Go na content

Go na a tra menu

Go na table of contents

Yehovah Kotoigi

Sranantongo

San Bijbel e leri wi trutru?

KAPITEL FEIFI

A lusu-paiman—A moro warti kado di Gado gi wi

A lusu-paiman—A moro warti kado di Gado gi wi

San na a lusu-paiman?

Sortu sani Gado seti fu pai a lusu-paiman?

Sortu wini a lusu-paiman kan tyari gi yu?

Fa yu kan sori taki yu e warderi a lusu-paiman?

SAN na a moro warti kado di yu kisi oiti? Wan kado no abi fu diri fu de warti èn te yu luku en bun, dan a moni di wan sma e pai gi wan kado, no e sori ala ten o warti a kado de trutru. Ma te wan kado e meki yu firi prisiri noso te a de wan sani di yu abi fanowdu trutru, dan yu sa si a kado dati leki wan tumusi warti sani.

2 Ma wán kado de di warti moro ala tra kado di yu ben kan howpu fu kisi. A de wan kado di Gado gi libisma. Yehovah gi wi furu sani, ma a moro warti kado di a gi wi na a frulusu-ofrandi fu en Manpikin, Yesus Krestes (Mateyus 20:28). Soleki fa wi sa si na ini a kapitel disi, dan a lusu-paiman na a moro warti kado di yu ben sa man kisi, fu di a kan tyari furu prisiri kon gi yu èn a kan meki taki yu kisi den moro prenspari sani di yu abi fanowdu. Fu tru, a lusu-paiman na a moro bigi sani di Yehovah du fu sori taki a lobi yu.

SAN NA A LUSU-PAIMAN?

3 Fu taki en leti, a lusu-paiman na a sani di Yehovah gebroiki fu frulusu a libisma famiri fu sondu nanga dede (Efeisesma 1:7). Fu man frustan bun san a Bijbel leri disi wani taki, dan wi musu prakseri baka san ben pasa na ini a dyari fu Eden. Soso te wi kon sabi san Adam lasi di a sondu, wi sa frustan fu san ede a lusu-paiman de so wan warti kado gi wi.

4 Di Yehovah ben meki Adam, a gi en wan trutru warti sani, namku volmaakti libi. Prakseri san dati ben wani taki gi Adam. Fu di a ben abi wan volmaakti skin èn wan volmaakti frustan, meki noiti a ben o siki, owru, noso dede. Leki wan volmaakti libisma, a ben abi wan spesrutu banti nanga Yehovah. Bijbel e taki dati Adam ben de wan "manpikin fu Gado” (Lukas 3:38). Sobun, Adam ben abi wan krosibei banti nanga Yehovah Gado, neleki a banti di wan manpikin abi nanga en lobi papa. Yehovah ben e taki nanga Adam, a manpikin fu En di ben de na grontapu, èn a ben gi Adam wroko di ben e gi en prisiri èn Gado ben taigi en san A ben e fruwakti fu en.—Genesis 1:28-30; 2:16, 17.

5 Gado ben meki Adam "akruderi a prenki fu en” (Genesis 1:27). Dati no wani taki dati Adam ben abi a srefi skin leki Gado. Soleki fa wi leri na ini kapitel 1 fu a buku disi, Yehovah na wan yeye di wi no man si (Yohanes 4:24). Sobun, Yehovah no abi wan skin di meki fu meti nanga brudu. Gado ben meki Adam akruderi a prenki fu en, èn dati wani taki dati Adam ben meki nanga den srefi fasi fu Gado, soleki lobi, koni, retidu, nanga krakti. Ete wan tra prenspari fasi de fa Adam ben de neleki en Tata; a ben abi wan fri wani. Dati meki Adam no ben de leki wan masyin di e du sani nomo, soso fu di na so Gado meki en. Na presi fu dati, a ben man teki en eigi bosroiti, a ben kan bosroiti fu du bun, noso ogri. Efu a ben bosroiti fu gi yesi na Gado, dan a ben o libi fu têgo na ini wan Paradijs na grontapu.

6 Sobun, a de krin taki di Adam ben trangayesi Gado èn di a kisi dedestrafu, a ben lasi wan tumusi warti sani. A sondu fu en ben meki taki a lasi en libi leki wan volmaakti libisma èn a ben lasi ala blesi di a libi dati ben o tyari kon gi en (Genesis 3:17-19). A sari fu si taki, a no Adam wawan ben lasi a warti libi disi, ma a ben meki taki den bakapikin fu en lasi a libi disi tu. Gado Wortu e taki: "Wán man [Adam] meki sondu kon na grontapu èn sondu fu en sei tyari dede kon, èn na so fasi ala sma e dede, bika den alamala sondu” (Romesma 5:12). Iya, wi alamala kisi sondu fu Adam. Dati meki Bijbel e taki dati a "seri” ensrefi, èn sosrefi den bakapikin fu en, fu tron srafu fu sondu nanga dede (Romesma 7:14). Howpu no ben de moro gi Adam nanga Eva fu di den ben trangayesi Gado fu espresi. Ma fa a de nanga den bakapikin fu den, sobun, nanga wi sosrefi?

7 Yehovah seti a lusu-paiman fu yepi a libisma famiri. San na wan lusu-paiman? Wan lusu-paiman abi fu du nanga tu sani. A fosi sani na taki wan sma e pai wan lusu-paiman fu sorgu taki wan sani, noso wan sma kan kon fri, noso fu bai wan sani baka. Yu kan agersi en nanga a moni di sma e pai fu frulusu wan sma di feanti teki leki strafuman na ini wan orloku. A di fu tu sani na taki wan sma e pai wan lusu-paiman fu tapu, noso fu pai gi den kostu fu wan sani. A de a srefi leki te wan sma e pai gi a mankeri di a gi wan trawan. Fu eksempre, efu wan sma meki taki wan sani broko, dan a moni di a o abi fu pai musu kruderi, noso musu warti a srefi leki a sani di a broko.

8 Fa wi ben o man kisi ala den sani baka di Adam ben lasi, èn fa wi ben o kon fri fu a katibo fu sondu nanga dede? Meki wi poti prakseri na a fasi fa Yehovah seti sani fu pai a lusu-paiman, èn meki wi luku sortu wini a kan tyari gi wi.

A FASI FA YEHOVAH SETI SANI FU PAI A LUSU-PAIMAN

9 Fu di a libi di wi lasi ben de volmaakti libi, meki nowan onvolmaakti libisma ben o man pai a paiman fu kan kisi volmaakti libi baka (Psalm 49:7, 8). San ben de fanowdu na wan lusu-paiman di warti a srefi leki a sani di ben lasi. Disi e kruderi nanga a gronprakseri di abi fu du nanga volmaakti retidu di de fu feni na ini Gado Wortu, pe skrifi: "Sili fu sili” (Deuteronomium 19:21). Sobun, san ben o abi a srefi waarde leki a volmaakti sili, noso libi di Adam ben lasi? Fu kan pai ’wan lusu-paiman gi ala sma’, a libi fu wan tra volmaakti libisma ben de fanowdu.—1 Timoteyus 2:6.

Yesus dede leki wan lusu-paiman

Yehovah ben gi en wan-enkri gebore Manpikin leki wan lusu-paiman gi wi

10 Sortu sani Yehovah seti fu pai a lusu-paiman? A seni wan fu den volmaakti yeye manpikin fu en kon na grontapu. Ma a no de so taki Yehovah luku lontu èn dan a kari wan fu den yeye libisani kon fu seni en go na grontapu. A seni a wan di a lobi moro iniwan trawan, namku a wan-enkri gebore Manpikin fu en (1 Yohanes 4:9, 10). A Manpikin disi ben de klariklari fu gowe libi a hemel tanpe fu en (Filipisma 2:7). Soleki fa wi ben leri na ini a kapitel na fesi, Yehovah ben du wan wondru di a poti a libi fu a Manpikin disi go na ini a bere fu Maria. Nanga yepi fu a santa yeye fu Gado, Yesus gebore leki wan volmaakti libisma èn a no ben de ondro a strafu fu sondu.—Lukas 1:35.

11 Fa wán man ben kan de leki wan lusu-paiman gi someni sma, fu taki en leti, gi milyunmilyun libisma? We, fa a du kon taki someni milyunmilyun libisma kon tron sondusma? Memre taki di Adam sondu, a lasi a warti volmaakti libi di a ben abi. Fu dati ede a no ben man gi volmaakti libi na den bakapikin fu en. Na presi fu dati, a ben kan gi den soso sondu nanga dede. Yesus, di Bijbel e kari "a lasti Adam”, ben abi volmaakti libi èn a no ben sondu noiti (1 Korentesma 15:45). Te yu luku en bun, dan Yesus ben teki a presi fu Adam, so taki a ben kan frulusu wi. Yesus ben gi en volmaakti libi abra èn a ben saka ensrefi ondro Gado na wan volmaakti fasi, èn na so fasi a pai gi a sondu fu Adam. Na a fasi disi Yesus gi howpu na den bakapikin fu Adam.—Romesma 5:19; 1 Korentesma 15:21, 22.

12 Bijbel e taki finifini fa Yesus ben pina bifo a dede. Den ben gi en hebi fonfon, na wan ogri-ati fasi den spikri en na wan postu, èn a dede wan hati dede na wan pina postu (Yohanes 19:1, 16-18, 30; "Tra prenspari sani”). Fu san ede Yesus ben musu pina so furu? Na ini wan fu den kapitel di e kon, wi sa si taki Satan ben wani buweisi taki nowan libisma futuboi sa tan getrow na Yehovah te den e kisi tesi. Ma fu di Yesus horidoro na wan getrow fasi aladi a ben pina srefisrefi, meki a ben man sori moro bun leki iniwan tra sma, taki san Satan ben taki no ben tru. Yesus ben buweisi taki wan volmaakti sma di abi wan fri wani kan hori en soifri retifasi na Gado, awinsi san Didibri e du. A no de fu taki dati Yehovah ben prisiri trutru di en lobi Manpikin tan getrow!—Odo 27:11.

13 Fa a lusu-paiman ben pai? Tapu a di fu 14 dei fu a Dyu mun Nisan, na ini 33 G.T., Gado gi pasi taki sma kiri en volmaakti Manpikin di no ben abi sondu. Na so fasi Yesus gi en volmaakti libi leki ofrandi, "wán leisi nomo” (Hebrewsma 10:10). Na a di fu dri dei baka di Yesus dede, Yehovah gi en wan opobaka leki wan yeye. Di Yesus drai go baka na hemel, a pristeri Gado a waarde fu a volmaakti libisma libi fu en, fu frulusu den bakapikin fu Adam (Hebrewsma 9:24). Yehovah teki a waarde fu a srakti-ofrandi fu Yesus leki a lusu-paiman di ben de fanowdu fu frulusu a libisma famiri fu a katibo fu sondu nanga dede.—Romesma 3:23, 24.

SORTU WINI YU KAN KISI FU A LUSU-PAIMAN

14 Aladi wi na sondusma, toku wi kan kisi bigi blesi nanga yepi fu a lusu-paiman. Meki wi poti prakseri na wan tu fu den winimarki di wi kan kisi now, èn na ini a ten di e kon, nanga yepi fu a tumusi warti kado di Gado gi wi.

15Kisi pardon fu sondu. Fu di wi gebore na ini sondu, meki wi abi fu feti trutru nanga wisrefi fu du san bun. Wi alamala e sondu fu di wi kan taki, noso du sani di no bun. Ma nanga yepi fu a frulusu-ofrandi fu Yesus, wi kan "kisi pardon fu wi sondu” (Kolosesma 1:13, 14). Ma efu wi wani kisi pardon, dan wi musu abi berow trutru. Wi musu sori sakafasi tu èn wi musu aksi Yehovah fu gi wi pardon, fu di wi e bribi na ini a srakti-ofrandi fu en Manpikin.—1 Yohanes 1:8, 9.

16Wan krin konsensi na fesi Gado. Te wi abi konsensi fonfon, dan dati kan meki taki wi e lasi-ati makriki èn taki wi e firi leki wi no warti noti. Ma fu di Yehovah e gi wi pardon nanga yepi fu a lusu-paiman, meki na wan switifasi a e sorgu taki wi kan anbegi en nanga wan krin konsensi, aladi wi no de volmaakti (Hebrewsma 9:13, 14). Disi e meki taki wi kan taki nanga Yehovah, sondro fu frede. Fu dati ede, wi kan taki fri nanga en na ini begi (Hebrewsma 4:14-16). Te wi tan abi wan krin konsensi, dan dati e gi wi wan korostu firi, a e meki wi abi lespeki gi wisrefi, èn a e gi wi prisiri.

17A howpu fu libi fu têgo na tapu wan paradijs grontapu. Romesma 6:23 e taki: "A pai di sma e kisi gi sondu, na dede.” A srefi tekst e taki moro fara: "Ma a presenti di Gado e gi, na têgo libi nanga yepi fu Krestes Yesus wi Masra.” Na ini kapitel 3 fu a buku disi, wi ben taki fu den blesi di wi sa kisi te a grontapu disi tron wan Paradijs na ini a ten di e kon (Openbaring 21:3, 4). Fu di Yesus dede gi wi, meki wi kan kisi ala den blesi dati na ini a ten di e kon, èn sosrefi libi wan gosontu libi fu têgo. Efu wi wani kisi den blesi dati, dan wi musu sori taki wi e warderi a lusu-paiman di wi kisi leki kado.

FA YU KAN SORI TAKI YU ABI WARDERI?

18 Fu san ede wi musu de nanga bigi tangi, taki Yehovah ben seti sani fu pai a lusu-paiman? We, wan kado abi spesrutu waarde efu a sma di gi wi en ben musu gi en ten, muiti, nanga moni fu kan gi wi a kado. A e naki wi ati trutru te wan sma e gi wi wan kado, fu di dati e sori wi taki a sma lobi wi trutru. A lusu-paiman na a moro warti kado di wi ben kan kisi, fu di Gado gi wi a moro diri sani di a ben abi. "Gado ben lobi grontapu so te, taki a gi en wan-enkri Manpikin”, na so Yohanes 3:16 e taki. A lusu-paiman na a moro bigi buweisi taki Yehovah lobi wi. A e buweisi tu taki Yesus lobi wi fu di a ben de klariklari fu gi en libi gi a bun fu wi (Yohanes 15:13). Fu dati ede, a lusu-paiman di wi kisi leki kado musu overtoigi wi taki Yehovah nanga en Manpikin lobi ibriwan fu wi.—Galasiasma 2:20.

19 Fa yu kan sori taki yu e warderi a lusu-paiman di Gado gi wi leki kado? Na a fosi presi, kon sabi Yehovah, a sma di pai a lusu-paiman gi wi (Yohanes 17:3). Te yu e gebroiki a buku disi fu studeri Bijbel, dan dati sa yepi yu fu kon sabi moro fu Yehovah. O moro yu e kon sabi Yehovah, o moro yu sa kon lobi en. Leki bakapisi, a lobi dati sa meki taki yu sa wani plisi en.—1 Yohanes 5:3.

Wan uma di e leisi Bijbel

Wan fasi fa yu kan sori taki yu e warderi a lusu-paiman di Yehovah gi wi leki kado, na te yu e kon sabi en moro bun

20Sori bribi na ini a frulusu-ofrandi fu Yesus. Yesus srefi ben taki: "A sma di e bribi na ini a Manpikin, e kisi têgo libi” (Yohanes 3:36). Fa wi kan sori bribi na ini Yesus? Wi no e sori a bribi disi nanga wortu wawan. Yakobus 2:26 e taki: "Bribi sondro wroko dede.” Iya, nanga den "wroko” fu wi, dati wani taki den sani di wi e du, wi e sori taki wi abi trutru bribi. Wan fasi fa wi kan sori taki wi e bribi na ini Yesus, na te wi e du ala muiti fu waka baka na eksempre fu en, no nanga den sani di wi e taki wawan, ma sosrefi nanga den sani di wi e du.—Yohanes 13:15.

21Go na a Avondmaal fu Masra di e hori ala yari. Na a mofoneti fu 14 Nisan 33 G.T., dan fu a fosi leisi Yesus hori a spesrutu fesa di Bijbel e kari "a neti-nyanyan fu Masra” (1 Korentesma 11:20; Mateyus 26:26-28). Son sma e kari a fesa disi a Memrefesa fu a dede fu Krestes. Yesus ben seti a fesa disi fu memre den apostel fu en, èn fu memre ala tra tru Kresten di ben o kon baka den, taki a ben gi en sili, noso en libi leki wan lusu-paiman fu di a dede leki wan volmaakti libisma. Di Yesus ben taki fu a fesa disi, a gi a komando: "Tan du disi fu memre mi” (Lukas 22:19). Te wi e hori a Memrefesa, dan dati e memre wi na a bigi lobi di Yehovah nanga Yesus sori wi nanga yepi fu a lusu-paiman. Wi kan sori taki wi e warderi a lusu-paiman fu di wi e go na a Memrefesa fu a dede fu Yesus, wan fesa di e hori ala yari.*

22 A lusu-paiman di Yehovah seti gi wi na trutru wan tumusi warti kado (2 Korentesma 9:14, 15). Srefi den wan di dede kaba kan kisi wini fu a tumusi warti kado disi. Kapitel 6 nanga 7 sa fruklari na sortu fasi dati o pasa.

SAN BIJBEL E LERI WI

  • A lusu-paiman na a sani di Yehovah e gebroiki fu frulusu a libisma famiri fu sondu nanga dede.—Efeisesma 1:7.
  • Yehovah seti sani fu pai a lusu-paiman, fu di a seni en wan-enkri gebore Manpikin kon na grontapu fu dede gi wi.—1 Yohanes 4:9, 10.
  • Nanga yepi fu a lusu-paiman wi e kisi pardon fu sondu, wi e kisi wan krin konsensi, èn wi e kisi a howpu fu libi fu têgo.—1 Yohanes 1:8, 9.
  • Wi e sori taki wi e warderi a lusu-paiman fu di wi e kon sabi Yehovah moro bun, fu di wi e sori bribi na ini frulusu-ofrandi fu Yesus, èn fu di wi e go na a neti-nyanyan fu Masra.—Yohanes 3:16.

*  Efu yu wani sabi moro fu a neti-nyanyan fu Masra, dan luku a pisi tori di nen "Tra prenspari sani”.


Den aksi fu a studie

1, 2. (a) San e meki taki wan kado warti gi yu trutru? (b) Fu san ede wi kan taki dati a lusu-paiman na a moro warti kado di wi ben sa man kisi oiti?

3. San na a lusu-paiman, èn san wi musu kon sabi efu wi wani kon frustan fu san ede a de so wan warti kado?

4. San volmaakti libi ben wani taki gi Adam?

5. San a wani taki te wi e leisi na ini Bijbel dati Gado ben meki Adam "akruderi a prenki fu en”?

6. San Adam lasi di a trangayesi Gado, èn fa dati ben abi krakti tapu den bakapikin fu en?

7, 8. San na tu prenspari sani di abi fu du nanga wan lusu-paiman?

9. Sortu lusu-paiman ben de fanowdu?

10. Sortu sani Yehovah seti fu pai a lusu-paiman?

11. Fa wán man ben kan de leki wan lusu-paiman gi milyunmilyun sma?

12. San kon na krin na ini a fasi fa Yesus nyan pina?

13. Fa a lusu-paiman ben pai?

14, 15. San wi musu du fu "kisi pardon fu wi sondu”?

16. San e meki taki wi kan anbegi Gado nanga wan krin konsensi, èn o warti a de fu abi wan krin konsensi?

17. Sortu blesi wi kan kisi fu di Yesus dede gi wi?

18. Fu san ede wi musu de nanga tangi taki Yehovah seti a lusu-paiman gi wi?

19, 20. Na sortu fasi yu kan sori taki yu e warderi a lusu-paiman di Gado gi wi leki kado?

21, 22. (a) Fu san ede wi musu go na a neti-nyanyan fu Masra di e hori ala yari? (b) San wi sa luku na ini kapitel 6 nanga 7?