Go na content

Go na a tra menu

Go na table of contents

Yehovah Kotoigi

Sranantongo

Mi buku nanga Bijbel tori

Tori 96: Yesus e dresi sikisma

Tori 96: Yesus e dresi sikisma

ALADI Yesus e waka pasa a heri kondre, dan a e dresi den sikisma. Sma e taki fu a nyunsu fu den wondru disi na ala pikin foto nanga bigi foto. Fu dati ede den e tyari den malengriman, breniman, dofuman, nanga furu tra sikisma kon na Yesus èn a e dresi den alamala.

Moro leki dri yari pasa sensi Yohanes ben dopu Yesus. Èn Yesus e fruteri en apostel taki heri esi a sa go na Yerusalem, pe den sa kiri en, èn dan a sa opo baka na dede. Disiten Yesus e go doro fu dresi sikisma.

Yesus e dresi wan siki uma

Wan dei Yesus e leri sma na wan Sabadei. Sabadei na wan rostudei gi den Dyu. Na uma di yu e si dya ben siki pasa marki. A ben waka kron 18 yari kaba èn a no ben man tanapu leti-opo. Dati meki Yesus e poti en anu na en tapu èn na uma e go tanapu leti-opo. A kon betre!

Disi e meki den kerki fesiman ati e kon bron srefisrefi. ’Siksi dei de di wi musu wroko’, wan fu den e bari taigi na ipi sma. ’Kon na den dei dati fu Yesus dresi unu, no na Sabadei!’

Ma Yesus e piki: ’Un ogri sma di unu de! Iniwan fu unu ben sa lusu en buriki èn tyari en go dringi na Sabadei. A pôti uma disi, di ben siki 18 yari kaba no mag kon betre dan na Sabadei?’ A piki fu Yesus e meki den sma disi kisi syen.

Bakaten Yesus nanga en apostel e teki pasi go na Yerusalem. Te den de leti na dorosei fu a foto Yerikow, dan tu breni begiman e yere taki Yesus e waka pasa. Fu dati ede den e bari tranga: ’Yesus, yepi wi!’

Yesus e kari den breniman kon na en èn a e aksi: ’San unu wani mi du gi unu?’ Den e taki: ’Masra, meki wi ai kon opo.’ Yesus e fasi den ai èn wantewante den kan si! Yu sabi fu san ede Yesus e du ala den wondru disi? Na fu di a lobi sma èn a wani taki den abi bribi na ini en. Fu dati ede meki wi kan de seiker taki te a tiri leki Kownu, nowan sma na grontapu sa siki moro.

Mateyus 15:30, 31; Lukas 13:10-17; Mateyus 20:29-34.



Aksi

  • San Yesus e du te a e waka pasa na ini a heri kondre?
  • San Yesus e fruteri den apostel fu en sowan dri yari baka di a teki dopu?
  • Suma na den sma na tapu a prenki, èn san Yesus e du gi na uma?
  • Fu san ede a piki fu Yesus e meki den kerki fesiman di e krutu en kisi syen?
  • Te Yesus nanga den apostel fu en de krosibei fu Yeriko, dan san Yesus e du gi tu begiman di breni?
  • Fu san ede Yesus e du wondru?

Ete wan tu aksi