Go na content

Go na a tra menu

Go na table of contents

Yehovah Kotoigi

Sranantongo

Mi buku nanga Bijbel tori

Tori 93: Yesus e gi furu sma nyanyan

Tori 93: Yesus e gi furu sma nyanyan

WAN tumusi ogri sani pasa. Didyonsro den kiri Yohanes a Dopuman. Herodias, na uma fu a kownu, no ben lobi Yohanes srefisrefi. A ben man kisi a kownu so fara fu koti na ede fu Yohanes puru.

Te Yesus yere fu disi, a e sari tumusi. A e go na wan presi pe sma no e libi, fu a de en wawan. Ma den sma e waka kon na en baka. Te Yesus e si den ipi sma, dan a e firi sari gi den. Dati meki a e taki nanga den fu a Kownukondre fu Gado èn a e dresi den sikiwan.

Te neti e doro, dan den disipel e kon na en èn den e taki: ’A lati kaba èn wi de dya na wan presi pe sma no e libi. Seni den sma gowe, so taki den kan bai wan sani fu nyan na den pikin foto di de krosibei.’

Yesus e gi ipi sma nyanyan

’Den no abi fu gowe’ Yesus e piki. ’Na unu musu gi den wan sani fu nyan.’ Dan Yesus e aksi Filipus: ’Pe wi kan bai nofo nyanyan gi ala den sma disi?’

’A sa kostu bun furu moni èn toku ala sma sa kisi pikinso nomo’, Filipus e piki. Andreas e taki: ’A boi disi di e tyari a nyanyan fu wi, abi feifi brede nanga tu fisi, ma dati no nofo srefisrefi gi ala den sma.’

’Taigi den sma fu go sidon na tapu a grasi’, Yesus e taki. Dan a e taki Gado tangi fu a nyanyan èn a e bigin broko a brede nanga a fisi na pisipisi. Dan den disipel e prati a brede nanga a fisi gi ala den sma. Yu ben abi 5000 mansma nanga dusundusun umasma nanga pikin-nengre tu. Den alamala e nyan teleki den bere furu. Èn te den disipel e piki san tan abra, dan den man furu 12 baskita ete!

Now Yesus e meki en disipel go na wan boto fu koti a Se fu Galilea abra. Na netiten wan bigi winti e opo kon èn den skwala e slenger a boto go kon. Den disipel e frede srefisrefi. Dan na mindrineti den e si wan sma e waka na tapu a watra kon miti den. Den e bari fu frede ede, bika den no sabi san den e si.

’No frede’, Yesus e taki. ’Na mi!’ Toku den no man bribi ete. Fu dati ede Petrus e taki: ’Efu na yu trutru, Masra, taigi mi dan fu waka na tapu a watra kon na yu.’ Yesus e piki: ’Kon dan!’ Petrus e komoto na a boto èn e waka na tapu a watra! Dan a e frede èn e bigin saka go na ondro, ma Yesus e puru en.

Bakaten, Yesus e gi nyanyan baka na dusundusun sma. Disi leisi a abi seibi brede nanga wan tu pikin fisi. Èn agen nofo de gi ala sma. A no de wan moi sani fa Yesus e sorgu gi sma? Te a sa tiri leki Gado kownu, dan noiti moro wi sa abi fu broko wi ede fu wan sani!

Mateyus 14:1-32; 15:29-38; Yohanes 6:1-21.



Aksi

  • Sortu tumusi ogri sani pasa nanga Yohanes a Dopuman, èn fa Yesus e firi te a e yere dati?
  • Fa Yesus e gi nyanyan na den ipi sma di waka na en baka, èn omeni nyanyan e tan abra?
  • Fu san ede den disipel e frede na netiten, èn san e pasa nanga Petrus?
  • Fa Yesus e gi nyanyan na dusundusun sma fu a di fu tu tron?
  • Fu san ede a sa de wan tumusi moi sani te Yesus sa tiri grontapu leki a Kownu di Gado poti?

Ete wan tu aksi