Go na content

Go na a tra menu

Go na table of contents

Yehovah Kotoigi

Sranantongo

Mi buku nanga Bijbel tori

Tori 108: Na tapu a pasi di e go na Damaskus

Tori 108: Na tapu a pasi di e go na Damaskus

YU SABI suma didon dya na gron? Dati na Saulus. Soleki fa yu sabi, dan na en ben de a sma di ben luku den dyakti fu den man di ben ston Stefanus kiri. Luku a krin faya dati! San e pasa?

Baka di den kiri Stefanus, dan Saulus e teki fesi fu onti den bakaman fu Yesus fu du den ogri. Fu a wan oso go na a tra oso a e srepi den go na doro èn e trowe den go na dungru-oso. Furu fu den disipel e lowe go na tra foto èn e bigin preiki a ’bun nyunsu’ drape. Ma Saulus e go na tra foto tu fu suku pe Yesus bakaman de. Now a de na pasi e go na Damaskus. Ma te a de na pasi a wondru sani disi e pasa:

Wantronso wan faya e koti na loktu skèin lontu Saulus. A e fadon na gron, soleki fa wi e si dya. Dan wan sten e taki: ’Saulus, Saulus! Fu san ede yu e du mi ogri?’ Den man di de nanga Saulus e si a faya èn e yere a sten, ma den no kan frustan san a sten e taki.

Wan faya meki taki Saulus breni

’Suma na yu, Masra?’ Saulus e aksi.

’Mi na Yesus di yu e du ogri’, a sten e taki. Yesus e taki disi fu di te Saulus e du Yesus bakaman ogri, a de neleki a e du Yesus srefi ogri.

Saulus e aksi now: ’San mi musu du, Masra?’

’Opo go na Damaskus’, Yesus e taki. ’Drape den sa taigi yu san yu musu du.’ Te Saulus opo tanapu èn e opo en ai, dan a no man si noti. A breni! Dati meki den man di de nanga en e hori en na en anu èn e tyari en go na Damaskus.

Now Yesus e taigi wan fu en disipel na Damaskus: ’Opo, Ananias! Go na a strati di nen a Retiwan. Aksi na a oso fu Yudas fu wan man di nen Saulus. Mi teki en fu de wan spesrutu futuboi fu mi.’

Ananias e go. Te a feni Saulus, a e poti en anu na en tapu èn e taki: ’Masra seni mi kon fu yu kan si baka èn fu yu kon furu nanga santa yeye.’ Wantronso wan sani di gersi fisibuba e fadon komoto na den ai fu Saulus èn a man si baka.

Yesus e gebroiki Saulus na wan makti fasi fu preiki gi sma fu furu nâsi. Sma e kon sabi en leki na apostel Paulus èn wi sa yere moro furu fu en ete. Ma fosi, meki wi go luku san Gado e seni Petrus fu du.

Tori fu den Apostel 8:1-4; 9:1-20; 22:6-16; 26:8-20.



Aksi

  • San Saulus e du baka di den kiri Stefanus?
  • Sortu wondru sani e pasa te Saulus de na pasi fu go na Damaskus?
  • San Yesus e taigi Saulus fu du?
  • San Yesus e taigi Ananias fu du, èn fa a du kon taki Saulus man si baka?
  • Sortu tra nen Saulus kon abi, èn fa Gado e gebroiki en?

Ete wan tu aksi