Go na content

Go na a tra menu

Go na table of contents

Yehovah Kotoigi

Sranantongo

Mi buku nanga Bijbel tori

Tori 94: A lobi pikin-nengre

Tori 94: A lobi pikin-nengre

LUKU fa Yesus brasa a pikin boi dya! Yu kan si taki Yesus lobi pikin-nengre trutru. Den man di tanapu drape na den apostel fu en. San Yesus e taigi den? Meki wi go luku.

Yesus nanga en apostel kon didyonsro fu wan langa waka. Den apostel ben krutu nanga makandra di den ben de na pasi e kon. Dati meki Yesus e aksi den, baka di den doro: ’Fu san unu ben e krutu di unu ben de a pasi?’ Te yu luku en bun, Yesus sabi san ben de a tori. Ma a e aksi disi fu si efu den apostel sa fruteri en.

Yesus nanga wan pikin

Den apostel no e piki, bika di den ben de na pasi den ben krutu nanga makandra suma fu den na a moro bigiwan. Wan tu apostel ben wani fu de moro prenspari leki den trawan. Fa Yesus sa sori den taki a no de yoisti fu wani de a moro bigiwan?

A e kari a pikin boi kon èn a e poti en na fesi den alamala. Dan a e taigi den disipel: ’Un arki bun! Efu unu no kenki èn tron leki yongu pikin, dan unu no sa kon noiti na Gado kownukondre. A moro bigiwan na ini a kownukondre na a sma di de leki a pikin disi.’ Yu sabi fu san ede Yesus ben taki disi?

We, pikin-nengre no e broko den ede fu de moro bigi, noso moro prenspari leki trawan. Dati meki den apostel musu leri fu de leki pikin-nengre, èn den no musu meki trobi fu suma de moro bigi noso prenspari.

Yesus ben sori na tra okasi tu omeni a lobi pikin-nengre. Wan tu mun na baka, wan tu sma e tyari den pikin fu den kon luku Yesus. Den apostel e pruberi fu seni den gowe. Ma Yesus e taigi den: ’Meki den pikin kon na mi. No tapu den, bika Gado kownukondre na fu sma di de leki den.’ Dan a e teki den pikin na ini en anu èn e blesi den. A no de wan moi sani fu sabi taki Yesus lobi pikin-nengre?

Mateyus 18:1-4; 19:13-15; Markus 9:33-37; 10:13-16.



Aksi

  • Fu sortu sani den apostel e krutu nanga makandra te den de na pasi e kon baka fu wan langa waka?
  • Fu san ede Yesus e kari wan yongu pikin kon èn e meki a tanapu na mindri den apostel?
  • Na sortu fasi den apostel musu leri fu de leki pikin-nengre?
  • Fa Yesus e sori wan tu mun baka dati taki a lobi pikin-nengre?

Ete wan tu aksi

Kon sabi moro

YESUS​—EN NA A PASI, EN NA SAN TRU, EN NA A LIBI

Yesus e sori fa Gado e si brokotrow èn a lobi pikin

Yesus abi wan heri tra denki fu pikin leki den disipel fu en. Fu san ede?