Go na content

Go na a tra menu

Go na table of contents

Yehovah Kotoigi

Sranantongo

Mi buku nanga Bijbel tori

Tori 104: Yesus e go baka na hemel

Tori 104: Yesus e go baka na hemel

TE DEN dei e pasa, dan Yesus e sori ensrefi furu tron na en bakaman. Wan dei sowan 500 disipel e si en. Yu sabi fu sortu sani Yesus e taki nanga den te a e sori ensrefi na den? Fu a Kownukondre fu Gado. Yehovah ben seni Yesus kon na grontapu fu leri sma fu a Kownukondre. Èn a tan du dati, srefi baka di a ben opo baka na dede.

Yesus e go baka na hemel

Yu e memre ete san na a Kownukondre fu Gado? Iya, a Kownukondre na wan trutru tiri fu Gado na hemel èn Yesus na a sma di Gado teki fu de kownu. Soleki fa wi ben leri, dan Yesus ben sori fa a sa de wan tumusi bun kownu, fu di a ben gi sma di ben abi angri nyanyan, a ben dresi den sikiwan, èn a ben opo dedesma kon na libi baka srefi!

Sobun, te Yesus sa tiri dusun yari na hemel, fa grontapu sa tan dan? Iya, heri grontapu sa tron wan moi paradijs. Feti no sa de moro, nowan ogridu, nowan siki, èn srefi dede no sa de moro. Wi sabi taki disi de tru, fu di Gado ben meki grontapu fu de wan paradijs, so taki sma kan nyan bun fu en. Fu dati ede a ben meki a dyari fu Eden na ini a bigin. Èn Yesus sa sorgu taki san Gado wani sa kon tru te fu kaba.

Now a ten doro gi Yesus fu go baka na hemel. Na ini a pisi ten fu 40 dei Yesus ben sori ensrefi na en disipel. Sobun, den sabi seiker taki a e libi baka. Ma bifo a e gowe libi den, a e taigi den: ’Tan na Yerusalem teleki unu kisi santa yeye.’ A santa yeye na a wroko krakti fu Gado, neleki winti di e wai. A yeye dati sa yepi Yesus bakaman fu du Gado wani. Te fu kaba, Yesus e taki ete: ’Un musu preiki fu mi na den moro farawe presi fu grontapu.’

Baka di Yesus taki disi, dan wan fruwondru sani e pasa. A e bigin opo go na hemel, soleki fa yu e si dya. Dan wan wolku e puru en na den ai èn den disipel no e si Yesus moro. Yesus e go na hemel èn fu drape a e bigin tiri tapu en bakaman na grontapu.

Den disipel e loktu go na loktu

1 Korentesma 15:3-8; Openbaring 21:3, 4; Tori fu den Apostel 1:1-11.



Aksi

  • Omeni disipel e si Yesus na wan okasi, èn fu sortu sani a e taki nanga den?
  • San na a Kownukondre fu Gado, èn fa a libi sa de na grontapu te Yesus e tiri wan dusun yari leki Kownu?
  • Omeni dei Yesus sori ensrefi na den disipel fu en, ma now a ten doro gi en fu du sortu sani?
  • San Yesus e taigi den disipel fu en fu du, leti bifo a e gowe libi den?
  • San e pasa na tapu a prenki, èn fa a du kon taki den disipel no man si Yesus moro?

Ete wan tu aksi

Kon sabi moro

YESUS​—EN NA A PASI, EN NA SAN TRU, EN NA A LIBI

Krestes de na a reti-anusei fu Gado

San Yesus ben o du aladi a ben o wakti teleki a ten doro fu puru den feanti fu en na pasi?