Go na content

Go na a tra menu

Go na table of contents

Yehovah Kotoigi

Sranantongo

Mi buku nanga Bijbel tori

Tori 107: Den e ston Stefanus kiri

Tori 107: Den e ston Stefanus kiri

A MAN di kindi dya, na Stefanus, wan getrow disipel fu Yesus. Ma luku san e pasa nanga en now? Den man disi e iti bigi ston na en tapu? Fu san ede den abi so wan bita-ati gi Stefanus, so taki den e du so wan takru sani nanga en? Meki wi go luku.

Den e ston Stefanus kiri

Gado ben yepi Stefanus fu du wondruwroko. Den man disi no lobi dati. Fu dati ede den e meki trobi nanga en fu den waarheid di a e leri sma. Ma Gado e gi Stefanus bigi koni, so taki a e buweisi den man disi taki den e leri falsi sani. Disi e meki den ati kon bron moro! Dati meki den e grabu en èn den e meki sma kon di e fruteri lei fu en.

A granpriester e aksi Stefanus: ’Den sani disi tru?’ Stefanus e piki na wan tumusi moi fasi nanga tori fu Bijbel. Na a kaba fu Stefanus taki, a e fruteri fa langa ten pasa kaba takru sma ben abi bita-ati gi den profeiti fu Yehovah. Dan a e taki: ’Unu de leki den man dati. Unu ben kiri Yesus, a futuboi fu Gado èn unu no ben gi yesi na den wet fu Gado.’

Disi e meki den kerki fesiman ati kon bron srefisrefi. Den e kaw den tifi fu atibron ede. Ma dan Stefanus e opo en ede go na loktu èn e taki: ’Luku! Mi e si Yesus tanapu na a reti-anusei fu Gado na hemel.’ Dan den man disi e tapu den yesi èn e lon go na tapu Stefanus. Den e grabu en èn e srepi en go na dorosei fu a foto.

Dyaso den e puru den dyakti fu den na den skin èn e gi den na a yonkuman Saulus fu luku. Yu e si Saulus drape? Dan sonwan fu den man e bigin iti ston na tapu Stefanus. Stefanus e kindi, soleki fa yu e si èn a e begi Gado: ’Yehovah no strafu den fu na ogri disi.’ A sabi taki den kerki fesiman ben kori wan tu fu den sma dati. Baka dati Stefanus e dede.

Efu wan sma du yu wan ogri sani, yu e pruberi fu du en wan ogri sani baka, noso yu e aksi Gado fu du en ogri? Stefanus nanga Yesus no ben du dati. Den ben sori switifasi gi ala sma, srefi gi den sma di no ben handri nanga den na wan switi fasi. Meki wi pruberi fu waka baka na eksempre fu den.

Tori fu den Apostel 6:8-15; 7:1-60.



Aksi

  • Suma na Stefanus, èn san Gado ben yepi en fu du?
  • Sortu sani di Stefanus e taki e meki den kerki fesiman atibron srefisrefi?
  • San den man e du nanga Stefanus te den srepi en go na dorosei fu a foto?
  • Suma na a yonkuman na tapu a prenki di e tanapu sei den mantel?
  • San Stefanus e begi Yehovah bifo a e dede?
  • Neleki Stefanus, san wi musu du te wan sma e du wan ogri sani nanga wi?

Ete wan tu aksi