben de profeiti, krutuman, nanga kownu. Na Evangelie skrifiman Lukas ben de wan datra. Aladi a libi fu den Bijbel skrifiman ben e difrenti so, toku ala den pisi fu Bijbel, a fosi buku te go miti a lasti buku, e kruderi nanga makandra.*

7 A fosi buku fu Bijbel e fruteri wi fa den problema fu a libisma famiri bigin. A lasti buku e sori taki a heri grontapu sa tron wan paradijs, noso wan moi dyari. Ala nanga ala Bijbel e taki fu wan pisi ten fu dusundusun yari, èn ibri pisi fu Bijbel e yepi wi fu kon frustan san Gado abi na prakseri èn fa den prakseri fu en sa kon tru. A de wan kefalek moi sani taki ibri pisi fu Bijbel e kruderi nanga makandra, ma dati na soifri san wi ben o fruwakti fu wan buku di komoto fu Gado, a no so?

8 Ala den sani di skrifi na ini Bijbel e kruderi nanga san sabiman ondrosuku. Na ini Bijbel yu kan leisi srefi fu sani di sma na ini a ten dati no ben kan sabi kwetikweti. Fu eksempre, a Bijbel buku Lefitikus ben abi wan tu wet na ini di ben e sori den Israelsma taki den ben musu meki den sikisma tan dorosei fu a kampu èn taki den ben musu hori ala sani krin; den nâsi lontu den no ben sabi noti fu den sortu sani disi. Na ini wan ten pe sma ben abi fowtu denki fu a fasi fa grontapu tan, Bijbel ben taki kaba dati grontapu lontu (Yesaya 40:22). Na wan soifri fasi Bijbel ben e taki dati grontapu ’e anga na noti’ (Yob 26:7). A no de fu taki dati Bijbel a no wan buku di e taki fu sabidensi. Ma te Bijbel e taki fu sani di abi fu du nanga sabidensi, dan a de soifri. Dati na soifri san wi ben o fruwakti fu wan buku di komoto fu Gado, a no tru?

9 Den tori di skrifi na ini Bijbel e kruderi tu nanga sani di pasa trutru na ini a historia èn wi kan frutrow na den tapu. Te a e taki fu wan sani, dan a e taki fu en finifini. Den tori di skrifi no e kari a nen fu son sma nomo, ma den e kari a famirilin fu den sma dati tu.# Den man di skrifi Bijbel no ben de leki den grontapu historia skrifiman, di abi a gwenti fu no taki fu den feti di a kondre fu den lasi, ma den Bijbel skrifiman taki krin fa sani waka trutru, èn den skrifi srefi fu den eigi fowtu èn fu den fowtu fu a kondre fu den. Na ini a Bijbel buku Numeri, fu eksempre, a skrifiman Moses ben taki krin fu a seryusu fowtu di a ben meki, èn taki a ben kisi hebi strafu fu dati ede (Numeri 20:2-12). Furu tron tra historia buku no e taki krin fa sani waka, ma Bijbel e taki krin fa sani waka fu di a de wan buku fu Gado.

WAN BUKU DI E GI SMA KONI RAI

10 Fu di Gado meki sma skrifi Bijbel, meki a "bun fu gi leri, fu frumane sma, fu poti sani kon reti” (2 Timoteyus 3:16). Iya, Bijbel na wan buku di e gi bun rai. A e sori krin fa libisma de trutru. Dati no e fruwondru wi, fu di a Skrifiman fu Bijbel, Yehovah Gado, na a Mekiman! A e frustan den prakseri nanga den firi fu wi, moro leki wi srefi. Boiti dati, Yehovah sabi san wi abi fanowdu fu kan de koloku. A sabi tu nanga sortu sani wi musu luku bun.

11 Luku den sani di Yesus ben taki di a ben hori a Bergitaki fu en, di skrifi na ini Mateyus kapitel 5 te go miti 7. Drape Yesus ben gi leri na wan tumusi moi fasi èn a ben taki fu difrenti sani, soleki a fasi fa wi kan feni trutru koloku, fa fu lusu trobi, fa fu begi, èn fa fu si gudu na a yoisti fasi. Na a ten di Yesus ben taki den wortu disi, den ben abi furu krakti tapu sma èn den ben bun srefisrefi. Na so a de tu na ini a ten disi.

12 Son Bijbel gronprakseri e taki fu na osofamiri libi, a fasi fa wi musu wroko, èn a banti di wi abi nanga trawan. Den Bijbel gronprakseri de gi ala sortu sma, èn a rai di skrifi na ini e tyari wini ala ten. Nanga yepi fu a profeiti Yesaya, Gado e taki syatu fu a koni di de fu feni na ini Bijbel: "Mi, Yehovah, na yu Gado, a Sma di e leri yu fu gi yusrefi wini.”—Yesaya 48:17.

WAN BUKU NANGA PROFEITITORI

13 Bijbel abi furu profeititori, èn furu fu den kon tru kaba. Luku wan eksempre. Nanga yepi fu a profeiti Yesaya, di ben e libi na ini a di fu aiti yarihondro b.G.T., Yehovah ben taki na fesi dati a foto Babilon ben o kisi pori (Yesaya 13:19; 14:22, 23). A ben taki finifini fa dati ben o pasa. Legre di ben e suku fu broko go na ini a foto ben o meki a watra na ini a liba fu Babilon saka, èn den ben o teki a foto abra sondro taki den ben o abi fu feti. Ma dati a no ala. A profeititori fu Yesaya ben kari a nen srefi fu a kownu di ben o teki Babilon abra, namku Sirus.—Yesaya 44:27-45:2.

A Bijbel skrifiman Yesaya ben taki na fesi dati a foto Babilon ben o fadon

Wan man di e ondrosuku fa a foto Babilon fadon

14 Sowan 200 yari baka dati, na a neti fu 5 go na 6 oktober 539 b.G.T., wan legre ben seti kampu krosibei fu Babilon. Suma ben de a komandanti? Sirus, a kownu fu Persia. A ten ben doro taki wan tumusi moi profeititori ben o kon tru. Ma a legre fu Sirus ben o man broko go na ini Babilon sondro taki den ben o abi fu feti, soleki fa a profeititori ben sori?

15 Den Babilonsma ben e hori wan fesa a neti dati èn den no ben e frede fu di den ben e bribi taki den bigi skotu fu a foto ben o man kibri den. Ma na a srefi ten, Sirus ben feni wan fasi fu tapu a watra fu a liba di ben e lon pasa na ini a foto, fu meki a watra lon go na wan tra sei. Heri esi a watra saka, so taki den srudati fu en ben man abra a liba fu doro na den skotu fu a foto. Ma fa a legre fu Sirus ben o pasa den skotu fu Babilon? Wi no sabi fu san ede, ma a neti dati den sma ben libi den doro fu a foto opo!

16 A profeititori ben taki fu Babilon: "Noiti sma sa libi na ini, èn a no sa tan tu fu geslakti go miti geslakti. Èn drape na Arabiri no sa opo en tenti, èn nowan skapuman sa meki den ipi fu en didon drape” (Yesaya 13:20). A profeititori disi no ben taki nomo dati a foto ben o fadon, ma a ben sori tu taki sma no ben o libi na ini Babilon noiti moro. Buweisi de di e sori taki den wortu disi kon tru. Sowan 80 kilometer na a zuidsei fu a foto Bagdad na ini Irak, yu kan si a presi pe Babilon fu owruten ben de fosi èn pe nowan sma e libi now. Disi e buweisi taki den sani di Yehovah ben taki nanga yepi fu Yesaya ben kon tru, namku: "Mi sa figi en puru nanga a sisibi di e pori sani.”—Yesaya 14:22, 23.%

San tan abra fu a foto Babilon

Sani di tan abra fu a foto Babilon

17 A e tranga wi bribi trutru fu si taki Bijbel na wan buku fu profeititori di wi kan frutrow, a no so? Bika, efu Yehovah ben meki taki ala den pramisi fu en kon tru na ini a ten di pasa, dan a no de fu taki dati a sa meki grontapu tron wan paradijs tu, soleki fa a pramisi wi (Numeri 23:19). Fu tru, wi abi "a howpu fu libi fu têgo soleki fa Gado, di no man lei, pramisi langa ten pasa kaba”.—Titus 1:2.^

"A WORTU FU GADO DE NA LIBI”

18 Den sani di wi luku na ini a kapitel disi, sori wi krin taki Bijbel na wan aparti buku trutru. Soleki fa wi si, dan ala den pisi fu Bijbel e kruderi nanga makandra, èn wi si tu taki den sani di skrifi na ini Bijbel e kruderi trutru nanga historia, èn nanga den sani di sabiman ondrosuku. Wi si sosrefi taki Bijbel abi koni rai, nanga profeititori di wi kan frutrow. Ma a no den sani disi wawan e meki taki Bijbel na wan tumusi warti buku. A Kresten apostel Paulus ben skrifi: "A wortu fu Gado de na libi, a abi krakti, èn a srapu moro wan feti-owru di e koti na tu sei; a e koti go so dipi taki a e prati sili nanga yeye srefi, èn a e prati bonyo nanga a bonyo-fatu fu makandra; a man si krin san na ati e denki èn san a abi na prakseri.”—Hebrewsma 4:12.

19 Te wi e leisi Gado "wortu”, noso a boskopu fu en di skrifi na ini Bijbel, dan dati kan kenki wi libi. A kan yepi wi fu ondrosuku wisrefi tra fasi èn moro bun. Kande wi e taki dati wi lobi Gado, ma a fasi fa wi o handri te wi kon sabi san en Wortu, Bijbel, e leri, sa sori san wi e denki trutru, èn san de na ini wi ati.

20 Fu tru, Bijbel na wan buku di Gado gi wi. A de wan buku di yu musu leisi, di yu musu studeri, èn di yu musu lobi. Sori warderi gi a presenti disi di wi kisi fu Gado, fu di yu e tan ondrosuku san skrifi na ini. Te yu e du dati, yu sa kon frustan moro krin san Gado abi na prakseri gi libisma. Na ini a kapitel di e kon now, wi sa si krin san Gado abi na prakseri gi libisma èn fa dati sa kon tru.

SAN BIJBEL E LERI WI

  • Na Gado meki sma skrifi Bijbel, èn fu dati ede a e taki sani soleki fa den de trutru èn wi kan frutrow na en tapu.—2 Timoteyus 3:16.
  • Den sani di skrifi na ini Gado Wortu na sani di wi kan gebroiki bun na ini wi aladei libi.—Yesaya 48:17.
  • Den pramisi fu Gado di wi kan leisi na ini Bijbel sa kon tru seiker.—Numeri 23:19.

*  Aladi son sma e taki dati wan tu pisi fu Bijbel no e kruderi nanga makandra, toku den no man buweisi dati. Luku kapitel 7 fu a buku De bijbel—Gods woord of dat van mensen?, di Yehovah Kotoigi tyari kon na doro.

#  Fu eksempre, luku fa Lukas 3:23-38 e taki finifini fu a famirilin fu Yesus.

%  Fu kon sabi moro fu den Bijbel profeititori, luku kapitel 14 fu a buku A Profeititori fu Yesaya—Leti gi a Heri Libisma Famiri, Pisi 1. Yehovah Kotoigi tyari a buku disi kon na doro.

^  Luku a pisi tori di nen "Tra prenspari sani”, pe yu kan leisi fu den someni profeititori di abi fu du nanga a Mesias, èn di kon tru na ini Yesus Krestes.


Den aksi fu a studie

1, 2. Na sortu fasi wi kan taki dati Bijbel na wan moi presenti fu Gado?

3. San a gi di Yehovah gi wi Bijbel e leri wi fu en, èn fu san ede disi e naki wi ati?

4. San e fruwondru yu te yu luku a fasi fa Bijbel prati?

5. Na sortu fasi "Gado srefi ben meki sma skrifi” Bijbel?

6, 7. Fu san ede a de wan aparti sani taki ala den difrenti pisi fu Bijbel e kruderi nanga makandra?

8. Gi wan tu eksempre di e sori taki den sani di skrifi na ini Bijbel e kruderi nanga sani di sabiman ondrosuku.

9. (a) Na sortu fasi Bijbel sori taki a de wan buku di e kruderi nanga a historia èn taki a de fu frutrow? (b) Den Bijbel skrifiman taki krin fa sani ben pasa. San disi e sori wi?

10. Fu san ede a no e fruwondru wi taki Bijbel na wan buku di e gi bun rai?

11, 12. (a) Fu sortu tori Yesus ben e taki na ini a Bergitaki fu en? (b) Fu sortu tra bun sani Bijbel e taki, èn fu san ede a rai di skrifi na ini Bijbel no de nomo gi sma di ben e libi na wan spesrutu ten?

13. Sortu finifini tori di ben abi fu du nanga a foto Babilon, Yehovah ben meki a profeiti Yesaya skrifi?

14, 15. Fa wan tu fu den finifini tori fu san Yesaya ben taki na ini en profeititori fu Babilon, ben kon tru?

16. (a) San ben o pasa nanga Babilon te fu kaba, soleki fa Yesaya ben taki na fesi? (b) Fa a profeititori fu Yesaya di ben taki dati Babilon ben o tron wan broko presi, ben kon tru?

17. Fa den Bijbel profeititori di kon tru e tranga wi bribi?

18. Sortu tumusi prenspari sani a Kresten apostel Paulus ben taki fu "a wortu fu Gado”?

19, 20. (a) Fa Bijbel kan yepi yu fu ondrosuku yusrefi? (b) Fa yu kan sori warderi gi na aparti kado di Gado gi wi, namku Bijbel?