Go na content

Go na a tra menu

Go na table of contents

Yehovah Kotoigi

Sranantongo

Mi buku nanga Bijbel tori

Tori 92: Yesus e wiki dedesma

Tori 92: Yesus e wiki dedesma

A YONGU umapikin di yu e si dya abi 12 yari. Yesus e hori en anu èn en papa nanga mama tanapu drape tu. Yu sabi fu san ede den de so koloku? Meki wi go luku.

Yesus e wiki opo a dede umapikin fu Yairus

A papa fu a yongu umapikin na wan prenspari man, di nen Yairus. Wan dei en umapikin e kon siki èn den e poti en na bedi. Ma a no e kon betre. A siki fu en e kon moro ogri nomo. Yairus nanga en uma e broko den ede srefisrefi, bika a gersi taki a yongu umapikin fu den o dede. En na a wan-enkri umapikin fu den. Fu dati ede Yairus e go suku Yesus. A yere fu den wondru di Yesus e du.

Te Yairus e feni Yesus, dan wan bigi ipi sma e tanapu lontu Yesus. Ma Yairus e pusu pasa na ipi sma èn a e fadon na den futu fu Yesus. ’Mi umapikin e siki tranga’, a e taki. ’Kon grantangi, èn meki a kon betre’, a e begi Yesus. Yesus e taki dati a sa kon.

Te den e waka go, dan na ipi sma e pusu kon moro krosibei na Yesus. Wantronso Yesus e tan tanapu. ’Suma fasi mi?’ a e aksi. Yesus ben firi taki krakti ben komoto na en, dati meki a sabi taki wan sma ben fasi en. Ma suma fasi en? Na wan uma di siki pasa marki 12 yari langa kaba. Na uma ben kon moro krosibei, a ben fasi den krosi fu Yesus èn a ben kon gosontu!

Disi e meki Yairus firi moro bun, bika a e si fa a de wan makriki sani gi Yesus fu dresi wan sma. Ma dan wan sma e tyari wan boskopu kon. ’No trobi Yesus moro langa’, a e taigi Yairus. ’Yu umapikin dede.’ Yesus e yere disi èn a e taigi Yairus: ’No broko yu ede. Ala sani o kon bun nanga a pikin.’

Te den doro te fu kaba na a oso fu Yairus, dan den sma e bari krei. Ma Yesus e taki: ’No krei. A pikin no dede. A e sribi nomo.’ Ma den e lafu èn e spotu Yesus bika den sabi taki a pikin dede.

Dan Yesus e go nanga a papa nanga mama fu a yongu umapikin nanga dri fu en apostel na ini a kamra pe a pikin didon. Yesus e teki na anu fu a pikin hori èn a e taki: ’Opo tanapu!’ Èn a pikin e kon na libi baka, soleki fa yu kan si dya. A e opo tanapu èn e waka lontu! Dati meki en papa nanga mama de so koloku pasa marki.

Disi a no a fosi sma di Yesus ben wiki opo na dede. A fosiwan di Bijbel e taki fu en na a manpikin fu wan weduwe fu a foto Nain. Bakaten Yesus e wiki opo Lasarus, a brada fu Maria nanga Marta, na dede tu. Te Yesus e tiri leki Gado kownu, dan a sa opo furu dedesma kon na libi baka. Wi kan breiti fu dati, a no so?

Lukas 8:40-56; 7:11-17; Yohanes 11:17-44.



Aksi

  • Suma na a papa fu a yongu umapikin na tapu a prenki, èn fu san ede en nanga en wefi e broko den ede srefisrefi?
  • San Yairus e du te a e feni Yesus?
  • San e pasa te Yesus e waka go na a oso fu Yairus, èn sortu boskopu Yairus e kisi te den de na pasi?
  • Fu san ede den sma na ini na oso fu Yairus e lafu Yesus?
  • Baka di Yesus teki den dri apostel èn a papa nanga a mama fu a yongu umapikin go na ini a kamra fu a yongu umapikin, dan san Yesus e du?
  • Sortu tra sma Yesus ben opo baka na dede, èn san disi e sori?

Ete wan tu aksi

Kon sabi moro

YESUS​—EN NA A PASI, EN NA SAN TRU, EN NA A LIBI

Yesus e gi wan meisje libi baka!

Den sma e lafu Yesus te a e taki dati a dede pikin e sribi. Den sma no sabi san a o du.

YESUS​—EN NA A PASI, EN NA SAN TRU, EN NA A LIBI

Yesus e gi wan yongu man wan opobaka

Den sma di si a wondru disi frustan san disi wani taki trutru

YESUS​—EN NA A PASI, EN NA SAN TRU, EN NA A LIBI

Lasarus e kisi wan opobaka

San na tu prenspari sani di meki taki srefi den gensman fu Yesus no man taki dati a wondru disi no tru?