Go na content

Go na a tra menu

Go na table of contents

Yehovah Kotoigi

Sranantongo

Mi buku nanga Bijbel tori

Tori 95: A fasi fa Yesus e leri sma

Tori 95: A fasi fa Yesus e leri sma

WAN dei Yesus e taigi wan man taki a musu sori lobi gi tra sma. A man e aksi Yesus: ’Suma na den tra sma di mi musu lobi?’ We, Yesus sabi san a man disi e prakseri. A man e prakseri taki soso den sma fu en eigi ras nanga bribi na den sma di a musu lobi. Meki wi go luku san Yesus e taigi en.

Son tron Yesus e fruteri wan tori fu leri sma sani. Na disi a e du now. A e fruteri wan tori fu wan Dyu nanga wan Samariasma. Wi ben leri kaba, taki moro furu Dyu no lobi Samariasma. We, disi na a tori fu Yesus:

Wan dei wan Dyu ben saka wan bergipasi go na Yerikow. Ma ogri-ati fufuruman ben dyompo kon na en tapu. Den ben teki en moni èn ben fon en te fu dede.

Bakaten wan Dyu priester ben waka pasa a pasi. A ben si a man di den ben fon. San yu denki taki a ben du? We, a ben koti abra go na a tra sei fu a pasi èn ben waka gowe. Dan wan tra kerkiman ben waka pasa. A ben de wan Leifisma. A ben tan tanapu? Nôno, ensrefi tu no ben tan tanapu fu yepi a man di den ben fon. Yu e si farawe a priester nanga a Leifisma fa den e saka na pasi gowe.

Ma luku suma de dya nanga a man di den ben fon. A de wan Samariasma. A e yepi a Dyu. A e poti dresi na den soro fu en èn e tai den. Baka dati, a e tyari a Dyu go na wan presi pe a kan rostu èn kon betre.

A bun Samariasma

Baka te Yesus kaba nanga a tori fu en, dan a e taigi a man di ben aksi a sani: ’Suma fu den dri disi yu denki ben sori taki a lobi a sma di den ben fon? A ben de a priester, a Leifisma noso a Samariasma?’

A man e piki: ’A Samariasma. A ben sorgu bun gi a man di den ben fon.’

Yesus e taki: ’Yu abi leti. Go dan èn handri nanga tra sma na a srefi fasi.’

Yu no e feni en wan moi fasi fa Yesus e leri sma? Efu wi e arki san Yesus e taki na ini Bijbel, dan wi kan leri furu prenspari sani, a no so?

Lukas 10:25-37.



Aksi

  • San wan man e aksi Yesus, èn fu san ede?
  • San Yesus e gebroiki son tron te a e gi sma leri, èn san wi ben leri kaba fu a fasi fa den Dyu ben si den Samariasma?
  • San e pasa nanga wan Dyu di de na pasi fu go na Yeriko, soleki fa Yesus e fruteri na ini a tori?
  • San e pasa te wan Dyu priester nanga wan Leifisma e waka na a pasi dati?
  • Suma na a man na tapu a prenki di e yepi a Dyu di kisi mankeri?
  • Baka di Yesus kaba fruteri a tori, dan sortu aksi a e poti, èn sortu piki a man e gi?

Ete wan tu aksi