Go na content

Go na a tra menu

Go na table of contents

Yehovah Kotoigi

Sranantongo

Mi buku nanga Bijbel tori

Tori 112: A boto sungu na wan tabiki

Tori 112: A boto sungu na wan tabiki

LUKU, a boto de na ini problema! A e broko na pisipisi! Yu e si den sma di dyompo go na watra? Sonwan e doro syoro kaba. Na Paulus de drape? Meki wi go luku san e pasa nanga en.

Den sma di kon na syoro di a boto sungu

Soleki fa yu sabi, dan Paulus ben de tu yari na dungru-oso na Sesarea. Dan den e poti en nanga tra strafuman na tapu wan boto di e go na Rome. Te den e pasa krosibei na a tabiki Kreita, dan wan bigi winti e kisi den. A winti e wai so tranga, taki den man no man tiri a boto moro. Èn den no man si son na deiten noso den stari na netiten. Baka furu dei te fu kaba, dan den sma di de na tapu a boto e lasi ala howpu taki den sa tan na libi.

Dan Paulus e opo tanapu èn e taki: ’Nowan fu unu sa lasi libi, soso a boto sa lasi. Bika a neti di pasa, wan engel fu Gado ben kon na mi èn ben taki: "No frede, Paulus! Yu musu kon na fesi a Kèiser fu Rome. Èn Gado sa frulusu ala den sma di de nanga yu na tapu a boto.” ’

Na a di fu 14 dei baka di a bigi winti ben bigin, na a ten fu mindrineti, dan den matrosi e si taki a watra no de so dipi moro! Fu di den e frede, taki na ini a dungru a boto kan naki broko na wan klepston, meki den e trowe den ankra na watra. A tamara mamanten den e si wan boktu fu a tabiki. Den e bosroiti fu seiri a boto go leti na tapu a syoro drape.

We, te den e kon krosibei na a syoro, dan a boto e fasi na tapu wan santi bangi. A boto e bigin fu broko na pisipisi te den skwala e bigin naki en. A legre ofsiri di abi a frantwortu, e taki: ’Ala sma di kan swen, musu dyompo fosi go na ini a se èn swen go na syoro. Den trawan musu dyompo na den baka èn grabu den udu hori di broko komoto na a boto.’ Èn dati na san den e du. Na so fasi ala den 276 sma di ben de na tapu a boto e kon heri bun na syoro, neleki fa na engel ben pramisi.

A tabiki nen Malta. Den sma abi switifasi srefisrefi èn den e sorgu gi den sma fu a boto. So esi leki a weer kon moro bun, dan den e poti Paulus na tapu wan tra boto èn den e tyari en go na Rome.

Tori fu den Apostel 27:1-44; 28:1-14.



Aksi

  • San e pasa nanga a boto pe Paulus de na ini, te a e pasa krosibei fu a tabiki di nen Kreita?
  • San Paulus e taigi den wan di de na ini a boto?
  • Fa a du kon taki a boto e broko na pisipisi?
  • San a legre-ofsiri di abi a frantwortu e taki, èn omeni sma e kon na syoro sondro fu kisi mankeri?
  • San na a nen fu a tabiki pe den kon na syoro, èn san e pasa nanga Paulus te a weer e kon moro bun?

Ete wan tu aksi