Go na content

Go na a tra menu

Go na table of contents

Yehovah Kotoigi

Sranantongo

San Bijbel e leri wi trutru?

TRA PRENSPARI SANI

A Neti-nyanyan fu Masra—Wan fesa di e gi Gado glori

A Neti-nyanyan fu Masra—Wan fesa di e gi Gado glori

KRESTEN e kisi a komando fu hori a Memrefesa fu a dede fu Krestes. Sma e kari a fesa disi sosrefi "a neti-nyanyan fu Masra” (1 Korentesma 11:20). Fu san ede a fesa disi de so prenspari? O ten Kresten musu hori a fesa disi èn fa den musu du dati?

Yesus Krestes ben seti a fesa disi na a neti fu a Dyu Paskafesa, na ini 33 G.T. Den Dyu ben e hori a Paskafesa wán leisi nomo na ini wan yari, tapu a di fu 14 dei fu a mun Nisan fu a Dyu kalender. Fu kon sabi sortu dei na 14 Nisan, dan soleki fa a sori, den Dyu ben e wakti a spesrutu dei na ini a lente, te a son e skèin sowan 12 yuru langa èn te a dungru sowan 12 yuru langa tu. A fosi nyun mun di de fu si leti bifo noso leti baka a dei dati, ben de a bigin fu a mun Nisan. A Paskafesa ben e hori 14 dei baka dati, baka te son dongo.

Yesus ben hori a Paskafesa nanga den apostel fu en, ne a seni Yudas Iskariot gowe, èn baka dati a seti a Neti-nyanyan fu Masra. A fesa disi ben kon na ini a presi fu a Dyu Paskafesa èn dati meki a musu hori wán leisi nomo na ini wan yari.

Na Evangelie fu Mateyus e taki: "Yesus teki wan brede, èn baka di a taki Gado tangi, a broko a brede, dan a gi den disipel. A taki: ’Un teki a brede, nyan. Disi e prenki mi skin.’ A teki wan kan tu, èn baka di a taki Gado tangi, a gi den disipel. A taki: ’Un alamala musu dringi en; bika disi e prenki mi "brudu fu a frubontu”, di o kanti trowe gi furu sma, so taki den kan kisi pardon fu sondu.’”—Mateyus 26:26-28.

Son sma e bribi taki Yesus ben kenki a brede kon tron en trutru skin, èn taki a ben kenki a win kon tron a brudu fu en. Ma a skin fu Yesus ben de bunbun ete di a gi den apostel fu en a brede. A de so trutru taki den apostel fu Yesus ben e nyan a trutru skin fu Yesus èn taki den ben e dringi a brudu fu en? Nôno, bika efu den ben du dati, dan a ben o de so taki den nyan libisma meti èn taki den pasa a wet fu Gado (Genesis 9:3, 4; Lefitikus 17:10). Na ini Lukas 22:20, Yesus taki: "A kan disi e prenki a nyun frubontu di seti fu di mi gi mi brudu di o lon fu unu ede.” A kan dati ben tron "a nyun frubontu” trutru? Dati no ben o man kwetikweti, fu di wan frubontu na wan kruderi; a no de wan sani di wi kan hori nanga wi anu.

Brede nanga win

Sobun, a brede nanga a win e prenki wan sani. A brede e prenki a volmaakti skin fu Krestes. Yesus ben gebroiki wan brede di ben tan abra fu a Paska nyanyan. A brede ben meki sondro srudeki (Exodus 12:8). Bijbel e agersi srudeki nanga sondu, noso porifasi. Fu dati ede a brede e prenki a volmaakti skin di Yesus ben gi leki ofrandi. A no ben abi sondu.—Mateyus 16:11, 12; 1 Korentesma 5:6, 7; 1 Petrus 2:22; 1 Yohanes 2:1, 2.

A redi win e prenki a brudu fu Yesus. A brudu dati ben meki taki a nyun frubontu kon abi krakti. Yesus ben taki dati a brudu fu en kanti trowe so taki sma kan "kisi pardon fu sondu”. Na so fasi, libisma kan kon santa ini Gado ai èn den kan kon na ini a nyun frubontu nanga Yehovah (Hebrewsma 9:14; 10:16, 17). A frubontu, noso a kontrakti disi, e meki taki 144.000 getrow Kresten kan go na hemel. Drape den sa tiri leki kownu nanga priester gi a bun fu a heri libisma famiri.—Genesis 22:18; Yeremia 31:31-33; 1 Petrus 2:9; Openbaring 5:9, 10; 14:1-3.

Suma musu nyan a brede èn dringi a win na a Memrefesa? Wi kan frustan taki soso den wan di de na ini a nyun frubontu, namku den wan di abi a howpu fu go na hemel, kan nyan a brede èn dringi a win. A santa yeye fu Gado e gi den sma disi na overtoigi taki Gado teki den fu tron kownu na ini hemel (Romesma 8:16). Den de sosrefi na ini a Kownukondre frubontu makandra nanga Yesus.—Lukas 22:29.

Fa a de nanga den sma di abi a howpu fu libi fu têgo na ini a Paradijs na grontapu? Den e gi yesi na a komando fu Yesus èn den e go na a Memrefesa na wan lespeki fasi, ma den no e nyan a brede èn den no e dringi a win. Wán leisi wan yari, Yehovah Kotoigi e hori a Memrefesa tapu 14 Nisan, baka te son dongo. Aladi wan tu dusun sma nomo na grontapu e taki dati den abi a howpu fu go na hemel, toku a fesa disi prenspari gi ala Kresten. Na a okasi disi, ala Kresten kan teki ten fu prakseri baka fa Yehovah Gado nanga Yesus Krestes sori lobi gi wi na wan tumusi bun fasi.—Yohanes 3:16.

← Luku a kapitel di e taki fu a tori disi