Go na content

Go na a tra menu

Go na table of contents

Yehovah Kotoigi

Sranantongo

Mi buku nanga Bijbel tori

Tori 110: Timoteyus e yepi Paulus

Tori 110: Timoteyus e yepi Paulus

A YONKUMAN di yu e si dya nanga Paulus na Timoteyus. Timoteyus e libi nanga en famiri na Listra. En mama nen Enise èn en granmama nen Lowis.

Disi na a di fu dri tron taki Paulus de na Listra. Wan sani fu wan yari na fesi, Paulus nanga Barnabas ben kon dya fu a fosi tron, di den ben de na wan waka fu preiki. Èn now Paulus de dya baka nanga en mati Silas.

Timoteyus nanga Paulus

Yu sabi san Paulus e aksi Timoteyus? ’Yu ben sa wani go nanga Silas nanga mi? Yu ben sa kan yepi wi fu preiki gi sma di e libi na farawe presi.’

’Iya’, Timoteyus e piki, ’mi ben sa wani fu go srefisrefi.’ Dati meki heri esi Timoteyus e gowe libi en famiri èn e go nanga Paulus nanga Silas. Ma bifo wi leri wan sani fu a waka fu den, meki wi go luku san ben pasa nanga Paulus. Now a de sowan 17 yari di Yesus ben sori ensrefi na Paulus na tapu a pasi di e go na Damaskus.

Soleki fa yu sabi, dan Paulus ben go na Damaskus fu du Yesus disipel ogri, ma now ensrefi na wan disipel! Bakaten wan tu feanti poti na den prakseri fu kiri en, fu di den no lobi a leri fu en di e taki fu Yesus. Ma den disipel e yepi Paulus fu lon komoto na a foto. Den e poti en na ini wan baskita èn e saka en abra a foto skotu go na dorosei fu a foto.

Dan Paulus e go na Antiokia fu preiki. Dyaso fu a fosi tron den bakaman fu Yesus e kisi a nen Kresten. Den e seni Paulus nanga Barnabas komoto dya na Antiokia go na wan waka fu preiki na farawe kondre. Wan fu den foto di den e go fisiti na Listra, pe Timoteyus e libi.

Now, na wan sani fu wan yari na baka, Paulus de baka na Listra na wan di fu tu waka. Te Timoteyus e gowe nanga Paulus nanga Silas, yu sabi pe den e go? Luku a karta èn meki wi leri wan tu fu den presi.

Den e go na a krosibei foto Ikonium fosi, dan na wan di fu tu foto di nen Antiokia. Baka dati den e waka go na Troas, dan Filipi, Tesalonika, nanga Berea. Yu e si Ateine na tapu a karta? Paulus e preiki drape. Baka dati den e preiki wán nanga afu yari na Korente. Te fu kaba den e tapu syatu na Efeise. Dan nanga boto den e drai kon baka na Sesarea èn e waka go doro na Antiokia, pe Paulus e libi.

Na so Timoteyus e waka hondrohondro kilometer nanga Paulus èn a e yepi en fu preiki a bun nyunsu èn fu opo furu Kresten gemeente. Te yu kon moro bigi, yu sa de wan getrow futuboi fu Gado neleki Timoteyus?

Tori fu den Apostel 9:19-30; 11:19-26; kapitel 13 te nanga 17; 18:1-22.

Wan karta

1. Rome; 2. Malta; 3. Berea; 4. Tesalonika; 5. Korente; 6. Filipi; 7. Ateine; 8. Kreita; 9. Troas; 10. Efeise; 11. Mileite; 12. Kolose; 13. Antiokia; 14. Ikonium; 15. Listra; 16. Siprus; 17. Antiokia; 18. Sesarea; 19. Yope; 20. Damaskus; 21. Yerusalem; 22. A Bigi Se (Mindrikondre Se)



Aksi

  • Suma na a yonkuman na tapu a prenki? Pe a e libi, èn fa en mama nanga en granmama nen?
  • San Timoteyus e taki te Paulus e aksi en efu a wani go makandra nanga Silas èn nanga Paulus fu preiki gi sma di e libi na farawe presi?
  • Na sortu presi den bakaman fu Yesus de te den e kisi a nen Kresten fu a fosi tron?
  • Baka di Paulus, Silas, nanga Timoteyus gowe libi Antiokia, dan san na wan tu fu den foto pe den e go?
  • Fa Timoteyus e yepi Paulus, èn san yonguwan na ini a ten disi musu aksi densrefi?

Ete wan tu aksi