Go na content

Go na a tra menu

Go na table of contents

Yehovah Kotoigi

Sranantongo

Mi buku nanga Bijbel tori

Tori 103: Na ini wan kamra di sroto

Tori 103: Na ini wan kamra di sroto

BAKA di Petrus nanga Yohanes gowe libi a grebikamra, dan Maria e tan en wawan drape. A e bigin krei. Dan a e beni luku na ini a grebikamra, soleki fa wi ben si na a prenki na a fesi. Drape a e si tu engel, di e aksi en: ’Fu san ede yu e krei?’

Maria e piki: ’Den teki mi meester gowe èn mi no sabi pe den poti en.’ Dan Maria e drai ensrefi èn e si wan man tanapu. A man e aksi en: ’Suma yu e suku?’

Maria e prakseri taki a man na a dyariman èn taki kande na en teki a skin fu Yesus tyari gowe. Fu dati ede a e taki: ’Efu yu teki en, taigi mi pe yu poti en.’ Ma a man disi na Yesus srefi. A teki wan skin di Maria no sabi taki na en. Ma te a e kari Maria na en nen, dan Maria sabi taki a man disi na Yesus. A e lon go taigi den disipel: ’Mi si Masra!’

Moro lati tapu a dei dati, te tu disipel e waka go na a pikin foto Ema-us, dan wan man e kon waka nanga den. Den disipel e sari srefisrefi, fu di den feanti fu Yesus kiri en. Ma aladi den e waka go moro fara, dan a man e tyari furu sani fu Bijbel kon a krin, di e meki den firi moro bun. Te fu kaba, te den tapu na wan presi fu go nyan, dan den disipel e si taki a man disi na Yesus. Dan Yesus no de fu si moro, èn den tu disipel disi e go esi-esi baka na Yerusalem fu fruteri den apostel ala sani.

Disiten Yesus e sori ensrefi na Petrus. Den trawan de nanga bigi prisiri te den yere disi. Dan den tu disipel e go na Yerusalem èn e feni den apostel. Den e fruteri den fa Yesus ben sori ensrefi na den tu, di den ben de na pasi. Èn na a yuruten di den ben e fruteri disi, yu sabi sortu fruwondru sani e pasa?

Luku a prenki disi. Yesus e kon leti drape na ini a kamra, aladi a doro sroto. Fa den disipel breiti! Dati na wan prisiri dei, a no so? Yu kan teri den tron di Yesus sori ensrefi te nanga now na en bakaman? Yu teri feifi tron tu?

Yesus e sori ensrefi na den disipel

Na apostel Tomas no de nanga den te Yesus e sori ensrefi. Fu dati ede den disipel e fruteri en: ’Wi si Masra!’ Ma Tomas e taki, dati a sa musu si Yesus ensrefi bifo a sa bribi a sani dati. We, aiti dei na baka den disipel de makandra baka na ini wan kamra di sroto, èn a leisi disi Tomas de nanga den. Wantronso Yesus e kon leti drape na ini a kamra. Now Tomas e bribi.

Yohanes 20:11-29; Lukas 24:13-43.



Aksi

  • San Maria e taigi wan man di a e si leki a dyariman, ma fa Maria e kon sabi taki a man na Yesus?
  • San e pasa nanga tu disipel di e waka go na a dorpu Ema-us?
  • Sortu fruwondru sani e pasa te tu disipel e taigi den apostel taki den ben si Yesus?
  • Omeni tron Yesus sori ensrefi na den bakaman fu en?
  • San Tomas e taki te a e yere taki den disipel si Masra, ma san e pasa aiti dei baka dati?

Ete wan tu aksi

Kon sabi moro

YESUS​—EN NA A PASI, EN NA SAN TRU, EN NA A LIBI

Hondrohondro sma e si Yesus fosi a Pinksterfesa

Baka te Yesus kisi wan opobaka èn fosi a go na hemel, a sori den disipel fu en wan tu leisi san den ben o kisi èn fa dati ben o yepi den.